Tag: termeti

Kryeministri Edi Rama mblodhi përsëri qeverinë në mbledhje të jashtëzakonshme për situatën pas tërmetit. Ai lajmëroi se të dielën do të mblidhet Komiteti Kombëtar i Rindërtimit, ndërsa paralajmëroi një konferencë informimi publik. Kjo konferencë do të shërbejë për qëllime informimi, ku njerëzit të kenë mundësi të evidentojnë dëmet nga tërmeti.

“Kemi grupe inspektorësh që kanë ardhur, grupe që po vijnë dhe është me shumë rëndësi të garantohet organizimi i plotë i punës. Këta ekspertë janë të përgatitur për këto situata. Unë i kam kërkuar të gjithëve dje dhe kemi filluar punë për të filluar sa më shpejt një konferencë informimi publike që të ekspozojnë fotografi, fakte nga puna e tyre me shpjegime teknike që njerëzit të dallojnë mes godinave të krisura dhe godinave të rrezikuara. Pamja e jashtme e godinave nuk është tregues i një situate të rrezikshme. Sot mblidhet Komiteti Kombëtar i Rindërtimit’, tha Rama.

Ai shtoi gjithashtu se sot do të aktivizohet fondi prej 10 milion lekësh. “Fondi prej 1 milion lekësh te reja do të aktivizohet sot. Reagimi i parterëve është inkurajues. Mos harroni se është edhe një familje në Kosovë që duhet kontaktuar dhe duhet marrë këtë fond. Fëmijët do marrin bursën prej 15 mijë lekësh që do ta kenë deri në fund të shkollës së tyre, gjimnaz apo dhe universitet. Sot mblidhet Komiteti Kombëtar i Rindërtimit dhe me rëndësi është organizimi i punës”, tha Rama.

Ndërkohë, shefi i qeverisë paralajmëroi se arsimi mund të pezullohet edhe për një javë. Ai tha se mësimi në shkolla duhet të kalojë në plan të dytë në këtë situatë. “Duhet që në këto ditë mësimi të kalojë në plan të dytë. Duhen organizuar biseda, lojëra, shtëtitje të përbashkëta. Do kemi kohë të rikuperojmë orët e mësimit dhe kjo është koha për të bërë sa më shumë në këtë aspekt. Çdo klasë në zonat e prekura ka nevojë për këtë asistencë njerëzore”, tha Rama

Tërmeti i fuqishëm që goditi vendin në 26 nëntor, shkatërroi edhe disa monumente kulture në vend. Kalaja e Krujës dhe ajo e Prezës, por dhe muret antike në Durrës, pësuan dëmtime të rënda nga lëkundjet sizmike. Ndërkohë, Ministria e Kulturës kreu një inspektim të këtyre monumenteve, duke konstatuar se ato janë të pavizitueshme nga turistët.

Ndaj, Ministria e Kulturës vendosi të ndalojë hyrjen në kalanë e Prezës dhe atë të Krujës. Sipas këtij institucioni, ky vendim është marrë për të siguruar jetën e qytetarëve dhe për të mos dëmtuar më shumë monumentet.

“Ministria e Kulturës dhe Drejtoria e Kulturës Kombëtare Tiranë, nuk janë përgjegjëse për çdo pasojë nga thyerja e këtij udhëzimi. Ruajeni jetën tuaj. Ju falenderojmë për mirëkuptimin.”, thuhet në njoftimin e ministrisë së Kulturës.

Tërmeti i fuqishëm që goditi vendin në 26 nëntor ka shkaktuar dëme materiale edhe në Urgjencën  e Spitalit të Durrësit. Ministrja Ogerta Manastirliu pa nga afër gjendjen e spitalit, dhe u shpreh për mediat se struktura nuk ka pësuar probleme. Sipas ministres shërbimi i urgjencës është riorganizuar nga hyrja kryesore e spitalit për të funksionuar me kapacitet të plotë.

“Është rionganizuar shërbimi i urgjencës nga hyrja kryesore e spitalit. Janë marrë të gjitha masat sipas protokolleve për të pritur çdo qytetar të lënduar dhe puna po vijon normalisht”, -tha Manastirliu. Ministrja tha se aktualisht në spitalin e Durrësit po trajtohen 22 të lënduar, ndërsa pjesa më e madhe e të lënduarve kanë lënë spitalin. Ministrja në një dalje të mëparshme së bashku me inxhinierin Agron Hysanbelliu tha se pas vlerësimit të godinës u vendos që spitali i Durrësit nuk ka dëme në strukturë dhe nuk përbën rrezik.

Që nga momenti i rënies së tërmetit të parë në spitalin e Durrësit janë trajtuar rreth 345 pacientë, të cilët kanë marrë shërbimin e nevojshëm mjekësor. “Prej mëngjesit të sotëm, jemi në spitalin e Durrësit për të organizuar punën, ku kujdesi shëndetësor për të plagosurit mos të mungojë. Instituti i Ndërtimit na konfirmoi se godina nuk ka dëmtime strukturore, por dëmtimet që janë shfaqur duhet të nisin një strukturim”.

“Ndaj vendosëm që të mbyllim një dhomë të urgjencës, atje ku ishte pritja e pacientëve. Bëmë spostimin dhe lëvizjen e pacientëve. Siguria është maksimale. Nuk ka pasur fluks qytetarësh të lënduar nga tërmeti. Ne jemi të përforcuar. Jemi në gatishmëri me ambulanca. Janë rreth 60 raste që kanë kërkuar ndihmë mjekësore, por janë raste të lehta. Një pjesë e kanë lënë spitalin, një pjesë kanë qëndruar siç e kërkon protokolli. Problematikat e sotme janë shoqëruar me shqetësimet e ankthit.”, -tha Manastirliu.

Tragjedia shkatërrimtare që la pas tërmeti, veç solidarizimit të pashembullt, po shfrytëzohet edhe nga dashakeqës. Shumë shoqata dhe organizata kanë hapur numra llogarie për të mbledhur fonde, që do të përdoren për të ndihmuar personat e prekur nga tërmeti. Megjithatë, këtë situatë e ka shfrytëzuar për qëllime përfitimi edhe një 30-vjeçar nga Lezha. Bëhet fjalë për shtetasin Arjan Meli, që kishte hapur një profil me emrin “Rilindje” në Facebook, ku kishte postuar një njoftim të Kryeministrit Edi Rama ku kërkonte ndihma financiare.

Por, numrat e llogarive bankare të vendosura në postim ishin numra personal të këtij shtetasi, duke bërë që paratë që qytetarët të binin preh e mashtrimit të këtij shtetasi, i cili do të përfitonte shumë financiare duke shfrytëzuar tërmetin. Policia e Shtetit, në bashkëpunim me strukturat e tjera të Inteligjencës Financiare dhe të sistemit bankar kanë marrë masa për bllokimin e kësaj llogarie.

“Policia e Shtetit dënon çdo fenomen abuzimi në këto momente kritike për të gjithë dhe ju informon se nëpërmjet strukturave të specializuara të saj, si dhe në bashkëpunim me agjencitë e tjera ligjzbatuese është duke punuar intensivisht për kontrollin, monitorimin e vazhdueshëm të situatës, zbulimin dhe goditjen e çdo rasti të abuzimeve me këtë situatë të fatkeqësisë natyrore.Ashtu siç është bërë e ditur vazhdimisht nga strukturat shtetërore, i vetmi kanal unik shtetëror për ofrimin e donacioneve apo ndihmave është nëpërmjet portalit e-albania/dhuro.

Policia e Shtetit, duke shprehur solidaritetin e plotë me të gjitha familjet e dëmtuara, mbetet e angazhuar maksimalisht, në misionin e saj në shërbim të qytetarëve. Për çdo denoncim apo sinjalizim të çfarëdolloj abuzimi apo shkeljeje të ligjit, telefononi në numrin 112”, tha në një deklaratë për shtyp zëvendësdrejtoresha e përgjithshme e Policisë së Shtetit, Aida Hajnaj.

Tërmeti shkaktoi dëme të mëdha edhe në fshatin Bubq në Fushë Krujë duke lënë në qiell të hapur 234 familje banesat e të cilëve janë shkatërruar. Ministria e Mbrojtjes ka dërguar 26 çadra për të strehuar më shumë se 1000 persona, por ende nuk janë ngritur nga Forcat e Armatosura, pasi nuk është përcaktuar ende zona ku do vendosen.

Banorët ndodhen në qiell të hapur që prej 26 nëntorit, pasi banesat e tyre janë bërë të pabanueshme. Fatmirësisht në këtë zonë nuk u shënuan viktima, por vetëm dëme materiale.

Tërmeti me magnitudë 6.4 i shkallës Rihter shkaktoi 47 viktima dhe mbi 750 të plagosur. Ekipet e kërkim shpëtimit janë ende duke punuar në rrënojat e zonës së Durrësit për trupat e bllokuar në to, ndërsa në Thumanë ka përfunduar procesi i kërkimit, pasi janë gjetur të gjithë personat që figuronin të zhdukur nga familjarët.

Tërmeti shkatërrimtar që goditi Shqipërinë ditën e djeshme ka prekur dhe lënduar shpirtrat e të gjithë shqiptarëve kudo që janë. Përveç nismës së shpallur nga Presidenti i Federatës Shqiptare të Futbollit, Armand Duka, për rindërtimin e tre shtëpive të shkatërruara, skuadra Kombëtare ka filluar fushatën për mbledhjen e fondeve për të dëmtuarit e kësaj fatkeqsie, për të ndihmuar sa më shumë familje, duke ju përgjigjur thirrjes së Presidentit Duka për një fushatë të gjerë ndihme kombëtare e ndërkombëtare.

Në rrjetet sociale të gjithë lojtarët kanë shpërndarë thirrjen e tyre, ku të gjithë shqiptarët mund të japin kontributin e tyre. “Ne, djemtë e ekipit Kombëtar shqiptar kemi ndërmarrë nismën për të kontribuar financiarisht për të prekurit nga tërmeti shkatërrimtar që goditi Shqipërinë. Ftojmë të gjithë shqiptarët kudo ku ndodhen të kontribuojnë në llogarinë e hapur nga grupi. Ne jemi një skuadër e pandarë dhe sëbashku do ti kalojmë këto momente të vështira për vendin tonë”, shkruajnë djemtë kuqezi në faqet e tyre, ku publikojnë dhe të dhënat ku secili mund të japë kontributin.

Ftojmë të gjithë shqiptarët kudo ku ndodhen të kontribuojnë në llogarinë bankare:

      Monedha: LEK

Union Bank     Sëift Code UNALALTR

IBAN: AL79214111060117141628020118

      Monedha: EUR

Union Bank     Sëift Code UNALALTR

IBAN: AL73214111060117141628020129

       Monedha: USD

Union Bank     Sëift Code UNALALTR

IBAN: AL67214111060117141628020140