Author: albi

Që pas thirrjes në Komisionin e Posaçëm Hetimor, kreu i shtetit, Ilir Meta ka nisur një lëvizje “flirtuese” me mazhorancën, duke lëshuar batuta si për kryeministrin, kryetarin e kuvendit, por edhe aktorë të tjerë të rëndësishëm të PS, ku nga njëra anë duket si një “hakmarrje” ndaj Bashës, i cili nuk i njohu 13 tetorin dhe që kërkon të afrohet sërish nga e majta, ndërsa nga ana tjetër si një blof i Metës për të zbutur disi përplasjet me partinë në pushtet, e cila nuk ka nguruar dhe që prej 30 qershorit e cilëson “President në detyrë”

Lëvizja taktike e Metës u vu re që në paraqitjen e tij në Komisionin Hetimor, i cili, më shumë se të jepte argumente për mbrojtjen e vet, ai u përgjigj sipas dëshirës, ndonjëherë pa iu përmbajtur aspak pyetjeve të drejtuara nga ana e deputetëve, por që nuk pati asnjë shpërthim akuzues, siç ka ndodhur rëndom në daljet e tij publike, pas mosnjohjes së dekretit për anulimin e zgjedhjeve të 30 qershorit.

Gjithçka e nisi me deputetin Bashkim Fino, i cili është anëtar i Komisionit të Posaçëm Hetimor, por edhe anëtar i Komisionit të Ligjeve. Një ditë më herët, gjatë rrëzimit të dekretit të Metës, i cili kishte kthyer për rishqyrtim në Kuvend ndryshimet e ligjit për qeverisjen vendore, Fino pati deklaruar se në argumentet që kishte përdorur Presidenti, dukej se ai kishte inat personal me relatorin e ligjit (që në këtë ligj ishte vetë deputeti i mazhorancës), më shumë se me ato çfarë janë shkruar për ndryshimet ligjore. Këtë deklaratë duket se e kishte lexuar mirë Meta dhe gjatë një pyetjeje të drejtuar nga Fino në Komisionin Hetimor, kur i tha nëse qeveria socialiste do të votonte për shkarkimin e tij, a do e respektonte ky i fundit këtë vendim, kreu i shtetit e shfrytëzoi kohën për të marrë disi me të mira deputetin e mazhorancës. “Kam marrë vesh nga mediat se keni një perceptim se mendoni se kam një problem personal me ju. Jo s’kam asgjë me ju. Pse nuk mendoni ju për vendimet e mia, për rolin tim si president. Pse duhej nxituar aq shumë? Për të bërë zëvendësime në bllok?”, iu drejtua Meta.

Por ky nuk ishte i vetmi “flirtim” i Metës, pasi një veprim zbutës, kreu i shtetit e bëri edhe me Kryetarin e Kuvendit Gramoz Ruçi. Një ditë pasi u paraqit në Komisionin e Posaçëm Hetimor në Kuvend për shkarkimin e tij, Ilir Meta ka publikuar një foto në rrjetet sociale, ku Meta shfaqet në një takim me Gramoz Ruçin, ndërsa në sfond është dhe Kryeministri Rama. Në komentin e fotos, Meta shkruan se, pas dëshmisë në Komisionin Hetimor, kishte takuar Kryetarin e Kuvendit, Gramoz Ruçi, me të cilin, sipas tij, kishte diskutuar se dy grupet parlamentare më cilësore opozitare kanë qenë ato të vitit 1991/92 dhe `92-`96.

Megjithatë, Presidenti meta nuk e ndaloi “flirtimin” me kaq. Të mërkurën në konferencën para gazetarëve, ai hodhi dy mesazhe të tjera ndaj mazhorancës. I pyetur nga gazetarët për deklaratën e deputetes Mimi Kodheli se Komisioni i Venecias tashmë e ka gati opinionin dhe rekomandimin për kushtetutshmërinë e dekreteve për zgjedhjet e 30 qershorit, Presidenti Ilir Meta e kaloi me batuta, duke u shprehur “Zonjën Kodheli e kam shumë për zemër dhe e kam uruar për ditëlindjen, kështu që urojeni edhe ju se është shumë e sjellshme me ju”, tha Meta.

Por, pasi Meta u bëri elozhe përfaqësuesve, la edhe një mesazh për kryeministrin Rama. Kur u pyet nëse ndihej sadopak xheloz që lideri demokrat Lulzim Basha dhe kryeministri Edi Rama mund të duken të sinkronizuar sa i përket shpresave që Shqipëria më 18 tetor të arrijë të hapë negociatat për anëtarësim në Bashkimin Evropian, Meta tha se nuk është aspak xheloz dhe se nëse arrihet të caktohet një datë, atëherë do të dekorojë kryeministrin Edi Rama. “Unë i jap dekoratë Edit më 18 tetor vetëm të hapen negociatat, siç u dha ai dekoratave ambasadorëve vjet në qershor. Z Basha nuk i jap dekoratë sepse ka braktisur institucionet, as Monikës se i ka dhënë besën Bashës”, përfundoi Meta batutën e tij, të cilën e përdori edhe për mbylljen e konferencës para gazetarëve.

Me këto deklarata, Meta duket qartë se ka një qasje të re ndaj mazhorancës, ku në pamje të parë të jep përshtypjen e një “flirtimi” me ta, por mund të jetë edhe një blof që ai po luan për përçarjen e tyre për çështjen e shkarkimit, ndërsa po afron dita e vendimit për hetimin e kryer ndaj tij për shkelje të Kushtetutës. / Realstory.al/

Kreu i shtetit për herë të parë ka pranuar shkeljen e afateve kushtetuese me dekretin e 13 tetorit, duke dashur të dalë nga situata se nuk ka bërë asnjë shkelje tjetër me anulimin e zgjedhjeve të 30 qershorit. Këtë fakt, kreu i shtetit e ka pranuar hapur para konferencës para gazetarëve, ndërsa shpjegonte sipas tij qetësinë para Komisionit të Posaçëm Hetimor. “E vetmja shkelje që mund të jetë me dekretin për zgjedhjet është se 13 tetori është jashtë afateve, ato të përcaktuara në Kodin Zgjedhor, por nuk është shkelje kushtetuese tha Meta. Megjithatë, afatet ligjore të përcaktuara në Kodin Zgjedhor deklarohet se janë afate kushtetuese. Pikërisht në nenin 109 të Kushtetutës deklarohet se “organet përfaqësuese të njësive bazë të qeverisjes vendore janë këshillat, të cilët zgjidhen çdo katër vjet me zgjedhje të përgjithshme, të drejtpërdrejta dhe me votim të fshehtë”, por që me dekretin për 13 tetorin, meta ia ka zgjatur afatin 4 vjeçar përfaqësuesve të Pushtetit Vendor.

Presidenti Ilir Meta u pyet nga gazetarët për qetësinë që e karakterizoi përballë Komisionit të ngritur për hetimin e tij. “Unë jam gjithmonë i qetë dhe artikuloj me forcë. Kështu që nuk kisha asnjë arsye përse të sillesh ndryshe në këtë komision. Kam qenë dhe do jem shembulli i qetësisë. Sundimi i ligjit dhe shteti i së drejtës është vënë në pikëpyetje. Ka qenë një mundësi për të gjithë për të kuptuar se presidenti i Republikës ka respektuar kushtetutën e Republikës së Shqipërisë”, tha Meta.

Presidenti Ilir Meta tha se nuk ka bërë çdekretim, pasi sipas tij ky është një term ligjor që nuk ekziston. Kreu i shtetit tha se ka shfuqizuar dekretin e tij, një e drejtë dhe praktikë që sipas tij e ka edhe kuvendi edhe qeveria për ligje e vendime që i shfuqizon. Ndërsa foli për një shtet propagandistik të qeverisë dhe një shtet të së drejtës ku ai u shpreh se bën pjesë, Meta tha se nga ana tjetër, Komisioni i Venecias është një institucion i rëndësishëm që do të marrë vendim jashtë propagandës./Realstory.al/

Presidenti Ilir Meta deklaroi se më datë 11 tetor do të jetë në Komisionin e Venecias për të qenë i hapur ndaj pyetjeve të anëtarëve të saj, ndërkohë që për deklaratën e tij në Komisionin e Posaçëm Hetimor se persona të caktuar do të digjnin kuvendin gjatë protestës së opozitës më 7 qershor, kreu i shtetit shprehet se këtë informacion ia ka kërkuar edhe Komisioni Hetimor me shkresë, por që ai ia ka përcjellë institucionit të sigurisë kombëtare, duke qenë se informacioni klasifikohet sekret.

Ketë deklaratë, Presidenti Meta e ka bërë duke iu përgjigjur interesit të gazetarëve në konferencën për mediat, e cila ka nisur në orën 17:12 minuta, ku për herë të parë, ai nuk ka dalë në podiumin e vet, por ka zgjedhur të ulet në një tavolinë, me një grumbull dokumentesh para. Që në fillim të fjalës së tij ka thumbuar Ramën, duke e konsideruar si “ngelës vjeshte”, pasi po tenton të ngulisë në mendjen e shqiptarëve datën 11 tetor, kur do të dalin rekomandimet e Komisionit të Venecias, ndërkohë që sipas tij, nuk është kjo datë e rwndwsishme pwr shqiptarwt, pasi datw e rwndwsishme për shqiptarët wshtw datw 18 tetor, ku pritet të merret vendimi për hapjen e negociatave për Shqipërinë. Meta, duke argumentuar për këtë çështje me ironi, ndryshe nga herët e tjera ku është shfaqur i tensionuar, ai është munduar të dhurojë buzëqeshje gjatë përgjigjeve për interesin e gazetarëve, ndërsa ka falënderuar Kuvendin, që ka thirrur Komisionin e Venecias për opinionin e vet për çështjen e shkarkimit të Presidentit, ndërkohë që Komisioni Hetimor është shprehur se opinioni i tyre do të jetë shumë i rëndësishëm për vendimin e tyre për hetimin ndaj kreut të shtetit.

Më tej, Presidenti Ilir Meta tha se informacioni që ai bëri publik në komisionin hetimor parlamentar, se në 8 qershor në protestën e opozitës së bashkuar, kishte plan për të djegur Kuvendin, është më se i vërtetë. Kreu i shtetit tha se e ka marrë këtë informacion që e detyroi atë të anulojë me dekret zgjedhjet e 30 qershorit, nga një institucion i lartë i sigurisë, duke nënkuptuar ndoshta Shërbimin Informativ Shtetëror, të cilin e ka kërkuar në raportim edhe Komisioni i Sigurisë Kombëtare. Presidenti u shpreh në konferencën për mediat këtë të mërkurë se Kuvendi i ka dërguar kërkesë zyrtare në presidencë për tu njohur me këtë informacion të konsideruar të klasifikuar. E po ashtu, presidenti Meta tha se ai i ka dërguar shkresë zyrtare institucionit prej nga e mori informacionit, në mënyrë që vetë institucioni në fjalë t’ia dërgojë informacionet Kuvendit të Shqipërisë. “Sa i takon deklaratës së një elementi të ri për opinionin publik se një ditë para se të komunikoja publikisht vendimin për të nxjerrë dekretin më 10 qershor se kam pasur informacion nga një institucion kushtetues, sekret, i klasifikuar, nga më të lartat shtetërore, kjo është e vërtetë, nuk kam thënë gënjeshtër, aq më tepër në një moment kaq të rëndësishëm. Ka informacione të tjera por në respekt të ligjit nuk mund të them diçka më shumë. Në komisionin Hetimor i kanë mundësitë sipas ligjit të njihen me këtë presidencë. Kanë çuar një kërkesë në presidencë për tu njohur me këtë informacion, presidenca i ka kërkuar institucionit që e ka këtë informacion që t’ia vë në dispozicion kuvendit, pasi është informacion i klasifikuar. Por është informacion i vërtetë, nuk besoj se është diçka që ka ndodhur para 100 vjetësh, Kuvendi është ndriçuar, ka pasur sulme, ka pasur të plagosur. Ju them me bindje se në këtë dokument do t’i ndiqni të gjitha shqetësimet e asaj kohe. Çdo institucion që ka interes në mënyrë të ligjshme mund të njihet. Dhe do ta kuptoni që ishte një situatë tërësisht e çmendur edhe më mirë nuk mund ta përshkruante edhe raporti final i OSBE-ODIHR”, tha Meta.

Ky informacion më tej do të vlerësohet nga komisioni hetimor parlamentar që ka nisur ndaj Metës në lidhje me kushtetutshmërinë e dekreteve për zgjedhjet vendore duke kërkuar shkarkimin e tij.

Deklarata e kreut të shtetit gjatë raportimit në Komisionin Hetimor, ku tha se “persona të caktuar do të digjnin Parlamentin”, ka shqetësuar Komisionin e Sigurisë, i cili ka kërkuar raportim nga kreu i SHISH, Elidon Bendo për të mësuar se nga kanë ardhur këto informacione për të cilat ka dijeni vetëm Presidenti i Republikës.

Kërkesa është ngritur nga deputeti i maxhorancës në Komisionin e Sigurisë, Xhemal Qefalia, i cili tha se ka aludime që janë identifikuar personat që do të ndërmerrnin aktin duke shfrytëzuar protestën e opozitës më 8 qershor. “Duke përfituar nga prezenca e Komisionit, shpreh një shqetësim që dje e kam ndjekur në media nga Presidenti i Republikës së Shqipërisë, i cili ka sjellë në vëmendje të Komisionit Hetimor, por edhe të opinionit publik një informacion për djegien e Kuvendit nga persona të veçantë. Bashkë me kolegun Vorpsi, i kemi përgatitur kryetarit të Shërbimit Informativ Shtetëror një kërkesë për të na informuar rreth këtij informacioni që disponon Presidenti”, tha Qefalia.

Por, kërkesa nuk ka gjetur dakordësinë e të gjithë deputetëve të pranishëm. Deputeti Adnor Shameti, i cili është anëtar edhe në komisionin Hetimor, sugjeroi që Bendo të ftohet pas përfundimit të punës së Komisionit Hetimor, pasi kjo mund të krijojë mbivendosje pune, duke paralajmëruar disi se një raportim i tillë nga kreu i SHISH do të kërkohet edhe nga Komisioni Hetimor “Duke qenë se unë jam edhe anëtar i Komisionit Hetimor, duke qenë se është Komisioni i Posaçëm Hetimor, i ngritur për këtë punë, nuk dua që të ketë mbivendosje të ushtrimit të kompetencave të të drejtave nga Komisioni Hetimor te Komisioni i Sigurisë. Në përfundim të veprimtarisë së Komisionit Hetimor, nëse ngelet diçka pa u sqaruar, sërish mund ta ushtroni këtë të drejtë. Kështu që unë do të rekomandoja që të mos kemi mbivendosje të punëve të Komisionit Hetimor me Komisionin e Sigurisë. Ju siguroj që do të gjejnë mbështetje të gjitha shqetësimet tuaja”, tha Shameti.

Ky rekomandim nuk ndryshoi mendimin e Qefaliajt, i cili tha se informacionet janë shqetësuese dhe se aludohet për identifikimin e personave të veçantë. “Të jeni të bindur se nuk do t’ia marrim fare kompetencat Komisionit Hetimor. Kështu që unë do të vazhdoj bashkë me kolegun Sadi Vorpsin të ushtroj të drejtën për t’i kërkuar informacione SHISH. Unë njoftova që të ishte në interes edhe për juve si pjesëtar, por dhe të drejtën time. Komisioni Hetimor nuk ka lidhje fare me Komisionin e Sigurisë. Unë jam i shqetësuar dhe besoj se edhe juve duhet të jeni të shqetësuar që qarkullojnë informacione për njerëz të veçantë. Madje aludohet që janë edhe të identifikuar dhe jam i interesuar se çfarë po bëjnë”, tha Qefalia.Madje, edhe deputetja e grupit të PS-së, Elena Xhina, mbështeti Qefalinë, e cila sqaroi se ligjërisht nuk ka asnjë pengesë nga Komisioni Hetimor që të thërritet z. Bendo në Komisionin e Sigurisë.

Një ditë më parë, kreu i shtetit, Ilir Meta, gjatë dëshmisë së tij para deputetëve të Komisionit Hetimor, tha se një nga arsyet që e shtynë atë në anulimin e 30 qershorit, ishte një informacion i ardhur nga institucionet e inteligjencës se persona të veçantë do të tentonin të digjnin Parlamentin duke shfrytëzuar protestën e opozitës më 8 qershor. Kjo deklaratë e Metës është rrëzuar edhe nga vetë opozita, për të cilën Meta akuzohet nga maxhoranca se anuloi zgjedhet, ndërkohë që asnjë institucion tjetër nuk ka folur pë një kërcënim të tillë. Tashm, SHISH duket se do të raportojë si pranë Komisionit Hetimor, ashtu edhe në Komisionin e Sigurisë Kombëtare për të mësuar më shumë nëse SHISH ka pasur vërtetë informacione të tilla, të cilat nuk i ka raportuar pranë institucioneve që e ngarkon ligji, siç është edhe Kryeministri, apo kjo deklaratë ka qenë një “lajthitje” e kreut të shtetit.