Artur Metani është zgjedhur kreu i Inspektoratit të Lartë të Drejtësisë me 98 vota pro, 8 kundër, ndërsa 9 të tjerë nuk kanë votuar. Ai ishte renditur i pari në listën e KED me 5 kandidatura, ndërsa mori miratimin e Kuvendit gjatë seancës së parë në sesion e ri parlamentar të 2020.
Artur Metani ka mbajtur postin e Avokatit të Shtetit dhe mazhoranca në bashkëpunim me deputetët e opozitës së re i ka besuar postin e Inspektorit të Lartë të Drejtësisë. Metani është vëllai i deputetes së Partisë Socialiste, Eglantina Gjermeni dhe kjo para nisjes së votimit ka deklaruar se është në konflikt Interesi dhe për rrjedhojë ka kërkuar që të përjashtohet nga votimi.
Metani ishte renditur i pari në garën për drejtimin e institucionit me 89.6 pikë në listën e KED dhe pritet të hetojë veprimtarinë e gjyqtarëve dhe prokurorëve.
ILD vjen si rezultat i Reformës në Drejtësi dhe do të ushtrojë kontrollin mbi gjykatës dhe prokurorë. ILD do ketë të drejtë të nisë hetim dhe procedim disiplinorë për të gjithë hallkat e drejtësisë përfshi anëtarët e Gjykatës së Lartë, Këshillit të Lartë të Prokurorisë, Këshillit të Lartë Gjyqësorë dhe Prokurorit të Përgjithshëm.
