“Njeriu e harron të keqen”, Rama viziton të mbijetuar e familjes Çupi

Kryeministri Edi Rama vizitoi pasditen e të premtes Aleks Çupin, i vetmi i mbijtuar i familjes Çupi në pallatin që u shemb në Thumanë. Aleksi, i cili pësoi dëmtime nga tërmeti, doli të premten nga spitali duke shkuar në shtëpinë e re që i është ofruar pas tërmetit të 26 nëntorit. Ai humbi babanë, nënën dhe vëllanë në Thumanë, pasi pallati ku jetonin u shemb nga tërmeti.

Vetë Aleksi, që ishte kthyer nga emigrimi për të bërë fejesën me vajzën që dashuronte, i shpëtoi për mrekulli tragjedisë. Kryeministri Edi Rama i shprehu ngushëllimet për familjarët që humbi në 26 nëntor, ndërsa u shpreh se “njeriu është bërë për të harruar të keqen”, duke inkurajuar të riun për të vijuar jetën.

BISEDA ME ALEKSIN

Rama: Ngushëllime për humbjet. Më e keqja kaloi??

Aleksi: Po, po kaloi.

Rama: Ku e ke shqetësimin?

Aleksi: Vetëm të këmba

Rama: Hajde ulu këto (i thotë një gruaje). Apo ke frikë nga unë?

Aleksi: Dhimbjen duhet ta kthejmë në forcë.

Rama: Shtëpia më duket e mirë

Aleksi: Po shumë mirë

Rama: Ta gëzoni dhe të keni vetëm momente të mira.

Ndërhyjnë familjarët: Ajo është e fejuara

Rama: E pash, e pash.

Rama: Faleminderit për fjalët e mira. Ne këto punë kemi. Në këto kushte është shumë e rëndë dhe gjendesh pranë diçkaje e që se pranon dot. Ajo çka mund të bësh është që të qash hallin që mund të qahet, se tjetër s’ke ça bën. Unë thash; brenda datës 15 dhjetor familjet që e kaluan më keq se të tjerat do të ishin në banesa. Do të çoj dhe atë Kristiano Ronaldon në shkollë, dhe jeta vazhdon. Pastaj janë gjithë ato shtëpi për të rindërtuar. Ata që humbën shtëpinë…e kanë më të lehtë se ata që humbën njerëzit. Njeriu është bërë që mund të harrojë të keqen. Kur përballesh me humbjen e njeriut thua; “ore i kam fal të gjitha. I fal të gjitha vetëm që mos të më ikë njeriu që kam”. Mirëpo njerëzit harrojnë, kështu është bërë kjo jetë.

Çadra për banorët e Thumanës, solidaritet me ndihma nga qytetarët

Disa çadra janë ngritur në Thumanë, ku do të strehohen provizorisht familjet të cilave iu shembën shtëpitë nga tërmeti i mëngjesit të së martës.

Gjithashtu, për banorët që do të strehohen në këto çadra janë dërguar edhe sasi të mëdha me ndihma ushqimore, të siguruara nga autoritetet por dhe nga sensibilizimi i madh i qytetarëve.

Çadrat janë ngritur në një zonë larg pallateve duke shmangur çdo rrezik të mundshëm për të kaluar natën.

Banorët do të kalojnë natën jashtë pasi dhjetëra banesa dhe pallate u shkatërruan nga tërmeti i të martës, që shkaktoi të paktën 21 të vdekur e mbi 600 persona të plagosur. Megjithatë, ky numër mund të ndryshojë pasi operacioni i kërkim-shpëtimit vijon ende.

Rama viziton Thumanën, familjarët kërkojnë shpëtimin e të afërmeve

Kryeministri Edi Rama, zëvëndësi i tij Erion Braçe dhe Ministri Sandër Lleshaj vizituan Thumanën, një nga zonat më të prekura nga tërmeti i të martës.

Drejtuesit e qeverisë kanë ndjekur nga afër operacionin e kërkim-shpëtimit të personave që kanë mbetur në rrënojat e pallateve të shembur.

Familjarë të këtyre personave, të dëshpëruar dhe me lot në sy, kanë kërkuar nxjerrjen sa më parë të afërmve të tyre.

Një grua mes lotësh kërkoi ndihmë që t`i shpëtojnë vëllain së bashku me bashkëshorten e tij, që ndodhen ende nën rrënoja, ndërsa nuk dihet nëse janë gjallë apo jo.

Aksident në Thumanë, 4 të plagosur në gjendje të rëndë

Një aksident i rëndë ka ndodhur mesditën e të hënës në Thumanë, ku si pasojë e përplasjes së dy mjeteve, janë plagosur rëndë katër persona. Mësohet se tre të nga të plagosurit kanë qenë duke udhëtuar në njërin prej mjeteve të aksidentuara, ndërsa tjetri është shoferi i makinës tjetër.

Të dëmtuarit janë dërguar me urgjencë drejt spitalit të Traumës në Tiranë, për të marrë ndihmë mjekësore. Përplasja e mjeteve ka qenë e fortë, pasi makinat janë dëmtuar rëndë.

Një prej mjeteve është përmbysur në rrugë, ndërsa mjeti tjetër ka përfunduar jashtë rruge. Policia ka shkuar në vendin e ngjarjes dhe ka nisur hetimet për të zbardhur shkaqet e aksidentit të rëndë.

Shpejtësia i merr jetën një të riu në Thumanë, tre të tjerë plagosen rëndë

Një aksident i rëndë rrugor ka ndodhur mbrëmjen e së shtunës në aksin rrugor Thumanë-Fushë Krujë, ku si pasojë ka humbur jetën një i ri, 18 vjeç. Ngjarja ka ndodhur rreth orës 20:00, teksa i riu, identiteti i të cilit jepet vetëm me inicialet A.K., 18 vjeç, ka qenë duke udhëtuar me një mjet në këtë aks rrugor bashkë me tre shokë të tij.

Në vendin e quajtur ish-Këneta, mjeti tip Volsëgen ka dalë jashtë rrugës në një kthesë të vështirë për shkak të shpejtësisë së lartë. Si pasojë, nga aksidenti ka humbur jetën i riu, i cili nuk dihet ende nëse ka qenë drejtues i mjetit apo jo.

Ndërkohë, tre të rinj të tjerë, për të cilët jepen gjithashtu inicialet, A.N., , U.L., A.M., dhe A.L., të tre të moshës 18 vjeç, janë plagosur rëndë dhe janë dërguar në Spitalin Ushtarak për të marrë mjekim.

Paraprakisht grupi hetimor është shprehur se mjeti me të clin po udhëtonin katër të rinjtë, ka qenë me shpejtësi të madhe. Për shkak të saj, mjeti ka përfunduar jashtë rrugës duke u përplasur me një objekt në ndërtim e sipër.