Durrës, shoqërohen në polici 17 punonjës të Kadastrës

Policia e Durrësit shoqëroi të premten e 17 punonjës të Agjencisë Shtetërore të Kadastrës. Punonjësit po pyeten në lidhje me dosje të ndryshme pronash, që dyshohet se kanë parregullsi. Në polici janë shoqëruar dhe ish-punonjës të kësaj agjencie, që më parë njihej si ALUIZNI.

Punonjësit e shoqëruar në polici mbajnë detyra si specialistë, topograf, juristë dhe hartograf. Paraprakisht dyshohet se punonjësit janë thirrur për tu pyetur në lidhje me dosje që kanë të bëjnë me tjetërsimin e pronave në Gjirin e Lalzit. Disa ditë më parë, Gjykata e Apelit në Durrës liroi nga burgu drejtorin e Kadastrës Liridon Pula.

Ai ishte ndaluar disa javë më parë me kërkesë të prokurorit Arian Ndoja, i cili pretendone se kreu i Kadastrës kishte abuzuar me pronat. Ndërkohë, ndaj prokurorit Ndoja, Kryeministri Edi Rama ngriti akuza të rënda, duke u shprehur se ai ishte bashkëpunëtor i bandave kriminale.

Vijon…

Peshkaqeni tigër kapet në ujërat e Adriatikut

Një peshkaqen i llojit tigër, me gjatësi 5 metra dhe peshë rreth 500 kg është kapur në ujërat e Adriatikut. Peshkaqeni ka ngecur në rrjetën e anijes së peshkimit “Meduza Durrës”, në rreth 175 metra thellësi.

Këta peshkaqenë nuk jetojnë në ujëra kaq të cekët, por ndryshimi i klimës duket se ka detyra peshqit e mëdhenj të vijnë gjithmonë e më afër bregut për gjetje të ushqimit.

Peshkaqeni tigër është një nga llojet më të rrezikshme për ujërat e Adriatikut dhe të Mesdheut.

Goditën policët, pranga dy personave në Durrës

Policia e Durrësit vuri në pranga dy persona, të cilët qëlluan punonjësit e policisë duke kundërshtuar arrestimin. Sipas një komunikate zyrtare, mësohet se të martën ndodhi një sherr mes disa personave në Shkozet.

Blutë e Durrësit u njoftuan për ngjarjen dhe shkuan menjëherë te vendi ku ishte raportuar se po ziheshin disa persona mes tyre. Gjatë ndërhyrjes për të ndarë personat që po ziheshin, dy prej tyre kanë kundërshtuar punonjësit e policisë duke i goditur.

Shërbimet e Policisë, pas ardhjes në ndihmë edhe të shërbimeve të tjera kanë bërë të mundur neutralizimin dhe prangosjen e tyre.

Në përfundim të verimeve u bë arrestimi në flagrancë i shtetasve: M. H., 44 vjeç dhe F. H., 35 vjeç, banues në lagjen Nr. 14, Durrës për veprën penale “Kundërshtimi me dhunë i punonjësve të policisë të rendit publik, kryer në bashkëpunim”. Materialet i kaluan Prokurorisë së Rrethit Gjyqësor Durrës për veprime të mëtejshme.

PD: Atentat drejtorit të Hekurudhave. Dyrmishi: S’ka lidhje me mua

Partia Demokratike denoncoi një sulm me armë të bërë ndaj makinës së kryetarit të Këshillit bashkiak të Durrësit dhe se kjo ngjarje është fshehur nga policia. Sulmi është pranuar nga Ani Dyrmishi, por mohon që ngjarja të ketë lidhje me të.

Dyrmishi, i cili mban postin e kryetarit të këshillit bashkiak Durrës dhe njëherësh drejtor i Hekurudhave, tha se sulmi ka ndodhur, por nuk kishte lidhje me personin e tij, pasi ajo makinë përdoret nga shumë persona.

Denoncimi erdhi nga kryetari i degës së PD në Durrës, Ferdinand Xhaferri, i cili tha se rreth orës 12:30 të natës të së hënës, makina është qëlluar me armë zjarri në momentin kur Dyrmishi ka qenë brenda saj.

“Kryetari i këshillit Bashkiak të qytetit dhe drejtori të Hekurudhave në përplasjet mes bandave të PS me dhe pa pushtet është goditur me pistoletë. Policia e fsheh ngjarjen dhe me porosi të drejtori të policisë thuhet se policia është goditur në parking, por në të vërtetë kryetari i këshillit bashkiak që ka qenë në makinë. Kjo ngjarje ka ndodhur ditën e hënë në orën 12:30 të natës, në lagjen numër 4 të qytetit. Policia e ka pranuar, por e ka fshehur ngjarjen. Ky është problemi, sepse drejtori i policisë i sapoardhur nuk ka ardhur për të vendosur rendin në qytet, por ka ardhur për të negociuar sherret e bandave të PS.” tha Xhaferri në një lidhje telefonike me News 24.

Vetëm pak minuta më vonë, erdhi dhe reagimi i Dyrmishit, i cili pranoi sulmin me armë ndaj makinës, por mohon të ketë qenë në makinë në momentin e ngjarjes. Ai tha se ishte në gjumë dhe se makina nuk është e tij. Dyrmishi u shpreh se sulmi nuk e frikëson pasi nuk ka konflikte dhe sulmi s’ka lidhje me të.

“Është një ngjarje që nuk ka të bëjë fare me mua, me personin tim. Nuk kam pas asnjë lloj atentati në drejtimin tim apo të makinës sime, pasi unë nuk disponoj makinë në pronësinë time, por e përdor atë makinë që është goditur. Është një makinë që ka të bëjë me një person, që ka qenë shoferi i babait tim, dhe përdoret nga unë, djali i hallës sime dhe shumë persona të tjerë. Në fakt, muajt e fundit nuk e kam përdorur. Nuk kam qenë në makinë, kur është qëlluar. Nuk e cilësoj paralajmërim këtë sulm, sepse unë nuk kam konflikte as personale dhe as në lidhje me detyrën, por gjithsesi duhen bërë hetime dhe të sqarohet ngjarja. Unë kam qenë në gjumë, kur jam njoftuar për ngjarjen.” tha Dyrmishi po në një lidhje telefonike për News 24.

Ndërsa policia e Durrësit reagoi për ngjarjen, pas denoncimit të bërë në media duke sqaruar se është qëlluar me pistoletë në drejtim të mjetit tip “Volswagen”, i cili ka qenë i parkuar. Ngjarja ka ndodhur pas mesnatës së 15 tetorit, në orën 00:45 dhe mjeti është në pronësi të 29-vjeçarit I. B. Në reagimin e saj policia nuk jep të dhëna që sulmi mund të jetë i lidhur me kreun e këshillit bashkiak Durrës, Ani Dyrmishi.

Kapet hajduti në Durrës, autor i pesë vjedhjeve

Policia e Durrësit arrestoi një person, i cili dyshohet se është autor i disa vjedhjeve në këtë qytet. Sipas njoftimit zyrtar, në pranga është vënë shtetasi me inicialet E.G., 39 vjeç, banues në Durrës.

Ky shtetas dyshohet se është autor i të paktën 5 vjedhjeve të ndryshme në qytetin e Durrësit, katër prej të cilave i kishte zhvilluar vetëm gjatë muajit shtator. Konkretisht, në datën 7 tetor, personi në fjalë dyshohet se vodhi një laptop, një magnetofon dhe një pajisje zëri në kopshtin “Met Hasa”.

Dy ditë para kësaj vjedhje, në datën 5 tetor, ky shtetas dyshohet se vodhi zyrat e Laboratorit të Akuakulturës dhe Peshkimit në Durrës, duke marrë një monitor kompjuteri, GPS dhe një videoprojektor. Në datën 20 shtator, ky person dyshohet se në oborrin e shkollës “Hasan Koçi”, vodhi kabllo elektrike.

Katër ditë para kësaj vjedhje, ky shtetas dyshohet se vodhi Zyrat e Njësisë Administrative nr.12 në Durrës. Ndërkohë, në 14 maj të këtij viti, ky shtetas dyshohet se tentoi të vidhte në “Dispeçerinë e Sëmundjeve të Mushkërive” në Durrës. Sipas policisë, të gjitha vjedhjet janë dokumentuar dhe materialet hetimore i kaluan Prokurorisë së Rrethit Gjyqësor Durrës.

Gërshërë kokës të riut

Një i ri i gjuan me gërshërë në kokë një 26-vjeçari pas një sherri për motive të dobëta. Ngjarja e rëndë ka ndodhur në fshatin Rinia të Durrësit.

Gjithçka nisi pas një sherri fizik mes dy të rinjve, ku më pas njëri prej tyre ka marrë gërshërën dhe i ia ka ngulur në kokë personit tjetër. Për pasojë është plagosur shtetasi me iniciale E. I., 26 vjeç, i cili është dërguar me urgjencë në spitalin e Traumës në Tiranë, ku dhe ndodhet nën kujdesin intensiv të mjekëve.

Policia vuri në pranga agresorin, shtetasin me iniciale O.D., 25 vjeç, i cili do përballet me akuzat e vrasjes me dashje.

“Far West” në Durrës, policia parandalon vrasjen

Një konflikt me armë zjarri mes disa personave mund të kishte një fund fatal, nëse policia nuk do kishte ndërhyrë në kohë. Shtetasi me iniciale A.B., 26 vjeç, ka qëlluar me armë zjarri tip pistoletë në ajër, gjatë një konflikti fizik me disa persona në lagjen 18 në Durrës. Shkrepja e armës ka bërë që banorët të lajmërojnë menjëherë policinë.

Sapo panë policinë, personat e përfshirë në konflikt u larguan menjëherë në drejtime të ndryshme, ndërsa 26-vjeçari me armë zjarri u largua me një makinë së bashku me shokun e tij, E.K., 30 vjeç.

“Arratisja” e tyre nuk ka zgjatur shumë pasi janë ndaluar pas pak minutash nga policia duke përfunduar në pranga. Gjatë kontrollit policia ka sekuestruar armën tip pistoletë me të cilën është qëlluar në ajër si dhe makinën me të cilën, dy personat u larguan duke mos iu bindur urdhrit të policisë.

Dy të arrestuarit nuk janë të panjohur për policinë, pasi mbi ta rëndojnë precedentë të mëparshëm penal që nga sulmet fizike ndaj personit deri tek kundërshtimi i efektivëve të policisë.

Policia parandalon përshkallëzimin e mëtejshëm të një konflikti me armë zjarri mes disa personave
DurrësPolicia parandalon përshkallëzimin e mëtejshëm të një konflikti me armë zjarri mes disa personave Reagimi në kohë e me profesionalizëm vë në pranga dy autorët e konflikti me armë zjarri të cilët tentuan të largohen me shpejtësi me automjet por u kapën gjatë ndjekjes nga shërbimet e Policisë.Sekuestrohet një armë zjarri tip pistoletë dhe automjeti.Strukturat e Drejtorisë Vendore të Policisë Durrës, me marrjen e njoftimit se në lagjen nr 18 Durrës po ndodhte një konflikt mes disa personave dhe njëri prej tyre po qëllon me armë zjarri në ajër, kanë shkuar menjëherë në vendin e ngjarjes., duke parandaluar përshkallëzimin e mëtejshëm të konfliktit. Shtetasi që kishte qëlluar me armë zjarri në ajër së bashku me shokun e tij në momentin që kanë parë Policinë kanë tentuar të largohen me shpejtësi me automjet por janë kapur në flagrancë gjatë ndjekjes nga shërbimet e policisë.Policia bëri të mundur bllokimin e automjetit si dhe vënien në pranga të shtetasve A.B., 26 vjeç (pasagjer në mjet), i cili dyshohet se është personi i cili ka qëlluar me armë zjarri dhe E.K., 30 vjeç, (drejtuesi i mjetit) të dy banues në Durrës.Gjatë kontrollit të ushtruar u gjet dhe u sekuestrua në cilësinë e provës materiale arma e zjarrit tip pistoletë me disa fishekë luftarakë.Shtetasit e arrestuar njihen si persona me precedentë të mëparshëm në fushën e krimeve kundër personit dhe kundërshtimit të punonjësve të Policisë.Grupi hetimor vijon punën për zbardhjen e shkakut të konfliktit, identifikimin dhe kapjen e personave të tjerë të përfshirë në këtë konflikt.Në përfundim të veprimeve të para hetimore materialet do ti kalojnë Prokurorisë së Rrethit Gjyqësor Durrës për veprime të mëtejshme për veprat penale " Mbajtja pa leje i armëve dhe i municionit" dhe "Prishja e qetësisë publike" në ngarkim të shtetasit A.B., dhe "Moskallëzimi i krimit " në ngarkim të shtetasit E.K.
Gepostet von Policia e Shtetit am Freitag, 4. Oktober 2019

Kërcet arma në Durrës. Plagoset një person, autori në kërkim

Një person mbeti i plagosur orët e vona në mbrëmjen e të mërkurës në Durrës. Personi i plagosur me armë është transportuar me urgjencë drejt Spitalit të Durrësit.

Policia e Durrësit dha informacion zyrtar për ngjarjen e ndodhur të mërkurën në mbrëmje. Sipas uniformave Blu, mësohet se mbrëmjen e të mërkurës, shtetasi me inicialet I.I., 42 vjeç plagosi me armë zjarri shtetasin me inicialet A.M.

Uniformat Blu nuk japin detaje të moshës së personit të plagosur, ndërsa ndodhet jashtë rrezikut për jetën. Sipas Policisë së qytetit bregdetar, ngjarja ndodhi për motive të dobëta. Materialet i kaluan Prokurorisë së Rrethit Gjyqësor Durrës për veprime të mëtejshme.

Kokaina, spiuni në Pire, lajmëroi pritësit në Shqipëri

Detaje të reja dalin nga hetimi për kapjen e 137 kg kokainë në Portin e Durrësit. Sipas një lajmi të publikuar nga Shqiptarja.com, mësohet se pritësit e vërtetë të kokainës, janë lajmëruar 1 muaj përpara, se në portin e Pireut në Greqi ishte zbuluar droga dhe në lojë ishte futur DEA Amerikane.

Sipas këtij artikulli, pritësit e drogës së nisur nga Ekuadori, ishin dy grupe kriminale, që drejtohen nga dy shtetas me inicialet A.C. dhe L.M. në Elbasan dhe Fier.

Dyshohet se pritësit e drogës kishin informator në Greqi, një shtetas nga qyteti i Elbasanit.

Fakti që asnjë nga personat e dyshuar si pritësit e vërtetë të drogës nuk është kapur, e përforcon më tej dyshimin se operacioni policor në Greqi është zbuluar një muaj përpara se ai të finalizohej në Durrës. Informatori mendohet se është nga Elbasani dhe jeton në Greqi.

Policia ishte me grupe vëzhgimi në terren për disa ditë, por pa mundur të kap “peshqit e mëdhenj”. Policia ka vënë në pranga dy persona për kokainën në Durrës, një punonjës i portit dhe një person tjetër.

Ndërkohë, në kërkim është shpallur shtetasi Gentian Malindi, i cili ishte personi që mori drogën nga kontenieri. Malindi pikasi se në 22 pakot e tërhequra nga kontinjeri, gjendjen oriz dhe kokainë, ndërsa ende nuk është arrestuar nga policia.

Kokaina “lundron” nga Ekuadori në Durrës. Tre në pranga

Sipas mediave greke dhe ato vendase, raportohet se dy kontenierë, që dyshohet të jenë me drogë ndodhen prej një jave në portin e Durrësit, ndërsa në pranga kanë rënë 3 punonjës. Policia e Shtetit ende nuk ka një deklaratë zyrtare në lidhje me rastin. Sipas CNN grek, dy kontenierë me drogë janë pikasur nga policia greke në Portin e Pireut që kishin si destinacion portin e Durrësit. Në përpjekje për të zbuluar autorësinë dhe rrjetin e trafikimit të drogës, policia greke në bashkëpunim me atë shqiptare, ka kërkuar monitorimin e dy kontenierëve për të kapur personat që janë të përfshirë në të. CNN grek raporton se autoritetet greke sekuestruan rreth 46 kg drogë e llojit kokainë dhe më pas lejuan kalimin e kontenierëve drejt portit të Durrësit, duke njoftuar autoritetet shqiptare për monitorimin e tyre. Kontenierët u nisën nga Ekuadori me banane drejt Pireut dhe më pas drejt Durrësit.

Më 14 shtator kontenierët u nisën nga porti i Pireut dhe kanë mbërritur në Durrës më 17 shtator, që më pas u vendosën në zonën e lirë të portit. Ishin 3 persona që iu afruan njërit prej kontenierëve, por kur kuptuan se po monitoroheshin u larguan me shpejtësi. Po sipas CNN grek, Policia shqiptare ka identifikuar të tre personat, ku njëri është arrestuar dhe janë shpallur në kërkim 2 të tjerët.

Ndërsa Report Tv raporton se 3 personat që i janë afruar njërit prej kontenierëve janë ndaluar nga policia shqiptare. Të tre personat, identiteti i të cilëve nuk bëhet i ditur, janë punonjës të sigurisë portuale në Portin e Durrësit. Njëri prej tyre, shefi i turnit që merrej me kontrollin e kalimit të ngarkesave, ka qenë i pari që i është afruar dhe ka rënë në pranga. Më pas është bërë edhe arrestimi i dy të tjerëve. Sipas Report TV kontenierët ende nuk janë hapur nga policia shqiptare dhe pritet që ky operacion të finalizohet më 27 shtator, ku do të bëhet dhe verifikimi nëse në të ndodhet lëndë narkotike apo jo.

Policia e Shtetit ende nuk ka dalë me një deklaratë zyrtare në lidhje me rastin.