Shkrumbohet makina e kreut të FRPD në Durrës

Të shtunën gjatë pasdites një mjet u dogj në qytetin e Durrësit. Balkanweb raporton se mjeti i djegur ishte në pronësi të shtetasit Ndrec Pjetri.

Ai mban aktualisht postin e kryetarit të Forumit Rinor të Partisë Demokratike në Durrës.

Sipas raportimeve të para dyshohet se makina është djegur aksidentalisht. Një defekt elektrik në mjet dyshohet se shkaktoi zjarrin në makinën e Pjetrit.

Mjeti është shkrumbuar i gjithi. Forcat zjarrfikëse shkuan në vendin e ngjarjes duke bërë të mundur shuarjen e flakëve.

Sulmi, irritohet Patozi

Kryetari i Partisë Bindja Demokratike, Astrit Patozi reagoi në rrjetet sociale, pas sulmit që një i ri (pjesë e FRPD në Shkodër), i bëri deputetes Rudina Hajdari. Patozi reagon ashpër dhe shënjestron drejtuesit e PD, duke u shprehur se opozitën e quajnë “pronë” apo “leje ndërtimi”.

“Janë më shumë të marrë, se sa të poshtër, dhe për këtë nuk duhen marrë asnjëherë seriozisht.

Ata mendojnë se opozita është pronë, leje ndërtimi apo tender, që ka nevojë patjetër për firmën e tyre, sepse vetëm kështu e konceptojnë politikën dhe atë që vjen prej saj”, shprehet Patozi.

Patozi e quan skenë të neveritshme atë që ndodhi në Shkodër, ndërsa shprehet se opozitës e vetmja gjë që i ka mbetur është e ulëritura, pas revolucioneve që hëngrën bijtë e vet.

“Ndaj edhe mos u çudisni, kur të shikoni skena të neveritshme si ajo me atë trimin nga Shkodra, që i hakërrehej Rudina Hajdarit se përse ajo nuk e njihte tamam babain e vet, ashtu si ai vetë. Në fakt është e vetmja gjë që u ka ngelur për të bërë, pas një serie të pashembullt revolucionesh të premtuara, të cilat, ose nuk kanë shpërthyer kurrë, ose kanë ngrënë bijtë e vet”, shkruan Patozi.

Në fund, Patozi shprehet se reagimi i të riut demokrat në Shkodër, ishte i ngjashëm me ato të bishave të uritura, që u zvogëlohet territori. “Është një reagim i ngjashëm me ato bishat e uritura, të cilat në ruajtje të territorit, që u zvogëlohet përditë, shenjojnë duke përmjerrur hapësirën e tyre, ku nuk duhet të shkelin të tjerët. Në shqip mund të thuhet edhe “tokë e xanun”, përfundon kreu i BD./Realstory.al/

Policia liron kreun e FRPD në Shkodër, Arvit Bushati

Është liruar nga qelitë e Komisariatit të Policisë së Shkodrës, kryetari i Forumit rinor të Partisë Demokratike, Arvit Bushati. Ai u ndalua në përfundim të protestës që PD zhvilloi të hënën në Shkodër, gjatë kohës që zhvillohej konstituimi i Këshillit bashkiak, dalë na zgjedhjet e 30 qershorit.

Bushati u ndalua pasi në disa momente, gjatë kohës që mbahej mbledhja e këshillit bashkiak, mes protestuesve dhe policisë pati tensione, ndërsa në fund të saj, disa militant të PD hodhën shihe uji në drejtim të deputetit Tom Doshi dhe këshilltarëve socialist.

Ndërkohë, përfaqësues të Partisë Demokratike, kanë qëndruar duke protestuar përpara komisariatit të Shkodrës, deri në momentin që u lirua kreu i FRPD-së në këtë qytet. Kujtojmë se gjatë momentit që policia shoqëroi Arvit Bushatin, ishin të pranishëm dhe drejtues të Partisë Demokratike. Ish-deputeti Bardh Spahia pati dhe një debat me disa punonjës të policisë, duke e cilësuar ndalimin e kreut të FRPD si ‘të paligjshëm’.