Përplasjet me Metën për Kushtetuesen, Dvorani kërkon ndryshime ligjore

Viti që lam do të mbahet mend për përlasjet midis Presidentit Ilir Meta dhe kreut të Këshillit të Emërimeve në Drejtësi, Ardian Dvorani. Shkak u bë procedura për emërimin e anëtarëve të Gjykatës Kushtetuese. Përplasjet arritën në pikën kulmore, aq sa Ilir Meta ngriti padi ndaj Dvoranit. Ndërkohë, KED publikoi këtë fillim viti raportin e punës për vitin 2019. Në një pjesë të konsiderueshme, raporti flet edhe për situatën e krijuar në Gjykatën Kushtetuese. Në këtë raport KED sqaron se procesverbalet e mbledhjeve nuk janë zbardhur për mungesë stafi. “Kishim tre punonjës me kohë të pjesshme nga gjykata e lartë, dhe kjo ka pamundësuar zbardhjen e procesverbaleve të mbledhjeve të KED e cila është një proces dëgjimi, e më pas transkiptimi”, shprehet Dvorani në raportin e tij.

Më tej, KED, duke u nisur nga përplasjet me Ilir Metën për emërimet në Gjykatën Kushtetuese, i kërkon Kuvendit ndryshime ligjore me qëllim shmangien e këtyre përplasjeve në të ardhmen. Më konkretisht, KED specifikisht kërkon “për të qartësuar procedurat që ndiqen nga organet e emërtesës dhe nga KED-ja për plotësimin e vakancës në Gjykatën Kushtetuese, ekzistencën, rastet, kuptimin dhe mënyrën e zbatimit të rregullit të paraqitjes së dy listave me gjyqtarë dhe jo gjyqtarë kur ka më shumë se një vend vakant në shqyrtim nga i njëjti organ emërtese lidhur me afatet, hapat proceduralë, komunikimin, kompetencat dhe përgjegjësitë e organeve të emërtesës në procesin e plotësimit të vendeve vakante si edhe për të harmonizuar në tërësi gjuhën dhe rregullat materiale dhe procedurale të këtij ligji të posaçëm me ato të ligjit të 2016 që përmban rregullime të natyrës më të përgjithshme”, thuhet në raportin e firmosur nga Ardian Dvorani. /Realstory.al/

Për më tepër lexoni raportin e plotë të KED

Raporti-KED Raporti i KED per vitin 2019

Do hetojë prokurorë e gjyqtarë, KED publikon renditjen e kandidatëve për ILD

Këshilli i Emërimeve në Drejtësi zhvilloi të hënën mbledhjen e radhës, duke miratuar përfundimisht renditjen e 5 kandidatëve që synojnë të marrin postin e Inspektorit të Lartë të Drejtësisë. Sipas renditjes përfundimtare, Artur Metani me 89.6 pikë është renditur i pari. Në vendin e dytë është renditur Sokol Stojani me 89 pikë, në vendin e tretë Joana Asimi Sorraj me 82.2 pikë, në vendin e katërt Eris Hysi me 78.3 pikë dhe në vendin e pestë Lindita Troja me 63.4 pikë.

“Lista do t’i dërgohet Kuvendit të Republikës së Shqipërisë, brenda tre ditëve, sipas parashikimeve të nenit 200 shkronja “ë” të ligjit nr. 115/2016. Dy vendimet e arsyetuara, raporti dhe aktet e tjera të pikëzimit të kandidatëve do të publikohen nesër ne faqen zyrtare te Gjykatës së Lartë”, thuhet ndër të tjera në njoftimin e KED. Kuvendi, gjatë rinisjes së punimeve në fillim të vitit 2020 do të vendosë se cili nga pesë emrat e dërguar nga KED do të zgjidhet Inspektor i Lartë i Drejtësisë.

Po çfarë është ky institucion?

Inspektorati i Lartë i Drejtësisë, i krijuar nga reforma në drejtësi, është përgjegjës për verifikimin e ankesave, nisjen e hetimeve për shkeljet dhe fillimin e procedimit disiplinor për gjyqtarët dhe prokurorët e të gjitha niveleve, deri tek anëtarët e Gjykatës Kushtetuese, Këshillit të Lartë Gjyqësor, Këshillit të Lartë të Prokurorisë etj.

Për të zgjedhur Inspektorin e Lartë të Drejtësisë duhet tre të pestat e votave në Kuvend. Mandati i Inspektorit të Lartë të Drejtësisë është 9-vjeçar, pa të drejtë rizgjedhjeje. Edhe për rastin e zgjedhjes së kreut të ILD, Kushtetuta ka parashikuar mekanizëm zhbllokues. Nëse një nga pesë anëtarët nuk votohet brenda 30 ditëve në Kuvend, kandidati i renditur me më shumë pikë në listë merr detyrën automatikisht. /Realstory.al/

Do hetojnë gjyqtarë e prokurorë, kush janë 5 kandidatët e ILD

Këshilli i Emërimeve në Drejtësi ka intervistuar 5 kandidatët që do të janë në listë për të zgjedhur kryetarin e institucionit të ri të drejtësisë Inspektori i Lartë të Drejtësisë. Intervistimi i 5 kandidateve Artur Metani, Eris Hysi, Joana Asimi Sorraj, Lindita Troja dhe Sokol Stojani është bërë të mërkurën gjatë mbledhjes së KED, në mënyrë që të bëhet vlerësimi dhe pikëzimi i tyre për hartimin e listës dhe më pas kjo listë do t’i çohet Parlamentit për të zgjedhur inspektorin që do të drejtojë ILD.

Zhvillimi i intervistave të kandidatëve të lejuar për kandidim, u krye në sallën e mbledhjeve të KED, në prani të anëtarëve të Këshillit, Avokatit të Popullit dhe përfaqësuesit të Presidentit të Republikës, në rolin e vëzhguesit. Kandidatët paraqitën platformën e tyre mbi vizionin, objektivat dhe sfidat e lidhura me ushtrimin e kompetencave të Inspektorit të Lartë të Drejtësisë .

Lista më 5 kandidatët do të përpilohet nga KED brenda aftat ligjor prej 10 ditës dhe më pas do t’i dërgohet Kuvendit, që duhet të vendos me 84 vota për të zgjedhur inspektorin që do të ketë një mandat 9-vjeçar. Nëse Kuvendi nuk arrin dot numrin e kërkuar të votave për të zgjedhur një prej pesë kandidatëve që listohen të parët nga KED, atëherë personi i listuar i pari zgjidhet automatikisht Inspektor i Lartë i Drejtësisë.

ILD vjen si rezultat i Reformës në Drejtësi dhe do të ushtrojë kontrollin mbi gjykatës dhe prokurorë. ILD do ketë të drejtë të nisë hetim dhe procedim disiplinorë për të gjithë hallkat e drejtësisë përfshi anëtarët e Gjykatës së Lartë, Këshillit të Lartë të Prokurorisë, Këshillit të Lartë Gjyqësorë dhe Prokurorit të Përgjithshëm.

Meta zgjedh me gogla KED, nuk shpëton nga Dvorani

Pavarësisht përplasjeve të ashpra me kreun aktual të KED, Ardian Dvorani duket se Presidenti Meta nuk ka mundur dot të shpëtoj prej tij. Në bazë të shorteut që u hodh në Presidencë për krijimin e KED-së së re, Ardian Dvorani u zgjodh automatikisht si pjesë e saj dhe kryetar u KED, pasi ishte kandidatura e vetme. Sipas ligjit anëtari i zgjedhur nga Gjykata e Lartë është edhe kryetar i KED, që do të thotë se Dvorani do të mbaj të njëjtin pozicion në KED edhe për 2020. Më herët Meta ka depozituar një padi kundër Dvoranit, pasi e akuzon atë për shkelje ligjore dhe marrje kompetencash në rastin e emërimit të Arta Vorpsit si anëtare e Gjykatës Kushtetuese. Madje Meta ka theksuar se do ta ndjekë me shumë rigorozitet veprimtarinë e këtij institucioni në mënyrë që të mos lejohet devijimi nga dispozitat kushtetuese.

Presidenca hodhi shortin për zgjedhjen e anëtarëve të Këshillit të ri të Emërimeve në Drejtësi, që sipas ligjit e ka këtë të drejtë ta ushtrojë çdo vit kalendarik midis datave 1 dhe 5 dhjetor. Shorti u hodh nga këshilltari juridik i presidentit, Bledar Dervishi në prani të të ngarkuarës me punë të SHBA, Leyla Moses-Ones, kreut të KLP-së, Gent Ibrahimi, Avokates së Popullit, Erinda Ballanca, presidentit Meta etj. Dervishi sqaroi se vetëm anëtarët që kanë plotësuar kushtet dhe kriteret marrin pjesë në short. Gjatë shortit u zgjodhën anëtarët e rinj të KED për 2020, ku dy anëtarë do të jenë nga Gjykata Kushtetuese, një nga Gjykata e Lartë, një prokuror nga Prokuroria e Përgjithshme, dy gjyqtarë dhe dy prokurorë nga gjykatat e apelit, si dhe një gjyqtar nga gjykatat administrative.

Në bazë të shortit u zgjodhën edhe anëtarët e tjerë:

-Nga Gjykata Kushtetuese për KED

Fjona Papajorgji anëtare e parë

Vitore Tusha anëtare e dytë

Marsida Xhafellari zgjidhet anëtare zëvendësuese

-Nga Gjykata e Lartë

Ardian Dvorani zgjidhet automatikisht si kandidat i vetëm

-Nga Prokuroria e Përgjithshme

Arta Marku zgjidhet anëtarë e KED-së si përfaqësuese e Prokurorisë së Përgjithshme

Bilbil Mete zgjidhet anëtari zëvendësues nga Prokuroria e Përgjithshme

-Nga Gjykata e Apelit

Miranda Andoni zgjidhet anëtare e parë

Saida Dollani zgjidhet anëtare e dytë

Nazmi Troka zgjidhet anëtar zëvendësues

-Nga prokuroria e Gjykatave të Apelit

Ludovik Dodaj zgjidhet anëtar i parë

Fatjona Memcej zgjidhet anëtare e dytë

-Nga Gjykata Administrative

Arjan Qafa anëtar i KED nga Gjykata Administrative

Marjana Velçani zgjidhet anëtare zëvendësuese

Në kushtet ku vendi nuk ka ende një Gjykatë Kushtetuese funksionale, dhe madje ka një debat kompleks për ngritjen e këtij institucioni, shorti i zgjedhjes së anëtarëve të rinj të KED-së merr një rëndësi të madhe për shkak të rolit të rëndësishëm që ka KED, si institucioni që ka si funksion që të bëjë vlerësimin e kandidatëve për anëtarë të Gjykatës Kushtetuese, anëtarëve të Gjykatës së Lartë, Prokurorëve etj.

Meta “luftë” KED: Diskriminoi Xhaferllarin për ta skualifikuar

Pasi foli për më shumë se një orë në konferencën për mediat mbrëmjen e të mërkurës, Ilir Meta publikoi dokumentin voluminoz, për të argumentuar dekretimin e Xhaferllarit si anëtare të Gjykatës Kushtetuese. Meta rendit disa nga detyrat që Marsida Xhaferllari ka mbajtur gjatë karrierës së saj si juriste, duke përmendur poste publike në institucione të ndryshme. Ndër arsyet, Presidenti vlerëson faktin, që sipas tij, Marsida Xhaferllari “gëzon integritet të lartë moral, etik dhe cilësi të larta profesionale të cilat janë kërkesa të domosdoshme dhe në koherencë me besimin që kërkon publiku për të qenë anëtar i Gjykatës Kushtetuese. Përgjatë karrierës së saj ka reflektuar aftësi vendimmarrëse dhe bashkëpunimi”, shkruan Ilir Meta.

Vlerësimin për Marsida Xhaferllarin, Ilir Meta kërkon ta përforcojë duke sulmuar Këshillin e Emërimeve në Drejtësi. Sipas Ilir Metës, KED ka vepruar në mënyrë jokorrekte në lidhje me kandidaturën e Marsida Xhaferllarit. Meta supozon se KED ka pasur qëllim për ta skualifikuara nga gara Xhaferllarin, duke e argumentuar këtë me faktin se dy nga anëtarët e KED kanë dhënë 0 pikë për kandidaten.

“Nga përmbajtja e dokumentacionit, rezultoi në mënyrë të qartë, se veprimtaria e KED-së, lidhur me ketë kandidaturë, ishte ndjekur në mënyrë jokorrekte dhe në shumë raste edhe me shkelje ligjore që synonin qartazi, diskriminimin e kandidaturës në fjalë, me qëllimin fillestar për ta s’kualifikuar në mënyrë të padrejtë apo edhe atë fundor për ta vlerësuar dhe renditur me po kaq të padrejtë, sa më poshtë në listë, për ta eleminuar nga mundësia e përzgjedhjes. Ka rezultuar se për këtë kandidate, dy anëtare të KED-së, në mënyrë të paarsyeshme, e kanë vlerësuar kandidaten me 0 (zero) pikë. Për asnjë kandidat tjetër nuk ka ndodhur një vlerësim kaq ekstrem”, shkruan Meta.

Madje, sipas Ilir Metës, për shkak të vlerësimit diskriminues të KED-s, kandidatja Marsida Xhaferllari u rendit e katërta në listën fillestare. “Vetëm për arsye të këtij vlerësimi diskriminues nga dy anëtarë të KED-së, kandidatja në fjalë, u rendit e 4-ta në radhë në listën fillestare. Presidenti i Republikës, ka analizuar dokumentacionin edhe në prizmin për të kuptuar shkaqet e vërteta të kësaj sjellje të disa anëtarëve të KED. Ka rezultuar se ndaj kandidates në fjalë është ndjekur një proces i verifikimit të kushteve të kandidimit, i ndryshëm nga kandidatët e tjerë, me nota të forta diskriminimi. Përsëri KED ka vlerësuar përfundimisht se zonja Marsida Xhaferllari i plotësonte kushtet e kandidimit”, thotë Meta.

Por pyetja që ngrihet është nëse Meta ka të drejtën të gjykojë veprimtarinë e KED-s? Në fakt, përgjigja ka ardhur nga Reforma në Drejtësi. Këtë kompetencë e rregullon Kushtetuta, e cila nën Nenin 149/d shprehet: “Këshilli i Emërimeve në Drejtësi kryen verifikimin e kushteve ligjore dhe vlerësimin e kritereve profesionale e morale të kandidatëve për Inspektor të Lartë të Drejtësisë, si dhe të kandidatëve për anëtarë të Gjykatës Kushtetuese. Këshilli i Emërimeve në Drejtësi shqyrton dhe rendit kandidatët sipas meritës profesionale. Renditja e kandidatëve nuk është e detyrueshme, me përjashtim të rastit kur nuk arrihet të emërohet kandidati”, pra Presidenti jo vetëm që ka paragjykuar një vendim të KED, por indirekt ai kërkon të futet në kompetencat që Kushtetuta ja njeh ekskluzivisht KED. /Realstory.al/

Kushtetuesja, Meta akuzon KED. Por a kishte parashikuar bllokimin?

Një ditë pasi Arta Vorpsi u emërua anëtare e Gjykatës Kushtetuese, vendim i botuar në Fletoren Zyrtare, reagoi Presidenti Ilir Meta. Ai publikoi letrën e plotë dërguar kryetarit të Kuvendit, kryetarit të KED dhe Avokatit të Popullit, në lidhje me pezullimin e procesit të emërimit të anëtarit të dytë të Gjykatës Kushtetuese, që i përket kreut të shtetit. Së pari, Meta i qëndron argumentit të tij, se pasi ai emëroi Besnik Muçin anëtar të Gjykatës Kushtetuese, ishte radha e Kuvendit për të bërë emërimin e anëtarit tjetër.

“Neni 179 pika 2 e Kushtetutës, përcakton: “Anëtari i parë për t’u zëvendësuar në Gjykatën Kushtetuese emërohet nga Presidenti i Republikës, i dyti zgjidhet nga Kuvendi dhe i treti emërohet nga Gjykata e Lartë. Kjo radhë ndiqet për të gjitha emërimet që do të bëhen pas hyrjes në fuqi të këtij ligji.”, shprehet Meta. Më pas, ai gjen alibi duke sulmuar Këshillin e Emërimeve në Drejtësi se ka shkelur procedurën. Sipas Metës, KED dërgoi listat në Kuvend më vonë se sa duhej.

“Në aktet e dërguara pranë Institucionit të Presidentit të Republikës nuk paraqitet asnjë e dhënë që të shpjegojë arsyet e dërgimit të të dy listave njëherazi apo shkaqet e vonesës së dërgimit të dy listave njëherazi me një javë diferencë pranë Kuvendit. Ky veprim administrativ i KED-së nuk respekton as kohën e përpilimit të listave (listat janë miratuar brenda të njëjtës ditë), as radhën e miratimit të tyre (lista e parë e miratuar është e Presidentit, lista e dytë është e Kuvendit, lista e tretë është e Presidentit, dhe lista e katërt është e Kuvendit) dhe as rendin kronologjik të detyrueshëm, që ka caktuar Kushtetuta dhe ligji, për plotësimin e vendeve vakante”, shprehet Meta. Megjithatë, këto nuk janë argumentet e vetme të Ilir Metës.

Duket se “djalli fshihet në detaje” sa i përket bllokimit të Gjykatës Kushtetuese. Së pari lidhet me procedurën, atë që Ilir Meta e citon duke e theksuar: “Anëtari i parë për t’u zëvendësuar në Gjykatën Kushtetuese emërohet nga Presidenti i Republikës, i dyti zgjidhet nga Kuvendi dhe i treti emërohet nga Gjykata e Lartë. Kjo radhë ndiqet për të gjitha emërimet që do të bëhen pas hyrjes në fuqi të këtij ligji”. Pra, nisur nga ky pohim, edhe nëse do të ishte ndjekur radha e përcaktuar për emërimin e anëtarëve të Gjykatës Kushtetuese sipas kronologjisë President, Kuvend, Gjykatë e Lartë, në hallkën e fundit mund të krijohej përsëri ngërç.

Kjo për faktin se Gjykata e Lartë ende nuk është funksionale, dhe në mos funksionim të saj, bie mundësia që të zbatohet radha kronologjike e plotësimit të vakancave në kushtetuese. Kështu, ndoshta në funksion të këtij fakti, KED vendosi që Arta Vorpsi të emërohet anëtare e dytë e Gjykatës Kushtetuese sipas vakancës së Presidentit të Republikës duke vepruar sipas sanksionit kushtetues: se nëse presidenti nuk përzgjedh një nga tre kandidatët në listë, i pari me më shumë pikë emërohet automatikisht. Por, duke u nisur nga veprimi i Presidentit, gjasat janë që edhe nëse ai do të kishte zgjedhur anëtarin e dytë të kushtetueses në këtë raund, mund të kishte bllokuar përsëri procesin pasi të kishte votuar dhe Kuvendi anëtarët e tij. Justifikimi do të ishte se Gjykata e Lartë nuk është funksionale dhe s`mund të zgjedhë kandidatët e saj.

Një tjetër detaj për të tentuar bllokimin e Gjykatës Kushtetuese lidhet me një tjetër argument të Presidentit. Meta kapet me një tjetër detaj, me faktin se, qoftë në listat që KED i ka dërguar presidentit qoftë në ato që i ka dërguar Kuvendit, gjenden pothuajse të njëjtët emra. Kështu, duke përjashtuar listën e parë, pra atë nga tashmë është zgjedhur Besnik Muçi, në tre listat e tjera, ajo dërguar presidentit, dhe dy Kuvendit, janë në garë pothuajse të njëjtët emra. Kështu, në listën e datës 21 shtator që KED i dërgoi Kuvendit renditen tre emra: Arta Vorpsi, Elsa Toska dhe Besnik Muçi.

Praktikisht, kjo listë mund të cilësohet e djegur tashmë, pasi Arta Vorpsi u emërua një ditë më parë, ndërsa Besnik Muçi u dekretuar disa javë më parë nga Meta. Kështu, dy kandidatët që gjendeshin në të dyja listat, si në atë të Kuvendit dhe atë Presidentit, tashmë quhen të emëruar. Tani pritet të mësohet nëse Kuvendi do të veprojë duke përzgjedhur Elsa Toskën dhe Fiona Papajorgjin, dy kandidatet e vetme të mbetura në dy listat për dy vakancat e kushtetueses që do të plotësohen nga Kuvendi?

Pavarësisht këtij fakti, Meta edhe në këtë pikë, me këtë argument duket se fsheh diçka tjetër. Më shumë sesa procedura e përzgjedhjes, interesi ka qenë për të mësuar lëvizjen e radhës të Kuvendit për emrin që do të zgjidhte. Fakti është se katër listat e kandidatëve kanë pothuajse të njëjtët emra. Kur Ilir Meta zgjodhi Besnik Muçin, që ishte i renditur i fundit në listën e pikëzimit, ai anashkaloi Arta Vorpsin, e cila qëndron e para në të katër listat e pikëzimit. Edhe pse zakonisht rekomandohet që kandidati i renditur më lartë me pikë zgjidhet i pari, Meta bëri krejt të kundërtën.

Ndoshta në këtë pikë mund të ketë dhe një tjetër shpjegim bllokimi i kushtetueses nga Meta. Emri i Arta Vorpsit ishte përsëri në krye të listës që Presidenti duhet të përzgjidhte anëtarin e dytë të kushtetueses. Nëse në rastin e listës së parë ndodhej një kandidat mashkull, siç ishte Besnik Muçi, në listën e dytë nuk ishte asnjë i tillë. Ndaj Meta refuzoi përsëri një kandidate që vlerësohet më lartë se gjithë kandidatët e tjerë, e cila tashmë është zyrtarisht në detyrë, pasi ligjvënësit kanë krijuar “çelësin zhbllokues” të ngërçit duke emëruar automatikisht më të mirin e listës.

Ndërkohë, për të gjithë ngërçin e krijuar Meta bën fajtore KED, pasi sipas tij, nëse listat e kandidatëve do të ishin miratuar sipas radhës së shpallur për vakancat, do të ishte shmangur përplasja. “Në zbatim të nenit 179 pika 2 të Kushtetutës, neneve 7 pika 2, dhe 86 pika 4 të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, Këshilli i Emërimeve në Drejtësi, domosdoshmërish, në fazën përfundimtare të miratimit dhe dërgimit të listave përfundimtare, duhet të respektonte kërkesat e mësipërme të Kushtetutës dhe ligjit. Duke i miratuar dhe përcjellë listat tek secili organ emërtese sipas kësaj radhe dhe të diferencuara në kohë KED-ja do të shmangte situatën paradoksale procedurale të krijuar”.

“KED-ja me përcjelljen e njëkohshme të listave të kandidatëve për plotësimin e të dy vakancave që i përkasin Presidentit të Republikës, e ka vendosur Institucionin e Presidentit të Republikës në vështirësi, duke u përpjekur të krijojë një gjendje fakti ku Presidenti sipas KED-së do të duhet të shprehet brenda afatit ligjor 30-ditor edhe për emërimin e gjyqtarit tjetër për plotësimin e vakancës tjetër, eventualisht përpara se Kuvendi të shprehet për emërimin e gjyqtarit të dytë kushtetues. Nëse Presidenti i Republikës, do të ndjekë këtë logjikë siç ka vepruar administrativisht Kryetari i KED-së, kjo do të çonte domosdoshmërish në shkelje të parashikimeve të dispozitave të Kushtetutës dhe të ligjit nr.8577/2000, për sa i takon respektimit të radhës së emërimit apo zgjedhjes së gjyqtarëve të rinj kushtetues”, shkruan ndër të tjera Meta. /Realstory.al/

Meta rihap garën për Kushtetuesen. 6 kandidatë i dërgohen KED

Pas dekretimit të Besnik Muçit si anëtar i Gjykatës Kushtetuese, Presidenti Ilir Meta rihapi garën për “Vakancën e parakohshme” e krijuar nga përfundimi para kohe i mandatit, të ish-gjyqtari Besnik Imeraj. Në këto kushte, Ilir Meta rihap garën për plotësimin e një tjetër vendi vakant në Gjykatën Kushtetuese për një nga 3 vende që plotësohen nga propozimet e kreut të shtetit. Pas përfundimit të afatit të rishpalljes për aplikim për këtë vend vakant, sipas merave të publikuar nga Presidenti Ilir Meta, kanë shfaqur interes 6 kandidatë.

Ata janë: Dedë Kasneci, Envi Hicka, Prelë Martini, Shaqir Hasanaj, Vasil Bendo dhe Vjosa Bodo Mujo. “Lista e aplikantëve të mësipërm, së bashku me dokumentacionin e dorëzuar prej tyre do t’i përcillet menjëherë Këshillit të Emërimeve në Drejtësi me qëllim që ky organ të revokojë/shfuqizojë Vendimin nr.137, datë 21.09.2019 të pezullimit të procedurës së verifikimit, si dhe vijimin e procesit për verifikimin dhe vlerësimin e të gjitha kandidaturave për plotësimin e këtij vendi vakant, sipas ligjit”, shkruhet në njoftimin e Presidentit.

Ndërkohë, në mbledhjen e datës 21 shtator të këtij viti, Këshilli i Emërimeve në Drejtësi vendosi pezullimin e procedurës së verifikimit të kandidaturave për “Vakancën e parakohshme” pas përfundimit të mandatit ish-gjyqtarit Besnik Imeraj. Shkak i pezullimit të procedurës së verifikimit të kandidatëve u bë skualifikimi nga gara i kandidates Zhaklina Peto, ndërsa në konkurrim mbetën vetëm dy kandidtë, nga tre që ishte minimumi i lejuar për garën.

Ndërkohë, sipas ligjit, pesë ditë nga publikimi i listës së kandidatëve të Presidentit, KED thërret mbledhjen për të shqyrtuar plotësimin e kushteve nga kandidatët. Më pas, 10 ditë pasi është zhvilluar mbledhja e parë, KED bën renditjen e kandidatëve në bazë të pikëve që ata kanë marrë.

Më pas lista i dërgohet Presidentit të Republikës, i cili brenda 30 ditëve duhet të zgjedhë një kandidat për plotësimin e vakancës së krijuar për shkak të përfundimit para kohe të mandatit të ish-gjyqtarit Besnik Imeraj. Nëse Presidenti nuk zgjedh gjyqtarin brenda 30 ditëve nga paraqitja e listës nga Këshilli i Emërimeve në Drejtësi, kandidati i renditur i pari në listë konsiderohet i emëruar./Realstory.al/

Kushtetuesja në shtator, KED gati listën e emrave

Këshilli i Emërimeve në Drejtësi ka përfunduar procesin e intervistave me 6 kandidtatë që do të garojnë për 4 postet vakante në Gjykatën Kushtetuese,e cila pritet të jetë funksionale në shtator.

KED i nisi intervistat ditën e mërkurë me Besnik Muçin, ndërsa i mbylli ditën e premte kandidatët e tjerë Arta Vorpsi, Elsa Toska, Fiona Papajorgji, Regleta Panajoti dhe Marsida Xhaferllari. Pas intervistimit të tyre KED do të përgatisë listën përfundimtare me renditjen e tyre që më pas do t’i paraqiten Presidentit dhe Kuvendit.

KED u ka kërkuar Presidentit dhe Kuvendit shpalljen e vendeve vakante për anëtarët e tjerë të Gjykatës Kushtetuese, që u krijuan nga skualifikimi nga gara i disa kandidatëve për shkak të vetingut, duke krijuar dy vakanca të lira në listat emërore të Presidentit dhe Kuvendit.

Aktualisht Gjykata Kushtetuese është vetëm me një anëtar, Vitore Tusha, dhe sipas ligjit duhet të pakën 5 anëtarë që kjo gjykatë të jetë funksionale dhe të fillojë me shqyrtimin e çështjeve në themel.

RealStory.al parashikoi më herët nëse ekziston mundësia që procesi i krijimit të Gjykatës Kushtuese mund të bllokohet nga presidenti Meta, pasi nga 6 kandidatët në garë për vendet vakante, 4 prej tyre janë si në listat e Presidentit ashtu edhe e Kuvendit. Nëse njëri kandidat zgjidhet prej të dyve atëherë, në Gjykatën Kushtetuese shkojnë vetëm 3 anëtarë dhe jo katër, duke mos e bërë funksionale atë, pasi duhen të paktën 5 anëtarë. Nisur nga marrëdhëniet e ashpra mes Kuvendit dhe presidentit, duket se KED duhet të luaj me limitet kohore që të shmang një bllokim të mundshëm të Gjykatën Kushtetuese për funksionimin e saj brenda shtatorit. Drita jeshile jepet nëse KED çon më parë listën e kandidatëve të Presidentit, i cili është i detyruar që brenda 30 ditësh të zgjedhë anëtarin dhe më pas i çon listën Kuvendi, që duhet të zgjedh po ashtu brenda 30 ditëve, një renditje në fakt që e përcakton edhe vetë ligji.

KUSHTETUESJA NË SHTATOR, A MUND TA BLLOKOJË META?!

Kushtetuesja, KED lejon kandidimin e Xhaferrllarit. 6 kandidatë për 4 anëtarë

Marsida Xhaferrllari është kandidatja e fundit e miratuar nga Këshilli i Emërimeve në Drejtësi për garën në Gjykatën Kushtetuese, duke e çuar në numrin total të kandidatëve për 4 vendet vakante. Kandidatura e saj u vlerësua dhe pranua nga Këshilli i Emërimeve në Drejtësi gjatë mbledhjes të martën, ndërsa sipas njoftimit po të këtij institucioni të mërkurën pritet të hapet zyrtarisht procedura e pikëzimit, që do të përcaktojë renditjen për secilin kandidat, qoftë ai nga Presidenti, qoftë nga Kuvendi.

Në mbledhjen e së martës, KED vendosi të pranonte kandidaturën e Xhaferllarit, e cila kandidon për vendet vakante për Gjykatën Kushtetuese të shpallur nga Presidenti, por edhe për vakancat për drejtimin e Inspektoratit të Lartë të Drejtësisë, pasi ajo ka konkurruar për të dy funksionet. KED ka njoftuar se të mërkurën do të nisë procedura dhe intervistimi i kandidatëve për të bërë vlerësimin, pikëzimin dhe të renditjes së kandidatëve për Gjykatën Kushtetuese dhe ILD-në pa humbur kohë në mënyrë që në shtator të dy këto institucione të jenë funksionale.

Marsida Xhaferrllari i bashkohet kështu garës për vakancat e Gjykatës Kushtetuese me 6 kandidatët e konfirmuar nga KED për 4 anëtarë të Kushtetueses. Pra, për të zgjedhur 4 anëtarë të rinj të Gjykatës Kushtetuese, Presidenti dhe Kuvendi duhet të vendosin mes 6 emrave të konfirmuar nga KED dhe Xhaferllarit, të sapozgjedhur si pjesë e garës. Konktretisht në garë janë: Arta Vorpsi, Besnik Muçi, Elsa Toska, Fiona Papajorgji, Marsida Xhaferrllari dhe Regleta Panajoti. Xhaferrllari kandidon edhe për ILD, bashkë me 3 kandidatët e tjerë Artur Metani, Eris Hysi dhe Artur Malaj.

Marsida Xhaferrllari, e cila ka qenë kryeinspektore pranë ish-Inspektoratit të Këshillit të Lartë të Drejtësisë, u zgjodh nga KED edhe pse procesi i vettingut nuk dha një përgjigje apo një përfundim për të në muajin mars të 2019. Edhe pse ajo kaloi të gjitha fazat e rivlerësimit të pasurisë, aftësive personale dhe pastërtisë së figurës, KPK doli me deklaratën përfundimtare duke thënë se për shkak se Xhaferrllari kishte humbur statusin e magjistratit nuk mund të vendoste për konfirmim apo jo të saj. Një rast i paprecedentë i KPK, pasi ligji e detyron atë që të marrë një vendim për çdo rast edhe kur një person nuk e gëzon statusin e magjistratit. /RealStory.al

VOA: Rrezikohet gara për Inspektorin e Lartë të Drejtësisë

Këshilli i Emërimeve në Drejtësi vendosi në mbledhjen e radhës të lejojë kandidimin e Eris Hysit si kandidat për Inspektor i Lartë i Drejtësisë dhe të ndalojë kandidimin e Klodian Rados për këtë post.

Vendimi u mor pasi u shqyrtuan dy kandidaturat për vendin vakant të Inspektorit të Lartë të Drejtësisë.

Burime pranë KED pohuan që zoti Rado nuk plotësonte kriterin e 15 vjetëshit të punës. Me këtë vendim duket se rrezikohet gara për ILD.

Nëse ky vendim për kandidatin Klodian Rado ngelet në fuqi, pas një kundërshtimi të mundshëm në gjykatë, atëherë pozicioni për Inspektor të Lartë të Drejtësisë mund të përsëritet për konkurrim nga KED.

Ligji parashikon që në konkurrimin për Inspektor të Lartë të Drejtësisë duhet të jenë 5 kandidatë.

Ata duhet të plotësojnë detyrimisht kriteret e 15 vjet përvojë pune në profesion, integritet të lartë moral e profesional, nuk duhet të kenë mbajtur funksione politike në administratë, ose nëpër parti politike 10 vitet e fundit.

Kandidatët për inspektorë të lartë të drejtësisë duhet po ashtu të mos jenë bashkëpunëtorë, informatorë ose agjentë të shërbimeve të inteligjencës, të mos jenë dënuar nga drejtësia për vepra penale dhe as të jenë pushuar më parë nga puna për shkaqe disiplinore.

Vendimi i djeshëm i KED për ndalimin e kandidaturës së zotit Rado mund të sjellë rishpalljen e vakancës për postin e ILD.

Zgjedhja e ILD duhet të ishte kryer në shkurt – mars 2017, ose 2 vjet e gjysmë më parë, 6 muaj pasi amendamentet kushtetuese të reformës në drejtësi hynë në fuqi.

Por, burime të besueshme e zyrtare nga KED i thanë Zërit të Amerikës se KED pritet të mblidhet të hënën për të vendosur nëse do të vijojë këtë garë me kandidatët e mbetur apo nëse duhet të rihapë garën nga e para.

Kjo e fundit do ta shtynte me disa muaj të gjithë procesin, duke lënë bosh ngritjen e njërit prej institucioneve kyçe të sistemit të drejtësisë.

KED vendosi po ashtu në mbledhjen e djeshme edhe ndalimin e kandidimit për zonjën Zhaklina Peta, kandidate për anëtare e Gjykatës Kushtetuese. Zonja Peta ka kandiduar në dy poste vakante për anëtare e Gjykatës Kushtetuese, që i përkasin presidentit.

Nëse edhe pas ankimimit emri i saj rrëzohet, atëherë i mbetet presidentit të vendosë nëse do ta rishpallë njërën nga vakancat e Gjykatës Kushtetuese e përcaktuar për presidentin.

KED rrëzoi disa ditë më parë 3 kandidatë të tjerë në një vakancë të përcaktuar për parlamentin, dhe ajo mbetet për t’u rishalllur gara.

Këshilli i Emërimeve në Drejtësi vendosi ndalimin e kandidimeve, ndërmjet të tjerëve, edhe për Fiona Papajorgjin, Valbona Balën dhe Sinan Tafajn. Këta tre emra ishin të vetmit që kandidonin për zëvendësimin e ish anëtarit të Gjykatës Kushtetuese, Fatos Lulo, të rrëzuar nga procesi i rivlerësimit të gjyqtarëve.

Pas kësaj Parlamentit i duhet të shpallë një thirrje të re.

Gjykata Kushtetuese, e cila aktualisht ka vetëm një anëtar, Vitore Tushën, pritet të ketë vetëm 5 anëtarë të rinj.

Por ky proces rrezikohet dhe nga një moment tjetër, që mund ta reduktojë edhe me një tjetër anëtar Gjykatën.

Për shkak të numrit të kufizuar të kandidatëve që janë përzgjedhur, gjithçka duket se do të jetë në dorë të presidentit Iir Meta.

Nëse Kreu i Shtetit për tre vendet vakante të shpallura prej tij, do të përzgjidhte emrat e Arta Vorpsit, Besnik Muçit dhe Elsa Toskës, atëherë automatikisht do të mbetej pa kandidat vakanca e shpallur nga parlamenti për zëvendësuesin e ish anëtarit Vladimir Kristo.

Ky rast mund të tejkalohet nëse do të ketë një koordinim mes dy institucioneve, në mënyrë që të mos pengojnë njëra tjetrën, dhe presidenti do të zgjidhte të paktën një nga dy kandidatët e tjerë të kualifikuar.

Deri më tani 12 kandidatë janë rrëzuar, dhe vetëm 5 janë përzgjedhur. Nga këto Besnik Muçi pret vendimin e Kolegjit të Posaçëm të Apelimit në fillim të shtatorit, ndërsa për Regleta Panajotin, pritet të shihet nëse Komisioneri Publik do të bëjë ose jo ankimim për vendimin e Komisionit të Pavarur të Kualifikimit, i cili e konfirmoi atë në detyrë. / VOA