Rindërtimi nga tërmeti, Ahmetaj: Bashkitë duhet të caktojnë zonat ku do ndërtohet

Ministri për Rindërtim Arben Ahmetaj doli të hënën në një konferencë për mediat, ku sqaroi hapat që po ndiqen për procesin e rindërtimit nga tërmmeti. Ahmetaj tha fillimisht se pas tërmetit janë strehuar të gjithë familjet që patën dëmtime apo shtëpitë e tyre u shembën nga tërmeti. “Që nga data 26 nëntor, kemi vazhduar me akomodimin e të gjithë qytetarëve që humbën shtëpinë ose shtëpitë e tyre u përcaktuan si ta pabanueshme”, tha ai. Më tej, Ahmetaj u shpreh se pas kërkesës së Kryeministrit, të gjitha bashkitë në zonat e emergjencës duhet të përcaktojnë zonat ku të rindërtohen lagjet apo banesat e reja për të pastrehët nga tërmeti.

“Bonusi i qirave bën të mundur, që deri në kthim në shtëpi, të mund të jetojnë në shtëpi me qira dhe më datë 2 janar, kryeministri ka kërkuar nga bashkitë në zonat e emergjencës, që të gjithë kryetarët përkatës të bashkive të vazhdojnë procesin e përcaktimit të tokave ku do të ndërtohen qytezat urbane, të cilave kryeministri iu është referuar në vazhdimësi, që janë pjesë e ligjit të posaçëm për rindërtimin. Për 15 deri 20 ditë do të kemi në të gjithë territorin e Shqipërisë ku është përcaktuar ku ka dëmtime, kryesisht në Shqipërinë e mesme, por edhe në Lezhë e Kamëz, pra të gjitha këto bashki janë të detyruara brenda afatit që ka kërkuar kryeministri të sjellin verifikimet e tokave ku do ndërtohen banesat individuale, qytezat urbane siç jemi referuar në ligj të posaçëm”, tha Ahmetaj.

Më tej, Ahmetaj u shpreh se banorët e këtyre zonave (shtëpitë e të cilëve u shembën ose janë shpallur të pabanuara), duhet të aplikojnë pranë bashkive përkatëse. Ministri për Rindërtimin sqaroi se pranë bashkive do të ngrihen platforma të posaçme për aplikimin e qytetarëve. “Është hera e parë që kemi një ligj të posaçëm për një situatë emergjente. Kemi procedurat përkatëse për programin e rindërtimit. Nesër ka një takim të posaçëm me kryetarët e bashkive, ku do të bëjmë një listë të familjeve që kanë humbur shtëpitë dhe që banesat e tyre janë vlerësuar si të pabanueshme ose banesa që kanë nevojë për rikonstruksion. Në bazë të vendimit, duke nisur nga nesër, kryetarët e bashkive duhet të ngrenë platformë aplikimi për qytetarët”.

“Aplikimi do të jetë tepër i thjeshtë. Ju lutem, të gjithë familjarëve që banesat e tyre janë quajtur të pabanueshme ose të dëmtuara, të mund të drejtohen në institucione, kudo të bëhet financimi përmes njësive vendore ose entiteteve që do të autorizohen nga Këshilli i Ministrave. Ky është vendim shtyllë, sepse detyron të gjitha bashkitë që në bazë të tokave që do të caktojnë (ne kemi rekomanduar tokat shtetërore) për 30 ditë tokat ku do të ndërtohet. Pa këto, nuk kalohet dot tek rindërtimi. Ne nuk kemi lënë asnjë qytetar jashtë. Do të bëhen edhe rikonstruksione në bazë të dëmtimeve dhe do kemi grante për këtë gjë”, deklaroi ministri Ahmetaj.

Ndërkohë, ai tha se banesa do të përfitojnë edhe ata që kishin ndërtuar pa leje, por shtëpitë e tyre janë shembur nga tërmeti. “Rindërtimi, që nga shtëpitë tek pallatet apo qytezat urbane që do të ndërtohen dhe palnfiifkohen në Bashki të ndryshme, të gjitha do të kenë bazën kushtetuese ku është e domosdoshme të shpronësimit. Aty ku ka ndërtime pa leje, shteti të marrë përsipër që ajo familje të përfitojë nga programi i rindërtimit, kundrejt kushteve të përcaktuara nga VKM. Komisioni i Rindërtimit, kemi bërë dy mbledhje, tani nëpërmjet vendimi detajohet funksioni i tij”, Ahmetaj.

Meta dekreton Ahmetajn Ministër të Rindërtimit

Ashtu siç kishte paralajmëruar, Presidenti Ilir Meta dekretoi të premten pasdite Arben Ahmetaj në postin e Ministrit të Rindërtimit. Propozimi, për krijimin e Ministrisë së Rindërtimit, u bë të premten nga Kryeminisri Edi Rama. Ai propozoi që postin në këtë ministri të re të ekzekutivit ta merrte ish-ministri i Financave, Arben Ahmetaj, që aktualisht drejtonte dhe Komitetin Kombëtar të Rindërtimit.

“Programi i Rindërtimit dikton hapjen e një vendi të posaçëm edhe në tryezën e Këshillit të Ministrave, ku një ministër i ngarkuar ekskluzivisht me koordinimin e të gjitha institucioneve vendase e ndërkombëtare që lidhen me këtë program,të ndjekë orë e minutë zbatimin e Programit”, shkruajti Rama.

Pas këtij propozimi, reagoi dhe Presidenca që konfirmoi se nuk do të humbte kohë në dekretimin e Ministrit Ahmetaj. Dhe disa orë më pas, Ilir Meta firmosi propozimin e Kryeministrit Edi Rama për emërimin e Arben Ahmetaj në postin e Ministrit të Rindërtimit.

Ky është një nga rastet e pakta, ku Kryeministri dhe Presidenti kanë unifikim të qëndrimeve, duke lënë pas përplasjet e mëdha politike, që nisën me zgjedhjet e 30 qershorit dhe janë ende të hapura me ngërçin e krijuar për emërimet në Gjykatën Kushtetuese. Ministria e Rindërtimit do të ketë detyrën për koordinimin e punës me të gjithë aktorët dhe vënien në lëvizje të të gjithë mekanizmave, për rindërtimin e banesave të shembura nga tërmeti, që kanë lënë pa strehë mijëra familje.

“Banesat e siguruara i paguajnë kompanitë”, Ahmetaj: Deri tani dëmi 12 milionë dollarë

Komiteti i Rindërtimit ka zhvilluar mbledhjen me Autoritetin e Mbikëqyrjes Financiare dhe kompanitë e sigurimeve në lidhje me dëme dhe shpenzimet që duhet të mbulojnë të dëmeve që la tërmeti i 26 nëntorit.

Arben Ahmetaj bëri një bilanc të situatës ku tha se 1943 banesa janë në proces trajtimi nga firmat e sigurimit dhe me një dëm paraprak i bie që kompanitë e sigurimit të paguajnë 12 milionë dollarë Ahmetaj kërkoi nga kompanitë e sigurimit do të paguajnë për dëmet nga tërmeti si dhe të dërgojnë listat e përfituesve, në mënyrë që procesi i rindërtimit të banesave të nis sa më shpejtë.

Kush mendoni se duhet t`i riparojë pallatet e dëmtuara nga tërmeti?

“Ne nuk kemi akoma kulturën për të siguruar banesat nga tërmeti. Tashmë ka një rekord zyrtar që në tërmetin e 21 shtatorit kanë paguar 5 milionë dollarë dhe kanë dëmshpërblyer 70-80% të detyrimeve. Sa i takon tërmetit të 26 nëntorit, nga informacioni që kam ju jeni në proces vlerësimi, por deri më tani dëmet në proces trajtimi ose të dëmtuara janë 1943 banesa. Dëmi total shkon gati 12 milionë dollarë deri më sot. Që do të thotë se kompanitë e sigurimit do paguajnë këtë shumë ndaj qytetarëve. Dëmi mund të shkojë deri në 25 milionë euro sipas informacioneve që kam marrë nga diskutimet tuaja. Dëmi i gjysmës së banesave të dëmtuara shkon në 12 milionë dollarë. Dorëzoni sa më shpejt listat e dëmtuesve pranë komitetit të emergjencës në mënyrë që ata që do merren me rindërtimin të mos kenë kosto dyfish” tha Ahmetaj.

Nga ana tjetër kompanitë e sigurimit u shprehën të gatshme për t’iu përgjigjur të gjithë banorët që kanë paguar siguracionin e shtëpisë.

“Rindërtimi pas tërmetit nuk cenon pagat e pensionet”

Arben Ahmetaj deklaroi, një natë më parë në emisionin “Real Story”, se nuk do të ketë rritje të taksave dhe se programi i rindërtimit nuk do të cenojë as pagat dhe as shërbimet. Këtë deklaratë Ahmetaj, kryetar i komitetit të rindërtimit pas tërmetit, e konfirmoi edhe gjatë seancës parlamentare të së enjtes, ku tha se situata e krijuar pas tërmetit të 26 nëntorit, nuk do të ketë pasojë në buxhetin e shtetit. Ahmetaj tha se edhe pse kostot e rindërtimit pas tërmeti janë të mëdha, kjo nuk do të ndikojë në buxhet, pasi do të zgjidhet përmes një programi specifik dinamik dhe fondeve të mbledhura.

“Nuk do rrisim asnjë taksë, asnjë taksë, në mënyrë direkte as borxhin s’do e rrisim, por do i përgjigjemi në dinamikë duke nisur nga 1 janari me programin specifik të detajuar të ndërtuar nga vetë kryeministri me ndihmën e komisionit të Ekonomisë e Financave për atë që sot prezantohet si programi i rindërtimit. E theksoj është dinamik, s’ka rritje taksash e që ditën e parë nis me gati 200 milionë USD. Fillojmë me 70 milionë dollarë nga donatorët. Të jeni të bindur do shkojë mbi 150 milionë euro mbështetja nga donatorët, shumë shpejt do jetë konferenca e donatorëve iniciuar nga KE. Thelbi është një program i rëndësishëm rindërtimi që do fokusohet te ndërtimi i banesave në Tiranë, Durrës, Thumanë, Lezhë apo edhe diku tjetër. Paralel do ketë për strehim, që në fillesë në buxhet është 1 miliardë lekë. Kosto e akomodimit në hotel sot është 2.4 milion dollarë në muaj që përballohet nga qeveria. Ky buxhet që kalojmë ne sot këtu nuk preket, nuk ulet e nuk cenohen shërbime e paga e pensione, zero, asnjë shërbim publik nuk cenohet, asnjë subvencion”, tha Ahmetaj.

RINDËRTIMI, AHMETAJ: S`DO RRITEN TAKSAT. JA SI DO SIGUROHEN PARATË

“Ke 20 vjet që më ndërpret”, Balla dhe Ahmetaj batuta në “Real Story”

Arben Ahmetaj, Kryetari i Komitetit të Rindërtimit dhe Menaxhimit të Fondeve për tërmetin, ishte i ftuar në emisionin “Real Story” të gazetarit Sokol Balla në News 24. Gjatë shpjegimit të Ahmetaj se si do të veprohet me fondet dhe programin e rindërtimit të objekteve të shkatërruara nga tërmeti nuk kanë munguar as pyetjet e gazetarit Balla. Kjo ka sjellë një situatë batutash mes tyre, ku Ahmetaj i ka kërkuar të mos e ndërpres më kur flet, pasi ka 20 vjet që e bën.

“Çe ke këtë maninë të më ndërpresësh. Ke 20 vjet me mua dhe të njëjtën gjë bën gjithmonë , më ndërpret”, u shpreh Ahmetaj, situatë që ka shkaktuar të qeshura mes tij dhe gazetarit Sokol Balla, i cili shtoi se “e lanë që nuk do bëjnë debat, kështu që nuk po kthen përgjigje”.

Sigurisht që batuta nuk ngelën këtu pasi Arben Ahmetaj tha se do të bëjë një emision të tij ku do të ftoj gazetarin Balla dhe nuk do e lë të flasë duke i kthyer “borxhin”.

“Pas një viti do bëj një emision, ku do të ftoj ty (Sokol Ballën), dhe nuk do të lë të flasësh, që të ta kthej se ma ke nxirë…sa herë më sjell në emision ma ndërpret,” tha Ahmetaj/ Real Story

Ahmetaj: I bindur, “Po” dhe nga Franca e Holanda

Ish ministri i Financave Arben Ahmetaj tha se është shpresëplotë se edhe vendet e tjera skeptike në lidhje me Shqipërinë, si Franca apo Holanda do të japin “PO” për hapjen e negociatave ashtu siç bëri Gjermania. Në lidhje me kushtet e vendosura nga Gjermania, Ahmetaj i cilësoi si detyra shtëpie për vendin dhe jo kryeministrin Rama, duke theksuar se puna e qeverisë është vlerësuar deri më tani. Ajo që prite, tha Ahmetaj është që të vijojë bashkëpunimi institucional dhe me opozitën jashtëparlamentare për të ecur përpara me reformën zgjedhore.

“Pres një po më 17-18 tetor për hapjen e negociatave. Kushtet mendoj se do jenë në tavolinë. Pozicioni i Bundestagut do jetë ky edhe në KiE. Franca përtej atij emocioni negativ ndaj hapjes ka qëndrim shumë pozitiv ndaj Shqipërisë. Holanda ka pasur idenë se shqiptarët janë grupi më i madh kriminal, por kur panë statistikat ndryshoi stereotipi. Unë besoj se do marrim një ‘Po’ nga Franca dhe Holanda, të formatit siç po bën Gjermania. Këto janë kushte për vendin, nuk janë kushte për Edi Ramën. Edi Rama i ka plotësuar kushtet e veta si qeveri sepse komisioni i ka dhënë ‘OK’ si qeveri”, tha Ahmetaj për News 24.

Në lidhje me ecurinë e reformave në vend, Ahmetaj tha se Shqipëria është maturuar për të hapur negociatat duke përmirësuar reformat e saj dhe institucionet. Një vendim pozitiv nga Gjermania nuk erdhi për shkak të dashurisë tha Ahmetaj, por për shkak të maturimit të vendit. Ai bëri thirrje opozitës që të heqë dorë nga kushtet irracionale dhe të ulet në tryezën e dialogut për reformën zgjedhore.

“Kjo mbështetje nuk vjen rastësisht vetëm nga dashuria, që patjetër ekziston, por se Shqipëria është maturuar për të hapur negociatat. Maturuar me reformat e thella për përmirësimin e institucioneve. Patjetër që i prisja dhe kushtet. Po t’i shohësh kushtet nuk është dëshira e Bundestagut për të vënë disa kushte por janë e mira e Shqipërisë. Miratimi i reformës zgjedhore është betejë e përbashkët e opozitës dhe pozitës. Kryeministri nuk ka thënë asnjëherë jo. Është ftuar opozita jashtë parlamentare të marrë vendet e veta në komisionin e reformës zgjedhore, të thotë fjalët e veta. Opozita ka përgjegjësinë të mbajë ‘check and ballance’ qeverinë. Unë mendoj që opozita e ka atë racionalitet, të heq dorë nga ato kushte që i konsideroj irracionale, diku-diku të stisura e të ulet të dialogojë në të mirë të vendit.” u shpreh Ahmetaj

Ahmetaj zbulon planin e opozitës: Pas protestave të dhunshme, do ulen përballë Ramës, kryeministër

Deputeti socialist, Arben Ahmetaj shprehet i bindur se opozita do të ulet përballë Ramës kryeministër, në tryezën e dialogut, pavarësisht thirrjeve “Rama ik”.

Në një intervistë për News 24, Ahmetaj tha se hapat e opozitës në vijim do të jenë organizimi i protestave deri diku të dhunshme dhe përpjekjeve për mos hapjen e negociatave, por në fund do të ulen në bisedime me Ramën.

Ai e bën këtë deklaratë duke iu referuar edhe bisedave me kolegët nga opozita, për disa prej të cilëve thotë se ka respekt.

“Duke njohur opozitën tonë, nuk mund ta them shumë mirë se kur do të kemi tryezë dialogu. Me një pjesë të mirë prej tyre (opozitarëve) ne bashkëbisedojmë me respekt për njëri -tjetrin. Bazuar në këtë unë mendoj se opozita do tentojë ta ashpërsojë betejën politike me protesta. Mund t’i bëjë ato edhe gjysmë të dhunshme, për të na treguar se ne kemi mundësi ta bëjmë këtë. Ata do ta bëjnë këtë në funksionojnë të mos hapjes së negociatave. Ata do të përpiqen ta bëjnë këtë sepse nuk duan që të hapen negociatat me BE. Por pas asaj ne jemi të bindur se do ketë tryezë dhe në atë tryezë të jeni të bindur edhe ju, se ata (opozita) përballë do të kenë kryeministrin Rama”, deklaroi Ahmetaj.

Deri tani përfaqësuesit e opozitës, përfshirë dhe kreun e PD-së Basha, këmbëngulin në sloganin “Rama ik” dhe në aksionin opozitar që do të vazhdojë gjatë gjithë verës, që synon largimin e Ramës përmes protestave. Por Basha ka treguar edhe më herët se ndryshon qëndrim herë pas herë në varësi të ofertave që i parashtrohen, siç ishte rasti i marrëveshjes së 17 majit dy vite më parë. Kështu që një tërheqje e opozitës nga kërkesa për largimin e Ramës nuk duket si një e pamundur.