Zgjedhjet, Ivi Kaso: Lista përfundimtare e PD do të ketë prurje të reja nga jashtë

Sekretari i PD për Çështjet Zgjedhore, Ivi Kaso ka folur në emisionin ‘’Real Story’’ nga Sokol Balla në News24 për ‘ekipin’ e ri që partia e tij do të ballafaqohet në zgjedhjet e 25 prillit.

Kaso thotë se PD është në hapje, dhe për këtë siguron që do ketë edhe prurje të reja nga jashtë, jo vetëm prej bazës apo strukturave.

Ai thotë se një parti e madhe që synon qeverinë duhet të ketë edhe prurje të reja dhe për këtë do të ketë edhe në listën përfundimtare.

Sipas Kasos PD me listën përfundimtare mund të krijojë një përfaqësim me figura të rëndësishme por jo një qeveri hije, pasi sipas tij nuk është gati për këtë.

”E vërtetë që ka patur dhe ka një hapje të PD për prurje të reja, jo vetëm nga kontributet brenda, të jetës aktive. Por edhe nga bota akademike dhe fusha të tjera. Baza nuk i njeh dhe nuk i ndjen si pjesë të saj, dhe strukturat kanë arkivat e saj. Pra ka tendencën për të votuar ata që ka në krah.

Por si një partie e madhe duhen prurje të reja. Pres që ky proces, me listën përfundimtare të ketë prurje nga jashtë.”- tha Kaso.

‘Filtrimi brenda partisë, po bëjmë një katarsis’, Ivi Kaso: Votimi në PD, i pari në vendin tonë

Sekretari për çështjet zgjedhore në Partinë Demokratike, Ivi Kaso, tha në emisionin “Real Story” të gazetarit Sokol Balla, në News24, se formulari që plotësojnë kandidatët për deputetë të PD është i vlefshëm vetëm 3-4 ditë sa të bëhet votimi i tyre nga anëtarësia.

“Formulari vlen 3-4 ditë, deri në momentin që kandidati votohet brenda degës”, tha Kaso.

Më tej, ai theksoi se PD po bën një proces pastrimi të figurave të kontestuara në të gjithë vendin, siç nuk ka ndodhur nga asnjë parti më parë.

“Ky votim që po bëhet në PD është i pari që bëhet në vendin tonë. Britanikët e kanë përshëndetur këtë proces në PD. Është menduar që listës së PD t’i bëhet një filtrim nga komisioni dhe më pas kjo listë të kalojë në shkurtim, ku i jepet mundësi çdo zgjedhësi të shprehë mendimin e tij me votë. Ky është një proces katarsis filtrimi brenda partisë, që s’e ka bërë asnjë parti tjetër. Ky proces kishte synim të shmangte pakënaqësitë në parti, duke pastruar emrat e kontestuar”, u shpreh Kaso.

Përplasjet për listat dhe koalicionet, Ivi Kaso: Ja hapi ynë i fundit

Sekretari për çështjet zgjedhore në Partinë Demokratike, Ivi Kaso, tha në emisionin “Real Story” të gazetarit Sokol Balla, në News24, se është e mundur ndërhyrja në Kodin Zgjedhor për hapjen 100% të listave, por pa prekur koalicionet parazgjedhore.

Sipas Kasos, është e papërshtatshme që të bëhen ndryshime drastike në kod, pasi vendi ndodhet pak muaj para zgjedhjeve.

“Ishte tërësisht e mundur të ndërhyhej në kod, pa prekur koalicionet. Është krejtësisht e papërshtatshme për të bërë ndryshime drastike në Kodin Zgjedhor, pasi jemi pak muaj para zgjedhjeve. Procesi zgjedhor është i komplikuar për t’u organizuar, ka shumë rrota dhe mekanizma të padukshme që vihen në lëvizje nga Presidenti. Nuk është normale, ndaj kemi kërkuar mendimin e ODIHR për të na dhënë një zgjidhje. Është një kërkesë që është refuzuar.

Vazhdojmë i qëndrojmë asaj që kemi thënë. Hapi ynë i fundit është materializimi i asaj që kemi thënë, pasi në dy mbledhjet e dështuara të Këshillit Politik preteksti ka qenë se nuk ka qenë e formalizuar kërkesa jonë. Drafti ynë është shumë i thjeshtë, shumë afër botëkuptimit të njeriut të zakonshëm se si duhet të jenë listat e hapura. Kemi dashur t’i tregojmë mazhorancës që ndërhyrja është e mundshme dhe nuk ka nevojë të prekë pikat e tjera”, u shpreh Kaso.

Ndreu, Bashës: Shihemi në gjyq. PD: Drejtësi nga Perëndia!

Me anë të një videomesazhi, Lulzim Basha e akuzonte kryebashkiakun e ri të Lezhës, Pjerin Ndreu, si person i “futur në listën e zezë të përtnerëve prej vitit 2003. I larguar nga policia për përfshirje në trafiqe, i kapur në përgjimet e manipulimit zgjedhor në dosjen 184, nuk dënohet por kandidohet”, shkrunte ndër të tjera kreu i PD. Pas kësaj akuze, ka reaguar Pjerin Ndreu, i cili është shprehur se me Lulzim Bashën do të ballafaqohet në gjykatë për akuzat e ngritura në drejtim të tij.

“Për Lulzim Bashën: Zoti kryetar i opozitës të pres për një vizitë në Bashkinë e Lezhës, ku të diskutojmë për zgjidhjen e problemeve dhe zhvillimin e qytetit. Sa për inkriminimin tim së shpejti do të shihemi në gjykatë. As ti e as perëndia në qiell nuk ka shansin të më gjej qoftë një element sado të vogël inkriminimi”, shprehej ndër të tjera Pjerin Ndreu.

Pas ftesës për të shkuar në Lezhë, dhe përgjigjes se për akuzat do të përballeshin në gjykatë, PD ka reaguar përsëri kundër Pjerin Ndreut. Sekretari për çështjet zgjedhore në PD, Ivi Kaso, u shpreh se “Basha patjetër do të vijë në Lezhë, ku ka mbështetjen e shumicës së qytetarëve të saj, për të drejtuar vendin dhe për t`u hapur rrugë planeve të zhvillimit të Lezhës dhe në të gjithë Shqipërinë”, shprehet Ivi Kaso.

Gjithashtu në deklaratën e Ivi Kasos shtohet se “si fillim, bashkia e Lezhës do të çlirohet nga trafikanti që e ka uzurpuar atë dhunshëm! Pjerin Ndreu dhe çdo anëtar tjetër i bandës së Edi Ramës, me të cilët ai mban pushtetin e tij kriminal, do të dalin nga politika dhe do të shkojnë para drejtësisë me pranga në duar. Zgjedhjet e paligjshme të 30 Qershorit dhe vjedhja e zgjedhjeve në Dibër, ku Pjerin Ndreu është kapur në flagrancë duke shkelur ligjin, do të ndëshkohen!Rrugët e Perëndisë për të bërë drejtësi janë të pafundme”, përfundon deklarata.

Fletët e votimit të Vaut të Dejës, PD kërcënon KQZ: Do shkoni në burg

Partia Demokratike ka kërkuar që anëtarët e Komisionit Qendror të Zgjedhjeve të dalin para drejtësisë dhe të shkojnë në burg për shpërdorim detyre ose të pranojnë se po gënjejnë për llogari të Edi Ramës. Sekretari për Çështjet Zgjedhore, Ivi Kaso deklaroi se KQZ gënjen në lidhje me fletët e votimit të 30 qershorit, sidomos në Vaun e Dejës ku votimet u kryen me fletë votimi të falsifikuara.

“Pretendimi i doganave dhe Komisionit Qendror të Vjedhjeve, 3 ditë pas denoncimit të skandalit, se sistemi doganor ditën e mbërritjes së fletëve të votimit për Vaun e Dejës, nuk ka funksionuar, është një alibi qesharake dhe mjerane. Dokumenti zyrtar doganor provon se fletët e votimit kanë qenë akoma në doganë në orën 8 të mëngjesit të datës 30 Qershor, ndërsa votimi në Vaun e Dejës ishte deklaruar i hapur një orë më parë, në orën 7 të mëngjesit.” – tha Koso

Kaso tha se alibia qesharake e KQZ-së se natën e ardhjes së fletëve të votimit nuk ka punuar sistemi doganor, rrëzohet nga dokumenti zyrtar i dalë nga vetë sistemi i doganave, ku shkruhet se fletët e votimit në orën 8 të mëngjesit ishin akoma në doganë.

“Çdo letër tjetër, e prodhuar me dorë për llogari të propagandës së Edi Ramës, 3 ditë pas denoncimit të skandalit, vetëm sa e thellon skandalin. Ajo provon se në këto votime, Komisioni Qendror i Vjedhjeve ka vepruar si organizatë kriminale. Gënjeshtra e KQZ-së del akoma më zbuluar, kur thotë se fletët e votimit janë porositur në 27 Qershor dhe janë prodhuar paraditen e 28 Qershorit. Në këtë rast 4 anëtarët e KQZ-së duhet të pranojnë se ose janë duke mashtruar, ose kanë shpërdoruar në mënyrë flagrante detyrën. Ky është vendimi i KQZ-së i datës 28 Qershor, sipas të cilit urdhri për prodhimin e fletëve të reja të votimit për Vaun e Dejës është marrë në orën 6 të pasdites.” – thotë Kaso

Pak më herët, gjatë ditës së hënë KQZ tha në një deklaratë për mediat se fletët e votimit u printuan në Slloveni në datën 29 qershor, dhe janë sjellë në Shqipëri në orët e para të mëngjesit të datës 30 qershor, duke u shpërndarë më pas në Qendrat e Votimit.

PD AKUZA PËR FLETË VOTIMI FALSE, KQZ: ERDHËN NGA SLLOVENIA NË 30 QERSHOR

KQZ do të numërojë 11 kuti të Lezhës, PD: Atje s`ka manipulim votash

Komisioni Qendror i Zgjedhjeve vendosi të enjten që të pranojë kërkesën e Eduard Ndocaj, për të rinumëruar votat në 11 kuti në Lezhë. Pas këtij vendimi, ka ardhur dhe një reagim nga Partia Demokratike. Sekretari për Çështjet Zgjedhore i PD, Ivi Kaso, me anë të një reagimi në rrjetet sociale, shprehet se KQZ ka vendosur të hapen 11 kuti, që sipas Kasos, nuk janë manipuluar votat.

“Nën shembullin e ndritur të “marifetit” me Idajet Beqirin, KQZ ka vendosur që nesër, në vijim të një kërkese ankimore për Bashkinë Lezhë, të hapë dhe të kontrollojë rregullshmërinë e procesit të 30 Qershorit vetëm për 11 qendra votimi ku PS ndihet e sigurt që s’ka patur manipulime”.

“Qëllimi, jo fort i fshehur është që t’i tregohet botës mbarë se votimet ishin të rregullta e të vlefshme, jo vetëm këtu por në mbarë vendin. Ajo që e nxjerr bllof këtë skemë farsë “dorëzimi të kontrolluar” është se nga frika se mos del në shesh manipulimi me listat e zgjedhësve, në këto qendra, KQZ ka vendosur të mos ta hapë fare kutinë e materialeve zgjedhore. Pra, thënë shkurt e me dy fjalë: Proces farsë për t’u hedhur hi syve njerëzve”, shkruan Ivi Kaso.

Sekretari për Çështjet Zgjedhore në PD, parasheh se të premten nuk do të ketë asnjë surprizë nga votat e 11 kutive që do të hapen në Lezhë, duke paragjykuar vendimin e KQZ-së dhe procesin e rinumërimit të votave, që në fakt është kërkuar nga një kandidat, që pretendoi gjatë zgjedhjeve edhe se pati kërcënime nga rivalët.

Ivi Kaso: Votuan vetëm 15% e shqiptarëve, Rama po manipulon votat

Sekretari për Çështjet Zgjedhore i Partisë Demokratike, Ivi Kaso, ka mbajtur një konferencë për shtyp, ku ka deklaruar se sipas shifrave të PD-së, pjesëmarrja në votime ka qenë 15% e personave me të drejtë vote. Sipas Ivi Kaso, komisionerët po bëjnë mbushje fiktive të listave të votuesve me emrat e emigrantëve.

“Pjesëmarrja totale në rang vendi është 15%. Po bëhet mbushja fiktive e listave të votuesve me emrat e emigrantëve. Paniku i Ramës nga braktisja dhe refuzimi popullor e ka shtyrë drejt manipulimit të numrit të votuesve. As mbushja e kutive që po ndodh tani, as manipulimi nuk e shpëtojnë Ramën. Shqiptarët e kanë refuzuar”.

PD: KQZ gënjen për pjesëmarrjen, Rama po braktiset nga qytetarët

Pak minuta pas raportit nga KQZ në lidhje me pjesëmarrjen e qytetarëve në votime në të gjithë vendin, ka ardhur edhe reagimi i Partisë Demokratike. Përmes sekretarit për çështjet zgjedhore, Ivi Kaso, PD tha se KQZ gënjeu duke rritur pjesëmarrjen në votime. Në një deklaratë për mediat, KQZ deklaroi se deri në orën 15:00 kanë votuar 15.5 % e qytetarëve. Sipas PD kjo shifër është shumë më e vogël, vetëm 10 % e qytetarëve me të drejtë vote i janë drejtuar qendrave të votimit.

Ivi Kaso tha se KQZ është duke mashtruar shqiptarët dhe partnerët duke rritur numrin e personave në votim.

“Operacioni më i madh që po kryen Edi Rama gjatë gjithë ditës së sotme është falsifikimi i pjesëmarrjes në votimet e tij njëpartiake dhe të paligjshme. Komisioni Qendror i Zgjedhjeve është në krye të këtij operacioni manipulimi, duke mashtruar shqiptarët dhe partnerët për numrin e vërtetë të atyre që kanë votuar. Nga monitorimi i të gjitha qendrave të votimit, ka rezultuar se pjesëmarrja faktike në rang vendi deri në orën 11:00 ka qenë 6 % dhe jo 12 % siç raportuan kamikazët e KQZ. Pjesëmarrja faktike deri në orën 3 pasdite është 10 %.” – thotë Kaso për mediat.

Kaso tha se kryeministri Rama është në panik sepse qytetarët po e braktisin atë në votime. “Megjithëse vetë kandidon, vetë voton, vetë numëron dhe vetë shpall rezultatin, paniku i Edi Ramës duket qartë. Asgjë dhe askush nuk mund ta fshehë braktisjen dhe refuzimin e tij.”- përfundon deklarata e PD.