Vetëm pak ditë nga finalja e Superkupës dhe nisjes së sezonit të ri të Superligës, Kukësi ka larguar nga skuadra kapitenin e ekipit, Ylli Shameti. Nuk dihen arsyet zyrtare të kësaj ndarje, por konfirmimi për largimin nga nënkampionët e Shqipërisë e ka dhënë vetë mbrojtësi, me numrin 4.
Ylli Shameti ka qenë një nga lojtarët më të rëndësishëm të viteve të fundit te Kukësi, ndërsa pak ditë më parë drejtori i klubit, Nderim Nexhipi, kishte bërë të ditur se ai do të vazhdonte të ishte pjesë e skuadrës së Shpëtim Duros. Por në kundërshtim me këtë, Shameti ka zyrtarizuar “divorcin” me një postim në rrjetet sociale. “Pas 6 vitesh erdhi momenti që të ndahem nga FK. Kukësi! Dëshira ishte që ta mbyllja karrierën këtu por? Arsyet? Koha i tregon të gjitha! Shameti ka akoma për të dhënë në futbollin e luajtur! Sot ka falënderime për të gjithë duke filluar nga presidenti, të gjithë drejtorët teknikë, shefi i klubit, stafi mjekësor dhe të gjithë trajnerët”, shprehet ai. Po ashtu, ai ka falënderuar shokët e ekipit dhe tifozët e Kukësit.