“Erë me shpejtësi 30 m/s dhe temperatura -10 gradë C”. Si do të jetë moti në dy ditët në vijim

Ministria e Mbrojtjes njoftoi mbrëmjen e të dielës lidhur me situatën e shkaktuar nga moti i keq në vend. Sipas Shërbimit Meteorologjik Ushtarak, era gjatë mesditës të së dielës ka qenë nga 5-10 m/s. Sipas Shërbimit Meteorologjik, në qytetin e Tiranës era ka qenë deri në 18 m/s. “Shpejtësia më e lartë e regjistruar në qytetin e Tiranës me 18 m/s. Era intensive do të vazhdojë deri në orët e para të mëngjesit të së hënës me shpejtësi mesatare 5-10 m/s dhe hera-herës era fiton intensitet deri në 15-20 m/s”, thuhet ndër të tjera në njoftimin e Ministrisë së Mbrojtjes.

Më tej, saktësohet se në zonat bregdetare era do të jetë dhe me shpejtësi më të madhe, ndërsa lajmëron se në datën 7 janar temperaturat do të ulen deri në -10 gradë. “Përgjatë vijës brendetare dhe zonat luginore stuhia e erës arrinë në shpejtësinë deri në 25-30 m/s. Duke nisur nga orët e mesditës së datës 6 janar pritet pakësim gradual i intensitetit të erës me shpejtësi mesatare 5-10 m/s, ndërsa përgjatë vijës bregdetare zonat dhe zonat luginore të verilindjes dhe juglindjes si dhe në zonën e alpeve era do të mbetet intensive deri në 20-30 m/s.

Nga data 7 janar era humbet akoma më shumë intensitet dhe bëhet mesatare me shpejtësi 3-8 m/s me përjashtim të vijës bregdetare e cila do të arrijë shpejtësi deri në 15 m/s. Dita më e ftohtë parashikohet të jetë mëngjesi i datës 7 janar, me temperaturat që pritet të arrijnë deri në -10 gradë në zonat malore, -6 në ato të ulëta dhe -1 gradë në ato bregdetare”, thotë Ministria e Mbrojtjes.

Ndërkohë, Agjencia Kombëtare e Mbrojtjes Civile i bën thirrje qytetarëve të shmangin qëndrimet në afërsi të pallateve apo objekteve që rrezikojnë të rrëzohen nga era. “Ministria e Mbrojtjes, përmes Agjencisë Kombëtare të Mbrojtjes Civile, nisur nga situata e pazakontë e erës së fortë gjatë orëve të fundit në disa qarqe të vendit, i bën thirrje qytetarëve, të shmangin qëndrimet në afersi të pallateve, godinave të larta, pemëve dhe objekteve të rrezikshme.

Rënia e sendeve dhe objekteve të ndryshme për shkak të erës përherë e më të fortë, mund të bëhen shkak për aksidente. Ndërkohë, Ministrja Xhacka përmes AKMC është në komunikim të vazhdueshëm me shtabet e emergjencave në të gjitha prefekturat, për të ndjekur orë pas orë situatën e vështirë të motit të shkaktuar nga erërat dhe bora në disa qarqe. Sipas informacioneve paraprake të deritanishme situata është nën kontroll dhe nuk raportohen probleme”, thuhet në njoftimin e Ministrisë së Mbrojtjes.

Foto/ Stuhitë e erës shkulin pemët, dëmtohet rrjeti elektrik. Veliaj apel qytetarëve

Stuhitë e erës janë shtuar pasditen e të dielës duke shkaktuar probleme të mëdha jo vetëm në qytetet bregdetare. Në Tiranë, era shkaktoi disa probleme duke rrëzuar deri edhe depozitat e ujit nga taracat e pallateve. Ndërkohë, në rrugë të ndryshme të Tiranës janë shkulur dhe pemë. Realstorty.al siguroi foto të disa prej dëmeve të shkaktuara nga era. Në lulishten përballë ish-ekspozitës, një pishë është shkulur për shkak të erës, duke u përkulur në krah të një pallati. Pema rrezikon të rrëzohet nga momentin në moment.

Ndërkohë, lidhur me situatën e krijuar nga stuhitë e erës, kryebashkiaku Erion Veliaj i bëri thirrje qytetarëve që të bëjnë kujdes. Në një reagim, Veliaj u kërkoi qytetarëve të kufizojnë lëvizjet në zonat ku objekte apo pemë që rrezikojnë rënien. “Kujdes! Erë e fortë në Tiranë, ju lutem evitoni lëvizjet dhe qëndrimin në vendet ku ka objekte apo pemë që rrezikojnë rënien. Për çdo problem raportoni te numri i emergjencës 112. Punonjësit tanë ndodhen në terren në ndihmë të çdo qytetar”, shprehet Veliaj.

Po për shkak të erës, në zonën e Selitës ka pasur dëme në rrjetin e shpërndarjes së energjisë elektrike, tha OSHEE në një njoftim. Në Selitë është këputur fideri i energjisë, ndërsa probleme ka pasur edhe në zona të tjera. “Moti i keq ditën e sotme preku pjesë të rrjetit elektrik, sidomos atë ajror. Dëmet janë shkaktuar kryesisht nga era e fortë. Gjithësesi, brigadat e avarive ndodhen në gatishmëri. Në zonën e Selitës, rruga “Bill Klinton” është këputur fideri”, thotë OSHEE.

Era shkakton probleme në Tiranë, Metoalb: Nesër ulen temperaturat deri në -11 gradë C

Vendi është përfshirë të dielën nga një mot i ftohtë dhe me erë. Në Tiranë, gjatë pasdites janë shënuar disa incidente për shkak të erës së madhe. Por fatmirësisht nuk janë raportuar të lënduar. Kështu, sipas Balkanweb, në zonën e “Komunës së Parisit” nga era kanë rënë depozita të ujit nga taracat e pallateve.

Fatmirësisht nuk janë shënuar të lënduar nga kjo ngjarje. Gjithashtu, për shkak të erës në qendër të Tiranës, në sheshin “Skënderbej”, pema e festave të fundvitit është rrëzuar në shesh. Edhe në disa rrugë ka pasur rënie të pemëve për shkak të erës së fuqishme.

Ndërkohë, me anë të një njoftimi Meteoalb Albania shprehet se “stuhitë e erës vijojnë deri në mesnatë. Më problematike situata paraqitet në bregdet kryesisht në jug duke sjellë probleme në trafikun detar, në momente të veçanta era do të jetë mbi 90 km/h në jug të vendit”.

“Dallgëzimi do të jetë i lartë deri në 7-8 ballë në det. Reshje dëbore në të gjithë zonën malore. Që nga nesër i ftohti i acartë mbërrin në vend me temperatura -11 gradë C në rang vendi. Ky i ftohtë mbetet deri të mërkurën kur nis rritja graduale e temperaturave”, thotë Metoalb në dy njoftime të ndryshme gjatë pasdites të së dielës.

Stuhite e eres vijojne deri ne mesnate Ku me problematike situata paraqitet ne bregdet kryesish ne jug duke sjelle…
Gepostet von Meteoalb Albania am Sonntag, 5. Januar 2020