Kryesia e PS, Rama: Fushata mbyllet në Vlorë, më 30 qershor proces me standarde

Fushata elektorale është futur në javën e fundit, teksa na ndajnë pesë ditë nga mbyllja e saj. Mëngjesin e kësaj të hëne, Kryeministri Edi Rama e ka nisur ditën me një mbledhje të kryesisës së Partisë Socialiste. Nga sa mësohet, kryesocialisti u ka lënë porosi anëtarëve të kryesisë për mbarëvajtjen e procesit zgjedhor, që për qeverinë mbetet i konfirmuar se do të zhvillohet më 30 qershor.

Gjithashtu në mbledhjen e kryesisë është vendosur edhe vendi i mbajtjes së mitingut përmbyllës të fushatës elektorale. Kryeministri ka zgjedhur qytetin e Vlorës për të thënë fjalën e fundit për këto zgjedhje, para se vendi të shkojë në heshtje elektorale dhe më pas në procesin e votimit.

Rama mësohet tu ketë thënë deputetëve dhe drejtuesve politikë në qarqe se procesi i votimit në 30 qershor do të jetë me standarde, ndërkohë, për garantimin e tij, kreu i qeverisë ka kërkuar që të respektohet Kodi Zgjedhor. Në mbledhjen e kryesisë është diskutuar edhe paralajmërimi i opozitës jo parlamentare, që është shprehur se nuk do të lejojë mbajtjen e procesit zgjedhor.

Edhe në këtë pikë, mësohet se Rama është shprehur se do ketë ndëshkime ligjore, nga burgu deri te përjashtimi përjetë nga puna në administratën publike, gjë të cilën, shefi i qeverisë e ka përsëritur edhe në takimet elektorale që ka mbajtur gjatë fushatës.

Rama: E shpëtova Lulin në 2017, sot se ndaloj dot të bëj vetëvrasje politike

Kryeministri Rama në vijim të prezantimit të kandidatëve për kryetar bashkie për zgjedhjet e 30 qershorit është ndalur ditët e premte në Urën Vajgurore, ku ka prezantuar kandidaten Juliana Memaj.

Rama tha se qeveria e ka shpëtuar një herë Lulzim Basha nga dështimi dhe vetëvrasja politike dy vite më parë kur pranuan çdo kërkesë të tyre duke u dhënë edhe gjysmën e qeverisë, por sot nuk i ndalon dot të bëjnë një vetëvrasje politike. “Ata kanë panik nga reforma në drejtësi. Ne nuk kemi frikë dhe jemi të vendosur ta sjellim deri në fund zbatimin e saj. Ata ikën nga parlamenti në 2017 se nuk dëshironin të votonin vettingun, të njëjtën gjë po bëjnë edhe sot. Unë arrita ta shpëtoja Lulin në 2017, mori gjithçka që kërkoi, mori gjysmën e qeverisë. I toleruam pafund. Këtë herë nuk i ndaluam dot të vrasin veten politikisht. Nuk është detyra jonë dhe as në mundësitë tona që t’i shpejtojmë përsëri. Detyra jonë është të paraqitemi në zgjedhje më 30 qershor.’- tha Rama

Nga Ura Vajgurore, Rama tha se zgjedhjet e 30 qershorit do të bëjnë njëherë e mirë ndarjen e politikës së mbrapshtë dhe krijimin e një të ardhme më të ndritur. Këto zgjedhje janë legjitime edhe pa opozitën që është vetëpërjashtuar. PS ka marrë mbështetjen e shumicës së shqiptarëve pasi e ka merituar atë me punën e saj, ndërsa e cilësoi opozitën rrugore dembele dhe pa ide për t’ia paraqitur popullit.

“Çështja nuk është se kush kandidon në Bashki, por se si ne të gjithë së bashku do ta ndajmë të ardhmen nga e shkuara, si do të zgjedhim mes ideve, projekteve dhe punës dhe rrugë së baltës dhe konfliktit në çdo ballafaqim. Ata kanë frikë të gjykohen në zgjedhje dhe për këtë kërcënojnë rrugëve me popullin imagjinar se nuk do të lejojnë popullin në zgjedhje. Një gjë është e paktë por sigurt, ato mund të vriten vetë politikisht por nuk vendosin dot asgjë tjetër për ne dhe Shqipërinë që ne duam.”

Rama nga Mirdita: Mos cenoni zgjedhjet, do digjeni

Kryeministri Edi Rama pas prezantimit të kandidates Majlinda Cara në bashkinë e Kurbinit, është ndalur edhe në qytetin e Mirditës ku prezanton kandidatin Ndrec Deda. Gjatë fjalës së tij Rama nuk i kurseu akuzat për kreun e opozitës duke i cilësuar si shkatërrues të qetësisë së vendit, dembela që nuk janë të aftë të bëjnë asnjë punë si dhe përmes dhunës dhe trazirave në protesta fshehin atë që e dinë shumë mirë ‘që janë humbës në zgjedhjet e 30 qershorit’.

“Njerëzit e bëjnë dallimin se kush është kalë për t’u ngarkuar dhe kush është gomar për t’u përcjellë në rrugën e vete.” tha Rama i cili përsëriti edhe një herë thirrjen për të rinjtë dhe qytetarët të mos tërhiqen nga opozita për të cenuar zgjedhje, pasi masat e marra do të jenë të rënda.

“U them atyre që protestojnë, që nuk duan qeveri, që duan që unë të iki një orë e më parë, mendoni si shqiptarë, e mos mendoni si huliganë. Ata nuk kanë për t`ia dalë. Ata mund të marrin më qafë disa njerëz, t’i çojnë pas hekurave, e pastaj për vete shkojnë e flenë të qetë në shtëpi. Nuk do të hyni dot në BE, mos ja digjni këtë mundësi vetes duke ndjekur Lulin nga pas.” – tha Rama

Rama bëri edhe një dallim të qartë se si ka ndryshuar Mirëdita sot nga ajo që ishte para 4 vjetësh, falë punës dhe përkushtimit të qeverisë.

“Është e qartë për këdo që do të shikojë dhe do të përdori mendjen e tij duhet të dijë se ne nuk jemi me te mirët por më të mirë se ne nuk ka. Ata janë pak dhe do të jenë përditë e më pak, sepse njerëzit që i ndjekin pas do i braktisin çdo ditë. Akuzojnë policinë për dhunë, por në fakt filmimet tregojnë se protestuesit dhunohen nga huliganët me kapuça të zinj. Këto janë shembuj pse në protestat e opozitës, njerëzit me mend në kokë nuk mund të bëhen pjesë, edhe pse mund të jenë të pakënaqur me qeverinë.”

Gjithashtu Rama përsëriti edhe një herë se nuk do të largohet pse e kërkon opozita rrugore por “ne do të ikim vetëm kur të vendos populli”.

PS nis fushatën, Rama: Kush prek zgjedhjet, luan me zjarrin!

Partia Socialiste ka hapur zyrtarisht fushatën elektorale për zgjedhjet lokale të 30 qershorit. Pas prezantimit të disa prej kandidatëve për kryetar bashkie në disa qarqe të vendit, fjalën kryesore të hapjesë së fushatës e ka mbajtur Kryeministri Edi Rama. Që në nisje të fjalës së tij, Edi Rama u shpreh se opozita politike e vendit ka frikë nga ballafaqimi demokratik, ndërsa u shpreh se zgjedhjet pa opozitën janë anti-ligjore, vetëm atëherë kur opzitës i pengohet pjesëmarrja në zgjedhje.

“Ata kanë frikë nga zgjedhjet prandaj bërtasin rrugëvee dhe kërcënojnë. Kanë frikë nga ballafaqimi demokratik, dhe betohen se do të imponojnë një përplasje anti demokratike. Sot unë u them se zgjedhjet janë të cdokujt prej jush dhe kush e con ndërmend tu pengojë duhet të mendojë dy herë para se ti bjerë me kokë gurit themelor. Ata që vendosën që të dalin nga binarët e sistemit nuk mund të vendosin për asgjë më shumë përves njeri tjetrit. Zgjedhjet pa opozitën kryesore janë anti demokratike kur pengohet jo kur vendos që të mos hyjë vetë” tha Rama.

Duke vijuar në këtë linjë, Kryeministri Edi Rama u shpreh se opozita ka frikë nga Reforma në Drejtësi, duke shtuar se opozita nuk ka asgjë tjetër në dorë, përveç se të vetëvritet politikisht.

“Ata kanë të drejtë që të bërtasin dhe ulërasin, të na shajnë dhe mallkojnë, por është e drejta e tyre për të sabotuar çeljen e negociatave, por ta harrojnë se kanë në dorë gjë tjetër përvecse të vetëvriten politikisht dhe të nxijnë faqen e tyre dhe Shqipërinë me gënjeshtrat dhe shpifjet skandaloze. Ata kanë një problem, janë pak, ne jemi shumë. Ata janë dembelë dhe të paaftë për të drejtuar, ne jemi punëtorë. Ata janë frikacakë dhe të alarmuar nga reforma në drejtësi, ne jemi guximtarë dhe të vendosur për të bërë shtet, ku drejtësia është e barabartë. Ata janë në panik prandaj i drejtohen dhunës. Ata janë të verbuar” tha Rama.

Kryeministri Edi Rama i është përgjigjur përsëri opozitës, në lidhje me deklaratat e artikuluara nga kjo e fundit se “nuk do të lejohet mbajtja e zgjedhjeve më 30 qershor”. Rama u shpreh se askush të mos guxojë të bëjë një maskarallëk të tillë ndaj vendit.

“Kjo nuk është fushatë pa kundërshtarë, por betejë me kundërshtarët e zgjedhjeve. Një plak i marrë dhe i marrë fund që është mësuar që të luajë me zjarrin, që e ka djegur njëherë Shqipërinë, dhe erdhi në pushtet duke përfituar nga përçarja jonë dhe kujton se na bën shantazh me zjarrin e urrejtjes së tij dhe atë pinokun e vogël që ka në krye të partisë së tij. Ne nuk do të kërkojmë votën, por qytetarinë, përgjegjshmërinë kombëtare, përgjegjësia. Kundërshtari kërkon njerëz lart e poshtë për një turp që do ta dëmtonte shumë rëndë Shqipërinë, që do ta bënte këtë vend skenë barbarie për të marrë peng zgjedhjet nga bandidizmi. Do ta damkoste këtë vend në mbarë Europën. Mos guxojë kërkush që të mendojnë një maskarallëk të tillë ndaj vendit, që nuk është i asnjë partie, por i të gjithë fëmijëve të Shqipërisë. Të dalësh kundër zgjedhjeve fizikisht do të thotë të dalësh kundër Kushtetutës”.

“Kush e merr qetësinë për tulatje dhe na kujton akoma këtë vend si sheshin e vjetër për përsheshin e një plaku të marrë dhe kush gënjehet nga vetëpërmbajtja jonë luan me zjarrin. Nuk duam të shohim asnjë pas hekurave për hesap të një plaku të marrë, prandaj do u dalim borxhit. Do u themi sa keq mund të përfitojë një individ që dënohet për krime zgjedhore, duke humbur lirinë në SHBA dhe bashkë me gjithë anëtarët e familjes së tij, kush nuk beson le të shkojë të pyes plakun, po ashtu edhe të hyrjes në BE”, tha ndër të tjera Rama.