Ruçi merr mbështetjen nga Praga: Lobim pranë vendeve skeptike të BE

Kryetari i Kuvendit të Shqipërisë, Gramoz Ruçi, ka zhvilluar një vizitë zyrtare dy ditore në Pragë, ku u prit nga Kryetari i Parlamentit të Republikës Çeke,  Radek Vondráček.

Praga ishte stacioni i fundit i veprimtarisë lobuese të Kryetarit të Kuvendit për të siguruar mbështetje për hapjen e negociatave. Në këtë vizitë Ruçi shoqërohej nga zëvendëskryetari i Komisonit të Jashtëm dhe anëtar i Komisionit parlamentar të integrimit europian, deputeti Ralf Gjoni, si edhe ambasadori i Shqipërisë në Republikën e Çekisë,  Ilirian Kuka.

Takimin e parë delegacioni parlamentar shqiptar e zhvilloi me Kryeministrin e Republikës së Çekisë, Andrej Babiš. Kryetari i Kuvendit vlerësoi marrëdhëniet e shkëlqyera politike midis të dy vendeve dhe nënvizoi se “Këto marrëdhënie duhet të pasohen nga intensifikimi i bashkëpunimit ekonomik, tregtar dhe nxitja e investimeve çeke në Shqipëri.

Gjithashtu Ruçi, pasi falenderoi për mbështetjen e fuqishme dhe të pakushtëzuar të Çekisë për hapjen e negociatave me Shqipërinë, theksoi se “Ne jemi këtu  për të kërkuar nga  Kryeministri Babiš dhe qeveria e Republikës Çeke, si edhe katër vendet e Grupit të Vishegradit, të lobohen pranë vendeve skeptike të BE-së për sqarimin e arritjeve të reformave integruese në Shqipëri dhe hapjen e negociatave në  mbledhjen e ardhshme të Këshillit Europian.”

Kryeministri Andrej Babiš nënvizoi se “Ne i njohim arritjet  e padiskutueshme të Shqipërisë dhe, përveç mbështetjes sonë dhe të Grupit të Vishegradit, do të bëjmë të gjitha përpjekjet që edhe vendet e tjera të BE-së të njohin e vlerësojnë këto arritje dhe të votojnë për hapjen  e negociatave me Shqipërinë në mbledhjen e ardhshme të Këshillit Europian.”

Ndërsa mbi situatën politike në Shqipëri, Kryeministri Babiš u shpreh se “Protestat paqësore janë një element i demokracisë, por qeverisja e vendit fitohet vetëm nëpërmjet konkurrencës në zgjedhje.”

Në takimin me Kryetarin e Dhomës së Përfaqësuesve, Radek Vondráček, Kryetari i Kuvendit,   Ruçi, nënvizoi se marrëdhëniet dhe bashkëpunimi midis të dy vendeve është lehtësuar edhe nga marrëdhëniet e shkëlqyera parlamentare. 

Vondráček u shpreh se ky bashkëpunim do të vazhdojë e të thellohet, ndërsa foli edhe për situatën politike në Shqipëri duke thënë se  “Opozita konstruktive bëhet në parlament dhe jo jashtë parlamentit.”

Ruçi: T’i mbrojmë fëmijët nga pabarazia dhe kurthet e teknologjisë

Kreu i Kuvendit Gramoz Ruçi ka uruar fëmijët  me rastin e 1 qershorit. Ai ka përcjellë një mesazh për fëmijët, shoqëri të drejtë dhe politikë të sinqertë.

Ruçi thotë se dija është shtegu drejt mirëqenies së fëmijëve dhe bën thirrje për mbrojtjen e tyre nga rreziqet e pabarazisë dhe kurthet e teknologjisë.

“Të mbrojmë fëmijët nga rreziqet e pabarazisë. Të mbrojmë fëmijët nga kurthet e teknologjisë”, shprehet Ruçi.

Ruçi dhe Balla në Holandë për “reputacionin” e Shqipërisë

Kreu i Kuvendi, Gramoz Ruçi dhe kreu i grupit parlamentar të PS, Taulant Balla janë duke zhvilluar një takim zyrtar në Holandë pak para vendimin për hapjen e negociatave të Shqipërisë me BE. Holanda është një nga vendet që ka kritikuar më shumë shqiptarët duke i cilësuar si kriminelë dhe madje ka firmosur edhe një mocion për vendosjen e vizave të përkohshme për Shqipërinë.

Gjatë një dëgjese, Komisioni për Çështjet e BE-së në Parlamentin e Holandës ka kërkuar nga delegacioni shqiptar vlerësimin nëse Shqipëria është apo jo gati për hapjen e negociatave.

Ruçi gjatë fjalës së tij tha se Shqipëria është gati për negociatat pasi i ka kryer të gjitha detyrat e saj.

“Po, Shqipëria është gati për çeljen e negociatave në qershor sepse i ka bërë në mënyrë shembullore detyrat e saj të shtëpisë. Me reformën në drejtësi, si krye-reforma e integrimit, Shqipëria ka dhënë një shembull jo vetëm për vendet aspirante, por edhe për vendet e BE-së.” – tha Ruçi

Ndërsa Balla tha se kriminelët nuk kanë as ngjyrë dhe as atdhe dhe është e padrejtë që shqiptarët të demonizohen padrejtësisht në media.

“Ne politikanët dhe vendim-marrësit duhet të dallojmë perceptimin mediatik nga perceptimi real i njerëzve për kriminalitetin. Shqiptarët që punojnë e jetojnë në Holandë janë qytetarë normalë e dinjitozë, por demonizohen padrejtësisht nga media. Kriminelët nuk kanë as ngjyrë, as atdhe. Ata duhet t’i luftojmë bashkërisht.” – tha Balla

Ruçi mesazh opozitës për 1 Maj: Rrugët e Shqipërisë duhen ndërtuar, jo bllokuar

Kryetari i Kuvendit, Gramoz Ruçi ka zgjedhur pikërisht Ditën e Punëtorëve, 1 Majin, për t’i dhënë një mesazh klasës politike në vend dhe veçanërisht opozitës.

Ai thotë se sot më shumë se kurrë duhen vlerësuar njerëzit e punës, ndërsa politikanët duhet të ulen nga tribuna. Ruçi gjithashtu thotë se sot në 1 Maj rrugët e Shqipërisë duhen ndërtuar dhe jo bllokuar në luftë për të marrë pushtetin.

Mesazhi i plotë i Gramoz Ruçit

“Sot është 1 Maj. Jemi mësuar ta quajmë Dita e Punëtorëve, Festa e Punëtorëve apo Dita e Punës. Pavarësisht emërtimeve në kohë e vende të ndryshme, një gjë mbetet e pandryshuar. 1 Maji është mirënjohja për njerëzit e punës. Për punëtorët, një ditë nderimi. Për shtetarët e politikanët, një ditë reflektimi.

Dikush nga ata që prodhojnë vetëm fjalë mund ta quajë një veprim të vjetëruar nderimin për 1 Majin. Për mua respekti për ata që prodhojnë të mira materiale e publike, është modern, bashkëkohor dhe njerëzor.

Sot edhe unë ndjehem një punëtor, sindikalist, student, mësues, infermier, polic.

Të rrëmbyer pas pasioneve politike, shpesh harrojmë që dhjetëra mijëra vajza e djem të Shqipërisë kërkojnë të hyjnë në tregun e punës që të bëhen zotër të vetes dhe jetës së tyre. 1 Maji na thërret të kujtohemi për ta.

Ne bëjmë retorika, ndërkohë që mbi një milion shqiptarë që punojnë, në sektorin publik apo privat, kërkojnë kushte të denja pune dhe pagë më të lartë. Të ndalojmë fjalët boshe dhe tu kushtohemi atyre.

Një pjesa jonë, në emër të interesave të një pakice që kërkon me çdo kusht karrige pushteti, bllokon rrugët e Shqipërisë. Rrugët e Shqipërisë duhen ndërtuar, jo bllokuar.

1 Maji na kujton se Shqipëria ka nevojë për politika më të mira, në rradhë të parë për botën e punës. Prandaj, të ulim nga tribunat e foltoret politikanët dhe të ngjisim në to njerëzit e punës.

Të punojmë që rritja e ekonomisë së Shqipërisë të prodhojë punë dhe mirëqënie cilësore për të gjithë.

Që ekonomia e Shqipërisë të prodhojë më shumë, më cilësisht dhe me kosto sa më të ulët.

Qe ekonomia e Shqipërisë të orientohet më shumë drejt sektorëve prodhues.

Që shërbimet të rrisin produktivitetin dhe të reduktojnë informalitetin.

Që puna të jetë e mbrojtur, e garantuar, cilësore dhe e denjë.

Që fshatarët shqiptarë të kenë një treg të garantuar dhe prodhimet e tyre të bëhen burim për mirëqenien dhe të ardhmen e fëmijëve të Shqipërisë.

Që vajzat dhe djemtë e Shqipërisë të marrin formimin që kërkojnë e meritojnë dhe të gjejnë punë të denjë në atdheun e tyre.

Që sipërmarrësit të shpenzojnë më shumë për formimin e të rinjve dhe këto shpenzimë të mos i quajnë humbje, por investim.

Që në ndërmarrjet shqiptare të pranohen e të punojnë më shumë vajza e djem të rinj, të cilët mund t’í kushtojnë më shumë sipërmarresve, por i lehtësojnë barrën shoqërisë.

Për këto dhe për shumë e shumë arsye të tjera, nderoj sot punëtorët shqiptarë dhe u bëj thirrje politikanëve të Shqipërisë.

Ruçi kritika RTSH-së: Njerëzit paguajnë 12 mijë lekë dhe nuk shohin asnjë kanal

Në seancën e sotme të Kuvendit teksa është diskutuar raporti i veprimtarisë vjetore të Radio Televizionit Shqiptar, kryetari i Kuvendit, Gramoz Ruçi ka shpërthyer në kritika të forta drejtuar këtij institucioni.

Ai tha se ka shumë njerëz të shqetësuar se paguajnë 12 mijë lekë dhe nuk i kap asnjë kanal të TVSH-së.  Po kështu ai tha, se pavarësisht numrit të shtuar të kanaleve të RTSH-së, asnjë prej tyre nuk ka një program për personat me aftësi të kufizuar, pra që të jepen përmes gjuhës së shenjave.

“Duke ndjekur raportin. Do të ngre çështje. Ne jemi këtu përfaqësues të atyre që na kanë zgjedhur dhe po na kanë ndjekur pyesin çfarë po raportoni kur Televizioni publik shqiptar ka tetë kanale dhe unë nuk i ndjek dot ato dhe ju flisni për paradat dhe sukseset tuaja. Ke televizor të teknologjisë së fundit, unë flas për ata që nuk kanë televizorin tënd dhe timin, me 10 mijë lekë është i vetmi kanal që taksapaguesit shqiptar janë aksionerë në financat e TVSH-së dhe e paguajnë ata, 12 mijë lekëshin.

Prandaj duhet të përfshiheshin në të gjithë debatin. E dyta vërtitet një kanal tjetër, RTSH Kuvend, diskutojnë deputetët dhe nuk merakosen për veten kur do të transmetohet në mënyrë permanente. Një pjesë e zgjedhësve tanë janë me aftësi të kufizuara dhe kërkojnë kur TVSH do na mundësojë të ndjekim Kuvendin përmes gjuhës së shenjave. Prandaj raportimet dhe rezolutat nuk duhet të jenë formale por efektive, brenda shqetësimeve që kanë njerëzit që na kanë zgjedhur”,- deklaroi Ruçi.

Balla letër Ruçit për reformën zgjedhore

Kreu i grupit parlamentar të Partisë Socialiste Taulant Balla kërkon ndryshime në komisionin e Reformës Zgjedhore.

Përmes një letre drejtuar kryetarit të Kuvendit Gramoz Ruçi, Balla kërkon shtyrjen e afatit të veprimtarisë së komisionit deri më 28 nëntor dhe puna e komisionit të realizohet në disa faza.

“Me qëllim realizimin e objektit të krijimit të Komisionit të Posaçëm Parlamentare “për realizimin e reformës Zgjedhore” dhe përfundimin e punës për miratimin e ndryshimeve të kuadrit ligjor zgjedhore për trajtimin e rekomandimeve të raportive të OSBE/ODIHR-it për tre zgjedhjet e fundit të viteve 2013, 2015 dhe 2017, si dhe propozime e ndryshme të partive politike në vend, propozoj kryerjen e disa ndryshimeve në këtë vendim:

1-Pjesë e objektit të veprimtarisë së Komisionit të shtohen edhe çështjet e sistemit zgjedhor në Shqipëri.
2-Objekti i veprimtarisë së Komisionit të mund të realizohet me disa faza, të cilat mund të përfshinë pjesë të ndryshme të Reformës Zgjedhore.
3-Afati i veprimtarisë së Komisionit të zgjatet deri më datë 28 nëntor 2019.” – shkruhet në deklaratë

Busti Skënderbeut vendoset mes arbëreshëve të Italisë

Përmes dy videove në Facebook, Kryetari i Grupit Parlamentar të PS, Taulant Balla ka treguar momentin emocionues të vendosjes së bustit të Heroit tonë Kombëtar Gjergj Kastrioti Skënderbeu, në Bashkinë e Portocannone në Itali.

Facebook🎥: Ceremonia e vendosjes së bustit të Heroit 🇦🇱 Kombëtar Gjergj Kastrioti Skënderbeu në Bashkinë e Portocannone🇮🇹, njëra prej katër komunave arbëreshe të Rajonit të Molises.

Publiée par Taulant Balla – Faqja Zyrtare sur Lundi 15 avril 2019


Portocannone është njëra prej katër komunave arbëreshe të Rajonit të Molises.

Në ceremoni ka qenë i pranishëm dhe Kryetari i Kuvendit, Gramoz Ruç.

Festë e paharrueshme sot në Bashkinë e Portocannone🇮🇹, njëra prej katër komunave arbëreshe të Rajonit të Molises, për Gjergj Kastriot Skënderbeun dhe për flamurin kuq e zi👐🇦🇱

Publiée par Taulant Balla – Faqja Zyrtare sur Lundi 15 avril 2019

Ruçi dhe Balla po zhvillojnë një vizitë zyrtare në Itali, me ftesë të Presidentit të Dhomës së Deputeteve Fico dhe Presidentes së Senatit Casellati.

Ruçi, kritika qeverisë dhe institucioneve të pavarura

Është zhvilluar sot në ambientet e kryesisë së Kuvendit takimi më drejtuesit e 21 institucioneve të pavarura të cilët raportojnë në parlament. Në këtë takim kryetari i Kuvendit, Gramoz Ruçi adresoi kritika kundrejt institucioneve të pavarura, por edhe ndaj qeverisë duke kërkuar shqyrtim sa më të shpejtë të çështjeve sensitive.

“Raportimet duhet të jenë sa më korrekte dhe në fund në dhënien llogari ndaj qytetarëve. Disa institucione nuk janë të qarta në raportim. Institucionet duhet të tregohen më të ndjeshme në rekomandime. Dua të tërheq vëmendjen, Këshillit të Ministrave dhe Ministrisë për Marrëdhënien për Parlamentin që duhet të shqyrtojë më shumë. Shërbimi i Monitorit duhet të trajtojë më imtësi çështjet me ndjeshmëri”,- tha Ruçi.

I pranishëm në këtë takim ishte dhe ambasadori i BE-së, Luigi Soreca i cili i ka kërkuar qeverisë dhe parlamentit që të bëhet më shumë për fuqizimin e institucioneve të pavarura.

“Është e rëndësishme të arrijmë rezultate të prekshme në publike. Kërkojnë një angazhim të fortë politik e teknik. Institucionet e pavarura janë kyçe për zhvillimet demokratike dhe mishërimin e vlerave të BE. Institucionet e pavarura janë instrumente për progresin e reformave apo prioriteteve kyçe që ne i monitorojmë. Shqipëria duhet të forcojë kapacitetin e institucioneve të pavarura, nevoja për të trajtuar boshllëqet në kuadrin legjislativ dhe mënyrën si funksionojnë buxhetet dhe burimet njerëzore. Thelbësore për BE që parlamenti dhe qeveria të marrin masat e duhura për punën e mëpasshme të rekomandimeve për institucionet e pavarura. Inkurajojmë ta ruani qasjen gjithëpërfshirëse”, deklaroi ambasadori i BE.

Skip to toolbar