Qëllon kushëririn me pistoletë manovër, sherr për pronën në Kashar

Konflikti për pronën është bërë sërish objekt sherri dhe kërcënimi jete për qytetarët. Dy kushërinj janë konfliktuar mes tyre për motive pronësie, duke bërë që njëri prej tyre në gjaknxehtësi e sipër të marrë një pistoletë manovër dhe ta qëllojë.

Ngjarja e rëndë ka ndodhur paraditen e së dielës në vendin e quajtur “Valias” në Kashar.

Burime zyrtare nga policia bënë me dije se gjatë një konflikti për motive pronësie shtetasi me inicialet E. B., ka qëlluar me pistoletë manovër në drejtim të kushëririt të tij shtetasit Z. B. Pas njoftimit, policia ka bërë të mundur arrestimin e autorit.

Në cilësinë e provës materiale u sekuestrua arma pistoletë manovër, me të cilën shtetasi E. B., ka kryer qitjen. Grupi hetimor vijon punën për sqarimin e mëtejshëm të rrethanave të ngjarjes.

Rama e Veliaj në Kashar: Tani duhet të qetësojmë njerëzit

Kryeministri Edi Rama, i shoqëruar nga krebashkiaku i Tiranës, Erion Veliaj, inspektuan nga afër situatën e krijuar në Kashar pas tërmetit. Kryeministri zhvilloi takime me banorët e prekur nga tërmeti, duke dëgjuar shqetësimet e tyre. Ai tha se gjërat duhen bërë me radhë, ndërsa shtoi se si fillim e rëndësishme është që njerëzit të qetësohen.

“Tani e rëndësishme është të qetësojmë njerëzit. Çadra me standarde do të jenë në dispozicionin tuaj për pak kohe. Të gjitha do të zgjidhen me pak durim. Sot në këtë moment nuk mund të fillojnë riparimet, pasi gjërat do të bëhen me radhë”, tha Rama. Ndërkohë, teksa një banore i shprehte Ramës shqetësimin se nuk ishte pajisur me një letër nga njësia administrative pasi banesa e saj ishte dëmtuar, kryeministri urdhëroi kryetarin e Kasharit që të merrej me rastin në fjalë”, tha Rama.

Nga Kashari ku së bashku me kryeministrin Edi Rama panë nga afër situatën e krijuar si pasojë e lëkundjeve të tërmetit, Veliaj informoi se aktualisht po punojnë 15 grupe ekspertësh të cilët po bëjnë inspektimin e specializuar në terren mbi gjendjen e çdo pallati dhe banese private dhe për të përcaktuar nëse kategorinë e dëmtimit dhe nëse janë të banueshme ose jo.

“Sot kemi bërë në Tiranë 15 grupe inxhinierësh se ky ka qenë meraku më i madh. Në 15 njësitë urbane janë çiftuar instituti i ndërtimit me kolegët që keni sjell ju nga jashtë grek, bullgarë, italian, amerikanë që të marrin edhe një opinion të dytë. Kjo është për të krehur të gjithë pallatet e Tiranës, sigurisht do të marri kohën e vet një pallat merr një orë e gjysmë – dy orë që të bëhet verifikimi me themel”, tha Veliaj.

Veliaj: Meta dhe Mona e kanë Kasharin transit për Rinas ose Gjirin e Lalëzit

Gjatë takimi me banorët në zonën e Kasharit, kryebashkiaku Erion Veliaj nuk la pa përmendur edhe presidentin Meta dhe Monikën, duke iu drejtuar qytetarëve nëse i kishin parë ndonjëherë ato në këtë zonë për t’i ndihmuar apo dëgjuar hallet e tyre. “I keni parë ndonjëherë Ilirin në Kashar, Monikën në Kashar? E kanë tranzit, ikin o në Rinas, o në Gjirin e Lalëzit. Po, ndalojnë vetëm kur ndajnë lekët e fushatës.”

Veliaj nuk la pa përmendur edhe ish kryeministrin Berisha dhe PetritVasili duke thënë se atyre iu është refuzuar viza për në SHBA dhe më 30 qershor do i hiqet viza njëherë e mirë të gjithë politikanëve që mbajnë peng vendin. “Në 30 qershor i heqim vizën Saliut, Vasilit dhe politikanëve që na mbajnë peng. I heqim vizën edhe protestës edhe prostatës.”

Zgjedhjet do të mbahen më 30 qershor dhe nuk do të ketë trazira tha Veliaj pasi “nuk besoj se ka ngelur njeri sot që të japë jetën për Berishën”, duke kujtuar se kush prek zgjedhjet dënohet me burg dhe hyn në listën e zezë të SHBA.

Mbillen 500 pemë në autostradë, Veliaj: Të ulim ndotjen industriale!

Bashkia e Tiranës ka vijuar aksionin për mbjelljen e pemëve edhe në këtë fund pranvere. Gjatë këtij muaji, sipas një njoftimi shpërndarë nga zyra për shtyp e bashkisë Tiranë, mësohet se përgjatë aksit të autostradës Tiranë-Kashar, janë mbjellë 500 pemë të mëdha të llojit Panjë. Ky investim për mjedisin është mundësuar nga “Raiffaisen Bank”.

Aksionit të mbjelljeve iu bashkua edhe kryetari i Bashkisë së Tiranës, Erion Veliaj, i cili vlerësoi përgjegjësinë sociale që kompanitë apo sipërmarrjet private tregojnë, duke kontribuar për të patur një qytet më të mirë dhe të jetueshëm.

“Jam sot në një ditë me diell pas shirave, që është momenti ideal për të mbjellë pemë dhe në këtë ditë ideale kemi disa miq idealë, që janë miqtë tanë nga Raiffeisen Bank, të cilët na kanë dhuruar 500 pemë panje, të cilat do qëndisin të gjithë rrugën dytësore të autostradës. Një rrugë, e cila konsumon një pjesë të madhe të ndotjes, për arsye pune të njerëzve që transportojnë mallra dhe që kanë gjithë bizneset në zonën Tiranë-Kashar, ka nevojë që për çdo makinë që kalon këtu, të kemi një pemë”, tha Veliaj.

Kryebashkiaku i bëri thirrje qytetarëve, bizneseve dhe çdo kujt tjetër që të shfrytëzojë ditët që kanë mbetur dhe të dhurojnë pemë për të patur një qytet më të mirë nesër.

“Dua t’i ftoj të gjithë qytetarët që të mbjellin pemë pas shirave që na ndihmuan sepse toka është ideale. Kush e ka lënë për në fund këtë punë, këto janë ditët, ndaj për të gjithë qytetarët që kanë kontribuar, qofshin kompani, biznese, shoqata, administratorë pallati, grupe banorësh apo edhe familjarë që e kanë bërë këtë për një ditëlindje apo për të kujtuar të afërmit e tyre, ky është momenti”, u shpreh Veliaj.

Drejtori i Përgjithshëm i Raiffeisen, Christian Canacaris falenderoi Bashkinë e Tiranës për bashkëpunimin jo vetëm në mbjelljen e pemëve, por edhe në shumë projekte të tjera.

“Ne dhamë kontributin tonë me mbjelljen e 500 pemëve përgjatë autostradës, të cilat ndikojnë realisht në krijimin e hapësirave të gjelbra dhe duam po ashtu që të vazhdojmë të japim kontributin tonë të mëtejshëm në përmirësimin e mjedisit. Falë kryebashkiakut, kemi marrë përsipër edhe angazhimin tonë social, duke ndihmuar njëkohësisht edhe komunitetin. Kemi bashkëpunuar në mjaft projekte me Bashkinë e Tiranës dhe do të vijojmë të japim këtë kontributin edhe në të ardhmen”, tha Canacaris.

Në pranga për tjetërsim pronash, ish kreu i komunës Kashar dhe 4 të tjerë

5 persona janë arrestuar nga policia e Tiranës me akuzën e falsifikimit të dokumenteve dhe tjetërsimit të pronave. Mes tyre është edhe ish kryetari i komunës së Kasharit Besnik Fuçia dhe ish-Përgjegjësi i Zyrës së Planifikimit dhe Kontrollit të Zhvillimit të Territorit, Jurgen Memisha.

Arrestimi i tyre erdhi pas kallëzimit të bërë në prokurori nga ndërtuesi Arben Petriti. Ai kishte rënë dakord për ndërtimin e dy pallateve bashkë me ndërtuesin tjetër Stefan Caushi, me ndarjen e pronësisë 50% me 50%. Por pronësinë e dy pallateve në fjalë e ka përfituar vetëm ndërtuesi Stefan Caushi, pas falsifikimeve dhe tjetërsimeve që u janë bërë dokumentave të pronësisë.

Pas hetimeve policia ka arrestuar 5 persona. Konkretisht në pranga kanë rënë ish-kreu i Komunës së Kasharit, Besnik Fuçia, ish-Përgjegjësit të Zyrës së Planifikimit dhe Kontrollit të Zhvillimit të Territorit, Jurgen Memisha, ndërtuesi Stefan Caushi, Vjollca Pani, Sekretare e Zyrës së Planifikimit dhe Kontrollit të Zhvillimit të Territorit si dhe inxhinierja, Miranda Dyrmisha, Kolaudatore.