Antishpifja, Balla: Metën e rrëzojmë në Kuvend, presim Venecian

Kryetari i Grupit Parlamentar të Partisë Socialiste, Taulant Balla tha se paketa antishpifje do të dekretohet në parlament dhe se do punohet që rekomandimet e Këshillit të Europës të adresohen për një përmirësim edhe më të mirë të tij. Pavarësisht se ligji është kthyer nga presidenti Meta, Balla tha se dekretet e tij mbrojnë një statukuo, ku shpifja ndaj personit dhe ku dezinformimi publik është kthyer në normë jetese për shumë persona. Balla u shpreh se qeveria ka punuar për këtë ligj me OSBE dhe Këshillin e Europës dhe se do të vijojë bashkëpunimin me çdo organizatë për përmirësimin e legjislacionit “antishpifje” në të ardhmen. Kryetari i Grupit Parlamentar të PS falenderoi Asamblenë e Përgjithshme të Këshillit të Europës që çoi draftin në Komisionin e Venecias, ku pret dhe rekomandimet e vyera të saj për përmirësimin e legjislacionit.

“Dekretet e Presidentit të Republikës mbrojnë një statukuo, ku shpifja ndaj personit ka triumfuar gjerësisht dhe ku dizinformimi publik është kthyer në normë jetese për shumë aktore online, ndërsa bashkëpunimi ynë me OSBE dhe Këshillin e Europës ka synuar dhe do të synojë mbrojtjen e fjalës së lirë e te integritetit njerëzor nga shpifja si edhe te vete publikut nga dezinformimi.

Prandaj ne do t’i rrëzojmë dekretet e Presidentit dhe do të vijojmë bashkëpunimin me çdo organizate brenda e jashtë vendit, për çdo përmirësimin të mundshëm të legjislacionit “antishpifje” në të ardhmen.

Ne jemi në kontakt dhe i falenderojmë kolegët e APKiE që ia kaluan Komisionit të Venecias tekstin dhe mezi presim ta përmirësojmë më tej ligjin me sugjerimet e vyera te Komisionit të Venecias.

Ndërkohë sikurse e kemi thënë, institucionet përkatëse shqiptare do të punojmë ngushtësisht me OSBE për aktet e domosdoshme nënligjore” shkruan Balla në Facebook.

Këshilli i Europës çon “Antishpifjen” në Venecia

Këshilli i Europës ka çuar ligjin antishpifje në Komisionin e Venecias në mënyrë që në të adresohen rekomandimet e saj në ato nene që KiE shprehet se nuk përputhen me standardet europiane për lirinë e mediave. Ka qenë vetë Komisioni i Venecias që ka publikuar në faqen e saj zyrtare kërkesën për dhënien e një opinioni për ligjin Antishpifje, të kërkuar nga Asambleja e Përgjithshme e Këshillit të Europës. Paketa Antishpifje do të shqyrtohet nga Komisioni i Venecias në muajin Mars të cilët do të japin opinion e tyre mbi dy projektligjet që KiE shprehet se ka nevojë për përmirësim.

Paketa është çuar nga Asambleja e Përgjithshme e Monitorimit, strukturë e Këshillit të Europës që monitoron dhe ndihmon vendet anëtare të Këshillit të Evropës të përmbushin premtimet e tyre për të mbështetur standardet më të larta demokratike dhe të të drejtave të njeriut. Pjesë e monitorimit të plotë është edhe Shqipëria, ku përfshihen vizita të rregullta dhe dialog të vazhdueshëm me autoritetet për të siguruar që përparimi dhe problemet e një shteti janë vlerësuar siç duhet.

Paketa “antishpifje” e qeverisë Rama hasi në kundërshti të forta nga gazetarët, opozita, analistët dhe shoqëria civile para se të kalonte në parlament, duke e cilësuar atë si cenim të fjalës së lirë dhe kontroll të qeverisë ndaj mediave. Ligji u kthyer edhe nga presidenti Meta, i cili tha se ai bie në kundërshtim me parimet themelore kushtetuese të ndërtimit të një shteti demokratik, sigurisë juridike dhe të proporcionalitetit.

Dhe pse ky ligj është bërë me konsultim të plotë me OSBE, Këshilli i Europës ka kërkuar disa rishikime të neneve të tij me argumentin se duhen përshtatur sipas standardeve të vendosura nga Gjykata Europiane për të Drejtat e Njeriut dhe nga Këshilli i Europës. Disa nga dispozitat që ky ligj ka hasur në kundërshtim dhe skepticizëm të Këshillit të Europës lidheshin me kompetencat që u janë dhënë organeve rregullatore, mundësia e vendosjes së gjobave të tepërta, bllokimi i faqeve të internetit të mediave pa një vendim gjyqësor, si dhe futja e rregullimit shtetëror të mediave në internet, mund të sjellin një goditje të fortë për lirinë e shprehjes dhe lirinë e mediave në vend.

Një ditë më parë zëdhënësja e Komisionit Europian, Ana Pisonero tha se qeveria duhet të fokusohet në adresimet e bëra nga Këshilli Europian dhe t’i shtojë ato në paketë. KE u shpreh se kthimi i dekretit nga Meta, përbën një rast për qeverinë shqiptare, për të pranuar rekomandimet e këshillit.

“Antishpifja”, KE: Kthimi nga Meta, shans të shtoni dhe rekomandimet tona

Komisioni Europian kërkon që qeveria shqiptare të rishikojë të ashtuquajturën “Paketa anti-shpifje” duke marrë parasysh të gjitha rekomandimet e tyre, pas kthimit të këtij ligji nga presidenti Meta për rishqyrtim. Zëdhënësja e KE-së, Ana Pisonero e pyetur në lidhje me kthimin e “antishpifjes” nga Meta duke e cilësuar antikushtetuese, tha se qeveria duhet të fokusohet në adresimet e bëra nga Këshilli Europian dhe t’i shtojë ato në paketë. KE shprehet se kjo përbën një rast për qeverinë shqiptare, për të pranuar rekomandimet e tij.

“Ne e kemi bërë të qartë se Bashkimi Europian mbështet rekomandimet e Këshillit të Europës në rastin e ligjit të medias në Shqipëri. Ne pranojmë se shqetësimet dhe rekomandimet përkatëse janë sërish të vlefshme dhe ato duhen adresuar sërish. Faktin që presidenti i Shqipërisë ka kthyer ligjin në Parlament e shohim si një mundësi për t’i pranuar ato. Ne shpresojmë që kjo të realizohet”, tha Pisonero.

Në lidhje me vetërregullimin në sektorin e medias, KE tha se e mbështesin këtë dhe është një nga rekomandimet kryesore të Këshillit të Europës.

“Absolutisht që ne e mbështesim këtë. Ne mbështesim disa rekomandime të Këshillit të Europës jo vetëm për promovimin e vetëregullimit. Por ne e mbështesim qëllimin për ta kufizuar qëllimin e rregullimit vetëm për serviset e mediave audiovizive online, trajtimin gjyqësor të pavarur të ankesave lidhur me mediat, forcimin për transparencën e pronësisë së mediave në vend. Pra, ne mbështesim të gjitha rekomandimet e Këshillit të Europës. Ato janë në përputhje me pritshmërinë tonë, që duhet ndjekur nga një vend aspirant”, tha Pisonero.

Antishpifja, Desir konfirmon Ramën: Ligji u konsultua me OSBE

Përfaqësuesi i OSBE për Lirinë e Medias, Harlem Desir ka deklaruar se ligji antishpifje është bërë nga qeveria shqiptare duke u konsultuar me OSBE-në, e cila ka dhënë rekomandimet e saj për mënyrën e trajtimit të keqinformimit duke konfirmuar kështu ato që Rama deklaroi para se ligji të miratohet në parlament.

Të mbledhur në Vjenë, ku Shqipëria merr kryesimin e OSBE dhe pritet që të enjten të paraqesë prioritetet e saj për 2020, Harlem Desir tha para gazetarëve se do të trajtohet edhe ligji për mediat. Desir u shpreh se ka pasur debate të shumta për miratimin e antishpifjes, por shtoi se masat ligjore që lidhen me paketën e keqinformimit janë për rastet e nxitjes së terrorizmit, pornografisë me fëmijët dhe kërcënimin e sigurisë kombëtare.

“Marrja e kryesisë se OSBE nga Shqipëria është një rast i mirë për të folur edhe për ligjin e ri të mediave në Shqipëri dhe paketën anti-shpifje. OSBE ka dhënë rekomandimet e saj për qeverinë në lidhje me ligjin vitin e kaluar dhe kemi mbështetur amendamente të ndryshme për këtë legjislacion në mënyrë që të garantojmë sot lirinë e fjalës dhe shprehjes e cila duhet të respektohet. Në lidhje me debate dhe çështje të ndryshme që lidhen me keqinformim apo shpifjen kjo bazohet në çështje të caktuara siç janë terrorizmi, pornografia me fëmijët dhe çështje e sigurisë kombëtare”, u shpreh Desir.

Përfaqësuesi i OSBE për Lirinë e Medias, Harlem Desir tha se bisedimet me qeverinë do të vijojnë, në mënyrë që të garantohet pavarësia e institucioneve që do të merret me monitorimin e mediave online dhe implementimin e këtij ligji, ndërsa shtoi se AMA-s duhet t’i sigurohet pavarësia për të kryer punën e saj larg ndikimeve politike.

“Kemi diskutuar edhe në lidhje me mënyrën e mbrojtjes së medias në këtë ligj, dhe siç e kam thënë dhe në deklaratat më herët, duam që në këtë pikë të vazhdojmë diskutimet me qeverinë në lidhje me instrumentet ligjore që të jenë të pavarura dhe të përgjegjshme në mënyrë që të mos vënë në rrezik të ardhmen e mediave online. Do të vazhdojmë të punojmë me këtë legjislacion që lidhet edhe me mënyrën e implementimin të saj dhe rolin e AMA-s si një institucion rregullues në mënyrë që të përdorë fuqitë e saj në mënyrë të pavarur dhe e pa ndikuar nga politika dhe të jetë garantuese e lirisë së medias”, tha Desir.

Paketa “anti-shpifje” kaloi në parlament në seancën e tij të fundit për 2019 me shumë debate në foltoren e Kuvendit, ndërsa jashtë tij protestonin gazetarët për mosmiratimin e saj. Ajo u sulmua ashpër pasi konsiderohej mjaft e ashpër për të ardhmen e medias online dhe se cenonte lirinë e fjalës. Një nga pikat më të diskutuara të saj ishte mbyllja e portaleve nga AKEP nëse AMA vendoset se kishte një Fake News, por me amendamentet e fundit në parlament në ligjin e miratuar kjo u ndryshua duke u vendosur se do të bllokohet vetëm lajmi dhe jo portali.