Vrau bashkatdhetarin në 2010 në Greqi dhe i fshehu trupin, kapet pas 14 vitesh Dritan Hoxha

AKTUALITET


Pas 14 vitesh në arrati, autoritetet shqiptare kanë vënë në pranga Dritan Hoxhën, i cili në vitin 2010 akuzohet se ka kryer vrasje në bashkëpunim në Larisa të Greqisë.

Ai u arrestua të mërkurën në Tepelenë, ndërsa tashmë do të përballet me drejtësinë për vrasjen e Andon Veshaj.

Sipas dosjes, Dritan Hoxha në bashkëpunim me Besim Besimaj (arrestuar në Greqi) e kanë goditur dhe dhunuar fizikisht Veshajn,  por për shkak të plagëve, ai humbi jetën.

Pasi e dhunuan dhe e goditën fizikisht Veshajn, dy të dyshuarit, e kanë futur trupin e viktimës në mjetin e tij dhe e kanë lëvizur atë në një vend tjetër, të pabanuar.

Trupi i pajetë i Veshajt u gjet nga autoritetet policore greke, më 18 maj të vitit 2010, një ditë pas krimit të rëndë.

Njoftimi i policisë: 

Vrau në shtetin grek në vitin 2010, zbulohet dhe arrestohet autori. Finalizohet operacioni policor i koduar “Identikit”. Falë inteligjencës policore, shërbimet e Seksionit për Hetimin e Krimeve të Rënda ndaj Personit, në Drejtorinë Vendore Tiranë, nën drejtimin profesional të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, pas një pune të mirëfilltë hetimore disamujore kanë bërë të mundur dokumetimin e plotë ligjor, identifikimin dhe kapjen e një shtetasi, autor i dyshuar i një ngjarje të ndodhur në shtetin grek më datë 17.05.2010, ku është vrarë shtetasi shqiptar Andon Veshaj.

Nga tërësia e veprimeve të thelluara hetimore ka rezultuar se më datë 17.05.2010, në zonën e Larisës, Greqi, shtetasi Dritan Hoxha, në bashkëpunim me shtetasin shqiptar Besim Besimaj (arrestuar në shtetin grek), kanë ushtruar dhunë fizike ndaj shtetasit shqiptar Andon Veshaj i cili si pasojë e dëmtime të marra ka ndërruar jetë. Pas kryerjes së këtyre veprimeve, dy të dyshuarit, e kanë futur trupin e viktimës në mjetin e tij dhe e kanë lëvizur atë në një vend tjetër, të pabanuar, ku është gjetur nga autoritetet policore greke, ditën e nesërme, më datë 18.05.2010.

Në vitin 2017, nëpërmjet Ministrisë së Drejtësisë së Republikës së Shqipërisë, është përcjellë në Prokurorinë e Përgjithshme, kërkesa e Prokurorisë pranë Gjykatës së Apelit në Larisa, Greqi, si dhe dokumentacioni përkatës për ushtrimin e ndjekjes penale në Republikën e Shqipërisë në ngarkim të shtetasit Dritan Hoxha, i shpallur në kërkim nga autoritetet greke, në lidhje me këtë ngjarje.

Më datë 01.11.2022, Prokuroria pranë Gjykatës së Shkallës së Parë të Juridiksionit të Përgjithshëm Gjirokastër ka shpallur moskompetencën në lidhje me procedimin penal nr. 622 të vitit 2017, dhe kalimin e akteve në Prokurorinë pranë Gjykatës së Shkallës së Parë të Juridiksionit të Përgjithshëm Tiranë.

Në vlerësim të provave dhe fakteve të grumbulluar, Gjykata e Shkallës së Parë e Juridiksionit të Përgjithshëm Tiranë, me vendimin nr 1734 akti, datë 09.07.2024, ka vendosur caktimin e masës së sigurisë “Arrest në burg” në mungesë, ndaj personit nën hetim Dritan Hoxha, i dyshuar per kryerjen e veprës penale “Vrasja me paramendim”, kryer ne bashkëpunim, parashikuar nga nenet 78-25 të Kodit Penal.

Më datë 10.07.2024, shërbimet policore të Sektorit për Hetimin e Krimeve të Rënda, në bashkëpunim me ato të Forcës së Posaçme të Operacioneve Speciale dhe Kërkimin në DVP Tiranë, në fazën operacionale, në bashkëpunim dhe me shërbimet policore të Komisariatit të Policisë Tepelenë dhe DVP Gjirokastër, kanë bërë të mundur lokalizimin dhe kapjen e shtetasit Dritan Hoxha, në lagjen “Hoxhaj”, Levan, Tepelenë.



Skip to toolbar