Kampionët e Botës dhe Europës, do të luajnë në Tiranë për bamirësi

Bota e futbollit u solidarizua në mënyrë të veçantë me familjet e prekura nga tërmeti i 26 nëntorit në Shqipëri. Ndërkohë, solidariteti do të vijojë edhe më tej. Sipas Panorama Sport, në datën 10 janar në stadiumin “Air Albania” do të zhvillohen dy ndeshje miqësore.

Ish-futbollistët e Italisë që u shpallën Kampion Bote në vitin 2006, veteranët e Turqisë që morën pjesë në botërorin e 2002 si dhe veteranët e Greqisë që fituan Euro 2004, do të vijnë në Tiranë.

Së bashku me veteranët e ekipit tonë kombëtar, do të luhen dy ndeshje, të ardhurat e fituara nga biletat do të shkojnë për rindërtimin nga tërmeti.

Kështu, veteranët e kombëtares Kuq e Zi do të luajnë kundër veteranëve të Italisë. Ndërkohë, veteranët e Turqisë do të përballen me veteranët e Greqisë.

Anija me ndihma nga Italia ankoron në Durrës

Anija e nisur nga Italia me ndihma, mjete të specializuara dhe ekipe shpëtimi ka mbërritur në portin e Durrësit. Italia ishte një ndër vendet e para që u solidarizua me Shqipërinë në lidhje me dëmet shkatërruese të tërmetit me magnitudë 6.3.

“Pas goditjeve të tmerrshme, humbjeve njerëzore dhe dëmeve të mëdha vjen solidariteti i miqve Italianë. Sapo mbërriti në portin e Durrësit anija e guardia Costiera italiane CP940 LUIGI DATTILO që po sjell ekipe dhe mjete të specializuara në kërkim të mbijetuarve në ndihmë të Shqiptareve. Mirë se vini miq italianë në kohë të vështira” thuhet në reagimin e Drejtorisë së Përgjithshme Detare të Durrësit.

Tërmeti i orës 03:55 të mëngjesit të së martës shkaktoi dëme të mëdha materiale dhe viktima në jetë njerëzore, numri i të cilëve pritet të rritet për shkak të personave të bllokuar nën rrënojat. Gjendja më kritike shfaqet në Thumanë dhe Durrës.

Air Albania, të hënën “Migjeni” fluturon drejt Italisë

Duke nisur nga e hëna e 30 shtatorit, kompania shqiptare “Air Albania”, nis fluturimet drejt Italisë në tre destinacione. Roma, Milano dhe Bologna janë tre aeroportet italiane, ku do të ulet dhe ngrihet fillimisht avioni i ri i Air Albania, modeli 737 800 i kompanisë Boeing, prodhim i vitit 2016.

Lajmi ishte bërë i ditur prej kohësh nga vetë kompania, e cila së fundi, publikoi dhe disa foto nga garazhi ku gjendet avioni i ri, i cili mban emrin “Migjeni”. Tashmë qytetarët shqiptarë, që udhëtojnë drejt Italisë, por dhe anasjelltas, do të kenë mundësi të udhëtojnë me kompaninë shqiptare të avicionit.

Ndërkohë, Air Albania planifikon që të zgjerojë hapësirën e udhëtimeve drejt Londrës dhe më pas drejt SHBA-së me linjë direkte. Aktualisht, kompania shqiptare ofronte udhëtime nga Tirana në Stamboll dhe anasjelltas.

Çmimet e biletave që ofron “Air Albania” për pasagjerët që do të udhëtojnë drejt Italisë, janë kryesisht çmime tregu.

Italia në krizë pas dorëheqjes së Contes. Presidenti, afat deri të martën, ose zgjedhje të reja

Presidenti italian, Sergio Mattarella pas dy ditë konsultash me krerët e grupeve parlamentare ka vendosur t’i japë atyre afat deri të martën për të arritur një marrëveshje për një koalicion qeverisës. Ndryshe thotë, Mattarella do të vendosë datën për zgjedhje të parakohshme.

Italia është futur së fundi në një krizë qeverisje pas dorëheqjes së kryeministrit Conte.

Aktualisht presidenti Sergio Mattarella shpreson në arritjen e një marrëveshje për një koalicion qeverisës mes Luigi Di Maio dhe Nicola Zingaretti. Nëse kjo nuk arrihet deri të martën, Italia do të shkojë drejt zgjedhjeve të parakohshme.

“Kriza duhet të zgjidhet me vendime të qarta dhe brenda një kohe të shkurtër”, është shprehur Sergio Mattarella, i cili nuk ka fshehur vështirësitë që ekzistojnë në qeverisjen e vendit si dhe rreziqet e një zgjatje të krizës. “Me dorëheqjen e Conte, të cilin e falënderoj, kriza është hapur dhe ka një diskutim mes palëve. Kriza duhet të zgjidhet në një afat të shkurtër ashtu siç kërkon një vend i shkëlqyer si i yni”, tha presidenti në një fjalim të transmetuar në të gjitha kanalet kryesore televizive.

Kreu i shtetit i ka dhënë 4 ditë afat PD dhe partisë Pesë Yje për të arritur një marrëveshje dhe thotë se nëse qeveria e re nuk do të marrë votimin nga parlamenti atëherë ai do të caktojë datën e zgjedhjeve.

“Vetëm qeveritë që marrin besimin e Parlamentit për një program qeverisës vazhdojnë përpara. Por nëse kjo nuk arrihet, rruga është ajo e zgjedhjeve”, tha Mattarella.

Kjo është arsyeja pse Zingaretti dhe Di Maio e dinë që këto ditë duhet të punojnë shumë dhe të tregojnë një sens përgjegjësie dhe gjithashtu e dinë se presidenti dëshiron që emri i kryeministrit të emërohet deri të martën.

Tre ditë më herët kryeministri i Italisë, Giuseppe Conte gjatë një fjalimi i cili zgjati rreth 1 orë në parlamenti, bëri të ditur vendimin e tij për t’u dorëhequr nga posti, ndërsa hodhi akuza ndaj ministrit të brendshëm Salvinit, me të cilin ka pasur shumë mosmarrëveshje.

Bie plani i Salvinit, Italia mund të shmang zgjedhjet

Italia mund të shmang zgjedhjet e parakohshme. Paralajmërimin e ka bërë Presidenti i Italisë, Sergio Mattarella. Pas dorëheqjes së kryeministrit Conte, presidenti Mattarella ka zhvilluar takime me liderët kryesor të politikës italiane. Pasditen e të enjtes ai ka konfirmuar se diskutimet për gjetjen e zgjidhjes së krizës do të shtyhen deri javën e ardhshme, pasi Lëvizja 5 Yjet ka kërkuar mandat për të dialoguar me Partinë Demokratike, me qëllim krijimin e një koalicioni të ri mazhoritar dhe qeverisës.

“Ka pasur një ndarje mes dy partive që përbënin shumicën e vjetër. Kriza duhet të zgjidhet brenda një kohe të shkurtër. Konsultimet e reja do të vijojnë të martën e ardhshme. Unë jam informuar nga disa parti se kanë nisur bisedimet për një marrëveshje në parlament për krijimin e një qeverie të re. Dhe më është kërkuar që të kenë kohë për të zhvilluar diskutimin”, ka thënë Mattaraella, duke i lënë kohë deri të martën partive që nuk duan të shkojnë në zgjedhje.

Megjithatë ai ka paralajmëruar se nëse marrëveshja nuk arrihet, vendi do të shkojë në zgjedhje të parakohshme. “Unë kam një detyrë të pashmangshme që të mos e ndaloj shprehjen e vullnetit mazhoritar të Parlamentit siç ndodhi. Në të njëjtën kohë unë kam detyrën të marrë, në interes të vendit, vendime të shpejta”, tha Mattarella, duke paralajmëruar se koha për bisedime mes partive nuk do të jetë e gjatë.

Në fund ai ka sqaruar se nuk do të miratojë asnjë qeveri, që nuk do të ketë shumicën dhe besimin e Parlamentit. “Vetëm qeveritë që fitojnë besimin e Parlamentit me marrëveshje dhe me një program qeverisës, janë të mundshme, në mungesë të këtyre kushteve, rruga është ajo e zgjedhjeve”, ka thënë kreu i shtetit në Itali. Nëse partitët e tjera në Parlament do të arrijnë një marrëveshje, duke krijuar një mazhorancë të re qeverisëse, atëherë do të minohej plani dhe dëshira e Matteo Salvinit për zgjedhje në Itali.

Në fakt, zëvendës kryeministri italian, ka krijuar bindjen se ka mbështetje të madhe në elektorat, si në veri ashtu dhe në jug, nisur ky argument nga zgjedhjet për parlamentin evropian, ku Lega Nord e Salvinit, doli e para në Itali. Por tashmë do të pritet me interes deri të martën, për të parë nëse kundërshtarët e Salvinit do të arrijnë të krijojnë një mazhorancë të re, duke shmangur zgjedhjet, rezultati i të cilave mund të jetë i paparashikueshëm.

Italia rezolutë për hapjen e negociatave për Shqipërinë

Italia mbështet integrimin e Shqipërisë në BE dhe këtë mbështetje e ka shprehur me hapa konkret duke miratuar një rezolutë në Parlamentin italian që kërkon çeljen e negociatave me Shqipërinë.

Lajmi u bë i ditur nga vetë kryetari i Kuvendit të Shqipërisë Gramoz Ruçi, i cili falënderoi homologun e tij italian Roberto Fico. Ruçi e konsideroi Italinë një fqinj të çmuar dhe partner i fuqishëm për Shqipërinë, marrëdhëniet mes të cilave sa vijnë edhe forcohen.

“Mirënjohje për Rezolutën në mbështetje të negociatave. Italia, fqinj i çmuar dhe partner i fuqishëm. Të bindur për mbështetjen e Italisë në KE në tetor”, ka thënë Ruçi.

Në tetor pritet që BE të vendos për çeljen ose jo të negociatave për Shqipërinë dhe Maqedoninë e Veriut. Në raportin e Komisionit Europian theksohet se Shqipëria i ka përmbushur të gjitha detyrimet e saj, duke rekomanduar hapjen e negociatave.

Ida nga Italia: Në Shqipëri gjeta punë, një rrogë dinjitoze

Kryeministri Rama ka shpërndarë mëngjesin e së martës një shkrim të botuar nga një medie italiane ilfattoquotidiano.it, ku i është kushtuar një artikull një vajze nga Italia që ka filluar të ndërtojë jetën në vendin tonë.

Në këtë artikull theksohet se Shqipëria ofron shanse për të rinjtë dhe ëndrrat e tyre dhe shembull për këtë është ndryshimi i jetës së Ida Nastasi, e cila lë Jugun e Italisë dhe vjen të jetojë në Tiranë ku gjen punë dhe një rrogë dinjitoze.

Artikulli i plotë:

“30-vjeçarja Ida Nastasi në Itali nuk arrinte të gjente një punë që nuk ishte e përkohshme, ndaj vendosi që të shkojë tek i fejuari i saj në Tiranë. Tani punon si edituese për një agjenci web marketing.

“Jugu në vendin tim është dëshpërues”, thotë ajo. Ndjej nostalgji për shtëpinë, më pas mendoj se ajo që gjeta këtu, atje nuk do të kishte qenë e mundur”.

“Realiteti në Jug të Italisë është dëshpërues. E sapo diplomuar, mezi prisja që të futesha në botën e punës, kisha entuziazëm dhe dëshirë për të punuar, por edhe frikë. Sepse përveç punëve të rastësishme, nuk kisha pasur kurrë mundësinë të gjeja diçka definitive.”

Kështu, Ida Nastasi, 30-vjeçe, e rritur në provincën e Caserta, por me origjinë nga Torre del Greco, në 2017-n zgjodhi të shkonte tek i fejuari i saj, i cili kishte emigruar për punë në Shqipëri. Dhe atje qëndroi.

“I pari që u përball me situatën depresive të punës në Jug të Italisë ishte pikërisht ai. Në Tiranë, sot jetohet mirë“, thotë ajo duke buzëqeshur.

Herën e parë që u nis drejt Shqipërisë, Ida ishte e emocionuar. “Po shkoja për të parë të fejuarin tim pas disa muajsh”, kujton ajo. Duhet të ishin pushime verore, përpara se të rikthehej në shtëpi në Shtator “më e ingranuar se kurrë”. Por në fakt, Ida u rikthye vetëm për të marrë bagazhet dhe për t’u transferuar.

E thotë me bindje: u detyrua të linte vendin e saj. “Pasi u diplomova kisha nisur të kërkoja punë, por u përballa vetëm me kontrata me kohë të caktuar, stazh apo punë që nuk paguhen”.

Atëherë tentoi rrugën e shkollës: kandidohet për mësuese zëvendësuese të përkohshme në Veri të Italisë. Por asgjë. “Puna e mësueses është vërtetë e pasigurt dhe nëse nuk ke mbështetje ekonomike, është e vështirë. Isha shumë e demotivuar”.

Më pas i erdhi mundësia në Shqipëri. Ida sot punon në një agjenci ëeb marketing, si editore dhe copyëriter. “Në Tiranë jetohet mirë. Pjesa më e madhe e shqiptarëve e njeh italishten, e kanë mësuar në shkollë, ose janë rritur duke parë Rai dhe Mediaset”, tregon ajo. Kostoja e jetesës është e ulët dhe ka avantazhe ekonomike të dukshme për një italian.

“Duke nisur që nga çmimi i biletës së autobusit, apo taksisë e cigaret. Fakti që krahu i punës kushton shumë më pak, ndihmuar nga një çmim inferior i punës, përkthehet në çmime të përmbajtura kudo: që nga restorantet tek dentistët, e deri tek estetistja apo shitësit e frutave”. Edhe qiraja e banesave nuk është shqetësim ekonomik. “Gjenden shtëpi të pranueshme, të mobiluara dhe me çmime shumë të mira”.

Dita e Idës nis me një kafe. “Fatmirësisht në shumë lokale kafeja është shumë e mirë, mjafton ta specifikosh që e do të shkurtër”. Dhe pas 10 minutash në autobus është në zyrë. “Në kompjuter nis të shoh testet që më kanë nisur grupet e ndryshme të punës, konsulentët apo kolegët e mi. Korrigjoj përmbajtjen për krijimin e postimeve për mediat sociale dhe fushatat publicitare dhe më pas i dedikohem blogut të agjencisë për të cilin shkruaj çdo javë. Në të shkuarën kam bërë edhe kurse italishteje dhe komunikimi për konsulentët, duke dhënë vlerësimin për nivelin e gjuhës”, shpjegon ajo. Megjithatë, në disa raste, ndryshimet me Italinë janë të dukshme. “Shoh që ka shumë prapambetje në mënyrën e të menduarit”, tregon Ida. “Jam përshtatur me zakonet lokale me shumë durim, duke hequr dorë nga mendimi sesi jam në Itali, pyetje apo gjëra që këtu e kam të pamundur t’i bëj apo t’i gjej”.

Rikthimi në Itali? “Në vendin tim në këtë moment janë vetëm gjërat e dashura. E shoh me nostalgji dhe më mungon gjithçka që kam jetuar dhe kam dashur deri pak vite më parë. Kur mbushem me nostalgji, mendoj sesi jetoj tani, për pavarësinë time, pazaret që mund të bëj e vetme dhe e di shumë mirë që nuk do të kisha pasur mundësinë të kisha të njëjtat gjëra nëse do të rrija në qytetin tim. Gjithsesi do të isha detyruar që të transferohesha në Veri të Italisë”.

Ida shpjegon pozicionin e saj dhe atë të gjeneratës së saj, me plot qartësi. “Të futesh në botën e punës për të rinj si ne, 28, 29, 30 vjeç është gjithnjë e më e vështirë. Pastaj vijnë 20-vjeçarët që të lenë pas sepse presupozohet se në moshën 30-vjeçare i ke aftësitë dhe kompetencat. Në Itali ka shumë, ndoshta tepër gjëra që duhet të ndryshojnë”.

Si e imagjinon të ardhmen e saj? Shpreson të shkojë pranë familjes së saj dhe të gjejë një punë të qëndrueshme në Itali, me një rrogë dinjitoze që mund t’i lejojë të paguajë qiranë, faturat, e të bëjë pazar. “Ajo që konsiderohet rrogë e denjë, në Itali sot duket utopi”./ilfattoquotidiano.it/