Ditët e djeshme një lajm tronditës qarkulloi në mediat e të gjithë botës, ku thuhej se një fëmijë mund të ishte rigjetur pas 7 vitesh i humbur.
Personi i shfaqur si një 14 vjeçar iu drejtua policisë me historinë se ishte fëmija Timmothy Pitzen dhe prej 7 vitesh ai ishte rrëmbyer e torturuar nga dy persona.
Mirëpo pas analizave të ADN-së dhe verifikimeve të policisë u vërtetua që në fakt “14 vjeçari” ishte 24 vjeçari Brian Michael Rini, një person me rekorde kriminale dhe histori të gjatë të mashtrimit të policisë.
24 vjeçari ka një histori të gjatë kriminale duke përfshirë akuza për vjedhje, vandalizëm dhe duke i dhënë informacione mashtruese policisë. Ai është liruar nga një burg në Ohio për vjedhje, vetëm pak javë më parë, para se të shpikte historinë e tij të re të pretendimit se ishte Timmothy i vogël.
Familjarët e fëmijës u shfaqën të shkatërruar nga ky lajm pasi patën shpresa se më në fund gjetën Timmothin e vogël, që tashmë do të festonte ditëlindjen e tij të 14-të.
“Është shkatërruese. Është sikur të ripërtërihemi brenda një dite dhe ditën tjetër të vuajmë të njëjtën dhimbje si në fillim. Babai i Timmothy-t po shkatërrohet edhe një herë.”- kanë thënë familjarët.
Timmothy u zhduk më 11 maj 2011, pasi u mor nga shkolla nga e ëma. Mirëpo ajo u gjet disa ditë më vonë në një dhomë moteli ku kishte bërë vetëvrasje dhe kishte lënë një shënim duke thënë se djali ishte i sigurt por nuk do të gjendej asnjëherë.