Problemet me pronat, Lame: Në disa zona toka del me 4 pronarë

Kreu i Agjencisë Kombëtare të Kadastrës Artan Lame tha se problemet dhe parregullsitë me pronat janë të shumta, disa janë bërë evidente nëpër media dhe disa janë ende në shqyrtim e sipër. Gjatë një bilanci të punës së Kadastrës për 6 muajt e parë, Lame tha se në kohën kur prona pritej t’i kthehej të zotit, në fakt me të u abuzua më shumë se në kohën e diktaturës. Lame tha se problematikat më të mëdha shfaqen në zonat që kanë potencial ekonomik në zhvillim dhe në bregdet, ku në disa raste një pronë del me 4 pronarë. Lame foli se situata të tilla i kemi dëgjuar tashmë në kadastrat e Vlorës dhe Durrësit ku janë bërë disa largime e dhënë dorëheqje si dhe arrestime për abuzim me pronën. Lame tha se këto problematika do të vijnë e të shtohen sidomos për vijën bregdetare, me të cilën është abuzuar shumë.


Në këta 6 muaj operim të Kadastrës së re Shqiptare, janë kryer 30 audite, kontrolle dhe verifikime nëpër të gjitha drejtoritë vendore. Janë marrë 120 masa, përfshirë edhe largimet nga detyra, madje si një risi e jona, të gjitha masat janë shoqëruar edhe me vendosje gjobash ndaj punonjësve. Janë trajtuar në këta muaj rreth 7500 ankesa nga publiku dhe nga institucione të ndryshme, ku pjesa dërmuese ka sfond grabitjen e të drejtës së pronës. Harta e abuzimeve me pronat përfshin të gjithë territorin e Republikës së Shqipërisë, por është e kuptueshme që këto abuzime dendësohen në zonat me interes ekonomik, pra pikërisht në zonat ku vendi dhe ekonomia duhet të tregohen më të hapura ndaj investimeve, zhvillimeve dhe iniciativës së lirë. Do të përmendja këtu zonat bregdetare përgjatë gjithë Jonit dhe Adriatikut, apo zona të tjera me fluks ekonomik si ato përreth qyteteve të mëdha dhe veçanërisht Tiranës, Durrësit dhe Elbasanit. Paralajmërova se problematika si ato të Vlorës do të bëhen publike edhe në zona të tjera. Do të ndeshen në Sarandë, përgjatë Rivierës së Jonit, në të gjithë Gjirin e Durrësit, ku pikërisht këto ditë organet ligjzbatuese kanë ndërmarrë veprimet e para, nisur edhe nga indicie të bëra nga ana e Agjencisë Shtetërore të Kadastrës. Më tej, do t’i ndeshim këto problematika në Gjirin e Lalzit dhe në bregdetin e Shëngjinit, ku edhe bankina e Portit ka dal me pronar. Do t’i ndeshim këto problematika në Bregdetin e Velipojës, ku si tokë buke janë ndarë dhe pjesë e kënetave që prej mijëra vjetësh janë nën ujë.” tha Lame

Kreu i Kadastrës Artan Lame tha se gjithë këto denoncime të abuzimeve me pronën bëhet që të pakësohen konfliktet sociale si dhe t’u jepet një mesazh i qartë të gjithë punonjësve të këtij sekreti të qëndrojnë larg aferave të tilla.


Nuk përbën asnjë kënaqësi për ne të denoncojmë raste, apo punonjës tanët, të cilët në vite janë përzier në këtë llum. E bëjmë këtë sepse është e vetmja mënyrë që, nga njëra anë të pakësojmë konfliktet sociale dhe të ndikojmë në vendosjen e drejtësisë së pronës; dhe, nga ana tjetër, të japim mesazhin punonjësve të këtij sektori, të mos përzihen në afera të tilla. Më tej, si deri më sot, ne do të vazhdojmë të bashkëpunojmë me të gjitha organet dhe agjencitë ligjzbatuese, për të bërë të mundur që në fund të këtij procesi të kemi një regjistër prone të saktë dhe një institucion të besueshëm ndaj qytetarëve.” deklaroi në një konferencë për shtyp Lame.


“Skandale pronash në Vlorë, Durrës, Elbasan e Shkodër”

Artan Lame, kreu i Agjencisë Shtetërore të Kadastrës, komentoi nga Elbasani dorëheqjet e tre drejtuesve në Kadastrën e Vlorës. Sipas numrit një të kësaj agjencie, probleme të tilla do të ketë në shumë qytete, por, në Vlorë, sipas Artan Lames, mungon “durimi”. “Probleme si ky i Vlorës do të dëgjonin në shumë qytete të tjera. Ndoshta për fat të keq, që sot jemi në Elbasan për të mbyllur legalizimet, do dëgjoni probleme si ky i Vlorës edhe në Elbasan. Po dëgjoni në Durrës, do dëgjoni në Shkodër, për fat të keq do të dëgjoni edhe në Sarandë. I vetmi ndryshim i Vlorës me qytetet e tjera, është ajo, që siç thotë kryeministri Rama, nuk gjen në Vlorë njeri që quhet “Durim”, tha Lame.  


Megjithatë, sipas kreut të Agjencisë Shtetërore të Kadastrës, probleme të kësaj natyre vijnë pasi “ka rënë piramidat e vjetra të ndërhyrjeve, dhe askush s`mund të mbrojë paligjshmërinë”. “Janë  më të padurueshëm se të tjerët, probleme të tilla do të dëgjoni ngado për një arsye shumë të thjeshtë: kanë rënë  piramidat e vjetra të ndërhyrjeve dhe të pushtetit dhe tashmë nuk ka askush që të mbrojë paligjshmëritë dhe gjërat e bëra keq në njëzet e ca vjet. Kjo është e gjitha nuk asnjë arsye tjetër. Do të dëgjoni shumë shpejt problematika të tilla në të gjithë Shqipërinë”, tha Lame.  

Nga agjencia e Kadastrës në qytetin e Vlorës, janë dorëhequr tre drejtues brenda një muaji. Së fundi, në datën 8 tetor dha dorëheqjen drejtoresha Elona Hodaj dhe zëvendësdrejtori Krenar Xhemali. Shkak është bërë një pronë në Jalë, e cila dyshohet se i është tjetërsuar një qytetari dhe i është dhënë një tjetri. Ndërkohë, për çështjen në fjalë nisi dhe një hetim në fillim të muajit shtator. Artan Lame i bëri këto deklarata nga qyteti i Elbasanit, ku shpërndau lejet e legalizimit për 134 familje.



Kadastra hap 74 vende pune, Lame, deputetëve: Mos ndërhyni për qoka

Kreu i Kadastrës, Artan Lame ka njoftuar të mërkurën hapjen e 74 vendeve të lira të punës në këtë Agjenci ndërsa u ka drejtuar një apel deputetëve, ministrave dhe të gjithë miqve të tij duke përfshirë gruan dhe prindërit, që të mos i kërkojnë qoka për punësime.


“Ju lutem të gjithë miqve, të njohurve, të afërmve përfshirë gruan dhe prindërit e mi, kushërinjve, deputetëve e ish-deputetëve, ministrave e ish-ministrave, të majtë e të djathtë e të qendrës, ju lutem mos më ndërhyni për punësime. Shteti shqiptar, kadastra shqiptare dhe unë duam profesionistë, jo miq.

Në Kadastër ka me qindra profesionistë kokëulur, ka me dhjetëra shefa e drejtorë që janë bërë të tillë pa futur mik, por thjesht me forcat, krahët dhe mendjen e tyre.


Të gjithë kërkojmë të zgjidhim nyje e pronës dhe nyja e pronës zgjidhet vetëm me profesionalizëm; dhe pastaj, të njëjtët njerëz që ankohen për çfarë kanë hequr, më kërkojnë me aman e me derman të fus në punë njërin a tjetrin jashtë profilit.

O më thoni të bëj Kadastrën, o më thoni të bëj qokat e miqtë, të dyja nuk bëhen dot! Së bashku po e nisim edhe këtë reformë dhe vetëm së bashku mund ta çojmë atë përpara”, është shprehur Lame.

Përsa i përket vendeve të lira të punës, ai ka njoftuar se më së shumti kërkohen inxhinierë, urbanistë, topografë etj.

Lame ka thënë se sfidat kryesore të Kadastrës sot janë dy: E para, avancimi i rishikimit hartografik të gjithë problematikave në rang vendi. E dyta, ngritja e nivelit profesional të punonjësve tanë.

“Pra sot unë po lajmëroj hapien e garës për punësimin e 74 specialistëve në strukturën e AKSH me profesione: Inxhinier ndërtimi; Arkitekturë; Urbanistikë; Gjeoinformatikë; Gjeodezi; Topografi.

Saktësoj, jo punonjës me kontratë, por punonjës në strukturë.

Në veçanti, dua t’i bëj një thirrje dy kategorive. Në radhë të parë, djemve e vajzave që kanë vullnet për punë, të vijnë dhe të konkurrojnë dhe të kenë besim tek unë dhe tek forcat e tyre”, tha Lame.