Nxjerrja nga burgu i Dritan Dajtit për një vizitë mjekësore në zonën e Bllokut në Tiranë, ka shkaktuar një furtunë shkarkimesh në burgje me vendim të Ministrisë së Drejtësisë për shkelje të rëndë nga ana e tyre. Një vizitë te dentisti i Dritan Dajtit i ka kushtuar postin drejtorit të Policisë së Burgjeve Bardhyl Kaçorri, drejtorit të IEVP-së Peqin, Emin Shpata si dhe shefit të Forcave Operacionale në Drejtorinë e Përgjithshme të Burgjeve, Ferit Mici, të akuzuar për shkelje të rënda. Gjithashtu është shkarkuar nga puna mjeku i burgut të Peqinit, Andi Andoni, ndërsa janë paralajmëruar mjekja e DPB, Ermira Qirinxhi si dhe inspektori i IEVP Peqin, Mefat Shehu.
Në vendimin e marrë nga Ministria e Drejtësisë thuhet se strukturat drejtuese dhe të kujdesit shëndetësor në burgun e Peqinit si dhe strukturat shëndetësore e policore në Drejtorinë e Përgjithshme të Burgjeve nuk kanë ndjekur procedurat ligjore dhe rregulloret e brendshme për vlerësimin e kërkesës së të dënuarit për kontrolle mjekësore jashtë institucionit të burgjeve.
Duke qenë se stafi nuk ka kryer asnjë proces vlerësimi të kërkesës dhe nuk është kryer procesi i vlerësimit të riskut dhe mundësinë e kryerjes së vizitave mjekësore pranë strukturave shëndetësore publike, “është konkluduar qartazi se në lidhje me rastin e Dritan Dajtit ka shkelje flagrante me ligjin.”
“Nga hetimi është konkluduar se është shkelur neni 33 i ligjit “Për të drejtat dhe trajtimin e të dënuarve me burgim dhe të paraburgosurve”, dhe i nenit 106 të rregullores së përgjithshme të burgjeve parashikohet se të paraburgosurit dhe të dënuarit mund të kërkojnë që të vizitohen, me shpenzimet e tyre, nga një mjek i zgjedhur nga ata. Por kjo kërkesë vlerësohet nga strukturat përkatëse duke vlerësuar mundësitë për marrjen e trajtimit të specializuar të të dënuarit nga spitali i burgjeve dhe organet shtetërore përkatëse të shëndetësisë.
Pavarësisht mundësisë së marrjes së këtij shërbimi në organet shtetërore përkatëse të shëndetësisë duke përfshirë spitalet publike, asnjë nga strukturat përgjegjëse nuk e ka vlerësuar dhe konsideruar kontrollin mjekësor në strukturat publike shëndetësore, por është dhënë aprovimi për kontrollin mjekësor në një klinikë private okulistike”, thuhet në urdhrin e Ministrisë së Drejtësisë.
Dritan Dajti u dënua me burgim të përjetshëm nga Gjykata e Shkallës së Parë me akuzën e vrasjes në rrethana cilësuese të 4 oficerëve të policisë, Fatos Xhani, Sajmir Duçkollari, Altin Dizdari dhe Kastrit Feskaj gjatë një operacioni policor për kapjen e tij në vitin 2009. Por me vendimin e Apelit të tre gjyqtarëve që i pranuan gjykimin e shkurtuar, rrjedhimisht e shpëtuan atë nga burgimi i përjetshëm, dënimi u ul në 25 vjet heqje lirie.
