Anëtarësimi i Turqisë në Bashkimin Europian “nuk është më prioritet” për Ankaranë, tha presidenti turk Recep Tayyip Erdogan, duke pretenduar madje se ky zhvillim do të bënte që Europa “të humbiste”.
Në një intervistë për emisionin “Al Muqabala” të kanalit Al Jazeera Arabic, presidenti turk trajtoi një sërë çështjesh kritike, që nga marrëdhëniet me BE-në dhe avionët F-35, e deri te marrëveshja e re e mbrojtjes në Mekë, Egjipti, Ngushtica e Hormuzit, Siria dhe Gaza.
Sipas kanalit turk NTV, Erdogan pretendoi se Bashkimi Evropian nuk duket i gatshëm ta pranojë Turqinë si anëtare me të drejta të plota.
Erdogan deklaroi se anëtarësimi në BE nuk është më në krye të agjendës së Ankarasë.
Siç tha ai, Europa nuk tregon gatishmëri reale për ta integruar Turqinë në Bashkimin Europian dhe, sipas tij, nëse kjo rrugë nuk përparon, “Evropa do të jetë humbësja”.
Duke iu referuar çështjes së avionëve luftarakë amerikanë F-35, ai tha: “Kam marrë një premtim nga Trump lidhur me F-35. Pres që ai të mbahet”.
Presidenti turk foli gjithashtu për Marrëveshjen e Përbashkët të Mbrojtjes, të nënshkruar më 7 gusht nga Turqia, Arabia Saudite dhe Pakistani në Mekë, e cila parashikon se një sulm i armatosur kundër njërës prej tri vendeve do të konsiderohet si sulm kundër të gjithave.
Ai argumentoi se kjo marrëveshje “dërgoi një mesazh të rëndësishëm për botën”.
Erdogan la gjithashtu të hapur mundësinë e zgjerimit të strukturës së re të mbrojtjes, duke thënë se në të ardhmen mund të marrë pjesë edhe Egjipti.
Lidhur me Ngushticën e Hormuzit, Tayyip Erdogan tha se prioriteti kryesor i Turqisë është rihapja e saj.
Ai tha se mbajtja e ngushticave të mbyllura nuk u shërben interesave të asnjërës palë.
Njëkohësisht, ai vlerësoi rolin e Katarit në përpjekjet ndërmjetësuese për t’i dhënë fund konflikteve në rajon.
Erdogan zbuloi gjithashtu se planifikon të vizitojë Sirinë. Ai tha se Turqia do të vazhdojë të punojë për të rikthyer stabilitetin në vend dhe “nuk do ta lërë atë vetëm”.
Sa u përket kurdëve të Sirisë, ai tha se edhe ata duhet të përfitojnë nga paqja dhe stabiliteti, duke shtuar se Ankaraja do të vazhdojë të forcojë marrëdhëniet e saj me komunitetet kurde.
Duke iu referuar Gazës, presidenti turk përsëriti se Ankaraja do të vazhdojë mbështetjen e saj. “Ne nuk mund ta lëmë Gazën vetëm,” tha ai. Ai gjithashtu pohoi se Hamasi po i përmbush detyrimet e tij “në mirëbesim”, ndërsa akuzoi Izraelin për vazhdimin e luftës.
Tayyip Erdogan shprehu gjithashtu shqetësimin për sulmet izraelite ndaj Libanit, duke vënë në dukje se e kishte ngritur këtë çështje me Donald Trump-in dhe se SHBA-ja mund të luajë një rol të rëndësishëm në dhënien fund të konflikteve.
Lidhur me Sudanin, Erdogan deklaroi se Turqia do të vazhdojë mbështetjen e saj dhe i cilësoi si të mira marrëdhëniet me kreun e Këshillit të Sovranitetit, Abdel Fattah al-Burhan.
Sa i përket Libisë, ai deklaroi se marrëdhëniet me Ankaranë mbeten të qëndrueshme dhe siguroi se Turqia “nuk do ta lërë atë vetëm”.