Ngjarjet kriminale në vend, policia shton kontrollet, gjen 203 kg kanabis në Fushë-Krujë, arreston 22 persona në gjithë vendin

203 kg kanabis në Fushë-Krujë, 22 të arrestuar dhe 17 makina të bllokuara, është ky bilanci i operacionit të kryer nga forca të policisë në të gjithë vendin.

Policia ka shtuar kontrollet në gjithë vendin me 86 pika policore për të parandaluar ngjarjet kriminale dhe për të goditur personat me precedent penal, në kërkim apo të akuzuar për krime.

Rasti më flagrant ishte i Krujës, ku Policia gjeti 203 kg kanabis në Zallë të Fushë-Krujës. Po ashtu janë goditur dhe disa raste të tjera të trafikut të drogës dhe klandestinëve.

Jo vetëm kaq, janë bllokuar edhe 17 automjete në gjithë vendin.

Njoftimi i policisë:

Vijon në të gjithë vendin zbatimi i detyrave të përcaktuara në Planin e Masave për mbajtjen nën kontroll të situatës kriminale dhe rendit publik, parandalimin dhe goditjen e veprimtarisë kriminale, kapjen e personave në kërkim, personave që mbajnë armë pa leje, atyre me tendencë në krimet kundër personit etj.

Në zbatim të planit operacional janë angazhuar të gjitha Drejtoritë Vendore të Policisë, forca e posaçme “Shqiponjat”, FNSH-ja, RENEA dhe Drejtoria e Forcës së Posaçme Operacionale në Policinë e Shtetit dhe strukturat e Policisë Kufitare.

Në të gjithë vendin, gjatë 24 orëve të fundit kanë funksionuar 86 pika kontrolli në akset rrugore nacionale, në brendësi të qyteteve dhe në akset kryesore rurale, si dhe janë shtuar patrullimet në kufirin jeshil dhe atë blu.

Janë ushtruar kontrolle në lokale, banesa, ambiente të ndryshme dhe vende të dyshuara për fshehje apo përdorim të lëndëve narkotike.

Si rezultat i kontrolleve janë sekuestruar drogë dhe janë vënë në pranga autorët, janë kapur persona në kërkim me rrezikshmëri shoqërore, janë goditur raste të dhënies ndihmë për kalim të paligjshëm të kufirit, të ushtrimit të paligjshëm të aktivitetit të lojërave të fatit etj.

Në të gjithë vendin janë arrestuar në flagrancë 22 shtetas, janë ndaluar 3 shtetas të shpallur në kërkim, janë proceduar penalisht 7 shtetas, si dhe janë shpallur në kërkim 4 shtetas.

Po gjatë kontrolleve, janë shoqëruar për verifikim në ambientet e Komisariateve të Policisë në të gjithë vendin, 56 persona me precedent penal të mëparshëm dhe pa dokument identifikimi me vete.

Gjithashtu janë bllokuar për mungesë dokumentacioni 17 automjete në gjithë vendin.

Rastet më kryesore:

Në fshatin Zallë, Fushë Krujë, gjatë kontrollit të ambienteve, banesave dhe territorit, shërbimet e Policisë kanë gjetur dhe sekuestruar 203 kilogramë lëndë narkotike cananabis sativa. Është arrestuar në flagrancë shtetasi F. Z., 59 vjeç, banues në Zallë, Fushë Krujë dhe janë shpallur në kërkim shtetasit E. Z., 32 vjeç, dhe F. Z., 29 vjeç, banues në Zallë, Fushë Krujë, (djemtë e shtetasit F. Z).

Në Tiranë, nga Forcat e Posaçme “Shigjeta” është kapur shtetasi i shpallur në kërkim S. T. (Z.), 22 vjeç, pasi Gjykata e Rrethit Gjyqësor Fier i ka caktuar masën e sigurisë “Arrest në burg”, për veprat penale “Vrasja në rrethana të tjera cilësuese” dhe “Armëmbajtja pa leje”, pasi më datë 24.11.2019, ka qëlluar në drejtim të mjetit me drejtues shtetasin I. A. Gjithashtu, ky shtetas është proceduar penalisht për veprën penale “Falsifikimi i dokumenteve”, pasi gjatë verifikimit të gjeneraliteteve i ka dhënë punonjësve të Policisë një kartë identiteti të falsifikuar.

Në Elbasan u arrestua në flagrancë shtetasi G. S., 41 vjeç, banues në Durrës, pasi në aksin rrugor Librazhd-Elbasan, u kap nga shërbimet e Policisë duke transportuar 8 shtetas sirianë dhe nuk i është bindur urdhrit të Punonjësit të Policisë për të ndaluar.

Në Korçë u arrestua në flagrancë shtetasi A. A., banues në Pojan, Maliq, pasi transportonte 3 emigrantë të paligjshëm me një mjet që e drejtonte mjetin pa leje drejtimi.

Në Lezhë është arrestuar shtetasi G. K., 18 vjeç, banues në Rrëshen, pasi gjatë kontrollit të ushtruar iu gjetën dhe sekuestruan doza me lëndë narkotike.

Operacioni vijon.

Drejtonte rrjetin e shpërndarjes së drogës në Korçë, arrestohet 35-vjeçari, subjekt i OFL

Policia e Korçës ka arrestuar një 35-vjeçar që organizonte dhe drejtonte një grup shpërndarësish droge në këtë qytet. Sipas të dhënave zyrtare, operacioni antidrogë i koduar “Përsëritësi” është finalizuar pas një hetimi disa mujor zhvilluar nga Seksioni për Hetimin e Trafiqeve të Paligjshme dhe Narkotikëve në DVP Korçë në drejtimin e Prokurorisë së Rrethit.

Specialistët për Hetimin e Trafiqeve të Paligjshme dhe Narkotikëve në DVP Korçë, në vijim të punës për parandalimin dhe goditjen e aktivitetit kriminal të shpërndarjes së drogave të forta, finalizuan operacionin antidrogë të koduar “Përsëritësi”, si rezultat i të cilit u bë kapja dhe arrestimi në flagrancë i shtetasit:

Zalmir Qyteti, 35 vjeç, banues në Korçë (i dënuar më parë për “Prodhimi dhe shitja e narkotikëve), subjekt i OFL-së për të deklaruar pasurinë.

Si edhe filloi procedimi penal në gjendje të lirë ndaj 7 shtetasve të tjerë.

Nga veprimet hetimore të kryera dhe provat ligjore të grumbulluara gjatë operacionit, rezultoi se shtetasi Z. Q., është poeseduesi dhe organizatori i shpërndarjes së lëndëve narkoitke, i cili nëpërmjet 7 shtetasve të tjerë bënte shpërndarjen e sasive të drogave të forta në qytet, të llojit heroinë dhe metadon, sasi të cilat këta shtetas i blinin tek 37-vjeçari dhe më pas e shisnin tek persona të tjerë, kundrejt fitimit.

Gjatë operacionit dhe kontrollit në banesë, Policia ka sekuestruar lëndë narkotike heroinë, një pjesë e ndarë në doza gati për shitje dhjetra kokrra metadoni, si edhe një sasi lënde e dyshuar si prokusor.

Shtetasi i mësipërm, aktualisht rezulton i dënuar me kusht, për një periudhë prej 3 vjet e 6 muaj, për veprën penale “Prodhimi dhe shitja e narkotikëve”, si edhe është subjekt i OFL-së ku i është dërguar formulari për deklarimin e pasurisë.

Materialet i kaluan Prokurorisë Pranë Gjykatës së Shkallës së Parë Korçë për hetime të mëtejshme.

Doli nga burgu të takonte gruan, vritet shqiptari

Një 45-vjeçar shqiptar është vrarë në Itali mbrëmjen e të shtunës. Ngjarja ndodhi në Romë rreth orës 11:30, ndërsa mediat raportojnë se burri është një shtetas me kombësi shqiptare. Ai është qëlluar me një plumb në gjoks dhe një në kokë.

Ai kishte dalë me leje nga burgu për të takuar gruan e tij, ndërsa është qëlluar pasi po kthehej për në qeli. Vrasja ndodhi në mes të rrugës, pak pasi 45-vjeçari doli nga dera e shtëpisë për t`u kthyer në qeli në burgun e Rebibbia. Viktima, emri i të cilit ende nuk bëhet i ditur, ishte me precendent penal.

Ai po vuante një dënim prej vitesh në burgun e Rebibbia, ndërsa mediat italiane raportojnë se ishte në ditët e fundit të dënimit. Hetuesit po përpiqen të zbardhin vrasjen, ndërsa dyshimet e para lidhen me të shkuarën e 45-vjeçarit.

Shisnin drogë në lokal, pranga pronarit dhe kamarierit në Tiranë

Policia e Tiranës godit një rast të shitjes së lëndëve narkotike në lokalet e kryeqytetit. Në pranga janë vënë dy shetas, njëri pronar i një lokali dhe tjetri banakier i tij. Gjithashtu, nga operacioni i quajtur “Shadoë”, janë sekuestruar edhe 736.4 gramë lëndë narkotike e dyshuar kanabis, grirëse metalike dhe dy aparate celularë.

Në pranga janë vënë shtetasit me inicialet B.B., 42 vjeç, banues në Tiranë, pronari i lokalit si dhe shetasi A.B., 41 vjeç, banues në Tiranë, i dënuar më parë për dhunë në familje, që shërbente si kamarier në lokalin ku u gjet sasia e lëndës narkotike.

Ngjarja

Arrestimi i këtyre shtetasve u bë, pasi në rrugën “Skënder Luarasi” gjatë kontrollit të ushtruar në një lokal bar-kafe, me pronar shtetasin B. B. dhe kamerier shtetasin A. B., shërbimet e Policisë gjetën në ambientet e brendshme të lokalit lëndë të dyshuar narkotike kanabis, të futur në qese plastike dhe në dy kavanoza qelqi.

U sekuestruan në cilësinë e provës materiale: 736.4 gr. lëndë e dyshuar narkotike kanabis, grirëse metalike dhe dy aparate celularë.

Materialet iu referuan për veprime të mëtejshme Prokurorisë së Rrethit Gjyqësor Tiranë, për veprën penale “Prodhimi dhe shitja e lëndëve narkotike” e kryer në bashkëpunim.

Operacion policor në 3 qytete. Arrestohen disa persona, sekuestrohet drogë

Një operacion i madh policor është zhvilluar pasditen e të premtes në Tiranë dhe disa qytete të tjera të vendit. Në fokus të këtij operacioni është goditja e një grupi kriminal që operon në trafikun e drogës.

Sipas Balkanweb, paraprakisht dyshohet se janë arrestuar disa persona. Gjithashtu, gjatë aksionit është sekuestruar dhe një sasi e madhe droge e llojit kanabis sativa, në formë çokollate.

Në prangat e policisë janë vënë të paktën 4 persona, ndërkohë që kontrollet për ndalimin e anëtarëve të tjerë të këtij grupi kriminal po vijojnë.

Operacioni është duke u zhvilluar pas disa muajsh hetimesh nga organet e drejtësisë shqiptare. Tirana, Durrësi dhe Fieri janë tre qytetet ku është zhvilluar operacioni.

U kap me drogë në kufi, pranga sarandjotit

36 kilogramë kanabis sativa u sekuestruan nga policia kufitare e Qafë Botës, e fshehur në një makinë që po tentonte ta transportonte atë drejt Greqisë. Automjeti tip ‘Peugeot’ me targë AA109ZD në pronësi të shtetasit me inicialet E.K. është kaluar për kontroll në vijën e dytë pasi kishte dyshime se brenda saj ishte fshehur lëndë narkotike.

Nga kontrolli rezultoi se në vendin e gomës rezervë ishte adoptuar një hapësirë ku u gjetën disa pako me lëndë narkotike me peshë 36 kg.

Në pranga ra drejtuesi i mjetit 36-vjeçari nga Saranda me iniciale E.K., ndërsa vijojnë hetimet për zbardhjen e personave të përfshirë në trafikimin e drogës.

Mbante drogë te rafti i pijeve në lokal, pranga 20-vjeçarit në Shkodër

Policia e Shkodrës goditi një rast të shitjes së lëndëve narkotike në këtë qytet. Në pranga është vënë një i ri 20 vjeç me inicialet S.L., banues në qytetin e Shkodrës. Arrestimi i tij u bë, pasi gjatë kontrolleve të ushtruaar në lokale për goditjen e lojërave të fatit dhe lëndëve narkotike, të riut iu gjet një sasi prej 93 gr lëndë narkotike kabanis.

“Forcat policore kanë ushtruar kontroll në ambjentet e një bar kafeje, në lagjen “Manush Alimani”, Shkodër, pikërisht tek pjesa e banakut, në raftin e pijeve është gjetur një qese me material në formë çokollate, Cannabis Sativa, me peshë 93 gr. dhe një peshore elektronike, për të cilën është bërë arrestimi në flagrancë i shtetasit të lartpërmendur, si dhe u bë sekuestrimi i lëndës narkotike në cilësinë e provës materiale”.

“Gjithashtu, gjatë veprimeve të mëtejshme, shtetasit K. G., 25 vjeç, banues në Shkodër, i është gjetur në aparatin e tij celular një faqe ëeb-i, e dyshuar si faqe sportive për lloto, i cili ndiqet në gjendje të lirë për veprën penale “Organizimi i lotarive të palejuara”. Materialet iu referuan Prokurorisë së Rrethit Gjyqësor Shkodër, për veprime të mëtejshme”, thuhet në njoftimin e policisë.

Gruaja fsheh kokainën në reçipeta, burri përfundon në burg

Një çift shqiptarësh u arrestuan pasi u kapën me drogë, që e kishin ndarë në disa doza dhe më pas fshehur në reçipetat e gruas.

Shqiptari, 34-vjeç, përfundoi në burg, ndërsa bashkëshortja e tij, 28 vjeçe, u la në arrest shtëpie pasi ishte në muajin e fundit të shtatzënisë.

Ndalimi i tyre u bë në zonën e Macerata në Itali, ku gjatë kontrollit gruas iu gjetën të fshehura 40 gramë kokainë të ndarë në doza, që i kishte vendosur në reçipetat e saj, me shpresën se nuk do të gjendeshin lehtësisht.

Gjithashtu gjatë kontrollit të banesës së tyre iu gjetën edhe materiale për paketimin dhe tregtimin e drogës si dhe u sekuestruan 4 mijë euro.

613 kg kokainë në banane, Prokuroria kërkon 21 vite burg për Arbër Çekajn

Prokuroria e Krimeve të Rënda dha pretencën duke kërkuar 21 vite burg për Arbër Çekajn, pronarin e kompanisë “Arbi Garden” në kontejnerët e së cilës bashkë me bananet u zbuluan dhe 613 kilogramë kokainë.

Gjatë seancës së sotme prokuroria kërkoi 21 vite burg për Çekajn 21 vite burg, që me pranimin e gjykimit të shkurtuar do të vuajë vetëm 14. Prokuroria ka kërkuar edhe për shoferin Armando Pezakun 13 vite burg, që me gjykim të shkurtuar shkon 8.8 vite, ndërsa për menaxherin e kompanisë Donaldo Lushaj u kërkuan 14 vite, me gjykim të shkurtuar ulet në 10.8 vite.

Prokurori i dosjes Edvin Kondili gjatë leximit të pretencës akuzoi se Çekaj është organizatori i grupit kriminal të trafikut të kokainës nga Kolumbia në Shqipëri, ndërsa dyshohet edhe për një tjetër sasi droge prej 90 kg kokainë që u kap në Kolumbi.

“Arbër Çekaj është i dyshuar edhe për 90 kokainë të kapur në Kolumbi në 2015. Çekaj iku me 25 shkurt 2018 nga pika kufitare Vernicës dhe u fsheh në Kosovë dhe më pas iku në Gjermani. Çekaj bisedoi me menaxherin e kompanisë Donaldo Lushaj se çfarë gjeti antidroga në kontejnerët në Durrës” tha prokurori, referuar sasinë prej 613 kg kokainë që u sekuestrua në Maminas.

Sasia e drogës u zbulua në kontejnerët me banane që vinte nga Kolumbia për llogari të “Arbër Garden”. Pas ngjarjes pronari i kompanisë Çekaj u arratis në Gjermani ku kërkoi edhe azil, por u ekstradua drejt Shqipërisë pak muaj më parë për të përballuar me drejtësinë shqiptare.

Drogë në makinë, 61-vjeçari rrezikon jetën e policëve gjatë arratisjes

Një 61-vjeçar u arrestua pasi u kap me 68 kg lëndë narkotike, si dhe rrezikoi jetën e policisë gjatë aksionit të tij të arratisjes.

Ngjarja ka ndodhur në Lezhë, ku efektivët i kanë bërë shenjë makinës që drejtohej nga 61-vjeçari të hap krahun për kontroll. 61-vjeçari me iniciale Z. B., nuk i është bindur urdhrit dhe ka rritur shpejtësinë për t’u larguar duke rrezikuar jetën e policëve, të cilët kishin dalë para makinës së tij për të ndaluar.

61-vjeçari është larguar me shpejtësi në drejtim të Shëngjinit, ndërsa policia është vënë në ndjekje duke e ndaluar në Ishull-Shëngjin.

Gjatë kontrollit në mjet, policia ka gjetur dhe sekuestruar 68 kg lëndë narkotike duke bërë arrestimin e tij.