Ish-kryeministri grek Kostas Karamanlis e cilësoi rajonin e Ballkanit si të paqëndrueshëm dhe një ‘vrimë të zezë” në hartën e Europës, pavarësisht se ka kaluar 20 vite nga lufta e fundit në rajon.
“Ka ende re në rajon. Ballkani Perëndimor, 20 vjet pas luftës së fundit në rajon, për fat të keq mbetet një vrimë e zezë në hartën evropiane. Po, nuk ka konflikte të përgjakshme si në këtë kohë, por situata në Bosnje dhe Hercegovinë, Kosovë dhe Shqipëri, në veçanti, është duke ngecur apo edhe duke u kthye.” tha Karamanlis
Karamanlis kritikoi ashpër vendimin e BE për të mos hapur negociatat me Shqipërinë dhe Maqedoninë e Veriut, ndërsa theksoi se dy vendet duhet të ecin para me reformat. Ish kryeministri grek u ndal edhe tek minoriteti grek në Shqipëri, duke kërkuar respektimin e të drejtave të tyre si pjesë e integrimit.
“Keqardhje që negociatat nuk u hapën, por dy vendet duhet të bëjnë përpara me progresin e reformave. Mbrojtja e të drejtave të pakicës etnike greke është e rëndësishme. Pa zbatimin e standardeve evropiane për këtë çështje dhe pa përmbushjen e detyrimeve të saj, Shqipëria nuk mund të presë përfundimin e kursit të saj evropian,” tha Karamanlis.
