Kryemadhi sulmon Venecian për Metën: Tejkaloi kompetencat

Kryetarja e LSI-së, Monika Kryemadhi ka dalë në mbrojtje të bashkëshortit të saj duke akuzuar Komisionin e Venecias për tejkalim të kompetencave. “Komisioni i Venecias tejkaloi kompetencat e saj në draftin paraprak për Presidentin Meta.” tha Kryemadhi, një deklaratë sa absurde aq edhe sulmuese ndaj një komision të pavarur, opinioni i të cilit vlerësohet nga të gjitha qeveritë e botës në lidhje me interpretimin e ligjit. Madje për të dalë në mbrojtje të bashkëshortit të saj, Kryemadhi hodhi poshtë edhe besueshmërinë e një prej organeve që vetë Meta, ishte shprehur se i besonte verbërisht (pavarësisht se vendosi të mos e dëgjojë opinionin e Venecias lidhur me tejkalimin e kompetencave nga ana e tij.)

Gjatë një interviste për Report TV, Kryemadhi deklaroi se Venecia tejkaloi kompetencat pasi dha një mendim edhe për zgjedhjet e 30 qershorit, gjë që sipas saj nuk i ishte kërkuar nga Kuvendi. Për Kryemadhin, Venecia duhet të jepte një opinion vetëm për dekretet e presidentit dhe jo 30 qershorin, dekrete që në fakt lidhen pikërisht për anulimin e 30 qershorit.

“Nuk më krijon asnjë lloj ndjesie, ai është një draft paraprak, mund të them që unë nuk jam një juriste që ta analizoj. Më duket si një deklaratë politike, pavarësisht nga kjo unë nuk jam e aftë për të gjykuar personat që e kanë hartuar atë draft. Ajo që më bën përshtypje është që, me sa kam lexuar në letrën e Z. Ruçi, nuk është kërkuar opinion nga Komisioni i Venecias për zgjedhjet e 30 qershorit por është kërkuar një opinion vetëm për dekretet e Presidentit. Komisioni i Venecias ka tejkaluar kompetencën e tij duke dhënë edhe një argumentim më të madh se ç’duhet, pra ka kaluar pyetësorin e tij, ka dalë në 30 qershor. Kështu që kemi një President që ka tejkaluar kompetencat, kemi edhe një Komision të Venecias që ka tejkaluar kompetencat.” tha Kryemadhi, e cila shtoi se opinioni i Komisionit të Venecias është një sugjerim që kush të dojë e merr parasysh.

Drafti paraprak i Komisionit të Venecias tha se presidenti Meta ka tejkaluar kompetencat e tij dhe ka shkelur Kushtetutën e vendit. Ky draft nuk u prit mirë nga vetë Meta, i cili e cilësoi atë si “trakt të rilindjes” dhe u shpreh se ka kryer “zero shkelje.” Një ndryshim qëndrimi 360 gradë e Metës, i cili deri dje i besonte verbërisht vendimit të Venecias dhe ishte gati të jepte dorëheqjen pa pritur ende vendimin e parlamentit, nëse ajo e gjente në shkelje.

Një marrëveshje mes PS dhe PD për reformën zgjedhore, nuk e tremb Kryemadhin, e cila tha se çështja duhet të shkojë përtej një marrëveshje, por të përqendrohet në një dialog gjithëpërfshirës mes të gjitha palëve politike (parlamentare dhe jo parlamentare).

“Unë mendoj që ky koncept ekziston vetëm në pyetjet e gazetarëve. Nuk është çështje marrëveshjeje PD-PS, PS-LSI, PD-LSI nuk është më çështje marrëveshjeje këtu. Është çështja e hapave që do të ndiqen nga politik-bërësit, kur them politik-bërësit të gjitha forcat politike, si ato parlamentare dhe jo parlamentare. Kur vjen reforma zgjedhore dhe zbatimi i saj. Vërtet miratohet një reformë zgjedhore por ajo duhet zbatuar, por si zbatohet një reformë zgjedhore? Me zgjedhje. Që të shkosh në një proces zgjedhor. Nuk është çështje marrëveshje këtu është çështje dialogu. Institucionalizimi i dialogut. Ne duhet ta institucionalizojmë. Ne nuk kemi dialog politik. Vazhdojmë 30 vjet tranzicion. Pse kemi 30 vjet tranzicion? Sepse nuk kemi dialog politik”

Në lidhje me djegien e mandateve, Kryemadhi e cilësoi si vetëvrasje politike për opozitën, por për të cilën nuk është penduar pasi sipas saj bëri që ndërkombëtarët të kuptojnë krizën në vend.

“Për hir të së vërtetës opozita mori një vendim ekstrem politik që nuk ka ndodhur ndonjëherë. Ishte si të themi një vetëvrasje politike, është e vërtetë por nuk jemi bërë pishman në asnjë moment sepse sot e kësaj dite ne kemi një raport të OSBE-ODHIR që flet për reformën në drejtësi që përdoret nga qeveria dhe mazhoranca për të kërcënuar gjyqtarët që të japin vendime gjyqësore në favor të tyre.” tha Kryemadhi, e cila shtoi se edhe bashkëshorti i saj Ilir Meta nuk e ka miratuar djegin e mandateve. “Di të them që është i pakënaqur për çështjen e mandateve, sapo hapim sytë në mëngjes, nuk fillojmë me ‘mirëmëngjesi, si fjete’ por ‘pse i dogjët mandatet’”.

Koha kur Kryemadhi i thurte lavde Edi Ramës

“ E ardhmja e një kombi është rinia dhe ti Edi Rama fitove sepse ke rininë me vete. Urime”. Sot nuk do e besonit që këto lavde dhe urime kanë dalë pikërisht nga goja e Monika Kryemadhit, pasi gjithçka që dëgjoni që prej daljes së LSI në opozitës, janë “i korruptuar”, “krimineli”, “Ramaforma” e shumë të tjera duke “e akuzuar për gjithçka të keqe që ndodh në vend”.

Këto fjalë janë thënë në vitin 2000, kur Edi Rama do të garonte për Kryetar Bashkia në Tiranë dhe Monika Kryemadhi si këshilltare e PS në Këshillin Bashkiak të Tiranës.

Në video duket Kryemadh, e cila shfaqet mjaft e ngrohtë, duke e përqafuar dhe buzëqeshur, shumë ndryshe nga gjuajtja me çizme dhe ofendimet në Kuvend. Përmes lavdërimeve, Kryemadhi uron Ramës për fitoren dhe se rinia shqiptare ishte e atë, ndërsa sot e akuzon se për faj të tij rinia po emigron jashtë vendit. Shihni videon më poshtë:

Kryemadhi del nga “ngujimi” i Bashës: Zgjedhje me Ramën…

Ndryshe nga Basha që vijon të thërrasë “Rama Ik”, Kryemadhi e LSI-së ka bërë lëvizjen e re duke dalë jashtë “ngujimit” demokrat dhe duke deklaruar se është e gatshme të futet në zgjedhje me ose pa Ramën Kryeministër.

Edhe më herët, siç ishte rasti i dekretit të Metës për zgjedhje në 13 tetor, LSI tregoi se mbante një qëndrim ndryshe nga PD, duke u treguar e gatshme të mbështesë presidentin dhe madje të dërgojë kërkesë në KQZ për t’u regjistruar në këto zgjedhje. Krejt ndryshe nga aleati i saj opozitar.

Ndërsa Basha vijon t’i shmanget garës dhe zgjedhjeve, Kryemadhi duket s’e e ka kuptuar gabimin e bojkotimit të 30 qershorit, dhe sheh se zgjidhja e krizës do të vijë nga përballja në zgjedhje me ose pa Ramën kryeministër.

“Ne si LSI nuk kushtëzojmë asnjëherë momentin e zgjedhjeve. Pse e themi nuk kushtëzojmë momentin e zgjedhjeve, sepse ne mendojmë që zgjedhjet janë i vetmi instrument që në një farë mënyre do të zhbëjë të gjithë këtë nyje të lidhur keqas, për shkak të mosfunksionimit të gjykatave, për shkak të mosfunksionimit të sistemit, të demokracisë. Ne duhet të përplasemi, ne duhet të luftojmë me bishën, sepse nëse nuk luftojmë me bishën nuk ka kush ta mundë bishën dhe në këtë rast, bisha është kapja e pushtetit nga kryeministri. Pavarësisht ligjëratës politike që ngre kryetari i PD-së dhe kryetari i opozitës që me një qeveri tranzitore dhe pa Ramën kryeministër, për ne si LSI mendojmë që është e domosdoshme përballja në zgjedhje e të gjithë opinionit publik. Në votimet e 30 qershorit, shqiptarët i dhanë një përgjigje jashtëzakonisht të madhe jo vetëm maxhorancës ku i thanë se e bojkotuan në 85% po i dhanë edhe një përgjegjësi shumë të madhe opozitës, ku i thanë që 85% e tyre iu përgjigjën aksionit politik të opozitës për të mos marrë pjesë në zgjedhjet moniste të Edi Ramës”, u shpreh Kryemadhi në një intervistë për News 24.

Për mungesën e dialogut të deritanishëm midis palëve, Kryemadhi bën fajtor kryeministrin Rama, i cili sipas saj, është kthyer në një kryeministër arrogant.

Nga ana tjetër Monika Kryemadhi ka folur edhe për reformën në drejtësi dhe sulmet e opozitës drejtuar saj ndërsa ka akuzuar Ramën për kapjen e kësaj reforme.

“SPAK nuk mund të përdoret kurrë si kamzhik për luftë politike, sepse sot luftën politike më të madhe e bëjnë qytetarët shqiptare. Çdo drejtësi politike do të bëjë hero çdo njeri që do të gjykohet për politikë. Dhe i vetmi gjykim sot janë qytetarët që të gjykojnë me votë. Kush do drejtësinë e vërtetë të shkojë në zgjedhje, të dalim të gjithë në mënyrë të barabartë t’iu japim shansin qytetarëve ai është gjyqi më i mirë për çdo politikan shqiptar. Gjyqi më i mirë sot për çdo politikan, janë zgjedhjet e lira dhe të ndershme, pastaj gjyq politik, gjyq mediatik, gjyq të pandershëm ka sa të duan. Në fund të fundit gjykimin tonë përfundimtar nuk na e bëjnë as politika, as ambasadat, as gjyqtarë, as prokurorë. E bën Zoti lart, për këtë të jeni të qetë”, vijoi më tej Kryemadhi.

Kryemadhi ka folur edhe për komisionin hetimor ndaj Metës ndërsa ka thënë se “Presidenti është një makineri politike që është shumë e vështirë për ta ndalur”.

LSI e Kryemadhit bojkotoi zgjedhjet e 30 qershorit, së bashku me aleatin e saj PD-në, të cilët vunë si kusht të panegociueshëm largimin e Ramës nga posti i kryeministrit. Por pasi zgjedhjet e 30 qershorit u zhvilluan dhe u njohën nga të gjithë, Kryemadhi ka ndryshuar qëndrim dhe mendon se tani e vetmja zgjidhje janë përballja në zgjedhje me ose pa Ramën kryeministër./realstory.al

Basha-Kryemadhi, asnjë reflektim: Protesta të fuqishme, “Rama Ik”

Aksioni opozitar do të vijojë të mbajë emrin “Rama IK”. Këtë njoftuan të mërkurën dy drejtuesit e koalicionit opozitar, Monika Kryemadhi e LSI-së dhe Lulzim Basha i PD-së pas takimit që zhvilluan në selinë blu.

Megjithëse pritej që ata të ofronin diçka të re pas pushimeve 2 mujore, por edhe pas premtimeve se në shtator do të nisë një aksion i ri opozitar, e kundërta ndodhi. Basha dhe Kryemadhi dolën para gazetarëve dhe përsëritën të njëjtin refren: Rama IK.

“Aksioni opozitar do të vazhdojë i drejtpërdrejtë, evidentues për të zgjuar çdo qelizë të shqiptarëve që po margjinalizohen për shkak të varfërisë. Votimet e 30 qershorit treguan se 85% nuk e duan Edi Ramën dhe largimi i tij është një kusht që e kërkojnë shqiptarët.

E rëndësishme është që çdo ditë shqiptarët protestojnë. Sepse mbajnë çdo ditë rradhën me bidona uji”, tha Kryemadhi pas takimit që zhvilloi me Bashën.

Ndërsa ky i fundit akuzoi qeverinë se përmes rrëzimit të dekreteve të Metës për dy koncesionet për ndërtimin e segmenteve Milot Balldren dhe Orikum-Dukat synon të vjedhë shuma të mëdha parash, ndaj dhe largimi i Ramës është dosmodoshmëri.

“Skandali me PPP-të Milot-Balldren dhe Dukat-Orikum, bëhet fjalë për një aferë të tmerrshme korruptive. Ata duan që shqiptarët të paguajnë një çmim 45 herë më të lartë se çmimi real. Të vjedhin mbi 200 milionë euro nga shqiptarët. Për këtë arsye u rrëzuan dekretet e Metës”, tha Basha i cili akuzoi parlamentin se është kthyer në noter të hajdutërisë së Ramës.

Siç duket nuk ka asnjë reflektim nga liderët e opozitës. Ata vazhdojnë serinë e akuzave kundër qeverisë dhe vijojnë në kërkesën për largimin e Ramës, por nuk japin asnjë ide sesi do të vijojë aksioni i opozitës në vijim. Të dy si Basha ashtu edhe Kryemadhi i janë shmangur kërkesës së vazhdueshme të Metës për zgjedhje në 13 tetor. Kjo është data që i ndan të dy krerët e opozitës për shkak se PD nuk është për zgjedhje në 13 tetor, ndërsa Kryemadhi mbështet dekretin e bashkëshortit të saj. Një ditë më herët Edi Paloka zbuloi se PD po bëhet gati për zgjedhje me Ramën në pranverë duke rrëzuar të gjithë aksionin opozitar të 7 muajve të fundit./Realstory.al

Bar West/ Kryemadhi braktis Bashën, ja merr valles me Ramën në Jalë

Monika Kryemadhi ashtu si dhe bashkëshorti i saj presidenti Meta, e kanë shfrytëzuar verën për të pushuar. Ndonëse Meta zgjodhi të udhëtonte nga mali në mal dhe të bënte dhe sulme politike përmes statuseve në Facebook, Kryemadhi zgjodhi të heshte. Asnjë status, asnjë deklaratë, asnjë fjalë gjatë gjithë verës. Pas 30 qershorit, Kryemadhi foli për përgatitje për zgjedhje, ato të 13 tetorit, dhe se nuk do të kishte pushim për LSI gjatë verës. Më pas foli për protesta masive në vjeshtë për rrëzimin e qeverisë, por ajo që u pa ishte një heshtje e madhe pa asnjë lloj aksioni politik për rreth dy muaj të nxehtë vere, duke harruar opozitën dhe aleatin e saj, Bashën.

Këtë heshtje Kryemadhi e theu me një valle të marrë në Jalë së bashku me zv/kryetarin e kësaj force politike, Luan Rama dhe të rinjtë e LRI-së në një aktivitet të përvitshëm kampingu. Ato shfaqen duke gëzuar pranë të rinjve dhe duke shijuar qetësinë e pushimeve verore.

Këto aktivitete argëtuese dhe shplodhëse duket se po përgatisin shpirtërisht Kryemadhin për të ndërmarrë një tjetër valle, atë të protestave në shtator dhe rikthimin në realitet të përballjes me krizën politike që ka mbërthyer vendin.

Gaz dhe hare në LSI: Monika Kryemadhi dhe Luan Rama ja marrin valles në Jalë, në vjeshtë protesta masive
Gaz dhe hare në LSI: Monika Kryemadhi dhe Luan Rama ja marrin valles në Jalë, në vjeshtë protesta masive
Gepostet von Gazeta TemA am Donnerstag, 29. August 2019

Distancimi i Kryemadhit, LSI i trembet një 17 maji të dytë

Realstory bëri një fact checking të mërkurën ku doli qartë se kryetarja e LSI-së Monika Kryemadhi prej më shumë se 1 muaji është distancuar qartë nga skena politike por edhe nga qëndrimet e kreut të PD-së, Basha.

Jo vetëm fakti që Kryemadhi është distancuar nga PD, por edhe një deklaratë e mbajtur dje nga ish deputeti i LSI-së Edmond Panariti, na lë të kuptojmë se LSI e mbetur tashmë pa asnjë pushtet dhe me frikën e largimit të militantëve drejt PS-së, i trembet një 17 maji të dytë.

Që ndryshe do të thotë, i trembet një marrëveshje mes Ramës e Bashës duke lënë mënjëanë LSI-në; madje-madje, i trembet mundësisë së ata të dy bashkëpunojnë për shkrirjen e LSI-së, ashtu sikurse Rama i shkruante në mesazh Metës pak kohë më parë. Mesazh, të cilin presidenti e lexoi para gazetarëve në konferencën e famshme për shtyp ku i shpalli të gjithë armiq përfshirë këtu edhe SHBA-të.

Por çfarë ka thënë të mëkurën Panariti në një intervistë televizive. LSI kërkon që në takimet e dialogut të mos jenë prezent vetëm PD dhe PS, por edhe partitë e tjera të vogla, përfshirë edhe vetë atë. Kjo pasi Lëvizja Socialiste për Integrim e ka pësuar një herë nga marrëveshjet qeveri-opozitë. Nga marrëveshja e 17 majit të 2017, LSI ishte partia më e dëmtuar. Tani ajo kërkon që kjo gjë të mos përsëritet, por të jetë edhe vetë pjesë e marrëveshjes. “Data 13 tetor një opsion që ofron Presidenti për t’i futur palët në zgjedhje. Unë besoj që dialogu duhet të jetë transparent jo me dyer të mbyllura. Duhet rivendosur besimi. Vendi ka nevojë urgjente, ulëritëse për zgjedhje sa më parë. Lini pushimet e uluni në tryezën e dialogut, nuk ka zgjidhje tjetër”, tha Panariti.

LSI kërkon me çdo kusht zgjedhje për t’u rikthyer në pushtet. Ajo ka humbur shumë nga djegia e mandateve por edhe nga humbja e bashkive. Tani i trembet largimit të militantëve që kanë nisur t’i bashkohen PS-së. Nëse situata vazhdon gjatë kështu, LSI rrezikon të shkrihet, ndaj dhe ata mbështesin fuqishëm ish shefin e tyre dhe zgjedhjet më 13 tetor, dhe sigurisht dialog me Ramën kryeministër./Realstory.al

MONIKA ME PUSHIME, HARRON PROTESTAT. ME METËN NË “KONKURSIN” E KOSIT!

Teatri, Bindja Demokratike: Po e shemb Basha dhe Kryemadhi, që refuzuan zgjedhjet

Përfaqësuesi ligjor i Bindjes Demokratike, Fabian Topallaj ka reaguar në lidhje me protestën e qytetarëve kundër prishjes së Teatrit Kombëtar. Topallaj ka shkruar një status në rrjetet sociale, ku shprehet se fajin për prishjen e teatrit e ka Lulzim Basha dhe Monika Kryemadhi.

“A e dini se Rama dhe Veliaj mund ta shembin Teatrin Kombëtar edhe nëse Gjykata Kushtetuese konstituohet edhe mblidhet që nesër duke e rrëzuar “Ligjin Fusha”. Kjo për shkak të mungesës së PD dhe LSI në zgjedhje. Makutërria e Veliajt dhe Ramës për të zëvendësuar Teatrin Kombëar me kulla gjigande betoni në mes të Tiranës, frenohej nga ligji për “vetëqeverisjen vendore” që parashikonte se pronat e Bashkisë mund ti kalonin në shfrytëzim privatit vetëm nëse këtë e dakordësonte me 3/5 e këshilltarëve bashkiakë”, shkruan Topallaj.

Më tej ai sqaron se as vendimi i Gjykatës Kushtetuese nuk do të ketë vlerë, lidhur me mbrojtjen e Teatrit. “Dhe sot, pavarësisht se Presidenti i Republikës ka goditur këtë ligj në Gjykatën Kushtetuese, vendimmarrja e kësaj të fundit nuk ka më asnjë rëndësi për çështjen, sepse Rama dhe Veliaj kontrollojnë 59 këshilltarë në Këshillin Bashkiak të Tiranës dhe mund të përdorin lirisht procedurën e vjetër ligjore për të bërë përsheshin e ëndërruar ne sheshin e godinës së teatrit”, shkruan Topallaj.

Kryemadhi: 3 vjet pas reformës nuk është realizuar ajo që votuam

Kryetarja e LSI, Monika Kryemadhi deklaroi se pavarësisht se kanë kaluar 3 vite nga miratimi i reformës në drejtësi, ende nuk është realizuar ajo që u votua me unanimitet të plotë në Kuvend. Kryemadhi tha se pavarësisht votimit me konsensus të plotë nga LSI me shpresën se do të arrihej një ndryshim pozitiv në drejtësinë e Shqipërisë, 3 vite më pas ende nuk është arritur anjëra nga këto.

“Defektet e deritanishme të reformës në drejtësi, nuk vijnë si pasojë e ndryshimeve kushtetuese 3 vite më parë, por si pasojë e devijimeve që i janë bërë nga rilindja” tha Kryemadhi e cila shtoi se miratimi i saj reforma me 140 vota ishte momenti kyç që i hapi dyert e integrimit Shqipërisë.

“Ky ishte momenti kyç që i dha mundësi Shqipërisë të merrte rekomandimin e parë pozitiv, po atë vit nga Komisioni Europian për çeljen e negociatave. Ishte vullneti për konsensus, dialog politik por edhe vendosmëria jonë për të miratuar këtë reformë. Deformimi i bërë, me koshiencë të plotë nga rilindasit, në implementimin e paketës së reformës në drejtësi që hartuam me ndihmën e partnerëve ka çuar në situatën aktuale kaotike dhe pa pasur ende institucionet kyçe të drejtësisë dhe tërësinë e funksionimit të shtetit të së drejtës.” – shkruan Krymadhi

Kryemadhi tha se LSI është edhe më e vendosur se 3 vite më parë për çlirimin e reformës në drejtësi nga kapja politiko-klienteliste.

“Pavarësisht, të gjitha defekteve të deritanishme të reformës, të cilat nuk vijnë si pasojë e ndryshimeve kushtetuese të bëra për t’i hapur rrugë reformës në drejtësi, por janë si devijime që i janë bërë kësaj reforme nga mazhoranca për të mbrojtur veten, ortakët e tyre në ekonomi dhe bashkëpunëtoret e tyre në krimin e organizuar, unë dhe LSI sot jemi edhe më të vendosur se 3 vite më parë në nevojën imediate për reformën në drejtësi, për çlirimin e saj nga kapja politiko-klienteliste, të pavarësimit dhe rritjes së integritetit të sistemit të drejtësisë në Shqipëri.” – shkruan Kryemadhi

Sot, 3 vite pas miratimit të ndryshimeve kushtetuese për reformën në drejtësi, nuk është realizuar ende ajo që miratuam…
Gepostet von Monika Kryemadhi am Montag, 22. Juli 2019

Kryemadhi harron ‘vjedhjen’ e votave, “Rama ik” për ekonominë

Pas takimeve në Vienë, Monika Kryemadhi ka ardhur me urgjencë për të vijuar ‘fushatën’ elektorale për zgjedhjet e 13 tetorit. Kryetarja e LSI ka zhvilluar një takim informues me strukturat e LSI në Berat, njofton zyra e shtypit e kësaj partie. Në fjalën e Kryemadhit para simpatizantëve të LSI në Berat, dallohet qartë ndryshimi i kursit në retorikën e saj. Nga deklaratat e ashpra politike (të cilat në fakt kanë nisur të zbuten pas 8 korrikut kur u miratua Komisioni Hetimor për shkarkimin e Metës), te deklaratat në formën e premtimeve elektorale. Kryemadhi, ashtu si Basha, tashmë flasin për ekonominë, për bujqësinë, për naftën, për varfërinë, duke theskuar se tashmë ‘Rama duhet të largohet për të çliruar ekonominë’.

“Një këshillë për Ramën, nuk e ka fajin drejtori apo inspektorët e tatimeve, por taksat e larta dhe paaftësia jote . Ka ardhur dita që të ikësh sa më parë, që të çlirohet ekonomia se e ke zënë prej fyti. Lënia në mëshirë të fatit e fermerëve ka për qellim shpopullimin e Shqipërisë. T’i themi ndal kësaj masakre ekonomike dhe humane ndaj shqiptarëve”, citohet ndër të tjera nga fjala e Kryemadhit. Madje, nuk mbetet këtu, por duke harruar (mesaduket qëllimisht) shprehjen ‘Rama ik’, për t`i hapur rrugë dialogut, si e vetmja mundësi që opozita të shpëtojë veten nga labirinti ku është futur, Kryemadhi tregon se LSI ka një plan të qartë ekonomik, sipas saj, për të shpëtuar ekonominë.

“LSI ka një program shumë të qartë për ta ndryshuar këtë realitet të zymtë. Kapja e ekonomisë në pesë duar po largon shqiptarët nga shtëpitë dhe vendi i tyre. Jemi në këtë betejë, jo për poste e karrike, por për ta bërë Shqipërinë shtëpinë e çdo shqiptari. Qëndrimet e LSI larg populizmit e fjalëve boshe, përgjegjësi para shqiptarëve për çdo gërmë të angazhimeve tona. Me Edi Ramen dhe këtë qeveri jo vetëm të korruptuar por edhe thellësisht të paaftë, nuk mund të integrohemi në BE”, shprehet Kryemadhi para beratasve, bashkinë e të cilëve e drejtoi këto katër vjet.

Sulmohet makina e Lubonjës, Meta dhe opozita: Sulm politik. Ja e vërteta

Presidenti Meta dhe më pas kryedemokrati Basha e kryetarja e LSI, Monika Kryemadhi kanë dënuar ashpër sulmet që janë bërë ndaj makinës së analistit Fatos Lubonja. Në deklaratat e tyre hidhen akuzat se sulmi ka ndodhur për shkak se Lubonja njihet si një zë kritik i qeverisë. Një burim për realstory.al konfirmoi se makina në fakt është e vëllai të Fatos Lubonjës.

Në statusin e tij Meta ka akuzuar “çunat problematik”, ato që kanë goditur me gur makinën e Lubonjës. “Thonë që sot çunat problematikë kanë dalë nga fugoni për të “përshëndetur” makinën e një analisti kritik ndaj Bablokut. Qoftë fake news për të diel, për të mirën e Kryeproblematikut!”.

Në të njëjtën linjë ka reaguar edhe Lulzim Basha, i cili tha se kjo është një dhunë psikologjike dhe gjuhë e urrejtjes së Ramës kundër zërave kritik ndaj tij. “Dënoj me ashpërsi dhunën e drejtuar kundër intelektualit publik Fatos Lubonja. Kjo dhunë fizike vjen në klimën e dhunës psikologjike, gjuhës së urrejtjes dhe sulmeve të Edi Ramës kundër zërave kritikë dhe medias jashtë kontrollit të tij.”

Kryetarja e LSI, Monika Kryemadhi gjithashtu e ka lidhur rastin e dhunimit të makinës me gjuhën e urrejtjes së Rilindjes. “Dënoj me forcë aktin, i cili është rrjedhojë e gjuhës së urrejtjes dhe sjelljes arrogante të kreut të Rilindjes. Kjo dhunë e ushtruar sot është modeli, që Edi Rama frymëzon çdo ditë me sulmet e tij prej një rrugaçi dhe banditi politik ndaj kritikëve të qeverisë së tepsisë dhe skandaleve.”

Në fakt vetë e vërteta është se ngjarja nuk ka lidhje me sulme politike. Policia e Tiranës e komisariatit numër 2 ka deklaruar se personi që ka sulmuar makinën, shtetasi Arben Haçkaj, është arrestuar dhe është lënë më pas i lirë pasi rezulton një person me probleme mendore. Ndërsa realstory.al konfirmoi se makina është e vëllai të Fatos Lubonjës.