Kryeministri Edi Rama ka mbrojtur projektin turistik të Jared Kushner në Zvërnec, si një nga projektet më të jashtëzakonshme që do të ndodhin në Europë, një projekt që sipas tij nuk ka si synim të shkatërrojë një vend të bukur por ta rigjenerojë atë.
Në një intervistë për redaktoren e lajmeve ndërkombëtare në Channel 4 News, Lindsey Hilsum, insiston se projekti nuk synon të dëmtojë natyrën dhe se do të zbatohet sipas standardeve të Bashkimit Europian.
“Ajo që u publikua në Instagram ishte thjesht një ngacmim. Projekti ka evoluar. Tani janë përfshirë arkitektë të nivelit më të lartë. Ky do të jetë një nga projektet më të jashtëzakonshme që do të ndodhin në Europë pas shumë kohësh. Nuk do të jetë ai që njerëzit imagjinojnë. Projekti nuk synon të shkatërrojë një vend të bukur, por ta rigjenerojë atë”, tha ai.
Rama u pyet edhe për shqetësimet e ngritura nga Komisioni Europian teksa vendi po përgatitet të mbyllë grupkapitujt e negociatave për anëtarësim në vitin 2027, dhe nguli këmbë se idea për një projekt që nuk përputhet me standardet e BE-së është e pabesueshme.
Ideja se mund të ecim përpara me një projekt që nuk përputhet me standardet e BE-së është e pabesueshme. Prandaj them vetëm kaq: qetësohuni dhe flisni me fakte”, deklaroi Rama.
Intervista u transmetua nga Channel 4 News, i cili e përshkruan Nartën si një nga zonat bregdetare më të paprekura dhe me biodiversitetin më të pasur në Europë, ndërsa vë në dukje se projekti i planifikuar nga Ivanka Trump dhe Jared Kushner ka nxitur protesta në Shqipëri, të njohura si “Revolucioni i Flamingove”.