Ndërsa Shqipëria dhe Europa janë goditur nga
vala e të nxehtit afrikan, në pjesën aziatike të botës, erërat e forta dhe përmbytjet
janë duke shkaktuar viktima.
Reshjet e dendura të shiut dhe erërat e forta
kanë krijuar tajfunin Lakima në Kinë, duke shkaktuar mbi 28 të vdekur dhe 10 të
zhdukur, ndërsa pritet që bilanci të rritet. Si pasojë e përmbytjeve, mbi 1
milion njerëz janë evakuuar, ndërsa problem mbeten rrëshqitjet masive të dheut.
Tajfunin Lekima goditi fillimisht në orët e
para të së shtunës Wenling, midis Tajvanit dhe kryeqytetit të Kinës, Shanghait.
Stuhia u cilësua në fillim si një “super tajfun” por u dobësua më vonë kur erërat arritën shpejtësinë 187
km/orë. Tajfuni pritet të godasë Shangani, i cili ka më shumë se 20 milionë
banorë.
Bllokimi i rrugëve, përmbytje, rëniet e pemëve, shkatërrimi i shtëpive, rrëshqitjet e dherave dhe mungesa e energjisë elektrike janë kthyer në pamjen e zakonshme që zonat që janë goditur nga tajfuni.
Dhuna në familje ka çuar në plagosjen e katër personave.
Ngjarja ka ndodhur në qytetin Elbasanit, ku policia ka ndërhyrë në kohë për të
shmangur përshkallëzimin e situatës. 50-vjeçari me iniciale N.J. ka dhunuar me
sende të forta ish gruan e tij dhe të birin, por nga ngjarja ka përfunduar i
plagosur edhe vetë.
Gjithashtu edhe vëllai i ish gruas të tij ka
mbetur i plagosur pasi ka ndërhyrë për të shmangur dhunën.
Pas njoftimit të policisë
është bërë ndërhyrja në kohë për të shmangur ndonjë tragjedi. 50-vjeçari do të
përballet me akuzën për veprën penale “Dhunë në familje” në Gjykatën
e Elbasanit.
Policia kufitare e Durrësit ka goditur një
rast të trafikimit të armëve dhe municioneve, duke vënë në pranga 2 poseduesit
e tyre. Armët janë zbuluar në bagazhet e një personi që do të udhëtonte me linjën
e tragetit Durrës-Bari.
Gjatë kontrollit të ushtruar në vijën e dytë
nga policia, në mjetin autobus tip “Sptinter” drejtuar nga shtetasi A.F., që
udhëtonte drejt Italisë në linjën Durrës – Bari, në bagazhet e shtetasit R. H.,
i gjetën dhe sekuestruan në cilësinë e provave material një karikatorë
automatiku e mbushur me 30 fishekë të kalibrit 7.62 mm dhe një pako me 20
fishekë model 56 të kalibrit 7.62 mm.
Në pranga kanë përfunduar të dy shtetasit banues
në Fier, pasagjeri R.H. 23 vjeç dhe shoferi i autobusit A.F. 30 vjeç.
Materialet i kaluan Prokurorisë së Rrethit
Gjyqësor Durrës për veprime të mëtejshëm për veprën penale”Trafikimi i armëve
dhe i municionit “në bashkëpunim parashikuar në nenin 283/a/2 të Kodit Penal.
Ambasada e SHBA-së ka uruar besimtarët
myslimanë për Kurban Bajramin, ndërsa ka bërë thirrje për reflektim për ndërtimin
e një paqe dhe begatie në vend. SHBA u ka bërë i ka bërë një thirrje politikës
shqiptare, që të tregojnë angazhim për të zgjidhur përçarjet mes tyre dhe t’i
japin fund krizës.
“Në emër të Ambasadës së Shteteve të
Bashkuara, iu shprehim urimet më të mira të gjithë atyre që festojnë Kurban
Bajramin. Kjo ditë ofron një mundësi për të reflektuar mbi angazhimin tonë të
përbashkët për ndërtimin e komuniteteve paqësore dhe të begata” shkruan
ambasada e SHBA.
SHBA disa herë ka bërë thirrje që palët të ulen në dialog si mënyra e vetme për zgjidhjen e krizës, ndërsa faktit që mund të ndërhyjë si ndërmjetëse mes palëve i është përgjigjur se kriza është një çështje e brendshme që duhet të zgjidhet nga vetë palët, pa ndërhyrjen e ndërkombëtarëve.
Kryeministri Rama ka përsëritur disa herë që dora e tij mbetet e shtrirë për dialog. Të shpresojmë që në këtë ditë feste, opozita jashtë parlamentare që këmbëngul të mos dialogojë me qeverinë, të ndërgjegjësohet dhe të ulet sa më shpjet në tryezë për të mirën e vendit dhe shqiptarëve.
Aksioni anti-informalitet nuk kursen askënd
dhe këtë kryeministri Rama nuk heziton ta përsëritë çdo ditë. Rama ka lajmëruar
përmes një postimi në Facebook goditjen e një tjetër rasti për paligjshmëri dhe
tregtim të hidrokarbureve pa akcizë. “Një depozite në Porto Romano në Durrës
është gjobitur me një shumë të madhe, pasi ka mungesë në deklarimet e saj për
233 mijë litra benzinë. Subjekti ka marrë një gjobë prej 350 mijë eurove dhe
nëse kjo shkelje do të përsëritet gjoba do të jetë deri në 5-fish dhe më pas
mbyllja e të gjithë aktivitetit”, shprehet Rama, i cili i bën thirrje bizneseve
të zbatojnë ligjin, pasi operacioni i kthimit në ligjshmëri do të prekë çdo
magazinë doganore, jo vetëm për karburantin, por edhe për produktet e tjera të
akcizës.
Nga verifikimi rezulton se aksioni
anti-informalitet ka goditur sërish subjektin e hidrokarbureve Gega Oil, pasi
është kapur me shkelje. ndërsa vetëm pak ditë më herët, subjektit Gega Oil iu
bllokua një pikë furnizimi për shkak të problemeve me pompat e furnizimit. Ndaj
Gega Oil që kishte bërë shkelje është vendosur një gjobë e majme prej 350 mijë
eurove dhe nëse kjo shkelje do të përsëritet gjoba do të jetë deri në 5 fish
dhe më pas mbyllja e të gjithë aktivitetit dhe revokim të licencës.
Ky zbulim evazioni ka ardhur në saj të
aksionit që po ndërmerret në të gjithë vendin tonë për të goditur
informalitetin, duke filluar nga plazhet dhe lirimi i zonave publike e deri tek
hotelet e komplekset me të famshme të vendit. Strukturat e Administratës
Doganore në kontrollet e tyre janë fokusuar te sektori i hidrokarbureve dhe produktet e akcizës.
Në inspektimin e bërë në Porto Romano ka qenë
e pranishme Ministrja e Financave Anila Denaj dhe drejtori i përgjithshëm i doganave
Arlind Gjokutaj, i cili tha se kjo është shkelje për herë të parë dhe për këtë
arsye penaliteti që aplikohet është 1-fish mbi vlerën e detyrimit. Në rast
përsëritje do të jetë 3-fish dhe për herë të tretë shkon deri në 5-fish të
detyrimit dhe revokim të autorizimit për ushtrimin e veprimtarisë.
“Kjo është një nga pjesët e procesit që ne po
kryejmë në bashkëpunim edhe me institucionet e tjera, me Drejtorinë e
Përgjithshme të Tatimeve dhe Inspektoriatin Shtetëror Teknik dhe Industrial.
Ajo që po mundohemi të bëjmë është inventarizimi fizik i të gjithë gjendjes në
magazinat fiskale. Krahasimi i gjendjes me sistemin, me deklarimet që kemi në
sistem dhe më pas kryqëzimi i informacionit me të gjitha faturat e shitjes dhe
me Drejtorinë e Përgjithshme të Tatimeve, për të kuptuar që nga momenti i
importit dhe deri në pikën fundore gjithë informacioni është i përcjellë saktë
dhe gjithë produkti është i fiskalizuar dhe i pasqyruar drejt kundrejt
detyrimeve doganore fiskale ndaj shtetit”, tha Gjokuta.
Në muajin gusht fokusi i kontrolleve do të
jetë sektori i produkteve të akcizës, duke filluar nga karburanti, pijet
alkoolike, kafeja,etj. Ministrja e Financave dhe Ekonomisë, Anila Denaj theksoi
se po bëhet një analizë e plotë me qëllim evidentimin e çdo shkeljeje.
“Ne do
të monitorojmë çdo veprimtari ekonomike, në mënyrë që të kuptojmë deri në fund
masën e evazionit dhe arritjen e objektivave për ta luftuar atë. Në Porto
Romano jemi duke analizuar të gjitha pikat e magazinave doganore për të gjitha
subjektet që kanë vendndodhje të depozitave. Gjithashtu do të zhvendosemi edhe
në Fier, si dhe në çdo pikë ku ka magazinë doganore. Kjo jo vetëm për
karburantin, por edhe për produktet e tjera të akcizës”.
Në fund ministrja Denaj i bëri apel bizneseve
të vlerësojnë dhe të deklarojnë në mënyrë të plotë produktet që tregtojnë.
Qëllimi i administratës fiskale nuk është ndëshkimi, por ndërgjegjësimi i
subjekteve për të zbatuar me korrektësi legjislacionin fiskal në fuqi.
Për shkeljen e mëparshme Administratori i ‘Gega
Oil’ , Paulin Gega është shpallur në kërkim pasi akuzohet për pastrim parash
dhe evazion fiskal në shuma të konsiderueshme. Prokuroria nxori një urdhër
ndalimi për Gegën, por rezulton se ky i fundit është larguar nga Shqipëria. Po
ashtu 4 vite më parë ai ishte proceduar nga Drejtoria e Policisë Shkodër, për
veprën penale fshehje e të ardhurave.
Megjithatë, në një reagim për mediat, Gega ka
mohuar që të ketë shkelur ligjin, ndërsa sa tha se nuk i është shmangur
drejtësisë, por ka ikur me pushime në Greqi, të cilat i kishte planifikuar kohë
më parë. Ai ka mohuar akuzat se kompania e drejtuar prej tij ka kryer evazion
fiskal apo fshehje të të ardhurave, ndërsa theksoi se “Gega Oil”
vijon aktivitetin pa ndërprerje në të gjithë vendin.
Prej dy muajsh në të gjithë vendin po ndërmerret një aksion i gjerë kundër informalitetit, duke filluar nga plazhet dhe lirimi i zonave publike e deri tek hotelet, komplekset, bizneset e dyqanet e deri tek karburantet dhe tregtimi i hidrokarbureve.
Pas një heshtje të gjatë në lidhje me sulmet politike dhe reagimet për çështje kryesore në vend, kryetarja e LSI, Monika Kryemadhi ka zgjedhur pikërisht festën e Kurban Bajramit që të jap sërish mesazhe politike dhe të numëroj ato që ajo i quan defekte të sistemit të korruptuar. Ndryshe nga bashkëshorti i saj, i cili bëri thirrje për dialog gjithëpërfshirës dhe foli me tone të qeta, Kryemadhi ka preferuar të bëjë thirrje për lëvizje në mënyrë që të fitohet koha e humbur dhe t’i jepet fund këtij sistemi të korruptuar .
“Shqipëria
sot ka nevojë për më shumë solidaritet në mënyrë që të ofrojë mundësi për një
të ardhme më të mirë, për të gjithë! Plagët sociale si varfëria, korrupsioni,
emigrimi dhe probleme të tjera shoqërore mund të gjejnë zgjidhje vetëm duke
ndërtuar sisteme të drejta e të ngritura mbi vlera! Ne duhet të fitojmë kohën e
humbur!” shkruan Kryemadhi.
Ndryshe nga Meta, Kryemadhi nuk ka kohë për të
humbur dhe largimi qoftë edhe për një ditë nga sulmet politike, nuk është në opsionet
e saj. Me herët, presidenti Meta bëri thirrje për dialog gjithëpërfshirës dhe kërkoi
nga palët që të luftohet për të ardhmen e vendit dhe të mendojnë mbi interesat personale.
Një ekskavator është hedhur në erë gjatë natës
në Bulqizë, për arsye ende të panjohura. Nga shpërthimi ka pasur vetëm dëme materiale.
Ekskavatori është në pronësi të shtetasit me iniciale V.N., ndërsa po punohet për
arsyet e vendosjes së eksplozivit dhe autorit.
Policia po heton në pista të ndryshme në
lidhje me konfliktet e mundshme të personit të sulmuar si dhe nëse ai ka ndonjë
të kaluar të dyshimtë që mund të nxisin sulmet dhe kërcënimet personale.
Pas 6 ditës i shpallur në kërkim nga policia e
Devollit, 25-vjeçari është vetëdorëzuar, pasi akuzohet për tentativë vrasje me dashje
ndaj një tjetër shtetasi.
Ngjarja ka ndodhur më 5 gusht në qytetin e
Bilishtit, ku pas një konflikti për motive të dobëta, sherri mes dy të rinjve
ka degjeneruar deri në përdorimin e armëve. Për pasojë 25-vjeçari me iniciale R.F.
ka plagosur me armë zjarri tip automatik 21-vjeçarin me iniciale K.B.
25-vjeçari do të përballet me akuzat “Vrasja
me dashje, mbetur në tentativë” dhe “Mbajtja pa leje dhe prodhimi i armëve e
municionit”.
Aksioni ndaj informalitetit ka liruar edhe
1000 m2 të tjerë sipërfaqe të vijës bregdetare të “pushtuara” nga shezlongët,
çadrat dhe karriget e paligjshme të bizneseve private.
Aksioni i policisë është përqendruar në lirimin
e hapësirave publike në Qerret dhe Spille, ku janë sekuestruar 200 komplete çadra
e shezlongë që kishin zënë hapësirat në mënyrë të paligjshme.
Gjithashtu kanë përfunduar në ndjekje penale përfaqësuesit
e subjekteve që kishin zënë hapësirat, përkatësisht shtetasit A.B. dhe E.H., të
cilët akuzohen për veprat penale “Fshehja e të ardhurave”, “Mospagimi i taksave dhe tatimeve”
dhe “Pushtimi i tokës”.
Policia gjithashtu ka çuar në ndjekje penale
edhe zyrtarët e tatim-taksave në Bashkinë Kavajë për shpërdorim detyre, pasi kanë lejuar këto biznese
të ushtronin aktivitet në mënyrë të kundërligjshme.
Akuzat për procedim penal ndaj tyre janë bërë
edhe gjatë operacionit “Plazh i Lirë”
të zhvilluar në Golem dhe në vijim.
Policia ka nisur një aksion të fuqishëm për të goditur informalitetin dhe ka liruar një hapësirë të madhe publike në vijën bregdetare nga veriu deri në jug të vendit duke ia kthyer atë qytetarëve.
