E kishte trajner te Lacio, Cana ka vetëm një merak për Edi Rejën!

Lorik Cana është ndoshta një nga shqiptarët që e njeh më mirë se kushdo trajnerin e ri të Kombëtares, Edy Reja. Ky i fundit, gjatë kohës që ishte trajner i Lacios në sezonin 2011-2012, e ka pasur Canën lojtar në ekip, duke e stërvitur çdo ditë. Kështu ish-kapiteni i kombëtares shqiptare ka një raport tjetër me 73-vjeçarin italian.

Lorik Cana, i ftuar si specialist futbolli në “Tring Sport”, ka analizuar ndër të tjera dhe ardhjen e Edi Rejës si trajner i Kombëtares. Ai është shprehur se Reja është një trajner me eksperiencë shumë të madhe, mirëpo i vetmi ‘shqetësim’ për Lorik Canën, është fakti që 73-vjeçari ka drejtuar shumë pak klube jashtë Italisë.

“Edoardo Reja është një trajner me eksperiencë shumë të madhe. Me shumë mundësi, një nga trajnerët, që besoj se ka moshën më të madhe jo vetëm në Itali, por në mbarë futbollin.

Ne kemi pasur edhe Bariç, por ky vjen me moshë më të madhe. Unë e kam pasur Reja-n trajner te Lacio, në sezonin 2011-2012 dhe në vitin 2014. E njoh mirë. Kur një trajner ka moshë 73-vjeçare dhe shumë përvojë, qëllimi është i qartë me të: të stabilizohet ekipi dhe të merret më e mira deri në nëntor, së paku.

Mirëpo, kjo pjesa që nuk ka absolutisht asnjë lloj përvoje, përveç kampionatit italian, ngre pak pikëpyetje. Reja është një person që e njeh mirë futbollin dhe shpresojmë që të arrijë të marrë më të mirën nga ky ekip”.

“Ai hipnotizoi De Paul”, mediat italiane vlerësojnë Thomas Strakoshën!

“Ai hipontizoi De Paul duke i pritur penalltinë”, apo “Strakosha blindon fitoren e Lacios”, janë disa nga titujt vlerësues të mediave Italiane për Thomas Strakoshën pas ndeshjes me Udinesen. Kjo e fundit u mund nga Lacio në takimin e prapambetur të Serisë A, që u luajt dje në Romë.

Portieri i Kombëtares shqiptare, Thomas Strakosha ishte deçiziv në fitoren me mjaftë vlerë për skuadrën e tij. Gardiani i portës së “Biancoceleste” priti një penallti të gjuajtur nga lojtari i Udineses, De Paul, duke i mohuar golin e ngushtimit të diferencës së rezultatit, që në atë moment ishte 2-0 për ekipin e Inzagit.

Për penalltinë e pritur dhe shumë gjuajtje të tjera gjatë ndeshjes, Thomas Strakosha është vlerësuar nga mediat italiane me notë të lartë. 7-të është nota e dhënë nga mediat në sinkron, të cilat evidentojnë vlerat e portierit shqiptar në takimin e djeshëm

“Strakosha meriton notën 7-të. Hipnotizoi De Paul dhe pritja vlen sa për një gol në një moment shumë delikat të lojës, ai mban Lazion në 2-0. Për pjesën tjetër bën administrim të zakonshëm të lojës”, shkruan ndër të tjera në vlerësimin që i bën “Calciomercato” futbollistit kuqezi.

Strakosha pret penallti, Lacio afrohet me Championsin (video)

Lazio ka fituar ndeshjen e prapambetur ndaj Udineses, të cilën e ka fituar me rezultatin 2-0. Skuadra e Inzaghit ka fituar një përballje të rëndësishme, që e afron tre pikë larg Milanit në renditjen e Serisë A.

Skuadra e Lazios tashmë është në vendin e shtatë të renditjes, ndërsa Milani në vendin e katërt, që sezonin e ardhshëm të promovon në Champions League.

Caicedo ishte ai që zhbllokoi rezultatin për vendasit në minutën e 21’ të takimit përpara se autogoli i Sandro të dyfishonte rezultatin.

Pas pushimit, miqtë mund të kishin ngushtuar diferencën me De Paul nga pika e bardhë e penalltisë, por Thoma Strakosha e ka pritur duke ruajtur rrjetën e paprekur.

Në minutat e mbetura kryeqytetasit ruajtën pa shumë probleme avantazhin duke marrë tre pikë tepër të rëndësishme.

“Strakosha ka personalitet për të luajtur në Londër”

Ish-shoku i skuadrës thotë fjalë të mëdha për portierin shqiptar

Loja është hapur, merkato ende jo, Hugo Lloris po shkon drejt pensionit, Tottenham kërkon të jetë fitues i Premier League vitet e ardhshme. Në fakt duket se të gjitha këto shkojnë në kahe të kundërta me njëra-tjetrën, por diçka pritet të ketë një pikëtakim të përbashkët.

Bëhet fjalë për të ardhmen e Thomas Strakoshës, i cili çdo ditë e më shumë po kthehet në vëmendjen e Spurs, të cilët kërkojnë një pasardhës të denj për Hugo Lloris. Një ditë më parë, “Soccer Souls”, e sponsorizonte transferimin e portierit të kombëtares shqiptare drej veriut të Londrës, ndërsa sot është dikush tjetër që i bënë reklamë këtij transferimi të mundshëm.

Felipe Anderson, sulmues anësor që aktualisht luan për West Ham United në Angli, ka qenë ish-shok skuadre me Thomas Strakoshën te Lazio një sezon më parë. Ylli i West Ham ka folur për median “Soccer AM”, duke komentuar lajmet e merkatos rreth transferimit të ish-shokut të tij të skuadrës te Tottenham.

“Para së gjithash, ai është i ri, po rritet dhe përmirësohet shumë dhe mendoj se do të shkojë shumë larg në karrierën e tij. Unë mendoj se, Strakosha, do të arrijë majat, sepse veç cilësive të tij, që punon për t`i përmirësuar çdo ditë, ai ka një përgjegjësi të madhe për të luajtur në një skuadër dhe qytet të tillë të vështirë. Ai ka personalitet të madh dhe gjithashtu luan mirë me këmbët e tij. Më pëlqen ky lloj portieri”, ka thënë Anderson për Strakoshën.

Felipe Anderson e njeh mirë Thomas Strakoshën, pasi e ka pasur shokë skuadre te Lazio. 25-vjeçari u largua verën e vitit të kaluar nga kryeqyteti italian drejt Premier Ligës, duke u bashkuar me West Ham United, ekip me të cilin ka bërë sezon të mirë deri më tani.

Strakosha ka në dorë Champions-in e Lazios!

Lazio udhëton sot drejt Milanos, aty ku nesër do të përballet me Milanin në ndeshjen e radhës të Serisë A. “La Gazzetta Dello Sport”, më shumë se sa ndeshjes që është e rëndësishme për të dyja ekipet, Milan dhe Lazio, i ka kushtuar vëmendje të veçantë portierit shqiptar, Thomas Strakosha. Ky i fundit kthehet përsëri në stadiumin dhe qytetin ku nisi debutimin në Serinë A në 20 shtatorin e vitit 2016.

Në atë ndeshje portieri i parë, Marchetti mungon, ndërsa Inzagi vendos t`i besojë një vend titullari Thomas Strakoshës, duke anashkaluar portierin e dytë Vargic. Një besim i tepruar i Inzagit, por që do të shpërblehej në vijim.

Ndonëse atë takim, Lazio e humbi me rezultatin 2-0 për Milanin, Thomas Strakosha nuk u vu në bankën e të akuzuarve. Që prej asaj dite filloi rritja, duke e bërë atë numrin një të Lazios. Ai nuk ka humbur asnjë minutë në ndeshjet e kampionatit të këtij sezoni, duke u bërë një element kryesor i ekipit të Inzaghit.

Humbja ndaj Spal dhe barazimi ndaj Sassuolos, kanë ngadalësuar ritmin e Lazios për të arritur zonën e Europës, duke lënë në hije performancën e ekipit, përfshirë dhe portierin. Megjithatë, në ndeshjen e dy javëve më parë kundër Interit në “San Siro”, Strakosha ishte ndër lojtarët kryesor në një sukses shumë të rëndësishëm jo vetëm për renditjen.

Strakosha ka bërë mirë në disa ndeshje në këtë stadium, përfshi këtu dhe në kualifikimin e Lazios në gjysmëfinalen e Kupës së Italisë kundër Interit, ku tashmë do të përballet me Milanin më 24 prill, po në “San Siro”.

Dita e nesërme do të synojë t`i japë vazhdimësi Strakoshës me ndeshjet pozitive të lidhura me stadiumin ku ka bërë debutimin e tij në Serinë A. Perspektiva për të arritur Ligën e Kampionëve duke mundur Milanin, është në duart e tij. Në “San Siro”, strakosha bëhet një siguri shtesë, Inzaghi tani kërkon një konfirmim të ri.

Dëmtohet në stërvitje, Berisha rrezikon sezonin!

Lazio është duke vijuar luftën për të arritur një vend në kupat e europës. Ndryshe nga sezoni i kaluar, kur “Biancocelesti”, ishte në pozita të sigurta për të luajtur në një nga dy kompeticionet evropiane të UEFA-s, këtë sezon gjërat janë pak më të komplikuara.

Telashet shtohen për Inzaghin, pasi trajneri i Lazios nuk ka dispozicion një nga lojtarët e rëndësishëm të ekipit si Jordan Lukaku, i cili është operuar në gju dhe ka mbyllur sezonin.

Mirëpo, ky nuk do të jetë lojtari i vetëm që do të mungojë për Lazion deri në fund të kampionatit. Edhe mesfushori shqiptar, Valon Berisha, është në pritje të kryerjes së një operacioni në gju, çka do të thotë se rrezikon të mbyll para kohe sezonin me Lazion.

“Corriere dello Sport”, raporton se mesfushori kosovar, që erdhi në verë nga Salzburg, mund të operohet në gju, duke përfunduar sezonin e tij të parë te Lazio disa javë para përfundimit të kampionatit.

Futbollisti është dëmtuar pas ndeshjes me Spal, në stërvitje. Valon Berisha ka kryer një kontroll në gju në Barcelonë, por ende nuk është vendosur nëse do të kryhet operacioni. Nëse kjo ndodh, atëherë futbollisti do të kthehet në fushë vetëm në fillim të sezonit të ardhshëm për Lazion.

Berisha nuk ka shkëlqyer këtë sezon me skuadrën nga kryeqyteti italian. Ai ka luajtur 14 ndeshje, një numër i kushtëzuar për shkak të disa problemeve fizike që futbollisti pati në vjeshtë.

Shpërthen Igli Tare: Vdekje e paralajmëruar, nuk bëj rolin e viktimës!

Lazio u mund ditën e djeshme në fushën e Milan, pas një penalltie të ekzekutuar saktë nga Kessie. Mirëpo ekipi kryeqytetas nuk është pajtuar me vendimin e arbitrit Rocchi për dhënien e penalltisë. Drejtori Sportiv, Igli Tare, ka folur për mikrofonët e DAZN pas ndeshjes, duke shprehur indinjatën për atë që ndodhi në fushën e lojës.

“Ka qenë historia e një vdekjeje të paralajmëruar. Ka ndodhur ajo që kishim frikë para ndeshjes. Na vjen keq që do të kthehemi në shtëpi pa pikë pasi kemi bërë një ndeshje të madhe. Meritonim që ndeshja të vendosej nga fusha dhe jo nga episodet dhe arbitrat”, ka thënë Tare.

“Penalltia ndaj Milinkovic-Savic? Flas vetëm për shpejtësinë me të cilën Rocchi ka dhënë penalltinë e parë për Milan-in. Dukej nga njëmijë metra se nuk kishte asgjë. Në rastin e penalltisë së dytë, Musacchio bie në tokë sikur ta kishin qëlluar dhe më pas na mungon penalltia për faullin ndaj Milinkovic-Savic”.

“Ata që kanë luajtur futboll e dinë se të paktën një dyshim për ta rishikuar aksionin, arbitri duhet ta ketë. Nuk më pëlqen të bëj rolin e viktimës, por gjëra të tilla nuk i meritojmë. Do të kërkojmë revanshin në gjysmëfinalen e Kupës së Italisë”.

Më i miri në fushë për Lazio-n, mediat vlerësojnë Strakoshën

Lazio u mund mbrëmjen e djeshme nga Milani në takimin e radhës të Serisë A, që në fakt vlente një vend në Champions League sezonin e ardhshëm. Megjithatë, gara ende nuk ka përfunduar dhe do të jetë e hapur deri në fund, për më tepër që Lazio ka një portier si Thomas Strakosha, i cili krijon gjithë garancinë e nevojshme se “Biancocelestet” do të luftojnë deri në javën e fundit për një vend mes katër më të mirëve.

Mbrëmjen e djeshme, pavarësisht humbjes me një penallti të kontestuar jo pak nga Lazio, skuadra e Inzaghit bëri një ndeshje të mirë, teksa portieri shqiptar, Thomas Strakosha, tregoi klasin e tij në shumë pritje.

Në fund të takimit ai fluturoi duke pritur ndalur një gol të sigurtë për Milanin, që mund ta çonte takimin në 2-0. Për këtë dhe shumë pritje të tjera, rrjeti i “Eurosport”, e ka vlerësuar portierin shqiptar me notën 6.5, nga më të lartat për lojtarët e Lazios.

“Në gjysmën e parë ai i thotë “jo” Çalhanoglusë, në gjysmën e dytë ndal Piatekun dhe Suson. Nëse Lazio mund të shpresojë deri në fund, kjo është falë tij”, shkruan “Eurosport”. Në të njëjtën linjë vlerësimi qëndrojnë dhe media të tjera në itali për portierin shqiptar.