Rrëzimi i avionit, Trudeau, urdhër Iranit: Dërgo në Francë kutitë e zeza

Kryeministri kanadez, Justin Trudeau i kërkoi Teheranit të dërgojë kutitë e zeza të avionit të linjës ukrainase, goditur gabimisht më 8 janar nga Teherani, drejt një laboratori në Francë për analizë.

“Vetëm disa vende si Franca kanë laboratorë të aftë për ta bërë këtë”, deklaroi Trudeau në një konferencë shtypi, “Ky do të ishte vendi i duhur për të dërguar këto kuti të zeza dhe për të marrë informacionin e duhur sa më shpejt dhe për këtë inkurajojmë autoritetet iraniane të pranojnë ta bëjnë.”


Nga 176 persona në bord, që të gjithë kanë humbur jetën në këtë tragjedi, 63 ishin qytetarë kanadezë.

“Kutitë e zeza janë dëmtuar rëndë dhe është shumë e rëndësishme që ato të ekzaminohen sa më shpejt që të jetë e mundur”, shtoi Trudeau.

Ai bëri me dije se familjet e 63 viktimave do të marrin nga 25 mijë paund, ndërsa shtoi se priste që këtë ta bënte Irani.

‘’Ndihma për shërbimet funerale dhe transportimin e trupave do të merret në ditët në vijim. Dua të jem i qartë, prisnim që Irani t’i kompensonte këto familje. Por i kam takuar familjarët. Nuk mund të presin me javë. Duan ndihmë dhe mbështetje tani. Nuk kemi parë ende se çfarë kompensimi të plotë do të bëjë Irani, por unë dua t’ju siguroj se çdo para që vjen nga Irani për familjet e viktimave do të shkonte direkt tek ata, dhe jo për të rimbursuar qeverinë kanadeze’’- tha Trudeau.


Kryeministri kanadez: Burime të zbulimit tregojnë se avioni u rrëzua nga Irani

Kryeministri kanadez Justin Trudeau tha të enjten se ka prova që tregojnë se ishte një raketë iraniane ajo që rrëzoi aeroplanin ukrainas me pasagjerë dhe se goditja mund të ketë qenë e paqëllimshme, siç tha ai.

Zoti Trudeau tha se pohimet e tij mbështeten tek burimet kanadeze të zbulimit dhe ato disa vendeve aleate, por ai nuk dha më shumë detaje.


Komentet e kryeministri kanadez pasojnë pohimet e bëra nga zyrtarë amerikanë më herët gjatë ditës së enjte se aeroplani i Ukrainës që u rrëzua në Iran, duke lënë të vdekur të 176 personat në bord, me shumë gjasë u rrëzua aksidentalisht nga një raketa anti-ajrore iraniane.

Një zyrtar amerikan i konfirmoi korrespondes së VOA në Pentagon, Carla Babb se ai është i sigurt se ishte Irani që e rrëzoi avionin ukrainas dhe se sigurinë e tij e bazon tek zbulimi amerikan.

Sipas të dhënave satelitore, tha një zyrtar amerikan, vetëm dy minuta pas nisjes së avionit Boeing 737-800 të linjave ndërkombëtare të Ukrainës, i cili ishte ngritur nga aeroporti i Teheranit dhe udhëtonte drejt Kievit, u diktuan shenja nxehtësie të dy raketave tokë-ajër.

Kjo u pasua menjëherë nga një shpërthim në afërsi të aeroplanit, tha zyrtari. Të dhënat e nxehtësisë treguan më pas aeroplanin që kishte marrë zjarr dhe po binte.

Kreu i aviacionit civil të Iranit u citua nga Agjensia e Lajmeve ISNA të thoshte se ishte “e pamundur që një raketë të kishte goditur aeroplanin ukrainas”.

Sipas dy zyrtarëve amerikanë, Uashingtoni beson se rrëzimi i avionit, i cili ndodhi në një kohë të rritjes së tensioneve midis Iranit dhe Shteteve të Bashkuara, ishte aksidental.

Kompania Boeing dhe Administrata Federale e Aviacionit nuk pranuan të komentojnë. Po ashtu edhe Pentagoni.

Presidenti Donald Trump la të kuptohet se ai besonte që Irani të ishte përgjegjës dhe nuk fajësoi drejtpërdrejt Iranin, por hodhi poshtë pohimet iraniane se rrëzimi ishte një çështje mekanike.

“Dikush mund të ketë bërë ndonjë gabim nga ana tjetër,” tha Presidenti Trump, duke vënë në dukje se avioni ishte duke fluturuar “në një rajon mjaft të vështirë”.

“Disa njerëz thonë se ishte mekanik,” shtoi zoti Trump. “Unë personalisht nuk mendoj se ishte ky problemi, as që bëhet fjalë”.

Ekuipazhi i avionit nuk kërkoi ndihmë me radio dhe po përpiqej të kthehej për në aeroport kur avioni që po digjej filloi të binte, thuhej në një raport fillestar hetimor të Iranit të publikuar të enjten.

Raporti iranian lë të kuptohet se diçka e papritur goditi avionin Boeing 737 të operuar nga kompania Ukrainian International Airlines mëngjesin e të mërkurës. Avioni u rrëzua vetëm disa minuta pasi u ngrit nga Aeroporti Ndërkombëtar Imam Khomeini në Teheran.

Hetuesit nga Organizata e Aviacionit Civil të Iranit nuk ofruan asnjë shpjegim për katastrofën. Zyrtarët iranianë fillimisht fajësuan një mosfunksionim teknik për rrëzimin, diçka që u mbështet në fillim nga zyrtarët ukrainas. Por më pas ata thanë se nuk donin të shprehnin hamendje ndërkohë që hetimi ishte në vazhdim./VOA/


Rrëzohet aeroplani në Kazakistan, vdesin 12 persona

Një aeroplan me 98 njerëz në bord u rrëzua menjëherë pas ngritjes në Kazakistan, duke vrarë të paktën 12 njerëz, thanë zyrtarët kazakë.

Ndërkohë 54 persona janë të shtruar në spital me lëndime, ndërsa të paktën 10 prej tyre janë në gjendje kritike.


Shkaku i përplasjes në vendin e Azisë Qendrore ishte i paqartë, por autoritetet po shohin nëse gabimi i pilotit ose një dështimi teknik ishin faktorë të rrëzimit, tha zëvendëskryeministri i Kazakistanit Roman Sklyar.

Avioni i kompanisë Bek Air goditi një mur betoni dhe një ndërtesë dykatëshe pas ngritjes nga Almaty, qyteti më i madh dhe kryeqyteti i Kazakistanit. Një i mbijetuar tha se avioni filloi të dridhej dy minuta pas ngritjes.

“Në fillim krahu i majtë kërceu vërtet shumë, pastaj djathtas. Avioni vazhdoi të fitojë lartësi, duke u tronditur mjaft rëndë, dhe pastaj u rrëzua”, tha Aslan Nazaraliyev, një nga pasagjerët që i mbijetoi rrëzimit.


Video/ 342 pasagjerë tmerrohen, avioni merr flakë në fluturim

Një avion Boeing 777 i Philipine Airlines, që fluturonte nga Los Angeles për në Manila, u detyrua të kthehej përsëri në pistë pasi një nga motorët e tij mori flakë. Avioni sapo ishte nisur nga Aeroporti Ndërkombëtar i Los Angeles, ndërsa pak pasi la pistën, pasagjerët u bënë dëshmitarë të zhurmës dhe flakëve që dilnin nga motori i dytë i aeroplanit.

Ekuipazhi i avionit shpalli gjendjen e emergjencës dhe u autorizua të ulej në pistë. Avioni u ul në mënyrë të sigurtë rreth 12 minuta pas nisjes, ndërsa zjarrfikësit e aeroportit shuan zjarrin në motor. Asnjë nga 342 pasagjerët dhe 18 anëtarët e ekuipazhit në bord nuk u dëmtua.


Being 777 ka dy motorë GE90-115. Prodhuesi i motorëve GE Aviation u shpreh për Associated Press se ishte informuar për incidentin dhe po punonte me kompaninë ajrore për të përcaktuar shkakun e incidentit.


Telashe për Boeing. Një tjetër model avioni me probleme

Linja ajrore australiane Qantas, nxori nga flota e saj një Boeing 737 NG, pasi zbuloi një plasaritje në një seksion të tij. Linja ajrore po inspekton avionët e flotës së saj model 737 NG, pasi zbuloi në njërin prej avionëve se një zonë afër krahut ishte e prirur të plasaritej. Megjithatë, Qantas tha se: “Edhe kur një çarje ndodh, ajo nuk rrezikon menjëherë sigurinë e avionit. Ne kurrë nuk do të përdorim një aeroplan nëse ai nuk është plotësisht i sigurt”.

Plasaritja është konfirmuar dhe nga kompania Boeign, që konstatoi se çarja ishte në vendin ku bashkohet krahu me pjesën tjetër të trupit të avionit. Muajin e kaluar, institucionet e aviacionit në SHBA urdhëruan kontrolle në të gjithë avionët që kishin bërë më shumë se 30 mijë fluturime.


Pas këtij incidenti, kompania Boeing ndodhet nën presion. Ngjarja ndodh vetëm pak kohë pasi dy avionë Boeing 737 Max pësuan aksidente fatale, për shkak të problemeve në sistemin elektronik.

346 njerëz vdiqën në Indonezi dhe Etiopi brenda pak muajve, për shkak të rrëzimit të 737 Max. Të mërkurën, shefi ekzekutiv i Boeing Dennis Muilenburg u tha ligjënëvësve amerikanë se kompania kishte gabuar në lidhje me flotën e avionëve 737 Max.

Modeli 737 NG është pararendës i 737 Max. Qantas u shpreh se do të inspektojë të 33 aeroplanët në flotën e saj për të njëjtin problem. Ndërkohë Shoqata e Inxhinierëve të Avionëve në Australi, bëri thirrje që Qantas të largojë nga flota e saj modelet 737 NG, por kompania e ka refuzuar këtë. Ndërkohë, kompania amerikane Southwest Airlines kohët e fundit zbuloi një çarje në një nga aeroplanët e saj 737 NB.


Rrëzohet avioni me 42 pasagjerë në SHBA

Një aeroplan PenAir që mbante një ekip noti të një shkolle të mesme në Alaska pësoi aksident. Si pasojë e aksidentit, mbeti një person i vdekur, pasi avioni doli nga pista në një qytet të vogël në Alaska, afër Detit Bering. Viktima e aksidentit të avionit është një 38-vjeçar nga Uashingtoni.

Ndërkohë, 11 nga 42 personat në bord janë plagosur, dy prej të cilëve kanë marrë dëmtime të rënda. Një hetues i aksidenteve të Administratës Federale të Aviacionit, u shpreh se kanë nisur hetimet për aksidentin, por pa dhënë shpjegime rreth shkaqeve të tij. Avioni doli nga pista rreth orës 5:40 me orën lokale të Alaskas në rrethana të panjohura.


Veç personit që humbi jetën dhe 11 të tjerëve të plagosur, asnjë nga fëmijët e ekipit të notit që ishin në bord, nuk u lëndua. Zyrtari i shkollës është shprehur se “fëmijët ishin mirë dhe hëngrën pica pas aksidentit”, megjithëse shtoi ai “ata janë të tronditur”. Dëshmitarët okular në vendin e ngjarjes, janë shprehur se avioni përfundoi rreth 500 metra larg pistës, afër një liqeni të vogël.


Avioni F-16 bie në tokë, piloti mbetet në “qiell”

Një aeroplan luftarak i forcave ajrore belege F-16 është rrëzuar në Francën veri-perëndimore. Fatmirësisht, dy pilotët janë hedhur me parashutë nga aeroplani, teksa njëri prej tyre mësohet se ka mbetur i bllokuar në një linjë të energjisë elektrike me tension të lartë.

Mediat franceze thonë se përplasja ndodhi në zonën e Pluvigner. Paraprakisht raportohet se një nga pilotët ka zbritur në tokë i sigur dhe mirë, ndërsa për tjetrin forcat e shpëtimit po punojnë që ta largojnë nga përcjellësit e tensionit të lartë.


Linja e energjisë me tension të lartë është 250 mijë volt, njoftuan mediat lokale. Agjencia e lajmeve franceze Le Telegramme postoi një foto nga një distancë e madhe, e cila tregonte parashutën që varej në linjën e energjisë në një shtyllë të madhe. Avioni nuk mbante armë gjatë fluturimit të tij, thanë zyrtarët.


Aksident tragjik, avioni rrëzohet mbi pishinë, vdesin të gjithë pasagjerët

Të paktën 9 persona kanë humbur jetën pas rrëzimit të një avioni në Filipine. Aksidenti ka ndodhur të dielën në afërsi të Manilas. Mësohet se të gjithë personat që ndodheshin në bordin e avionit kanë vdekur.

Mësohet se ka qenë një avion ambulancë, i cili po transportonte disa persona, kur është rrëzuar pranë një zone turistike në afërsi të kryeqytetit, Manila. Avioni ka rënë pranë një zone të banuar, ndërkohë që në momentin e përplasjes në tokë, janë goditur dhe dy persona të tjerë. Avioni i vogël raportohet se u rrëzua në fshatin Miramonte në Barangay.


Nga kërkimet deri në fundin e ditës së diel në mbrëmje, ishin gjetur nëntë trupa të viktimave. Tetë prej këtyre personave mësohet se kanë qenë në aeroplan, ndërsa personi tjetër është viktimë e goditur në tokë gjatë kohës së përplasjes së avionit. Ndërkohë që mësohet se një tjetër person ka mbetur i plagosur.

Një zyrtar i policisë lokale në zonën ku është rrëzuar avioni, është shprehur se mjeti flutures ka rënë në një resort me pishina. Hetuesit ende nuk kanë dalë me një deklaratë zyrtare rreth shkaqeve të aksidentit ajror, ndërkohë që avioni ishte zhdukur nga radarët disa minuta përpara se të rrëzohej në tokë.

https://twitter.com/PhilippineStar/status/1168121557530492928?ref_src=twsrc%5Etfw%7Ctwcamp%5Etweetembed%7Ctwterm%5E1168121557530492928&ref_url=https%3A%2F%2Fgulfnews.com%2Fworld%2Fasia%2Fphilippines%2F9-killed-in-philippines-air-ambulance-crash-near-manila-authorities-1.1567341864411

Helikopteri përplaset me avionin, 5 të vdekur në ishullin turistik

Të paktën pesë persona kanë mbetur të vdekur nga përplasja e një helikopteri me një aeroplan të vogël në Majorka. Ngjarja ka ndodhur këtë të diel, teksa mësohet se tre personat në helikopter dhe dy në aeroplan, kanë mbetur të vdekur. Policia ka njoftuar se mes viktimave është dhe një i mitur.

Rrëzimi ndodhi në orën 13:35 me orën lokale të Majorkas. Ekipet e emergjencës kanë shkuar në vendin e ngjarjes, por pamundur të shpëtojnë jetë njerëzish. Ndërkohë autoritetet kanë nisur një hetim për aksidentin, i cili ndodhi në qytetin Inca. Ende nuk dihet kombësia e viktimave të aksidentit, ndërsa mediat lokale raportojnë që ata mund të jenë turistë.


Majorka është një nga ishujt e preferuar për turistët në Spanjë. Presidentja e ishujve Balearik, Francina Armengol, ka shkruajtur në rrjetet sociale, duke u shprehur se “po e ndjekim me shqetësim aksidentin ajror”, duke theksuar se “ka mbetur e tronditur”.

Mediat lokale raportojnë se aksidenti ka ndodhur në ajër, por pas përplasjes në tokë, ka pasur shpërthim të madh të dy mjeteve fluturuese.


Panik në Romë, avionit i shkëputen pjesët në fluturim, bien mbi makina dhe shtëpi banimi

Një dëmtim teknik në motorin e avionit Boeing 787, i linjës ajrore norvegjeze, për pak sa nuk ka shkaktuar një tragjedi në aeroportin Fiumicino të Romës. Mediat raportojnë se pjesë metalike me përmasa të ndryshme, u shkëputën nga motori i avionit vetëm pak pas ngritjes së tij nga pista e aeroportit të Romës.

Metalet ranë fuqishëm në tokë duke u përplasur mbi makina apo mbi çatitë e shtëpive shumë pranë aeroportit të Fiumicinos, por fatmirësisht pa pasoja në njerëz.


Lajmi është konfirmuar, sipas Euroneës, nga një zëdhënëse e linjës ajrore Norvegjeze, e cila është shprehur se fluturimi nga Roma në Los Angeles “duhej të kthehej në aeroportin e Fiumicino për shkak të indikacioneve për dëme teknike të njërit prej motorëve”.

Ajo ka shtuar se avioni është ulur në mënyrë të sigurt. Ndërsa drejtori i aeroportit të Fiumicinos, ka postuar në faqen e tij në Facebook pjesë metalike të avionit, të gjetura në tokë. Ai ka shkuar se ky incident, fatmirësisht pa viktima, ka konfirmuar edhe njëherë temën e sigurisë në aeroport dhe problemin e pistave të ndërtuara pranë qyteteve.


Skip to toolbar