Sekretari i Përgjithshëm i Partisë Socialiste, Taulant Balla i dorëzoi çelësat e shtëpisë së re familjes së Petrit Vrapit në fshatin Papër të Elbasanit. Familja Vrapi u godit dy herë nga fatkeqësitë natyrore. Së pari, shtëpia e Petrit Vrapit dhe familjes së tij u dëmtua nga rrëshqitjet e tokës dhe më pas nga tërmeti. Shtëpia u bë tërësisht e pabanueshme, ndërsa anëtarët e kësaj familje u strehuan në një çadër pranë shtëpisë së vjetër.
Pak javë më parë, familja Vrapi pati një vizitë nga deputeti socialist i qarkut të Elbasanit Taulant Balla, i cili së bashku me biznesmenë të këtij qarku u angazhuan të rindërtonin shtëpinë e familjes Vrapi. Balla shprehet se i premtoi kësaj familje se ata do të futeshin në shtëpi të re para festave të fundvitit. Këtë 22 dhjetor, Balla shkoi përsëri në familjen Vrapi në Papër duke i dhënë çelsat e shtëpisë së re kryefamiljarit të familjes Vrapi.
“Shtëpia e Petrit Vrapit në Papër u godit edhe nga rrëshqitjet e tokës edhe nga tërmeti. Ajo u bë tërësisht e pabanueshme. Për emergjencë familja u strehua në një çadër pranë shtëpisë së vjetër. Ju premtova se festat e fundvitit do t’i gëzojnë në shtëpi të re. Dhe jam shumë i gëzuar që arrita t’ia dorëzoj çelësat zonjës së shtëpisë në këtë vigjilje Krishtlindje. Gjithashtu të katër anëtarët e familjes marrin trajtim të posaçëm me pension dhe kujdes social”, shkruan Balla në një reagim.
