Dështon mbledhja e KQZ-së. Digjen afatet për 13 tetorin

Ka dështuar Komisioni Qëndror Zgjedhor për të zhvilluar një mbledhje ditën e shtunë ku do të shqyrtohej kërkesa e aleatëve të PD-së, për nisjen e përgatitjeve për zhvillimin e zgjedhjeve në datën 13 tetor, datë e dekretuar nga presidenti Meta.

Shkak është bërë mungesa e anëtarëve të PS-së në Komisionin Qëndror Zgjedhor të cilët janë me leje vjetore. I pranishëm në mbledhje ishte vetëm kryetari Klement Zguri, i cili e mbylli mbledhjen për shkak të mungesës së kuorumit, pa të cilin nuk merret dot asnjë vendim.

Kujtojmë se dështimi i kësaj mbledhje djeg dhe afatet ligjore për zhvillimin e zgjedhjeve të 13 tetorit, pasi bazuar në Kodin Zgjedhor subjektet politike duhet të regjistrohen për zgjedhje 70 ditë përpara datës së tyre, afat i cili mbaron më 4 gusht (nesër).

Përfaqësuesi i LSI-së, Muharrem Caka akuzoi se mungesa është e qëllimtë dhe politike. Ai tha se LSI-ja ditën e hënë do të sjellë kërkesën për regjistrimin në zgjedhjet lokale të 13 tetorit.

“Dekreti i Presidentit është në fuqi dhe ne do të respektojmë parashikimet. Do të sjellim të hënën kërkesën për regjistrimin në zgjedhje. Kodi parashikon që KQZ-ja ka detyrimin të nisë procedurat dhe së pari duhet të merrte parasysh kërkesën. Në Kolegj? Do të ndjekim të gjitha hapat. Prevalon Kushtetuta mbi lejen e tyre vjetore“,- tha përfaqësuesi i LSI-së, Muharrem Caka.

Të premten tre aleatët e Partisë Demokratike, LSI, PAA dhe PR, i dërguan zyrtarisht një kërkesë KQZ përmes të cilës kërkojnë që të shqyrtohet dekreti i presidentit për zhvillimin e zgjedhjeve më 13 tetor. Kërkesa është firmosur nga Fatmir Mediu, Agron Duka dhe nga Sekretari i Përgjithshëm i LSI, Endrit Braimllari, duke treguar kështu qëndrimin kundër që këto forca politike kanë me kreun e PD, Lulzim Basha i cili ka deklaruar se nuk hyn në zgjedhje pa largimin e Edi Ramës dhe është tërhequr nga data 13 tetor.

Anëtari i KQZ-së, Bledar Skënderi ka deklaruar më herët se me datë 13 tetor nuk ka zgjedhje dhe se për këtë institucion është zyrtarisht ditë pushimi. Skënderi ka deklaruar se nëse 13 tetori do të ishte një datë normale zgjedhjesh, puna duhet të kishte gjashtë muaj më parë, gjë e cila nuk ka ndodhur, pasi 30 qershori është “kapitull” i mbyllur për KQZ-në, ndërsa sipas Kodit Zgjedhor subjektet politike duhet të regjistrohen për zgjedhje 70 ditë përpara, afat i cili mbaron më 4 gusht.

Kolegji Zgjedhor është shprehur për dekretin e parë të presidentit, atë për anulimin e 30 qershorit duke e cilësuar atë nul për shkak se vendimi është marrë përtej afateve kushtetuese dhe përtej kompetencave që kushtetuta i njeh presidentit, argumente këto që vlejnë njëlloj edhe për dekretin e datës 13 tetor.

KQZ miraton rezultatin. Zguri voton kundër. 30 qershori tani në dorën e Kolegjit Zgjedhor

Gati një muaj pas zhvillimit të zgjedhjeve të 30 qershorit, Komisioni Qëndror Zgjedhor ka shpallur të shtunën rezultatin përfundimtar të zgjedhjeve duke certifikuar kryebashkiakët fitues dhe duke i hapur rrugën nisjes së mandatit të tyre në 10 gusht.

Rezultati u miratua me 4 vota pro dhe 1 kundër që është ajo e kryetarit të KQZ-së, Klement Zguri. Gjatë gjithë kësaj kohe Zguri ka votuar kundër çdo vendimi të marrë nga KQZ duke i qëndruar deri në fund besnik partisë që e ka propozuar në atë post, PD-së, pavarësisht se në bazë të ligjit anëtari i KQZ kur merr detyrën nuk mban anë partiake.

Më këtë vendim vuloset 30 qershori dhe përfundon saga e zgjedhjeve; ndërkohë që PD-së përveç votës kundër të Zgurit nuk i mbetet asgjë të tjetër, ndëkohë që i bie edhe slogani që zgjedhjet janë nul.

Zëvendës kryetari i KQZ-së Denar Biba tha se më 30 qershor shqiptarët vendosën mes pazareve dhe kushtetutës.

“Shqipëria zgjodhi mes kushtetutës dhe pazareve. Kushtetuta iu mbivendos pazareve të vogla. Në këto zgjedhje ndoshta më shumë se asnjëherë tjetër edhe personalisht kam ndjerë mbështetjen e partnerëve perëndimorë që e mbështetën Shqipërisë në këtë rrugëtim ku kryesorja është ndërtimi i shtetit”, tha Biba.

Ndërsa kryetari i KQZ-së Zguri tha se vota e tij kundër është për shkak të performancës së dobët të KQZ-së në zgjedhje.

“Zgjedhjet nuk janë vetëm një moment ligjor por edhe një ngjarje politike. Brenda zgjedhjeve përfshihen të gjithë zhvillimet. Është një formalitet pasi vendimi i sotëm është shoqëruar paraprakisht me një sërë aktesh të tjera. këto zgjedhje janë shoqëruar nga një konflikt i madh politik. Besoj se konflikti do të vazhdojë edhe pas. Por ky nuk është problemi im. Problemi im është se me votën, kjo merr një rëndësi tjetër. Vota nuk kthehet thjesht formale. Problemi im është se përmes votës sonë kemi dhënë edhe një notë për sjelljen e KQZ. KQZ në këtë proces zgjedhor ndërmjet standardit ligjor dhe arbitraritetit, për fat të keq KQZ ka zgjedhur të dytën. Vota për këtë proces mbetet në dorë të KQZ. E kam të pamundur të jap një notë kaluese. Unë do të votoj kundër sepse unë dua që kjo përformancë të mos kthehet në standard pune në të ardhmen. Unë nuk bija dakord me shumicën dhe shpresoj që kolegët e mi t’i thërrasin vetëdijes ligjore”, tha Zguri.

Pas vendimit këtij vendimi të KQZ-së, tani rezultati i 30 qershorit është në dorën e Kolegjit Zgjedhor që i vë vulën përfundimtare procesit të shumë debatuar zgjedhor.

Zguri distancohet nga shifrat e KQZ: Nuk janë zyrtare, janë paraprake

Klement Zguri për të disatën herë gjatë këtij procesi zgjedhor mohon njoftimet e Komisionit Qëndror Zgjedhor, institucion të cilin ai e drejton.

Pasi zëdhënësja e KQZ-së, njoftoi se deri pak para mesditës pjesëmarrja në votime është 12%, kreu i KQZ, Zguri tha për mediat se shifrat për pjesëmarrjen në votime të bëra publike nga KQZ nuk janë zyrtare dhe nuk janë të besueshme.

Sipas Zgurit këto shifra kanë ardhur përmes komunikimeve telefonike me KZAZ (kjo gjë ka ndodhur edhe në proceset e kaluara zgjedhore).

“Nuk është shifër zyrtare e konfirmuar nga KQZ. Kjo shifër ka ardhur përmes komunikimeve telefonike me KZAZ dhe KZAZ i kanë marrë këto përmes komunikimeve me sekretaret e qendrave të votimit. Këto shifra minimalisht janë të pa besueshme pa u konfirmuar nga KQZ. Nuk janë zyrtare, janë paraprake sepse vijnë përmes komunikimit telefonik”, tha Zguri.

Në shumë votime të KQZ, Zguri nuk ka marrë pjesë, ose ka votuar kundër. Ai gjithashtu ka braktisur mbledhjen e KQZ kur u diskutua dekreti i Metës që anulonte zgjedhjet e 30 qershorit (i cilësuar nul).

Zguri i KQZ është kundër zgjedhjeve, por pas reklamave, voton dhe për vëzhguesit e OSBE-së

Klement Zguri është përfaqësuesi i PD-së në Komisionin Qëndror Zgjedhor dhe megjithëse mban postin e kryetarit, ka deklaruar se eshte kundër zhvillimit të zgjedhjeve në 30 qershor. Megjithatë në mbledhjen e së premtes të KQZ-së ai ka votuar pro vëzhguesve të OSBE-së që do të vijnë në Shqipëri për të monitoruar mbarëvajtjen e procesit, ashtu sikurse ndodh në çdo zgjedhje.

Në dy mbledhjet e fundit që janë zhvilluar kryetari i KQZ-së, Klement Zguri është larguar në mënyrë demonstrative duke kërkuar zbatimin e dekretit të Presidentit, por ne mbledhjen e te premtes, ai veproi ndryshe duke drejtuar mbledhjen. Në rendin e ditës ishin disa pika për miratim nga vëzhguesit afatshkurtër të OSBE/ODIHR, gazetarëve dhe operatorëve të televizioneve, por edhe disa anëtarëve të KZAZ- ve.

Kryetari i KQZ-së votoi pro rendit të ditës vetëm për pikën e miratimit të 150 vëzhguesve të OSBE/ODIHR, ndërsa për të tjerat kundër. Zguri theksoi se qëndrimin e tij për dekretin e ka bërë publik, pra që është kundër, por shtoi se institucionet nuk po i binden. “E kam bërë qëndrimin tim publik për dekretin e Presidentit. Nuk ka asnjë përpjekje nga asnjë institucion për të bërë një lexim të dekretit. Unë personalisht jam kundër vendimmarrjeve të KQZ-së. Vetëm për vëzhguesit do të votoj për të çdo vendimmarrje tjetër jam kundër”, tha Zguri.

Megjithatë Zguri ka firmosur edhe fondin e parave per reklamen e zgjedhjeve. Duke ja dhene shumicen gazetave që sot bëjnë thirrje për lufte dhe për prishje te zgjedhjeve në 30 qershor.