Merkel dhe Conte kërkojnë zgjidhjen e problemeve me migrantët

Kancelarja Merkel dhe kryeministri italian, Giuseppe Conte kërkuan bashkëpunim më të ngushtë në çështjen e shpërndarjes së migrantëve. Krerët e qeverive u takuan për herë të parë në Romë.

Evropa ende nuk ka ndonjë marrëveshje konkrete për migrantët e shpëtuar në deti, deklaroi kancelarja gjermane Angela Merkel, gjatë vizitës në Romë. Pas takimit me kryeministrin italian Conte ajo tha se disa vende kanë bërë hapin e parë në takimin e fundit në Maltë, që të arrihet një zgjidhje e qëndrueshme dhe jo vetëm “zgjidhje ad-hoc”. “Por ka mbetur edhe shumë për t’u bërë, deri në arritjen e zgjidhjes definitive për shpërndarjen e migrantëve dhe refugjatëve në mbarë Evropën. Kërkohet më shumë vullnet tek vendet anëtare, për pjesëmarrje në këtë shpërndarje”, tha Merkel.

Conte mendon se vendet e BE duhet t’i plotësojnë obligimet

“Qëllimi përfundimtar është që vendet e Bashkimit Evropian të punojnë së bashku”, deklaroi kryeministri italian, Giuseppe Conte. Gjermania po angazhohet shumë dhe ajo e ka mbështetur shumë Italinë në këtë drejtim, theksoi Conte, i cili e falënderoi Gjermaninë për këtë mbështetje. Në shtator të këtij viti, ministri i Brendshëm Horst Seehofer deklaroi në Malta se Gjermania dhe Franca duhet të respektojnë marrëveshjet për marrjen e njerëzve të shpëtuar nga anijet. Por kjo nuk ka ndodhur gjithmonë. Ndaj anijet me migrantë me ditë të tëra detyrohen të presin për hyrje në portet bregdetare.

Si një strategji afatgjatë ai theksoi nevojën e luftimit të shkaqeve për ikjen e refugjatëve dhe migrantëve nga vendet e tyre. Për këtë kërkohet stabilitet politik dhe ekonomik në Libi dhe vendet tjera afrikane. Conte do të marrë pjesë në një konferencë që do të organizohet javën që vjen në Berlin, me përfaqësues të vendeve afrikane. Qëllimi është ndër tjera të vendosja e paqes së plotë dhe stabilizimi i Libisë.

Merkel: “Jemi duke punuar në këtë drejtim”

Merkel kërkoi një bashkëpunim më të mirë me rojet bregdetare të Libisë. Në këtë vend afrikan kërkohet të punohet shumë për përmirësimin e gjendjes. Përgatitja e njerëzve në Libi është e një rëndësie të madhe, theksoi Merkel. Këtu duhet të aplikohen standardet e nevojshme, të cilat nuk aplikohen në të gjitha rajonet e vendit. Jemi duke punuar në këtë drejtim, për përmirësimin e gjendjes, theksoi Merkel duke shtuar se njerëzit duhet të shpëtohen nga rreziku i udhëtimeve tepër të rrezikshme ku mund të humbasin edhe jetën./DW/

Shpëtimi i Alvinit, Conte: Për punë orësh bashkohet me të atin

Shpëtimi i Alvin Berishës nga kampi në Siri Al-Haul ka sjellë dhe reagimin e kryeministrit italian Giuseppe Conte, i cili ka ndjekur ngjarjen hap pas hapi së bashku me kryeministrin Rama. Conte tha se Alvini do të bashkohet gjatë orëve në vazhdim me babin dhe familjarët e tjerë në Itali. Conte tha se shpëtimi i tij ndodhi si rezultat i bashkëpunimit të autoriteteve italiane, shqiptare dhe organizatave humanitare.

“Kthimi i Alvinit në shtëpi është një nga ato histori që ju mbush zemrën me lumturi. Fëmija shqiptar, për vite me radhë në një kamp refugjatësh në Siri, në orët e ardhshme më në fund mund të përqafohet nga babai i tij i cili po e pret në Itali. Kjo është arsyeja pse unë shpreh falënderimet e mia të përzemërta për të gjithë autoritetet italiane dhe shqiptare, për organizatat humanitare, që kanë bashkëpunuar për këtë operacion kompleks, në një zonë aq të vështirë sa ai sirian. Faleminderit edhe për ato media që kthyen në qendër të vëmendjes historinë e Alvinit të vogël.

Qeveria italiane ka bërë gjithçka që është e mundur për lirimin e tij. Unë personalisht ndoqa këtë ngjarje, i informuar vazhdimisht dhe në kontakt me kryeministrin shqiptar Edi Rama.

Një sukses i jashtëzakonshëm jo vetëm i diplomacisë por mbi të gjitha i bashkëpunimit ndërkombëtar, falë rolit të çmuar të luajtur nga Kryqi i Kuq dhe Gjysmëhëna e Kuqe dhe ndërhyrja vendimtare e policisë speciale dhe departamenteve të karabinierëve.

Më e keqja për Alvin tani është pas tij, në pak orë ai do të jetë i lirë. I lirë të jetë në gjendje të jetojë fëmijërinë e tij, të jetë në gjendje të luajë përsëri, të imagjinojë dhe të ndërtojë të ardhmen e tij. Pa kufizime dhe larg bombave, luftërave, fanatizmit”, shkruan Conte.

Rama: Një“JO”, s’na ndryshon drejtimin

Kryeministri Rama theksoi se Shqipëria i ka bërë detyrat e saj dhe se nuk është duke kërkuar as lëmoshë dhe as dhuratë, por atë që i takon. Gjatë konferencë për shtyp me homologun italian Conte, Rama u shpreh se Shqipëria ka një histori dashuri me Europën për shkak të të kaluarës së saj. Kryeministri Rama hodhi batuta duke thënë se “Shqipëria kërkon të martohet me Europën, ndërsa Britania kërkon divorc.”

Megjithatë Rama tha se edhe nëse nuk marrin një “po” për hapjen e negociatave, dielli do të lind sërish më 19 tetor dhe se vendi do të vazhdojë punën e tij në përmirësimin e reformave të kërkuara nga BE.

“Shqipëria dhe Maqedonia i kanë kryer detyrat e tyre të shtëpisë dhe e meritojnë çeljen e negociatave pa kushte. Ne kemi një histori dashurie me Europën dhe nëse britanikët dëshirojnë divorcin, por nuk na shërben si një shembull për të hequr dorë, pasi për ne Europa është një marrëdhënie e fortë që ka një prejardhje të hershme. Është rrugëtim për ta shndërruar Shqipërinë në një shtet të së drejtës. Ne nuk po kërkojmë një dhuratë as lëmoshë, por jemi duke kërkuar atë që na përket, jo për t’u shndërruar në anëtarë të BE-së por për të çelur negociatat dhe më tej do të tregojmë se do të jemi të gatshëm për t’u shndërruar në anëtarë.

Në këto momente, shumë prej vendeve anëtare të BE, po të ishin në vendin tonë, do të kishin bërë të njëjtën gjë. Data 18 është e rëndësishme, por në 19 dielli do të lindë sërish, dhe nëse nuk do të kemi një PO do të vijojmë pasi rrugëtimi është për ne dhe nuk është se e bëjmë vetëm për Europën” tha Rama

“Conte 2” betohet në presidencë, emrat e 21 ministrave

Giuseppe Conte është betuar para presidentit Matarrella së bashku me 21 ministrat e kabinetit të ri qeveritar. Kryeministri italian ja doli që me lëvizjen e tij të dorëheqjes, jo vetëm të shmangte marrjen e pushtetit nga Salvini, por ta nxirrte atë jashtë qeverisë dhe të drejtonte një kabinet të dytë qeveritar.

Qeveria e re italiane përbëhet nga 21 ministra, nga të cilët 7 janë gra. 10 prej tyre i përkasin partisë Lëvizja 5 Yjet, 9 nga Partia Demokratike dhe 1 nga partia Të lirë dhe të Barabartë.

Ministri i parë që u betua dhe firmosi ishte ai i Marrëdhënieve me Parlamentin, Federico D’inca. Në përbërjen e kabinetit të ri bie në sy edhe ndryshimi i gjeografisë nga vijnë ministrat, 11 prej të cilëve, janë nga Jugu i Italisë. Mosha measatare e ministrave është 47 vjeç. Më i riu është Luigi Di Maio, ministri i Jashtëm, 33 vjec. Ministrja me moshën më të madhe është Luciana Lamorgese, 66 vjeçe.

Kryeministri Conte u shpreh para Presidentit Matarrella se: “Bazohemi në një program që shikon drejt të ardhmes, do t’i kushtojmë energjinë tonë më të mirë dhe pasionin tonë për ta bërë Italinë një vend më të mirë në interes të të gjithë qytetarëve”.

Qeveria e re e Giuseppe Conte:

Ministër i Brendshëm – Luciana Lamorgese

Ministër i Drejtësisë – Alfonso Bonafede

Ministër i Mbrojtjes – Lorenzo Guerini

Ministër i Ekonomisë – Roberto Gualtieri

Ministër i Jashtëm – Luigi Di Maio

Ministër i Zhvillimit Ekonomik – Stefano Patuanelli

Ministër i Bujqësisë – Teresa Bellanova

Ministër i Ambientit – Sergio Costa

Ministër i Çështjeve Rajonale – Francesco Boçia

Ministër i Transportit – Paola De Micheli

Ministër për Jugun – Giuseppe Provenzano

Ministër i Inovacionit Teknologjik – Paola Pisano

Ministër i Administratës Publike – Fabiana Dadone

Ministër i Shanseve të Barabarta – Elena Bonetti

Ministër për Marrëdhëniet me Parlamentin – Federico D’Incà

Ministër për Çështjet Europiane – Enzo Amendola

Ministër i Punës – Nunzia Catalfo

Ministër i Arsimit – Lorenzo Fioramonti

Ministër i Kulturës – Dario Franceschini

Ministër i Shëndetësisë – Roberto Speranza

Ministër i Sporteve – Vincenzo Spadafora

Conte kërcënon me largim nga posti, nëse koalicioni nuk i jep fund grindjeve

Kryeministri italian Giuseppe Conte kërcënoi se do të japë dorëheqjen, nëse dy partnerët e tij të koalicionit nuk i japin fund grindjeve të vazhdueshme. Conte, gjatë një konference për shtyp, bëri një ultimatum për dy partitë populiste të koalicionit qeveritar, që prej muajsh debatojnë mes tyre për çështje të ndryshme.

“Nëse ata nuk marrin përgjegjësitë e tyre në mënyrë të qartë … atëherë unë do të jap dorëheqjen”.

Udhëheqësit e partisë “Lidhja” dhe partisë “Pesë Yjet”, Matteo Salvini dhe Luigi Di Maio, prej kohësh janë përballur me disa çështje të ndryshme në projektet e infrastrukturës dhe emigracionit, shpenzimet publike etj.

Pas kërcënimit të kryeministrit Conte, Matteo Salvini tha se nuk ka për qëllim ta rrëzojë qeverinë, por donte që kabineti të nxiste reforma të nevojshme dhe nuk mund të vazhdonte të vononte miratimin e tyre duke përfshirë ato për më shumë autonomi për autoritetet rajonale.