Ndryshimi i masës së arrestit për Jamarbër Malltezin nuk do të përbënte lajm, nëse do të shikonim se Apeli i Gjykatës Speciale antikorrupsion, respekton disa standarde njësoj për të gjithë.
Mbajtja në paraburgim e një të akuzuari, si politikë penale, në Shqipëri është një tepërim. Ndëshkimi nga drejtësia nuk duhet të nënkuptojë posaçërisht vuajtjen fizike paraprakisht, përveç rasteve kur i pandehuri është në një pozitë të tillë që pengon hetimin apo kapet ne krim në flagrancë.
Dhe në këtë rast nuk më duket ndonjë dramë që Malltezi të hetohet jashtë burgut, apo në arrest shtëpie. Aq më tepër nëse kanë përdorur dhe arsyetime humanitare për të sëmurë në familje.
Por vendimi shkakton dyshime të forta dhe mungesë standardesh kur krahasohet me vendime të tjera analoge për të akuzuar që nuk kanë asnjë shans të prishin prova apo të pengojnë drejtësinë duke u hetuar në gjendje të lirë.
Dy raste janë shumë specifike, që rrëzojnë standardin Malltezi për paraburgimin.
E njëjta gjykatë ka lënë në burg Safet Gjicin, ish- bashkiakun e Kukësit, i përfshirë në një skandal seksual, që s’ka nevojë për zbardhje, se ishte shumë transparent. Ai e mori ndëshkimin si moral, ashtu dhe zyrtar.
Nëse do vazhdohet dhe më tej me hetim penal, mund të vazhdohet, edhe pse ngjan pak si gjyq iranian. Por Safet Gjici nuk ka çfarë prova të prishi nëse gjykohet i lirë. Dhe nëse ja çon përsëri atë vajzën përpara, vështirë se i shkon më mendje për seks me atë që i ndodhi.
Si është e mundur që e njëjta gjykatë kërkesën e Gjicit e refuzon se “rrezikon të prishë provat”, kurse kërkesën e Malltezit e legjitimon. Nuk kam gjë me lirimin e Malltezit, se aty është e rëndësishme fokusimi tek hetimi dhe gjykimi i korrupsionit, dhe jo vuajtja e tij në qeli. Por standardi i Gjykatës është i dyfishtë.
Edhe më keq akoma me Vangjush Dakon. Dako mbahet në burg prej katër muajsh, pa u pyetur asnjëherë, për një leje që ka dhënë në vitin 2010, dhe që akuzohet pse e ka zbardhur me vonesë, ndërkohë që ndërtuesi ka nisur punimet. Çdo gjë ka ndodhur mes vitit 2010- 2013. Leja është dhënë, pallati është ndërtuar, dokumentet janë aty dhe Dako është një njeri i papunë në Durrës.
Ashtu si Malltezi që nuk ka çfarë t’u bëjë më shkesave dhe kontratave që ka firmosur, ashtu dhe Dako nuk ka se ku të ndikojë më në një proces që akoma nuk e kanë pyetur pse e kanë arrestuar.
E njëjta gjykatë e ka lënë në burg, ndërsa Malltezin e ka çuar në shtëpi.
Pra duket qartë që Gjykata Speciale Antikorrupsion e Apelit, ka një problem me standardin e gjykimit. Dhe kjo më duket akuzë e thjeshtë para asaj që mendojmë të gjithë.
Nëse nuk është çështje e mungesës së standardeve të gjykimit, atëherë është çështje e integritetit të Gjykatës, çka e bën atë gjykatë të korruptueshme, ose të shantazhueshme nga presioni i rrugës i Sali Berishës. Atëherë ka kuptim të themi se shantazhi politik i Sali Berishës funksionon dhe drejtësia e re po gjunjëzohet para tij.
Tani le të zgjedhin këtë duan për të na sqaruar. Uroj të jenë gjyqtarë të dobët, jashtë standartit të drejtësisë që kërkojmë dhe të kenë marrë në të gjitha rastet vendime klienteliste. Madje do isha më i lumtur dhe sikur ta dija që kanë marrë para nga Malltezi për ta liruar, se është një gjë me pak e rëndë se gjunjëzimi para Berishës.
Më e rënda do të jetë sikur të funksionojë vërtet shantazhi i Sali Berishës mbi drejtësinë dhe ata ta kenë liruar atë nga frika. Kjo i jep fund pastaj çdo shprese për një drejtësi të pavarur, pasi për t’u bërë populist dhe për të shantazhuar drejtësinë ka plot njerëz të gatshëm në këtë vend.
Ka dhe ka pasur.
Ajo çfarë nuk kemi pasur ishin gjyqtarët e pavarur që nuk e përfillin këtë presion. Ndaj është e rrezikshme të shpallim shantazhin e Sali Berishës si mekanizëm që e mposht drejtësinë e re.
Jam gati të besoj më lehtë se kanë marrë ndonjë lekë, se sa të besoj që janë gjunjëzuar nga shantazhi i Berishës. Nuk do të hamendësha mes këtyre dy të këqijave, sikur të kishin një standard për të gjithë në vendimet e tyre. Madje dhe për Belerin, burgu i të cilit po na kushton me shantazhe ndaj Shqipërisë. Por me sa duket këta gjyqtarë kanë problem vetëm shantazhet në adresë të tyre prej Berishës dhe jo ato ndaj Shqipërisë.
Pra dukshëm ata kanë tjetër standard për Malltezin, dhe tjetër standard për të tjerë, që nuk bëjnë shantazh mbi ta.