Kampionët e Botës dhe Europës, do të luajnë në Tiranë për bamirësi

Bota e futbollit u solidarizua në mënyrë të veçantë me familjet e prekura nga tërmeti i 26 nëntorit në Shqipëri. Ndërkohë, solidariteti do të vijojë edhe më tej. Sipas Panorama Sport, në datën 10 janar në stadiumin “Air Albania” do të zhvillohen dy ndeshje miqësore.

Ish-futbollistët e Italisë që u shpallën Kampion Bote në vitin 2006, veteranët e Turqisë që morën pjesë në botërorin e 2002 si dhe veteranët e Greqisë që fituan Euro 2004, do të vijnë në Tiranë.

Së bashku me veteranët e ekipit tonë kombëtar, do të luhen dy ndeshje, të ardhurat e fituara nga biletat do të shkojnë për rindërtimin nga tërmeti.

Kështu, veteranët e kombëtares Kuq e Zi do të luajnë kundër veteranëve të Italisë. Ndërkohë, veteranët e Turqisë do të përballen me veteranët e Greqisë.

U kry! ‘Air Albania Stadium’, shtëpia e re e kuqezinjve

Zyrtarizimi i emrit “Air Albania Stadium” dhe certifikimi i stadiumit nga UEFA si të përshtatshëm për të zhvilluar ndeshje të kampionateve botërore ka sjell dhe reagimin e kryeministrit Rama.

Përmes një postimi shoqëruar me foto të ambienteve brenda dhe jashtë stadiumit më të ri dhe modern në vend “Air Albania Stadium”, kryeministri Rama tha të shkurtër se kjo punë “u kry” dhe se është një trashëgimi e denjë për brezat e tjerë.

“U kry! Ta gëzojnë brezat! Forca Shqipëria!”, shkruan kryeministri.

Në foto e shpërndara shihet edhe emri i ri i stadiumit “Air Albania”, që do të inaugurohet më 17 nëntor ku do të pres ndeshjen Shqipëri-Francë, kualifikuese për Euro 2020. Në këtë ndeshje do të jetë i pranishëm edhe kreu i UEFA-s, Aleksander Čeferin.

Pas “Migjenit” vjen “Naimi”, Balluku: Air Albania, me destinacione të reja

Ministrja e Infrastrukturës, Belinda Balluku prezantoi avionin e ri të “Air Albania”, që nisi udhëtimet drejt tre aeroporteve në Itali. Balluku u shpreh se destinacionet e fluturimeve me avionët e “Air Albania”, do të shtohen çdo muaj. “Air Albania është krijuar për të qënë një kompani prestigjoze, ndaj edhe zogjtë fluturues të shqiponjave do të shtohen çdo muaj për në destinacionet ku ka kërkesë të madhe”. Duke prezantuar Boeing 737 800 nga bordi i tij, Balluku tha se është hera e parë që në Aeroportin e Rinasit vjen një avion kaq i ri.

“Gjëja tjetër që ne shtojmë sot me avionin “Migjeni” është cilësia. Në Tiranë është ulur një pajisje e quajtur Boeing 737 800, prodhim i fundvitit 2016. Aeroporti i Rinasit nuk e ka parë kurrë një pajisje kaq të re. Ne jemi krenarë të themi që Air Albania ofron shërbimet e një kompanie të ekselencës me çmimet një kompanie loë cost”, tha Balluku.

Avioni i ri ofron kushte optimale dhe siguri në udhëtim sipas rregullave të BE-së për pasagjerët. Stafi i “Air Albania”, sipas ministres, është trajnuar për më shumë se një vit në akademinë e aviacionit pranë Turkish Airlines. Ministrja shtoi se avioni “Migjeni” do të udhëtojë 7 herë në javë në Milano dhe Romë, si dhe katër herë në javë në Bolonja të Italisë.

“Tregu Italian ka qënë i planifikuar për t’u aksesuar që në studimin e parë pasi mbi 70 % e pasagjerëve që udhëtojnë nga aeroporti i Rinasit shkojnë drejt Italisë”, theksoi Balluku. Sipas saj, çmimet për biletë janë 20 deri në 25 euro më pak se sa të gjitha kompanitë low cast që operojnë në Shqipëri. Ministrja njoftoi se brenda këtij viti pritet të ulet në Rinas një tjetër avion i “Air Albania”, “Naimi”, një tjetër prodhim i vitit 2016 që do të fluturojë drejt destinacioneve Europiane.

Air Albania, të hënën “Migjeni” fluturon drejt Italisë

Duke nisur nga e hëna e 30 shtatorit, kompania shqiptare “Air Albania”, nis fluturimet drejt Italisë në tre destinacione. Roma, Milano dhe Bologna janë tre aeroportet italiane, ku do të ulet dhe ngrihet fillimisht avioni i ri i Air Albania, modeli 737 800 i kompanisë Boeing, prodhim i vitit 2016.

Lajmi ishte bërë i ditur prej kohësh nga vetë kompania, e cila së fundi, publikoi dhe disa foto nga garazhi ku gjendet avioni i ri, i cili mban emrin “Migjeni”. Tashmë qytetarët shqiptarë, që udhëtojnë drejt Italisë, por dhe anasjelltas, do të kenë mundësi të udhëtojnë me kompaninë shqiptare të avicionit.

Ndërkohë, Air Albania planifikon që të zgjerojë hapësirën e udhëtimeve drejt Londrës dhe më pas drejt SHBA-së me linjë direkte. Aktualisht, kompania shqiptare ofronte udhëtime nga Tirana në Stamboll dhe anasjelltas.

Çmimet e biletave që ofron “Air Albania” për pasagjerët që do të udhëtojnë drejt Italisë, janë kryesisht çmime tregu.

Rama publikon fotot e avionit të ri, “Air Albania” së shpejti drejt Amerikës

Pasi lajmëroi se në shtator do të nisin fluturimet e “Air Albania” drejt tre aerporoteve italiane, Kryeministri Edi Rama ka publikuar fotot e avionit, që do të transportojë shqiptarët drejtë Italistë dhe anasjelltas. Avioni Boeing 737, prodhim i vitit 2016, është pagëzuar me emrin e “Migjenit”, dhe është duke u bërë gati për t`ju bashkuar flotës kompanisë shqiptare të aviacionit civil. Rama shkruan se ky avion do të jetë i standardeve të larta nga “trupa shqiptare e stjuartëve, që nga ushqimi në bord që ishte harruar prej shumë vitesh për udhëtarët e Rinasit dhe me televizor për ço pasagjer, si asnjëherë më parë”, shkruan kreu i qeverisë.

Në fotot e “Migjenit”, shihet se një pjesë e bordit të kabinës së udhëtarëve është e destinuar për udhëtimet e “Business Class”. Ndërkohë, Kryeministri Rama, në postimin e tij në Facebook, shkruan se në fund të këtij viti do të shtohet dhe avioni i tretë i flotës së “Air Albania”, që do të ketë emrin “Naimi”, (një tjetër Rilindasi të shquar), që do të kryejë destinacione të tjera evropiane. Ndërsa më pas, radha do të jetë e “Nolit”, që sipas kryeministrit, do të kryejë linjën direkte Shqipëri-Amerikë.

Në fund, kreu i qeverisë shprehet se flota e “Air Albania” do të zgjerohet me të tjerë avionë në të ardhmen, ndërsa kritikëve u përgjigjet me një shprehje të urtë popullore shqiptare. “Gur gur bëhet mur”. “Më tutje do të vazhdojë zgjerimi i flotës me të tjerë, bazuar mbi suksesin e fazës së parë, po më mirë i’a lemë kohës të na tregojë e të flasë Se gur gur bëhet muri dhe mur pas muri bëhet kalaja thotë Populli; po normal që çdo popull ka të paduruarit e të pagdhendurit e vet, kështu që rroftë puna se ajo mbetet, ndërsa llafet lum kush i duron deri kur t’i marrë era”.

Rama, opozitës: Shani sa të doni, por Air Albania nis fluturimet në Europë

Kryeministri Edi Rama ka njoftuar të premte se pas Stambollit Air Albania do të nisë fluturimet drejt qiejve të shteteve të tjera të Europës Europes.

Me një shënim në faqen e tij në Facebook, ai ka postuar destinacionet dhe çmimet e tyre, ndërsa u ka kthyer përgjigje edhe zërave kritikë.

“Hë tani jepini, filloni shani e përqeshni sa të doni, si zakonisht. Po të paktën, futeni mirë në kokë, se kur unë them KJO DO BËHET, është vetëm çështje kohe, pune, mundimi e durimi, por fjalën time s’e merr kurrë era”, shkruan Rama.

“Nisin me Italinë në fillimvjeshtë, fluturimet e kompanisë kuqezi drejt qiejve të Europës.

Dhe mos e harroni, se nga e thëna në të bërë është në mes një det i tërë; herë i ngushtë e herë i gjerë, herë i qetë e herë me trazime që të vonojnë; nganjëherë edhe me furtuna e tallaze që të ndryshojnë trajektoren, po jo qëllimin nëse nuk dorëzohesh. Prandaj BESIM dhe DURIM miq, se do t’i bëjmë, së bashku, të tëra ato që kemi në dorë t’i bëjmë për Shqipërinë që duam”, premton kryeministri në këtë mesazh drejtuar shqiptarëve, por kryesisht opozitarëve.

Air Albania me destinacione të reja, Rama shpërndan mesazhin me superlativa

Avioni me logon shqiptare Air Albania së shpejti do të nisë fluturimet edhe në destinacione të tjera evropiane përveç Stambollit.

Lajmin e ka bërë të ditur kryeministri Rama, i cili ka shpërndarë edhe një mesazh me superlativa për udhëtimin me Air Albania, dërguar atij nga disa udhëtarë.

Ata shkruajnë se udhëtimi komod me Air Albania i ka bërë ata të ndjehen krenarë që janë shqiptarë.

“I nderuar Z. Kryeminister, unë udhëtoj në gjithë botën, por ishte hera e parë që më rastisi të udhëtoj për në Stamboll me Air Albania. Pasi kisha dëgjuar statuse negative nga “personazhe” të ndryshëm nëpër rrjetet sociale, isha i përgatitur shpirtërisht që mbase në bord nuk do na shërbenin as ujë. Por surpriza ime dhe e gjithë familjes time ishte e madhe që në momentin që hipëm në avion, një Airbus i ri, super komod, me hapësira mes sediljeve, pushuese për këmbët, e gjithfarë komoditetesh, që edhe pasagjerët në klasën ekonomike të udhëtonin sa më mirë! Të mos flasim për shërbimin në bord, ku na u servir ushqim i ngrohtë, i freskët, tepër i shijshëm, i servirur bukur në tabaka. Stjuardesat shumë të sjellshme na flisnin shqip, dhe kudo ishte mbishkrimi “Air Albania”! U ndjemë shumë krenare për këtë gjë në dukje të parëndësishme, por që i shton vlerë vendit tonë të vogël e na bën të ndihemi mirë fakti që edhe një udhëtar i huaj mund të shijojë një udhëtim komod (madje shumë më komod se në shumë linja me emër të madh botëror), – në një avion shqiptar e të thotë: “Bravo Shqipëria!”. E për fat me ne në avion ishte duke udhëtuar edhe i madhi Mr. Rudy Giuliani, e jam i bindur edhe ai ka mbetur i impresionuar nga udhëtimi me linjën ajrore shqiptare! Komplimente Z. Kryeministër, pasi kjo ishte iniciativa juaj dhe e di që ky opinion i sinqertë do t’ju bëjë të ndiheni mirë edhe ju! Ju urojme punë të mbare dhe sa më shumë suksese të tilla! Me respekt, Badush Kajtazi, Xhoana Milloshi dhe Glauk”, shkruhet në mesazhin e shpërndarë nga Rama.