Katër makina luksoze janë përplasur më njëra-tjetrën në një efekt zinxhir në autostradën Tiranë-Durrës. Aksidenti ka ndodhur në afërsi të Sukthit, ndërsa nuk ka persona të plagosur.
Makinat kanë pësuar vetëm dëme materiale , ndërsa fortat e policisë janë paraqitur në vendngjarje për të zbardhuar shkakun e aksidentit.
Si pasojë e aksidentit për disa minuta është shkaktuar trafik i rënduar në autostradë.
Një 28-vjeçar është arrestuar në zonën e “Don Boskos” nën akuzën e vjedhjes. Arrestimi i tij u bë gjatë operacionit të koduar “Çiklisti”, ndërsa policia ka mundur të faktojë të paktën 7 vjedhje të kryera nga ai.
28-vjeçari nga Durrësi kryente vjedhje biçikletash në Tiranë. Në momentin e ndalimit në rrugën “ Don Bosko”, policia i gjeti këtij shtetasi 4 biçikleta të vjedhura, si dhe sendet që përdorte për kryerjen e vjedhjeve, konkretisht: thikë, kaçavidë, çelësa të vegjël biçikletash, pinca, kapele për maskim etj.
Në vijim të hetimeve, bazuar në prova të grumbulluara dhe pamje filmike dyshohet se ky shtetas është autor edhe i 3 vjedhjeve të tjera biçikletash, të ndodhura gjatë muajve mars-prill të këtij viti në Tiranë.
Po vijon puna në bashkëpunim me komisariatet e tjera të Policisë në varësi të DVP Tiranë, për dokumentimin e vjedhjeve të tjera të biçikletave të ndodhura në Tiranë pasi dyshohet se ky shtetas ka kryer edhe vjedhje të tjera të biçikletave duke ua shitur personave të rastësishëm në shuma më të vogla nga vlera e tyre reale.
Gjithashtu u procedua në gjendje të lirë dhe shtetasi E.Gj.,41 vjeç banues në Tiranë për veprën penale “Përvetësim i sendeve të vjedhura”.
Materialet procedurale do t’i referohen Prokurorisë pranë Gjykatës së Shkallës Parë Tiranë për veprime të mëtejshme.
Policia e Tiranës ka vënë në pranga inxhinierin e firmës private, ku ndodhi shpërthimi i transformatorit në autostradën Tiranë-Durrës. Personi i arrestuar ishte përgjegjës për sigurimin e mbrojtjes në punë, dhe për shkak të mungesës së saj humbi jetën një person dhe u plagosën dy të tjerë.
Policia ka bërë arrestimin shtetasit R.D., 36 vjeç, nën akuzën e “Shkeljes së rregullave të mbrojtjes në punë”, i cili ka pasur rolin e inxhinierit në firmën private.
Ngjarja ndodhi të enjten në autostradën Tiranë-Durrës, ku viktimë mbeti punëtori Gjergji Sula dhe u plagosën Fari Çollaku dhe Andi Bojni , të cilët ndodhen në gjendje të rëndë në QSUT.
Dy persona janë arrestuar në Tiranë, pasi kanë tentuar të korruptojnë policinë rrugore. Në pranga janë vendosur shtetasit H. K., 43 vjeç dhe K. C., 24 vjeç, të cilët për t’i shpëtuar masës disiplinore nga policia kanë tentuar t’i japin një shumë parash.
43-vjeçari është ndaluar me mjetin e tij në rrugën “Jordan Misja’, pasi po drejtonte mjetin pa vendosur rripin e sigurisë, dhe gjatë kontrollit policor, me qëllim shmangien e penalizimit, i ka ofruar agjentit verifikues një shumë parash. E njëjta situatë u paraqit edhe në sheshin “Karl Topia”, ku 24 vjeçari, i cili drejtonte mjetin pa vendosur rripin e sigurisë dhe nuk kishte regjistruar ndryshimet e pronësisë në afat, për të shmangur penalizimin i ka ofruar efektivit të policisë një shumë parash.
Të dy të arrestuarit pritet të përballen për veprën penale “Korrupsioni aktiv ndaj personave që ushtrojnë funksione publike”.
Një 34-vjeçar është proceduar penalisht në gjendje të lirë për veprën penale “Organizimi i lotarive të palejuara”. Gjatë kontrollit të ushtruar në lokalin në administrim të 34-vjeçarit në Rrugën e Dibrës u gjetën 4 automatë elektronikë që shërbenin për të ushtruar veprimtarinë e lojërave të fatit, të cilat u sekuestruan në cilësinë e provës materiale.
Policia e Tiranës sekuestroi në cilësinë e provës materiale 4 automate elektronikë të lojërave të fatit, ndërsa nisi procedimi penal në gjendje të lirë për shtetasin R.H., 34 vjeç, banues në Tiranë.
Arrestohet një person, i cili ishte shpallur në krim për trafikim të lëndëve narkotike. 39-vjeçari me iniciale E.G., isha shpallur në kërkim pasi akuzohet se ka mbjellë bimë narkotike në zonën në vendin e quajtur “Përroi i Bllomes”, në pyllin e fshatit Mënik.
Arrestimi i tij përmbyll me sukses operacionin e koduar ‘Lugina 2’, e zhvilluar më 12 korrik dhe çoi në arrestimin edhe të dy shtetasve të tjerë dhe sekuestrimin e 60 bimëve kanabis sativa.
Materialet në ngarkim të tij iu kaluan Prokurorisë së Rrethit Gjyqësor Tiranë, për veprën penale “Kultivimi i bimëve narkotike”.
Një 36-vjeçar arrestohet pasi kapet duke lëvizur në kryeqytet me armë zjarri pistoletë dhe krehër me fishek luftarak. Policia e Tiranës arrestoi të riun, pas informacioneve të marra në rrugë operative se një shtetas qarkullonte me armë zjarri me vete në rrugën “Kastriotët”. Arma u gjet në çantat e dorës që mbante me vete.
Policia ka bërë të mundur arrestimin në flagrancë të 36-vjeçarin nga Kruja, ndërsa ka proceduar në gjendje të lirë mikun e tij që e shoqëronte, shtetasin E. M.,34 vjeç banues në Laç për veprën penale “Moskallëzim krimi”
36-vjeçari do të gjykohet për veprën penale “Prodhimi dhe mbajtja pa leje e armëve luftarake dhe municionit”, nisa arma iu kalua prokurorisë Tiranë për veprime të mëtejshme hetimore.
Dikur simboli i një regjimi totalitar shtypës, godinës që i ngjan një piramide në qendër të kryeqytetit shqiptar, Tiranë, është duke iu dhënë një jetë e re si qendër e teknologjisë, shkruan ZDNet, faqja e njohur amerikane e informimit për teknologjinë e biznesit, që botohet nga CBS Interactive dhe ka të paktën 36 milionë klikime në muaj.
“Historia e Piramidës së Tiranës fillon në vitin 1980 kur godina u dizajnua për të kujtuar jetën e diktatorit shqiptar, Enver Hoxha. Lideri komunist drejtoi vendin nga viti 1944 deri në vdekjen e tij në vitin 1985 duke futur vendin në një izolim të thellë nga pjesa tjetër e botës.
Shumë shpejt, pas vdekjes së tij, një grup arkitektësh, të drejtuar nga vajza e Hoxhës, Pranvera dhe bashkëshorti i saj Klement Kolaneci, dizajnuan strukturën e Piramidës.
Godina u hap në vitin 1988 si muzeu ”Enver Hoxha”. Në atë kohë përshkruhej si struktura më e shtrenjtë e ndërtuar ndonjëherë në Shqipëri.
Megjithatë, qëllimi i saj për të nderuar diktatorin e Shqipërisë pati një jetë të shkurtër. Pas rënies së komunizmit në Shqipëri në vitin 1991, Piramida u shndërrua në një qendër kulturore duke nderuar Pjetër Arbnorin, një i mbijetuar nga kampet shqiptare dhe viktimë e regjimit.
Gjatë viteve ’90, Piramida u bë gjithashtu pika më e nxehtë në Tiranë për jetën e natës dhe një vend ku të rinjtë shqiptarë mblidheshin dhe luanin gjatë verës.
”Ajo është një godinë ikonike në Tiranë, që më kujton fëmijërinë. Ngjiteshim dhe luanim atje”, thotë Oliana Sula, studiuese në universitetin ”Aleksandër Moisiu” në Durrës.
”Dikur atje kishte disa klube nate gjithashtu, veçanërisht kur isha adoleshente. Ekziston një farë nostalgjie për këtë godinë dhe kjo nuk vjen domosdoshmërish për shkak të qëllimeve të saj origjinale”, vazhdon ajo.
Në vitin 2011, qeveria shqiptare, që në atë kohë drejtohej nga ish-kryeministri Sali Berisha, donte ta shkatërronte godinën dhe të ngrinte godinën e re të Parlamentit.
Megjithatë, plani i Berishës dështoi në vitin 2013, kur nuk mori miratimin nga qeveria e re, e drejtuar nga kryeministri aktual Edi Rama.
Gjatë 11 viteve si kryebashkiak i Tiranës, Rama, që ka gjithashtu një formim në arte, rigjallëroi fasadat e qytet me punime artistike dhe duke pikturuar godinat gri të epokës komuniste.
Tani, Rama dhe kryebashkiaku aktual i Tiranës, Erion Veliaj, janë mbështetësit kryesorë të transformimit të Piramidës, që do të shndërrohet në një qendër të teknologjisë dixhitale dhe informatikës.
Projekti zbatohet nga kompania me seli në Holandë, MVRDV, që parashikon të përfundojë transformimin e ndërtesës këtë vit.
“Projekti ka për qëllim t’ia kthejë ndërtesën publikut. Kati i parë është hapur në të gjitha anët duke ftuar publikun të marrë pjesë në programet e tij të ndryshme arsimore”, thotë kompania në përshkrimin për projektin.
Me funksionin e saj të ri, Piramida gjithashtu mishëron tranzicionin që shoqëria shqiptare ka kaluar që nga rënia e komunizmit. Me zhvillimin e teknologjisë së informacionit dhe arsimit në këtë fushë autoritetet shqiptare janë fokusuar në zhvillimin e vërtetë ekonomik dhe social.
“Ndoshta Piramida është një simbol i tranzicionit. Fillimisht, ajo lartësoi një diktator, më pas u shndërrua në një vend për aktivitete gjatë kohës së lire. Tani, po ecim drejt zhvillimit real, ekonomik dhe social”, thotë Sula.
Piramida gjithashtu do të ketë një qendër për teknologjitë krijuese (TUMO), e cila do të ofrojë një lloj të ri të arsimit falas për rininë shqiptare bazuar në teknologjinë dhe dizajnin.
Sipas TUMO-s, një qendër edukative për median dixhitale me qendër në Armeni, dega e saj në Tiranë synon të ofrojë për mijëra fëmijë shqiptarë kurse dhe leksione në fusha të ndryshme digjitale, si zhvillimi i lojërave dhe web design.
Policia e Tiranës ka arrestuar një shtetas, pronar i një lokali në Tiranë, të cilin e kishte përshtatur si bazë të shpërndarjes së kokainës. Sipas një njoftimi të policisë, mësohet se gjatë operacionit “Befasia” është arrestuar një shtetas, emri i të cilit jepet me inicialet R.P., 44 vjeç në Tiranë.
Ky shtetas, sipas policisë, në rrugën “Merdar Shtylla”, një biznes i llojit ‘bar’, ky shtetas ofronte lëndë narkotike të llojit kokainë për persona të ndryshëm që frekuentonin ambientet e këtij barai.
Sipas njoftimit të policisë, mësohet se gjatë kontrolleve të forcave të policisë, është gjetur dhe sekuestruar një qese me lëndë narkotike e dyshuar Kokainë. Gjithashtu, në një prej tavolinave të këtij bari, është gjetur dhe një qese tjetër me Kokainë, dhe një fishek luftarak.
Pas gjetjes së këtyre provave, policia ka arrestuar pronarin e lokalit me akuzën për veprën penale të “Prodhim dhe shitje e lëndëve narkotike”, “Përshtatje e lokalit për përdorim droge”, dhe “Prodhimi dhe mbajtja pa leje e municionit luftarak”.
Gjithashtu, në gjendje të lirë, policia ka nisur edhe procedimin penal për dy punonjës të këtij lokali, për moskallëzim krimi. Në cilësinë e provës materiale u sekuestruan 13.4 gramë kokainë, 4 aparate celulare dhe një fishek luftarak. Materialet proceduriale do t’i kalojne Prokurorisë pranë Gjykates së Shkallës së Parë Tiranë, për veprime të mëtejshme hetimore.
Policia e Tiranës ka vënë në pranga 18-vjeçarin F.H banues në Tiranë, pasi ka aksidentuar një të mitur.
Arrestimi i tij u bë pasi, në rrugën “Dedë Gjo Luli” duke drejtuar mjetin tip “Audi” ka aksidentuar shtetasin e mitur R. M.,14 vjeç banues në Tiranë, i cili ndodhet në spital në gjendje të rëndë shëndetësore.
Policia bën të ditur se 18 vjeçari, drejtues i automjetit ka shkelur rregullat e qarkullimit rrugor duke ecur me shpejtësi tej normave të lejuara.