Prokuroria e Përgjithshme ka kërkuar informacion dhe vlerësim të dokumenteve të nxjerra nga Partia Demokratike në lidhje me akuzat për korrupsion dhe konflikte interesi, ndaj nënkryetarit të Bashkisë së Tiranës, Arbian Mazniku. Këtë kërkesë, Prokuroria e Përgjithshme ia ka dërguar prokurorisë pranë Gjykatës së Tiranës, që të informohet në lidhje me këto materiale që qarkullojnë edhe në media.
“Duke marrë shkas nga publikimet e fundit në media, ju dërgojmë për vlerësim ligjor, të dhëna të printuara nga mediat online, ku përfshihen dyshime në lidhje me përfitimin në mënyrë të parregullt të dhuratave prej funksionarit të administratës publike Arbi Mazniku. Pa cenuar sekretin hetimor kërkojmë informacion në lidhje me mënyrën e trajtimit të materialit” thuhet në letrën e dërguar nga Prokuroria e Përgjithshme.
Kjo kërkesë erdhi pasi PD-ja denoncoi dhe kërkoi shkarkimin e nënkryetarit të Bashkisë Tiranë, Arbian Mazniku për korrupsion dhe konflikte interesi në lidhje me përfitimet që merrte për shkak të postit të tij. PD tha se biznesmeni Shkëlqim Fusha, që sipas selisë blu është përfituesi më i madh i parave publike nëpërmjet Bashkisë së Tiranës, i ka paguar dhomat luksoze të hotelit në Barcelonë, Maznikut.
