“Na ka bo gjysëm robi”, Rama takon banorët e prekur nga tërmeti në Lezhë

Paraditen e të hënës, Kryeministri Edi Rama i shoqëruar nga Ministri i Brendshëm Sandër Lleshaj, ishte në Lezhë. Ai pa nga afër gjendjen e krijuar pas tërmetit si dhe bisedoi me banorët, banesat e të cilëve kanë pësuar dëme. Një ndër personat që Kryeministri takoi, ishte një zonjë, nëna e 12 fëmijëve.

Ajo tregoi se në momentin që ra tërmeti ishte vetëm me vjehrrën dhe dy fëmijët në banesë, ndërsa u shpreh se apartamenti ishte plasaritur. Pasi e dëgjoi, kreu i Qeverisë i kërkoi nënës së 12 fëmijëve të largohej nga banesa dhe të qëndronte në hotel deri në përfundimin e vlerësimit të dëmeve dhe gjendjes së banesave.

“Nuk bëhen pallatet menjëherë. Po bëjmë ditë natë isnpektimin. Nuk i ka as Franca mijëra inspektorë. Ça ka ik ka ik. Të lutem me durim. Të tjerët i kanë çu robt e shpisë me kolona varrimi. Mos e harro këtë. A i ke pa uraganet në Amerikë. Ne po bëjmë maksimumin. Dua të jesh mirë. Mu shfryj, por qetësohu dhe duro”, iu drejtua kryeministri banorëve.

Ndërkohë banorja rrëfeu se tërmeti e ka tronditur shumë. “Kam ra prej tërmetit nga shkallët. Zoti më ka sjell këtu. Jam nënë me 12 fëmijë. Jetoj në Adriatik. Kam ngel me plakë 92 vjeçe. Jam pensioniste, dhe jetoj me 2 femijë të vegjël. Jam nënë heroinë, te unë të vinte. Pse nuk vini në Adriatik. Na ka bo gjysëm robi”, tha banorja.

Më herët Kryeminsitri takoi disa gra të zonës së Thumanës, të akomoduara në Shëngjin, që tashmë janë duke marrë asistencë psikologjike për të kaluar traumat e tërmetit. Kreu i Qeverisë i pyeti ato për shërbimin që u ofrohej, ndërsa ka shkëmbyer dhe batuta. “Unë me gratë nuk lodhem kurrë, burrat me shkatërrojnë”, tha Rama me humor.

Vëllai plaçkiste gjermanët, polici nga Laç i shiste në Shqipëri

Dy vëllezër kishin ngritur një rrjet të vjedhjes së objekteve me vlerë dhe më pas shitjes në treg nga Gjermania drejt Shqipërisë. Njëri nga vëllezërit emigrant vidhte sende me vlerë të konsiderueshme si orë, bizhuteri, pajisje kuzhine, pajisje elektronike në Gjermani dhe më pas ia niste vëllait të tij që ishte polic në Laç për t’i shitur. Ky bashkëpunim u zbulua pas goditjes së bandës së hajdutëve në Gjermani, mes të cilëve ishte edhe vëllai i policit. Pas informacioneve të marra nga policia e Hamburgut, SHÇBA ka bërë menjëherë ndalimin e policit nga Laçi, i cili pasi i përdorte vetë mjetet e vjedhura, i shiste ato në treg.

Pas arrestimit punonjësi i policisë ka pranuar sendet e vjedhura nga i vëllai në Gjermani se i përdorte dhe më pasi i shiste ato. Gjatë kontrollit të banesës u gjetën shumë nga sendet e vjedhura si orë, bizhuteri, pajisje të ndryshëm dhe një armë gjahu pa leje. Të gjitha sendet dyshohet se janë vjedhur në shtetin gjerman.

Polici shqiptar përfundoi në pranga dhe do përballet me veprën penale “Pastrimi i produkteve të veprës penale ose veprimtarisë kriminale” dhe “Mbajtja pa leje e armëve të gjuetisë”, ndërsa i vëllai do vuaj dënimin e tij për vjedhje në Gjermani, ku dhe u arrestua.

Laç, treni përplas motorin

Drejtuesi i një motori mbeti i plagosur, pasi u përplas nga treni i linjës Vorë-Shkodër. Ngjarja e rëndë ka ndodhur në qytetin e Laçit, ku drejtuesi nuk mori parasysh trarët e ulur për të mos kaluar mbi shinat e trenit. Neglizhenca dhe mosrespektimi i rregullave të qarkullimit rrugor ka bërë që motori të merret para nga treni sapo ka tentuar të kalojë shinat.

Nga përplasja mbeti i plagosur drejtuesi i motorit, i cili është dërguar menjëherë në spitalin e Laçit ku po merr edhe ndihmën e parë mjekësore.

Aksident tragjik në Laç, vdes 44-vjeçarja

Një aksident i rëndë ka ndodhur rreth orës 18:40 në aksin e vjetër rrugor Milot-Laç. Mësohet se një mjet, i drejtuar nga një 23-vjeçar me inicialet A.G., banues në qytetin e Laçit, ka përplasur për vdekje një shtetase me inicialet Z.D., 44 vjeçe banuese gjithashtu në Laç.

Nga informacioni paraprak që ka dhënë policia e Kurbinit, mësohet se aksidenti ka ndodhur në vendin e quajtur ‘ish-Uzina e Superfosfatit’.

Sapo janë njoftuar, uniformat Blu kanë shkuar në vendin e ngjarjes dhe kanë nisur hetimet për të bërë zbardhjen e shkaqeve të aksidentit.

Ende nuk dihet nëse drejtuesi i mjetit është arrestuar apo është në kërkim. Mësohet se 44-vjeçarja e aksidentuar, ka ndërruar jetë në vend, pa pasur mundësi të transportohet në spital.

Plagosën kushëririn e Vis Martinit në Laç, zbardhen detajet

Policia e shtetit ka zbardhur detaje të reja në lidhje me plagosjen me armë zjarri të kushëririt të Ervis Martinit, në qytetin e Laçit. Dy autorët të identifikuara si G.R, 21 vjeç dhe A. M., 25 vjeç, janë shpallur në kërkim. Ngjarja ka nisur disa javë pas një konflikti për motive të dobëta mes këtyre 2 personave dhe të plagosurit, që përshkallëzoi deri në përdorimin e armëve dhe plagosjen e 19-vjeçarit.

Aktualisht policia është në kërkim të autorit të 21-vjeçarit si autor i plagosjes së Edon Martini,19 vjeç, dhe bashkëpunëtorit të tij 25-vjeçar, i cili akuzohet për armëmbajtje dhe moskallëzim krimi. Autorët dyshohet se pas ngjarjes dogjën makinën në Borizanë të Krujës për të humbur gjurmët.

Ngjarja ka ndodhur paditen e të shtunës, ku 19-vjeçari u gjet i plagosur nga kalimtarët në anë të rrugës në lagjen nr. 1 të qytetit të Laçit dhe është transportuar për mjekim të specializuar në spitalin e Traumës në Tiranë. 19-vjeçari ka disa plagë në trup dhe gjendja e tij paraqitet e rëndë.

Edon Martini është kushëriri i parë (djali i xhaxhait) të Ervis Martinit, i cili ishte protagonist i një përplasje me armë disa muaj më parë në zonën e ish-bllokut në tetor të vitit të kaluar, ku mbeti një i vdekur. Martini mbeti i plagosur nga ngjarja, ndërsa pas 7 muajsh në burg u lirua në maj të këtij viti kundrejt garancisë pasurore në vlerën e 5 milionë lekësh të rinj.

PLAGOSET ME ARMË NË LAÇ KUSHËRIRI I VIS MARTINIT, GJENDET I GJAKOSUR NË RRUGË

Tronditet Laçi, një i ri qëllohet për vdekje për një vend parkimi

Një ngjarje e rëndë ka tronditur Laçin në orët e vona të mbrëmjes të së mërkurës, teksa një i ri ka mbetur i vrarë me armë zjarri. Sipas njoftimit të Policisë, mësohet se i riu me inicialet V.Sh. 24 vjeç, mësohet se është qëlluar me armë zjarri automatike në afërsi të stadiumit të Kurbinit. 24-vjeçari ka pasur një konflikt të çastit me disa të rinj të tjerë për një vend parkimi.

Autorët e vrasjes kanë kërkuar që viktima tu lironte një vend parkimi, por 24-vjeçari me orgjinë nga Mirdita, ka bërë rezistencë. Një prej personave ka nxjerr një armë automatike dhe ka qëlluar në drejtim të viktimës duke i marrë jetën. Autorët janë larguar nga vendi i ngjarjes, ndërsa policia ka nisur hetimet për kapjen e tyre.

Në ndihmë të Policisë Vendore, për të bërë të mundur zbardhjen sa më shpejt të ngjarjes, janë nisur një grup specialistësh nga Drejtoria për Hetimin e Krimeve të Rënda në Departamentin e Policisë Kriminale. Shërbimet e Policisë të D.V.P. Lezhë, të Komisariatit të Policisë Kurbin dhe FNSh, po krehin zonën si dhe janë ngritur pika kontrolli për kapjen e autorit/eve.

Kushërinjtë në Laç u vranë për një foto në Facebook

Mund të duket e çuditshme por kjo ndodh në Shqipëri: dy kushërinjtë në Laç u vranë për një foto në Facebook.

Kështu kanë dëshmuar autorët e vrasjes në polici.

Vëllezërit Markel dhe Manuel Bushi, si dhe një person tjetër janë penduar që situata agravoi deri në vrasjen e dy kushërinjve Jushi.

Nga hetimet rezulton se sherri ka ndodhur në ambientet e një lokali në qendër të qytetit verior dhe pasi kanë dalë nga lokali sherri ka vijuar dhe ka çuar deri në përdorimin e armëve.

Ata ishin të njohur me njëri tjetrin dhe sherri ka filluar pas një fotoje në mediat sociale.

Mësohet se autorët e arrestuar për krimin kanë thënë para policisë: “Nuk deshëm t’i vrisnim kushërinjtë Jushi. Gjithçka ndodhi në gjaknxehtësi e sipër!”

Vrasja e 2-fishtë në Laç, dorëzohet edhe autori i tretë

Edhe autori i tretë i krimit të dyfishtë në qytetin e Laçit është vetëdorëzuar në polici. Autori i tretë i dyshuar është Manuel Bushi, 23 vjeç, banues në Laç. Më herët janë dorëzuar edhe dy autorët e tjerë Markel Bushi, 25 vjeç dhe Vincent Bushi, 28 vjeç.

3 autorët akuzohen për vrasjen e dy kushërinjve Mikel Jushi, 35 vjeç dhe Jani Jushi, 30 vjeç, në qytetin e Laçit.

Sipas policisë ngjarja ndodhi për motive banale në lokal, ku pas një konflikti fizik çoi në përdorimin e armëve. Dy kushërinjtë morën disa plagë në trup, por nuk arritën t’i mbijetonin duke humbur jetën në një spital privat në Tiranë.

Vetëdorëzimi i autorëve ndodhi pas negociatave të policisë me familjarët e tyre.

Vrasja e kushërinjve në Laç, dorëzohen vetë në polici autorët e krimit

Janë dorëzuar në polici dy nga autorët e dyshuar për vrasjen e dy kushërinjve Mikel dhe Jani Jushi në Laç.

Policia bën të ditur se dorëzimi i tyre erdhi si rezultat i negociatave të policisë me familjarët e tyre. Ngjarja ndodhi vetëm pak ditë më parë në qytetin e Laçit. Të rinjtë u qëlluan me armë pas një sherri banal në një lokal.

Njoftimi i policisë:

Në vijim të veprimeve për zbardhjen e ngjarjes së ndodhur në lagjen nr. 1 Laç, Kurbin, ku pas një konflikti për motive të dobëta u plagosën me armë zjarri dy shtetas të cilët më pas gjetën vdekjen në një nga spitalet private në Tiranë ju informojmë se:

Si rezultat i punës hetimore të kryer nga grupi i posaçëm hetimor nën drejtimin e Prokurorisë së Rrethit Gjyqësor Kurbin u bë e mundur identifikimi dhe shpallja në kërkim e autorëve të dyshuar të kësaj ngjarje.

Policia në vijim dhe pa ndërprerë ushtroi kontrolle të shumta dhe përdori metodat speciale të hetimit për të bërë të mundur kapjen e autorëve.

Njëkohësisht Grupi i posaçëm hetimor negocioi me familjarët e autorëve të dyshuar që ata të dorëzoheshin organeve të drejtësisë.

Dy nga autorët e dyshuar, shtetasit M. B., 25 vjeç dhe V. B., 28 vjeç, të dy lindur e banues në Kurbin, pas negociatave me familjarët, janë vetë dorëzuar në Polici.

Grupi i posaçëm hetimor nën drejtimin e Prokurorisë po vijon punën për dokumentin e plotë të kësaj ngjarje.

Materialet iu referuan Prokurorisë pranë Gjykatës së Shkallës së Pare Kurbin, për veprime te mëtejshme hetimore, për veprat penale “Vrasja në rrethana të tjera të cilësuara, në bashkëpunim” dhe “Mbajtja pa leje e armëve dhe municioneve luftarake”, parashikuar nga nenet 79/dh, 25 dhe 278/1 të Kodit Penal.

Pse u vranë kushërinjtë në Laç? Ja çfarë thotë policia

Policia e Lezhës ka zbardhur ngjarjen e mbrëmshme në Laç ku mbetën të vrarë dy kushërinjtë Mikel Jushi, 35 vjeç, dhe Jani Jushi, 30 vjeç.

Policia bën të ditur se motivi i vrasjes ka ndodhur pas një konflikti të çastit mes 5 personave të cilët kanë qenë duke biseduar në lokal. Për zbardhjen e rrethanave të krimit, policia shoqëroi 23 persona në cilësinë e dëshmitarit.

“Në lidhje me ngjarjen e ndodhur mbrëmjen e djeshme në lagjen nr. 1 Laç, Kurbin, ku pas një konflikti për motive të dobëta u plagosën me armë zjarri dy shtetas të cilët më pas gjetën vdekjen në një nga spitalet private në Tiranë, Policia ngriti një grup të posaçëm hetimor nën drejtimin e Prokurorisë së Rrethit Gjyqësor Kurbin për zbardhjen e kësaj ngjarjeje.

Menjëherë sa është marrë njoftimi, në vendngjarje kanë shkuar shërbimet e Policisë së Kurbinit si dhe grupi hetimor. Në vijim janë ngritur pika kontrolli në të gjitha rrugët që lidhen me qytetin e Laçit si dhe disa pika kontrolli në akset kryesore rrugore, Milot -Lezhë, Milot -Kurbin -Tiranë.

Me mbështetjen e FNSH, janë kryer një sërë kontrollesh në banesa e vende të dyshimta ku mund të ishin fshehur autorët, si dhe janë shoqëruar në Komisariatin e Policisë, 23 persona të cilët u pyetën në lidhje me ngjarjen.

Nga tërësia e veprimeve hetimore të kryera nga grupi i posaçëm hetimor, rezultoi se ngjarja ka ndodhur për motive të dobëta, pas një konflikti të çastit, dhe se autorët e dyshuar të vrasjes janë shtetasit: M. B., 25 vjeç, M. B., 23 vjeç dhe V. B., 28 vjeç, të tre lindur e banues në Kurbin.

Policia e Kurbinit vijon kontrollet intensive për gjetjen dhe kapjen e autorëve të dyshuar. Materialet iu referuan Prokurorisë Kurbin, për veprime te mëtejshme hetimore, për veprat penale “Vrasja në rrethana të tjera të cilësuara, në bashkëpunim” dhe “Mbajtja pa leje e armëve dhe municioneve luftarake”, thuhet në njoftimin zyrtar.