Kriza, ja axhenda politike sot

Një ditë pas firmosje së dekretit për anulimin e datës së zgjedhjeve, kjo e martë pritet të jetë e mbushur me të tjera zhvillime politike në vend. Kështu, Partia Socialiste tashmë e ka bërë fakt të kryer nismën për shkarkimin e presidentit Ilir Meta, teksa të hënën Taulant Balla depozitoi kërkesën për zhvillimin e një debati të gjatë në seancën parlamentare të së enjtes, ku do të diskutohet shkarkimi i Metës.

Për këtë arsye, gjatë paradites së sotme, në orën 09:00, do të mblidhet Konferenca e Kryetarëve në Kuvend, ku do të caktohet data e zhvillimit të mocionit të debatit dhe ora e tij, për shkarkimin e Ilir Metës.

Sakaq, Kryeministri Edi Rama do të jetë në një seri takimesh në Bruksel këtë të martë, ku sigurisht fokus i takimeve të tij do të jetë kriza politike në vend. Një ditë më parë, saktësisht mbrëmjen e së hënës, opozita dhe presidenti Ilir Meta, morën një tjetër goditje nga partnerët ndërkombëtar.

Ishte kreu i OSBE Miroslav Lajçak, që u shpreh se lëvizja e Ilir Metës ishte një akt që mund të thellonte krizën në Shqipëri, duke kërkuar që kreu i shtetit të respektojë të drejtën e qytetarëve për të votuar.

Ky reagim erdhi pas takimit që Kryeministri Edi Rama pati me ambasadorët e vendeve të BE në mesditën e të hënës, të cilët, siç i tha një burim Realstory.al, i kanë shprehur mbështetjen kreut të qeverisë.

Mbrëmjen e të hënës, edhe Bashkimi Europian i kërkoi presidentit që të respektonte të drejtën e qytetarëve shqiptarë për të votuar. Ishte zëdhënësja e shefes për Politikën e Jashtme të BE-së, Maja Kocijançiç, e cila në emër të Federica Mogherinit, ka deklaruar të hënën se qytetarëve shqiptarë duhet t’u jepet e drejta për të votuar për të siguruar vazhdimësinë e qeverisjes lokale.

Megjithatë, të martën pasdite, opozita ka lajmëruar se do të thërrasë mbledhjen e Këshillit Kombëtar për të vendosur se si do të jetë aksioni opozitar në vijim. Një ditë më parë, në mbledhjen e kryesisë, opozita vendosi ngritjen e strukturave të posaçme për atë që ajo e quan “parandalimin e rrezikut që i kanoset demokracisë”.

Por, po sot, priten të tjera reagime ndërkombëtare, duke pasur parasysh vizitën e Kreyministrit Edi Rama, që është angazhuar për të gjetur mbështetjen e ndërkombëtarëve, me qëllim që zgjedhjet të mbahen në afatin e caktuar, ndërsa pas tyre, ashtu siç ai vetë është shprehur një javë më parë në “Real Story”, të shihet mundësia për dialog.

OSBE distancohet nga vendimi i Metës, Boschardt: Është çështje e brendshme!

Ambasadori i OSBE në Shqipëri, Bernd Boschardt është distancuar nga komentet për shfuqizimin e datës së zgjedhjeve nga presidenti Ilir Meta. Në një aktivitet të organizuar sot në kryeqytet, Boschardt u shpreh se kjo është çështje e brendshme e Shqipërisë.

“Kryesia jonë bëri një deklaratë shumë të fortë për këtë javën që kaloi. Dhe kryesia e radhës e OSBE kur ishte këtu tha se sa i takon zgjedhjeve është çështje e brendshme e Shqipërisë. Kjo është çështje e debatit të brendshëm dhe kam shumë besim se institucionet shqiptare do të gjejnë se kush e ka argumentin më të mirë ligjor”, u shpreh Boschardt.

Kreu i OSBE në vendin tonë, nën insistimin e gazetarëve, u shperh se kjo është çështje mes parlamentit, Kushtetutës dhe Gjykatës Kushtetuese, ndërsa shtoi se sa i përket mbajtjes së zgjedhjeve, edhe kjo është detyrë e institucioneve shqiptare për të marrë një vendim.

“Ne kemi thënë shumë qartë që protestat dhe ngritja e zërit është e drejtë demokratike dhe këto përgjegjësi i kalojnë atyre që organizojnë këto protesta. Kanë përgjegjësi për dhunën e organizuar”.

“Institucionet shqiptare duhet të marrin një vendim për këtë. Janë pyetje të vështira dhe me pamje të ndryshme ligjore, dhe do ta shikojmë në vijimësi“.

Petro Koçi: Rilindja e Sali Berishës ka kaluar gjithmonë nga Ilir Meta!

Sipas Petro Koçit, Ilir Meta është bërë njësh me Berishën. Ai ka postuar në facebook një reagim ku shkruan se Meta po bashkëpunon me opozitën për të delegjitimuar institucionet.

“Rilindja e Sali Berishes ka kaluar gjithmone nga Meta! Strategjia e opozites ne bashkepunim me Presidentin eshte delegjitimimi i institucioneve. Dmth i vete shtetit. PS mbron institucionalitetin.

Presidenti cakton, por jo ç’cakton daten e zgjedhjeve!”, deklaron Koçi, ndërsa thotë se presidenti nuk ka të drejtë të anulojë dekretin për zgjedhjet.

Rilindja e Sali Berishes ka kaluar gjithmone nga Meta!
Gepostet von Petro Koçi am Montag, 10. Juni 2019

“Parti jashtë afateve Ligjore”, Patozi-Metës: Je produkt i pazareve të pista!

Ilir Meta firmosi mëngjesin e kësaj të hëne dekretin për anulimin e zgjedhjeve lokale të 30 qershorit. Gjatë fjalës së tij të gjatë, ku dha argumentat, që sipas tij ishin kushtetues dhe moral, Ilir Meta u shpreh ndër të tjera se partia Bindja Demokratike u krijuar për të legjitimuar zgjedhjet.

Menjëherë pas fjalës së Metës, ka ardhur reagimi i Partisë Bindja Demokratike, Astrit Patozi, i cil është shprehur se fjalët e metës në adresë të partisë së tij, janë një fushatë pozitive për BD. “Ndërsa për konsideratat e tij politike dhe jo insistucionale nuk shqetësohemi fare, madje i vlerësojmë ato si një kontribut pozitiv për fushatën e Bindjes Demokratike në këto zgjedhje”, thotë Patozi.

Më tej, Astrit Patozi vijon duke u shprehur se Bindja Demokratike nuk është fajtore në krizën politike në të cilën ndodhet vendi, kreu i kësaj partie thotë se “ndërkohë që vetë Presidenti i Republikës, si funksion dhe si personazh politik, është produkti më sinjifikativ i pazareve të pista midis tyre”.

Astrit Patozi i kërkon Ilir Metës të heshtë kur bëhet fjalë për Bindjen Demokratike, ashtu sikundër ka bërë dhe LSI, parti, të cilën, sipas Patozit, Ilir Meta ia la trashëgim bashkëshortes së vetë.

“Por edhe në këtë kontekst, është më mirë që të pranojë heshtjen, me të cilën e ka përcjellë krijimin e Bindjes Demokratike, partia që ia la trashëgim bashkëshortes së vet, se sa të marrë si aksioma thashethemet që dëgjon nga një forcë tjetër politike, që nuk e ka fshehur mërzinë dhe shqetësimin për futjen tonë në garën e 30 qershorit”, thuhet ndër të tjera në deklaratën e Patozit.

Fjalët e Metës për Bindjen Demokratike gjatë konferencës për shtyp:

Kjo situatë bëhet edhe më absurde, referuar faktit që për këto zgjedhje në më shumë se në gjysmën e njësive të qeverisjes vendore konkuron vetëm një kandidat për t’u zgjedhur si Kryetar Bashkie, ndërkohë që për pjesën tjetër konkurohet me kandidatë të propozuar nga një forcë politike e regjistruar në minutat e fundit në sistemin gjyqësor, dhe e regjistruar pranë KQZ përtej afateve ligjore.

Kjo gjë tregon qartë së ky proces zgjedhor është fiktiv dhe është një element shtesë që provon faktin që standardet demokratike të kërkuara për plotësim jo vetëm që nuk mund të përmbushën, por po shkelen në mënyrë flagrante.

I gjithë sistemi i qeverisjes lokale që do të funksiononte si rezultat i këtyre zgjedhjeve pa garë dhe konkurentë, nuk do të bazohej në një sistem zgjedhjesh, siç parashikon neni 1, pika 3 dhe neni 109 i Kushtetutës, por në një sistem emërimi të drejtpërdrejtë të organeve përfaqësuese dhe ekzekutive të njësive të qeverisjes vendore, i cili do të cenonte strukturën e demokracisë nga poshtë lart dhe pjesëmarrësve e zgjedhësve në qeverisjen vendore.

Baze: Përse nuk e qetësojmë dot Ilir Metën dhe Sali Berishën?

Të gjithë ata që mendojnë se Ilir Meta e komplikoi krizën politike, I bien kot më qafë. Merita e vetme e Ilir Metës është që e qartësoi krizën politike.

Kjo krizë është ngjizur qysh në fillim si një lëvizje e përbashkët e Sali Berishës dhe Ilir Metës, njëri duke përdorur opozitën dhe tjetri institucionin e Presidentit për të prodhuar një kaos dhe destabilizim të vendit, me qëllim që kriza të negociohej me Ata, dhe Ata të merrnin garancinë e duhur që nuk do ti prek më askush.

E gjithë kjo ka filluar si krizë paniku në Korrik të vitit 2016, ndërkohë që po përpëliteshin të votonin Reformën në Drejtësi. Rezistenca e tyre ndaj reformës ishte shembullore, e guximshme dhe historike për parti që janë shpallur formalisht pro perëndimore.

Beteja më e madhe gjatë reformës u bë kundër pranisë së ndërkombëtarëve në mekanizmat e vendimarrjes së institucioneve të Vetingut dhe vazhdoi pas miratimit të reformës me sabotimin e ngritjes së institucioneve për aq sa kishin mundësi.

E nisur si krizë paniku dhe e vazhduar si panik I thelluar, kur askush nuk u ofroi një Pazar që ata do të ishin të përfillur, ose të siguruar se nuk do tu ndodhte gjë, u shkua drejt zgjedhjeve të vitit 2017, kur Lulzim Basha tentoi tu ik nga kontrolli, nën shpresat se do të bënte një qeveri të përbashkët me Edi Ramën dhe do ishte faktor në negocimin e fatitë të tyre. Prat ë bëhej shefi I tyre.

Fati e desh që as ai të mos faktorizohej pas zgjedhjeve si humbës, dhe Sali Berisha I vuri atij zgjedhën në qafë, duke e detyruar të ishte kryetar formal I PD, edhe më tutje, me kusht që tani të mos bënte asgjë pa leje.

Prej vitit 2017, Shqipëria po duron talebanizmin e dy liderëve politik Sali Berisha dhe Ilir Meta, njëri duke shpuar me hosten, “kaun që i ka vënë të tërheq parmendën”, Lulzim Bashën dhe tjetri në Presidencë duke bërë çështë e mundur të destabilizoj vendin duke shkelur rregullisht kushtetutën, që nga dekretimet e ministrave, pengesën për reformën dhe tani me daljen jashtë kontrollit, duke tentuar tu heq shqiptarëve që duan të votojnë më 30 qershor, të drejtën e tyre. Nesër ose pasnesër, mund të bëj dhe marrëzira më të mëdha, por nuk është për tu shqetësuar.

Ajo që kanë tre vjetë që presin Sali Berisha dhe Ilir Meta, është thjeshtë që dikush tu trokas në derë dhe tu jap garanci, ose ti quaj faktor. Por në vend të garancive ata kanë provuar pasigurinë.

Kur Sali Berisha filloi të provokoj daljen nga parlamenti dhe djegien e mandateve, duket se në vend të posterit që tu troskte në derë, për Pazar, u trokiti posteri që i dha lajmin për të qenë person I padëshiruar për të vizituar SHBA. Më pas kjo ju përsërit numurit 2 të LSI, si një mesazh I qartë për Ilir Metën në Presidencë. Kjo ishte dhe pika e ujit, që zbrazi gotën.

Tani, shpresa e fundit e Sali Berishës dhe Ilir Metës është të destabilizojnë situatën, të shkatërrojnë zgjedhjet dhe të justifikojnë një dhunë të komanduar në vend, një lloj terrorizmi politik, me shpresë se dikush nga Uashingtoni ose Brukseli, do të trokas tek ata, duke u thënë që gabuam që nuk u morëm me ju që në fillim.

Kjo është e vetmja shpresë e tyre. Dhe kjo vjen pasi Lulzim Basha ka marrë paralajmërime të qarta se nëse prek zgjedhjet do të jetë personalisht në listat e zeza të përjetëshme të SHBA dhe nëse do të ishte në SHBA , do të ishte arrestuar për molotovët. Ilir Meta po ashtu besoj e ka marr mesazhin pas vizitës së gruas së tij në Uashington, nëse ushqen dhunën dhe destabilizon institucionet.

Problemi që Sali Berisha dhe Ilir Meta kanë sonte, nesër në drekë, pasnesër, më 30 Qershor e më pas, është nëse do të kenë mundësi të bëhen faktorë destabilizimi.

Nëse jo, ata së paku duan të bëhen heronjtë e dstabilizimit. Gjestet e hapura kundër kushtetutës, ç’dekretimi I zgjedhjeve, I panjohur në historinë botërore, kërcëniemt qesharake se do të shpërndaj parlamenitn, apo do vras veten si Allende, janë të gjitha përgatitje për të krijuar një kazus, për atë që mund tu ndodh, kur asgjë të mos bëjnë. Kur drejtësia dhe parlamenti të filloj të merret me ta, kur të shkarkohet nga presiddnt dhe ti dorzohet drejtësisë, kur “Bin Laden”-i I PD të dal nga shpella, me barrela drejt qelisë, dhe vendi ti kthehet normaliteti, ata duan së paku të thonë se po ndëshkohen dhe sakrfikohen, jo se kanë vjedhur dhe kanë vrarë, por se tentuan të përballen me Perëndimin

Dhe kjo është një aspiratë legjitime e tyre, që mund t’ia plotësojnë vetes. SHBA, Bashkimi Evropian, qeveria shqiptare, parlamenti, KQZ dhe çdo institucion tjetër në vend, duhet ti injorojnë këto gjeste skizofrenike, të njerëzve të dëshpëruar që ndjehen të pasigurtë. Duhet ti lëmë në fatin e tyre. Çështja e zgjedhjeve është një çështje që e zgjidh KQZ, ndërsa çështja e presidentit, një çështje që e zgjidh parlamenti. Çështjen e futjes së tyre në histori si heronjë që po sakrifikohen në pritje të një pazari, nuk e ka në dorë as qeveria, as parlamenti, as SHBA dhe askush tjetër. Ai është një fiksim I tyre, të mësuar që gjithë jetën, sa herë kanë qenë afër humnerës, dikush u ka dhënë një dorë. Këtë rradhë nuk do të ketë dhe gjithë dëshpërimin dhe paranojën e tyre, merreni me qetësi. Nuk është problem I shqiptarëve, por problem I atyre që duan tu nxijnë jetën shqiptarëve, për të zbardhur të shkuarën e tyre. Nuk I ndihmojmë dot më.

Dekreti i Metës, Veliaj: Presidenti po i jep një dorë Bashës, por ai nuk bëhet më

Nga Farka ku zhvilloi një takim elektoral, Erion Veliaj ka komentuar vendimin e presidentit Ilir Metan për shtyrjen e datës së zgjedhjeve. Veliaj u shpreh se akti i Metës i shkon në ndihmë Lulzim Bashës, por, sipas Veliajt, Luli ka treguar se nuk është i aftë dhe nuk bëhet më.

“Ne të vazhdojmë punën, rrugën dhe drejtimin e duhur për Tiranën tonë. Jam entuziast se shumica e popullit shqiptar nuk shkuan pas një guri që hodhi njëri në lumë. Sot nuk ka asnjë pengesë pse qytetarët të mos zgjedhin politikanët e duhur. Presidenti e provoi që t’i japë Lulit një dorë. Po Lulit jepi ça të duash nuk bëhet më. E kishte Tiranën në dorë 4 vite”, u shpreh Veliaj.

Dekreti i Metës. Çfarë është presidenti për ju?

Më tej, kryebashkiaku Erion Veliaj u shpreh se Lulzim Bashën po mundohen ta mbajnë me pilula, ndërsa shtoi se sot u kemi thënë lamtumirë atyre që na bllokojnë. “Lulin po mundohen ta mbajnë me shiringa me pilula, po nuk bëhet më. Këtu në Farkë s’kishte autobus të vinte këtu, nuk kishte një kopsht, një çerdhe. E menaxhonte Loni këtu. Duket sikur ka qenë para 100 viteve, por ka qenë para pak. Sot i kemi thënë lamtumirë dekreteve, lamtumirë atyre që na bllokojnë”, tha Veliaj.

Gjatë fjalës së tij, Erion Veliaj, u shpreh se dekreti i Metës vjen direkt pas reagimit që mbajti SHBA, që u shpreh se më 30 qershor amerikanët do të vinin në Shqipëri për të monitoruar zgjedhjet, dhe përgjegjësit e dhunës do të ishin Luli e Mona.

“Dekreti nuk ndodhi në dhjetor, para se të caktohej data e zgjedhjeve, por ndodhi dje. Dekreti ndodhi dje sepse Amerika tha do jemi në Shqipëri në 30 qershor që qytetarët të votojnë të lirë. Ja pse ndodhi. Një herë në 4 vjet, do merret më i miri në punë. Jo kur të dojë qejfi ty. Kjo nuk është në dorë të politikanëve, është populli që i zgjedh”, theksoi Veliaj.

Rama: Meta do konflikt, por zgjedhjet janë në 30 qershor

Për Kryeministrin Edi Rama, vendimi i Ilir Metës për shfuqizimin e dekretit për datën e zgjedhjeve të 30 qershorit, është përçarës dhe konflikt-nxitës. “Ajo që ka bërë dje është përçarëse, konflikt-nxitëse, nga pikëpamja politike është vetëvrasje dhe një turp që do ti mbetet atij”, u shpreh Kryeministri. Nga Dibra, ku mbajti një takim elektoral, Edi Rama tha se vendimi i Ilir Metës erdhi pas goditjes që i dha SHBA. “Dje doli dhe Presidenti, për shumë kënd i papritur, por jo për mua, doli në një moment kur protesta e tyre po binte dhe morën një goditje nga SHBA, Meta doli dhe tha; po anuloj zgjedhjet”, tha Rama.

Më tej, Rama shtoi se me aktin e shfuqizimit të datës së zgjedhjeve, Ilir Meta i ka vendosur në një pozitë të vështirë, ndaj sipas kreut të Qeverisë, Meta nuk meriton më të jetë në zyrën që mban. “Ai u shfaq si lider i opozitës, duke na vendosur në pozitën më sëkëllditëse. Nga dje Ilir Meta nuk meriton më zyrën ku rri”, u shpreh Kryeministri.

Dekreti i Metës. Çfarë është presidenti për ju?

Në këtë linjë, gjatë fjalës së tij, Edi Rama solli në kujtesën e banorëve të Dibrës dhe gjithë Shqipërisë, situatën dhe krizën politike të dy viteve më parë. Ai tha se ish-presidenti Bujar Nishani, paçka krahut politik, aso kohe i këroi Lulzim Bashës dhe Kryeministrit, vetë Ramës, që të dy të bënin një kërkesë me shkrim për shtyrjen e datës së zgjedhjeve brenda Kushtetutës dhe të vinte si kërkesë konsensuale nga të dy liderët.

“Bujar Nishani, president i asaj kohe, mund të themi çfarë të duam por kjo është e vërteta, ai e kërkoi me shkrim dhe vulë, timen dhe shokut tim Lulzim Bashës, që ti kërkonim presidentit atë shtyrje brenda kushtetutës si kërkesë konsesuale. Nuk mund dot kurrë presidenti që të vendos dot shtyrjen e zgjedhjeve pasi i ka vendosur”, tha Kryeministri. Pavarësisht kësaj deklarate, Kryeministri Edi Rama u shpreh i vendosur, se zgjedhjet e 30 qershorit do të mbahen, dhe sipas tij, ato do të shërbejnë për ndarë të shkuarën nga e ardhmja.

“Ka akoma njerëz që pyesin, po ua them të gjithëve, më 30 qershor ne do të zgjedhim të gjithë kryetarët e bashkive të Shqipërisë. Më 30 qershor Shqipëria do të zgjedhë rrugën e të ardhmes, jo të së shkuarës”, shtoi Kryeministri nga Dibra.

Kërkojmë mendimin tuaj: Si e vlerësoni vendimin e Presidentit për shtyrjen e datës së zgjedhjeve?

Vetëm pak minuta para se të niste protesta e tetë kombëtare e opozitës këtë të shtunë, Presidenti i Republikës Ilir Meta nxorri një njoftim publik, ku shprehej se kishte vendosur shfuqizimin e dekretit për datën e zgjedhjeve të 30 qershorit.

Ky vendim i ishte sa i papritur, njëherazi dhe disi i paralajmëruar, shkëndijat e para të kësaj ndodhie, u dhanë nga gazetari Sokol Balla të enjten në mbrëmje në emisionin e tij “Real Story” në Vizion Plus, ku deklaronte para Kryeministrit të vendit Edi Rama, se kishte informacione se kreu i shtetit po mendonte shtyrjen e datës së zgjedhjeve.

Megjithatë, vendimi kësaj të shtune i Presidentit Ilir Meta, u lexua si fitore nga opozita, e cila sot gjithashtu ishte e papërgatitur, të paktën për të mos i shkuar deri në fund skenarit të saj për protestën.

“RealStory.al” hap një tjetër sondazh, ku fton qytetarët shqiptarë për të dhënë mendimin e tyre rreth aktit të paprecendentë të Presidentit të Republikës, atë të shfuqizimit të dekretit për datën e zgjedhjeve. A tregon ky vendim se Ilir Meta është “Burrë shtetit”, është “Opozitar”, apo pas këtij vendimi, Ilir Meta duhet të japë dorëheqjen?. Votoni në sondazhin e mëposhtëm.

Dekreti i Metës. Çfarë është presidenti për ju?

Dekreti i presidentit, Monika zë be: Kam dy javë pa e takuar Ilirin

Kryetarja e LSI i është bashkuar protestës së opozitës dhe ka pretenduar se ajo nuk ka ndikuar në vendimin e Presidentit, duke deklaruar se ka dy javë pa e takuar bashkëshortin.

“Nuk kam ndikuar fare në vendimin e tij, qëkur kam ikur për tu operuar kam dy javë pa e takuar. Nuk kemi biseduar fare. Për mua nuk ka rëndësi bëhen apo jo zgjedhjet, ndryshon apo nuk ndryshon data. Ky njeri duhet të ikë se ku njeri ka ardhur nga votat e krimit”, ka deklaruar Kryemadhi, duke shtuar se protestat do të vijojnë dhe nuk ka dialog me Ramën kryeministër. “Nuk kam kohën që të harxhoj çfarë thotë Rama. Ne jemi këtu për t’ju thënë që shumica e shqiptarëve pa dallim bindjesh politike janë kundër politikave të tij diskriminuese. Ta harrojë politikën, politika ka marrë fund në Shqipëri”, tha Kryemadhi nga protesta e opozitës.

Sa i përket deklaratave të Palmer, kryetarja e LSI tha se ai nuk ndërhyn në punët e brendshme të Shqipërisë. “Jam dakord me deklaratat e Palmer. Protestat kanë qenë paqësore, dhuna ka qenë e provokuar nga policia. Palmer nuk ndërhyn në punët e brendshme të Shqipërisë, sepse krizën në fund të fundit ne do e zgjidhim”, deklaroi ajo.

Dekreti i Metës. Çfarë është presidenti për ju?

Zgjedhjet në 30 qershor, tërhiqet edhe Meta: Nuk ka dekret tjetër

Pas deklaratave të Kryeministrit Rama të enjten në Real Story, ku cilësoi se “presidenti ka qenë tepër i qartë në deklarata e tij se do të ishte dakord të shtynte datën e zgjedhjeve nëse palët do të ishin dakord” , ka ardhur edhe reagimi i presidentit Meta. Në një intervistë për Deutsche Welle, i pyetur se përse ka pritur kaq gjatë të ulte palët në tavolinë, Meta tha se Rama “ashtu sikurse kam ndjekur edhe mbrëmë, do doja shumë të isha korrekt, ka qenë qartësisht refuzues për rishikimin e datës me mirëkuptim midis dy palëve për të garantuar zgjedhje gjithëpërfshirëse demokratike. Ashtu sikurse edhe zoti Basha dhe përfaqësuesit e tjerë të opozitës kanë vendosur si parakusht që zoti Rama të mos jetë në një tryezë të tillë në cilësinë e kryeministrit.”

Presidenti Meta tha gjithashtu se ai do ti vazhdojë përpjekjet e palodhura për rivendosjen e këtij dialogu të domosdoshëm.

Pjesë nga intervista:

Deutsche Welle: Kur ju të ktheheni nesër në Tiranë, pra të shtunën, opozita do të mbajë protestën e tetë kombëtare në Shqipëri, kundër qeverisë dhe me kërkesën absolute prej së cilës nuk tërhiqet, për dorëheqjen e kryeministrit, duke kërkuar prej muajsh zgjedhje të parakohshme, por njëkohësisht edhe duke paralizuar jetën parlamentare në vend. A nuk ka pritur shumë gjatë presidenti pa reaguar me një ftesë konkrete për dialog mes palëve? Në mënyrë që zgjidhja të gjendet brenda vendit dhe jo me mbështetje nga Berlini, apo diku gjetkë në botë?

Ilir Meta: Ndoshta për koincidencë, në ditën që opozita bëri zyrtare vendimin e saj për të djegur mandatet, unë pata rastin që edhe atë ditë të isha në Berlin për të takuar presidentin gjerman Steinmeier, dhe dhashë një intervistë për Deutsche Wellen, dhe për fat të keq ftesa ime, apo thirrja ime nga të dy palët nuk u dëgjua, në mënyrë që opozita të bënte një hap pas, të mos shkonte drejt zyrtarizmit të këtij vendimi, por edhe maxhoranca të bënte dy hapa pas në mënyrë që të evitohej një përshkallëzim i mëtejshëm i ndarjeve dhe i një krize më të gjerë institucionale dhe përfaqësimi në vend. Por sidoqoftë, asnjëherë nuk është vonë. Unë në mënyrë të vazhdueshme kam nxitur vendosjen e dialogut, por për fat të keq të dy palët kanë vendosur disa kushte që e kanë bërë të pamundur një tryezë apo një takim zyrtar, pasi kryeministri Rama dhe kryetar i Partisë Socialiste, ashtu sikurse kam ndjekur edhe mbrëmë, do doja shumë të isha korrekt, ka qenë qartësisht refuzues për rishikimin e datës me mirëkuptim midis dy palëve për të garantuar zgjedhje gjithëpërfshirëse demokratike. Ashtu sikurse edhe zoti Basha dhe përfaqësuesit e tjerë të opozitës kanë vendosur si parakusht që zoti Rama të mos jetë në një tryezë të tillë në cilësinë e kryeministrit. Megjithatë, përpjekjet e mia do të jenë të palodhura, por edhe çdo kontribut i partnerëve tanë për rivendosjen e këtij dialogu dhe të këtij besimi, është jo vetëm i mirëpritur por është edhe i domosdoshëm.

Deutsche Welle: A mund të mbahen zgjedhjet lokale në këtë situatë, ndërkohë që datën e votimeve ju e keni përcaktuar konform kushtetutës. A ka mundësi shtyrjeje të datës së zgjedhjeve, brenda kuadrit kushtetues?

Ilir Meta: Nuk do të dëshiroja të shprehesha sot për këtë çështje. Ne i dimë edhe përvojat e mëparshme që vendi ynë ka pasur kur ka ekzistuar vullneti dhe përgjegjshmëria për stabilitetin e vendit, për të ardhmen e tij demokratike dhe plotësisht europiane, gjithnjë janë gjetur zgjidhje të mençura. Dhe në këtë drejtim unë nuk do të ndaloj së angazhuari institucionin e presidentit dhe natyrisht personalisht deri në fund për të shmangur çdo alternativë që nuk i shërben jo vetëm stabilitetit të vendit por edhe e largon në horizonte të padukshme mundësinë e çeljes së negociatave apo anëtarësimit të Shqipërisë në Bashkimin Europian. Unë besoj se të dy palët kanë për detyrë t’i përgjigjen vullnetit të gjithë qytetarëve shqiptarë, i cili është në shifra të jashtëzakonshme mbi 90 e ca përqind, për t’ i dhënë këtë mundësi historike Shqipërisë që të çeli së afërmi negociatat me Bashkimin Europian dhe unë besoj, se nëse kjo gatishmëri nga të dy palët do të reflektohet në orët dhe ditët që vijnë, edhe mbështetja nga Bundestagu do të jetë e plotë dhe kjo do të jetë shumë e rëndësishme për kurorëzimin me sukses të këtij qëllimi madhor për vendin tonë.

Së dyti, dua të theksoj se është shumë e rëndësishme për opozitën, meqenëse nesër është paralajmëruar një protestë tjetër e madhe kombëtare, sikurse e përmendët edhe ju, se sa e rëndësishme është vetëpërmbajtja dhe demonstrimi tërësisht paqësor, në mënyrë që kauza e tyre për të pasur zgjedhje me standarde të vërteta europiane, të ketë mbështetje maksimale brenda dhe jashtë vendit. Prandaj, edhe një herë do të apeloja për udhëheqësit e opozitës që të marrin të gjitha përgjegjësitë për të garantuar një manifestim të standardeve europiane, të mos provokohen nga askush brenda tyre por edhe përballë tyre, në këto orë në këto ditë të rëndësishme për vendin tonë.

Lexo intervistën e plotë këtu