Nga 1 janari 2020, 472 shërbime do të jepen online për qytetarët duke nisur kështu revolucionin dixhital duke shmangu kështu radhët e gjatë nëpër sportele dhe aplikimi për këto shërbime online përmes telefonit apo kompjuterit.
Lajmi u dha nga kryeministri Rama , i cili tha se qytetarëve nuk do t’u kërkohen më dosje me dokumente shtetërore pasi ato do të sigurohen nga vetë administrata. Rama tha se qytetarët do të mund të ndjekin online ecurinë e aplikimit të tyre dhe do të paraqiten në sportel për të marrë shërbimin në afatin e përcaktuar ligjor.
Kryeministri tha se dixhitalizimi do të shkurtojë kohën dhe shmang radhët e gjata, ndërsa deri në dhjetor 2020 të gjitha shërbimet do të jenë online, përveç atyre që duhet të paraqitesh personalisht.
“Kjo që do të ndodhë është një revolucion. Është e domosdoshme që njerëzit të vihen në dispozicion të këtij sistemi. Nuk është thjeshtë çështja e mundësisë së vetme e aplikimit për shërbime online, që njerëzit të mos jenë të detyruar të vijnë në sportel, por ta bëjnë aplikimin nga shtëpia në telefon. Ky është blloku i parë, në qershor do të ketë një të dytë, ndërsa në dhjetor të 2020 të gjitha shërbimet, me përjashtim të disave që e duan personin aty. Qytetarët do të aplikojnë dhe do të postojnë online vetëm dokumentet personale, një dokument banke, në vërtetim…Ndërsa ato që janë brenda për brenda shtetit do i merrni ju. Pra, kolona e dokumenteve të shtetit do të mbushet nga brenda administratës. Qytetarët të shpëtojnë nga radha dhe ecejaket. Nëse ia dalim shkurtojmë kohë dhe tension nervor dhe eliminohet mundësia për ryshfet” tha Rama.
Aplikimi online për shërbimet do të kryhet përmes regjistrimit në portalin e-Albania ku nga 1 janari 2020 do të jetë e publikuar edhe lista e plotë e shërbimeve që do të zhvillohen online.