Gjermania është një nga shtetet e para europiane që shpreh mbështetjen financiare ndaj Shqipërisë për rindërtimin nga tërmeti. Nëpërmjet një njoftimi zyrtar, Ambasadori i Gjermanisë në Tiranë, Peter Zingraf njoftoi se Qeveria Federale do të japë 4 milionë euro grant për rindërtimin e Shqipërisë nga tërmeti.
“Gjermania mbështet rindërtimin me 4 milionë euro. Sot ne informuam zyrtarisht qeverinë shqiptare: Qeveria Federale do të mbështesë rindërtimin pas tërmetit të tmerrshëm të 26 nëntorit me grante në shumën e 4 milionë euro përmes Bankës Gjermane për Zhvillim (KfW). Me të do të rindërtohen shkolla dhe ndërtesa publike në përputhje me standardet më të fundit të sigurisë dhe efiçensës së energjisë”, shkruhet në njoftimin e ambasadës.
Në lidhje me këtë mbështetje, Ambasadori Gjerman në Shqipëri, Z. Peter Zingraf u shpreh: “Gjermania do të ndihmojë Shqiperinë për të rindërtuar shkollat dhe institucionet publike. Ky grant është një nga elementët e mbështetjes Gjermane pas tërmetit të 26 nëntorit i cili traumatizoi shumë shqiptarë dhe shqiptare. Rindërtimi do të shërbejë për rikthimin dalëngadalë në normalitin e jetës së përditshme”, thotë Zingraf.
