Lleshaj bën gati njësinë kundër “të fortëve”: Askush s’do shpëtojë

Njësia Speciale e policisë kundër “të fortëve” do të zbresë së shpejti në terren për të kapur të gjithë personat që i janë shmangur drejtësisë.

Ministri i Punëve të Brendshme, Sandër Lleshaj ndoqi nga afër një seancë stërvitje të efektivëve të kësaj njësie dhe deklaroi se tashmë askush nuk do mund t’i shmanget përballjes me drejtësinë.

Njësia Speciale kundër ‘të fortëve’ është një njësi e re elitë e Policisë së Shtetit, e cila po përmbush fazën stërvitore intensive, përpara daljes në terren.

“Është shumë e rëndësishme që të përcjellim mesazhin që drejtësia mund të vonojë, por kurrë nuk mund të harrojë dhe ju jeni dëshmia dhe prova e kapaciteti, që ne u japim qytetarëve garancinë që drejtësia nuk do të harrojë askënd që i është shmangur asaj.

Njësia do të elitë, do të jetë provë e angazhimit serioz për të kërkuar dhe vendosur para drejtësisë këdo që ka llogari të hapura me të. Do të jetë edhe element i rëndësishëm bashkëpunimi me ndërkombëtarët, pasi do të jetë pjesë e rrjetit europian që i janë shmangur drejtësisë dhe përgjegjësia juaj del përtej kufijve të Shqipërisë, pasi ju do të jeni të angazhuar për të kërkuar jo vetëm persona që i janë shmangur drejtësisë në Shqipëri, por edhe në vendet e tjera, ashtu si njësitë në vendet e tjera”, deklaroi Lleshaj.

Duket se qeveria i ka marrë të gjitha masat që të bëjë gati njësinë e re policore, në të njejtën kohë kur pritet të ngrihen dhe të jenë funksionale organet e reja të drejtësisë, si SPAK dhe BKH për t’i dhënë goditjen e duhur krimit dhe korrupsionit.

#NjSK🦅 Njësia Speciale e Kërkimit të personave që i janë shmangur drejtësisë (ndryshe njësia speciale kundër “të Fortëve”), është një njësi e re elitë e Policisë së Shtetit, e cila po përmbush fazën stërvitore intensive, përpara daljes në terren👍#PoliciaqëDuam👮🏻‍♂🇦🇱👮‍♀#ShqipëriaqëDuam☀🇦🇱
Gepostet von Edi Rama am Mittwoch, 11. September 2019

Blindimi i kufirit nga FRONTEX, Lleshaj: Shqipëria po përfiton shumë

Shqipëria është vendi i parë në rajon, me të cilin FRONTEX ka nënshkruar marrëveshje bashkëpunimi dhe operon jashtë BE-së, në menaxhimin e integruar të kufijve. Ky bashkëpunim është vlerësuar nga ministri i Brendshëm Sandër Lleshaj, i cili theksoi se pala shqiptare po përfiton shumë nga FRONTEX, jo vetëm në menaxhimin flukseve migratore e luftën kundër trafiqeve, por edhe në përcjelljen e përvojës personale të kësaj force.

“Me kënaqësi të veçantë vizitova sot Pikën Kufitare të Kapshticës, ku së bashku me oficerët dhe punonjësit e tjerë të Policisë Shqiptare kryejnë shërbim edhe oficerë policie të FRONTEX nga shumë vende europiane. Bisedova me ta dhe kontaktova me kënaqësi se niveli i bashkëpunimit është shumë i lartë, efektiviteti i punës së tyre është i lavdërueshëm. Prej këtij bashkëpunimi Shqipëria po përfiton shumë. Po përfiton në radhë të parë eksperiencë të jashtëzakonshme nga përvoja e Policive të ndryshme europiane, të cilat janë aktive në këtë operacion, por po ashtu Shqipëria po përfiton mbështetje të madhe në menaxhimin e kufijve të saj. Ky operacion, i pari që FRONTEX zhvillon në një vend jashtë BE-së, është një shans i mirë për të treguar nivelin e përgatitjes së Policisë shqiptare, pjekurinë e saj për të bashkëpunuar në nivel europian. Kjo e gjitha është në funksion të përpjekjeve të Shqipërisë për integrimin në Bashkimin Europian“, tha ministri i Brendshëm.

Pasaportat drejt skadimit, nuk lejohet të dilni jashtë shtetit

Ministri i Brendshëm Sandër Lleshaj, u ka bërë apel qytetarëve që të aplikojnë për karta të reja identiteti si dhe të rinovojnë pasaportat që i kanë drejt skadimit pasi nuk do lejohen të dalin jashtë shtetit.

Ai tha se nga muaji tetor, nëse dikujt që i skadon pasaporta në dhjetor, nuk do mund të udhëtojë pa pasur me vete një dokument që vërteton se ka aplikuar për një pasaportë të re

“Janë mbi 1 milion karta identiteti dhe pasaporta qytetarësh, të cilët mbarojnë afatin e vlefshmërisë këtë vit. Dhe është me rëndësi të madhe që qytetarët të shfrytëzojnë kohën për të aplikuar, sa nuk është vonë për të mos e lënë që në fund të vitit të mblidhen e të shtohen radhët dhe të krijojmë situata të panevojshme. Për fat të keq konstatojmë që ende flukset e aplikimit nuk janë ato që duhet, sepse ne përgjithësisht ne tentojmë t’i lëmë gjërat për në sekondën e fundit. Por gjej rastin edhe njëherë t’i ftoj të gjithë qytetarët të aplikojnë për t’u pajisur me kartën e identitetit dhe pasaportën biometrike, ende sa ka kohë, sa sportelet janë të lira për arsye se shumë shpejt ne do të ndërmarrim masa shtesë që do të thotë, ne do t’i kushtëzojmë përdorimin e dokumenteve aktualë, megjithëse janë ende në fuqi, me aplikimin.

Do të thotë që në një periudhë të caktuar, e cila do të shpallet, besoj nga muaji tetor, nëse dikush do të tentojë të udhëtojë jashtë shtetit me një pasaportë, të cilës i mbaron afati në dhjetor, nuk do të mund të udhëtojë pa pasur bashkë me pasaportën që skadon, edhe një dokument që vërteton që ai e ka bërë aplikimin për pasaportën e re. Po kështu shërbimet që lidhen me kartën e identitetit, nuk do të ofrohen nëse karta nuk shoqërohet me një dokument që provon se qytetari e ka bërë aplikimin për të renë. E gjitha kjo bëhet për t’i kujtuar qytetarët që 31 dhjetori është afati i fundit, por nuk mund të prodhohen të gjitha kartat në datën 31 dhjetor! Do të duhet që gjithë kjo kohë, përpara datës 31 dhjetor të shfrytëzohet nga çdo qytetar në mënyrë që të evitojmë radhët, stresin dhe të gjitha problemet që lidhen me këtë çështje”, është shprehur Lleshaj.

Lleshaj e Veliu mbledhin drejtorët e policisë. Rama u la porosi ndërtimet pa leje

Ministri i Brendshëm Sandër Lleshaj dhe Drejtori i Përgjithshëm i Policisë së Shtetit, Ardi Veliu kanë mbledhur në një takim në ministri të gjithë drejtuesit e policisë.

Në takim ishin të pranishëm kreu i Gardës së Republikës Gramoz Sako, zv.drejtoresha e Policisë së Shtetit Aida Hajnaj, drejtori i Akademisë së Sigurisë Bilbil Mema, kreu i policisë rrugore Mitat Tola, drejtori i policisë kriminale Tonin Vocaj, zëvendësministritat e Brendshëm dhe drejtues të lartë të policisë.

Në një prononcim për mediat vetë ministri Lleshaj tha se ishte një mbledhje pune e përditshme.

Por kujtojmë se ky takim vjen vetëm 1 javë pas takimit që zhvilloi kryeministri Rama me drejtuesit e policisë në Ministrinë e Brendshme.

Në atë takim Rama la disa porosi. Ai kërkoi zero tolerancë për ndërtimet pa leje në bregdet, si dhe mos lejimin e qarkullimit të makinave të vjedhura. Në atë takim Rama prezantoi ndryshimet në Kodin Penal të cilat parashikojnë dënime me burg për ata persona që bllokojnë rrugët në mënyrë të paligjshme dhe sulmojnë policinë. Një përgjigje direkte kjo për opozitën dhe protestat e saj të dhunshme ku shpeshherë janë sulmuar policët me molotov e shashka.

Vendi digjet, Lleshaj akoma fjalë: “Do të arrestojmë… do të shkrijmë…”

Ministri i brendshëm, Sandër Lleshaj bëri të qartë për të gjithë se do të arrestohen të gjithë ata që sulmojnë KZAZ-të dhe do të ndëshkohen sipas ligjit. Ai gjithashtu tha se do të shkrihen policitë bashkiake që kanë dalë jashtë funksionit të tyre dhe janë kthyer në një rrezik publik.

Lleshaj garantoi se policia e shtetit do të veprojë me vendosmëri dhe profesionalizëm ndaj këtyre akteve kriminale.

“Sulmet ndaj KZAZ-ve janë shfaqje brutale e dëshpërimit politik të kthyer në akte kriminale që do të ndëshkohen me gjithë forcën e ligjit. Policia e Shtetit po provokohet dhe sulmohet, do të përgjigjet me vendosmëri dhe profesionalizëm deri në fund. Punonjës bashkish, dhe punonjës të policive bashkiake po gabojnë rëndë duke u përdorur si mish për top nga kryetarët e bashkive dhe udhëheqësit e tyre dritëshkurtër në Tiranë.

I bëj thirrje të mos bëjnë krime elektorale të dënueshme nga Kodi Penal, për interesat e një grupi njerëzish në halle me drejtësinë që duan të marrin peng zgjedhjet për të bllokuar rrugën integruese. Do të shkrihen disa struktura të policive bashkiake që kanë dalë jashtë misionit të tyre dhe janë kthyer në rrezik publik. Askush nuk do të tolerohet. E gjithë kjo shfaqje nuk do të cënojë aspak rendin dhe sigurinë e qytetarëve. Policia e Shtetit është në krye të detyrës”, tha ministri Lleshaj.

Deklarata e tij vjen në një ditë kur në disa bashki të vendit që drejtohen nga PD dhe LSI, zyrtarët e tyre së bashku me militantë të opozitës kanë sulmuar KZAZ-të dhe kanë djegur materialet zgjedhore në mënyrë që të pengojnë zhvillimin e zgjedhjeve në 30 qershor. E gjithë kjo situatë është krijuar për shkak të dekretit të presidentit Meta i cili anuloi datën e zgjedhjeve, dekret që është cilësuar nul nga KQZ, por që mbështetet nga opozita.

Por, pavarësisht kësaj deklarate, deri më tani Policia e Sandër Lleshajt ka arrestuar vetëm militantë të thjeshtë të PD-së, dhe asnjë drejtues të kësaj partie, që për hir të së vërtetës janë dhe udhëheqësit e dhunimit të KZAZ-ve. Rasti është ai i ish-deputetit të PD-së, Bardh Spahia, i cili u përfshi mbrëjen e së martës në aktet e dhunimit të një KZAZ-je në Shkodër, ku ndër të tjera ju vu flaka katit të parë të një shkolle. Spahia u shpall në kërkim, sipas Policisë, por ish-deputeti demokrat deklaroi se për të nuk ka asnjë komunikim zyrtar nga organet e rendit, dhe lajmin për shpalljen në kërkim nga policia e kishte mësuar nga mediat, duke shtuar se ai nuk do të parqitej në komisariat.

Deklarata e plotë e Ministrit të Brendshëm Sandër Lleshaj:

Mirëdita,

Skenat e djeshme dhe të sotme, të sulmeve barbare mbi shkollat, ku janë vendosur Komisionet Zonale të Administrimit Zgjedhor dhe angazhimi i punonjësve të Bashkive ‘blu’, për të djegur dhe shkatërruar materialet zgjedhore, janë shfaqje domethënëse e përfshirjes së opozitës jashtë-parlamentare në një spirale të rrezikshme jo vetëm të vetë shkatërrimit, por edhe të dëmtimit të interesit publik.

Në të njëjtën kohë, kjo është një shfaqje brutale e dëshpërimit politik të kthyer në veprimtari të paligjshme e në akte kriminale, që do të ndëshkohen me të gjithë forcën e ligjit.

Policia e Shtetit, garantja ligjore e mbarëvajtjes së procesit zgjedhor, e cila po provokohet dhe po sulmohet në mënyrë të organizuar, po përgjigjet dhe do të përgjigjet proporcionalisht dhe me vendosmëri deri në fund.

Fatkeqësisht, individë të verbuar politikisht, kryesisht punonjës bashkish, por për më keq punonjës të Policive Bashkiake, po gabojnë rëndë duke u përdorur si “mish për top” nga drejtuesit e tyre të bashkive dhe udhëheqësit dritë-shkurtër të këtyre të fundit në Tiranë.

U bëj thirrje punonjësve publikë që të mos marrin mbi vete barrët e rënda ligjore, duke kryer krime elektorale të dënueshme nga Kodi Penal, për llogari të një grushti njerëzish që për interesat e tyre dhe hallet e tyre me drejtësinë, duan të marrin peng zgjedhjet për të dëmtuar rrugën evropiane të Shqipërisë.

Qeveria do të marrë masa të menjëhershme, që në pajtim me ligjin, të shkrijë disa struktura të Policive Bashkiake që kanë dalë haptazi jashtë misionit të tyre dhe janë shndërruar faktikisht në një rrezik publik. Askush nuk do të tolerohet!

Ndoshta kjo mund të jetë pak, por dhe shumë e sigurt. Ndërkohë, u përcjell të gjithë qytetarëve shqiptarë mesazhin se e gjithë kjo shfaqje e turpshme aktesh barbare kundër zgjedhjeve, nuk do të cenojë aspak rendin dhe sigurinë e tyre.

Policia e Shtetit është në krye të detyrës dhe pavarësisht vështirësive të posaçme të kësaj situate, nuk do të çedojë asnjë milimetër nga përgjegjësia e saj për mbrojtjen dhe garantimin e ligjit.

U bëj apel po ashtu, prokurorëve dhe gjykatësve të këtyre territoreve, ku po shkelet ligji dhe po sulmohet e drejta e popullit për të zgjedhur, që të zbatojnë ligjin, vetëm ligjin dhe asgjë tjetër përveç tij!

Policia e Shtetit do të ndalojë dhe do të arrestojë në bazë të ligjit, çdo shkelës dhe do të depozitojë prova të mjaftueshme për ndëshkimin e tyre, sipas parashikimeve të Kodit Penal të Republikës së Shqipërisë.

Ky është një moment kritik në betejën e ligjit me anti-ligjin, shtetit me anti-shtetin, shoqërisë me grupet paramilitare të një politike që zhvillohet në shtratin e paligjshmërisë.

Në ketë moment, ligji, shteti, shoqëria dhe kushdo që i përfaqëson ato, si autoritet, si zyrtar apo si qytetar, duhet të jenë bashkë.

Nuk ka asnjë dyshim se një pakice njerëzish të dalë nga hullia e ligjit, nuk do të imponojnë asgjë tjetër, përveç reagimit të fortë, kompakt dhe fitues të ligjit, shtetit dhe të shoqërisë.

Kryetarë bashkish që po u përfundon mandati legjitim nuk mund të qëndrojnë me dhunë më në detyrë. Mandatet për të qeverisur bashkitë e vendit i jep vetëm populli shqiptar përmes votës së tij të lirë.

Ata që i janë shmangur gjykimit dhe vendimmarrjes së popullit për arsye që jo vetëm ata, por gjithë Shqipëria dhe bota tashmë i di, nuk mund të marrin peng asgjë. Faleminderit!

A është në rrezik Lulzim Basha? Bardhi letër me akuza Lleshajt

Sekretari i Përgjithshëm i PD-së, Gazment Bardhi i ka dërguar një letër ministrit të Brendshëm, Sandër Lleshajt përmes të cilët e pyet për një takim të zhvilluar mes tij dhe truprojes së Bashës ditën e premte në datën 14 qershor.

Në këtë takim ministri Lleshaj i ka thënë truprojes së Bashës se “bazuar në informacione të tërthorta, kreut të PD-së i kanoset rrezik për sigurinë”.

Në letrën drejtuar ministrit të brendshëm, Bardhi shkruan se si ministër i brendshëm e ka detyrim ligjor që informacionet e tërthorta mbi sigurinë e jetës së kreut të opozitës, t’i kalojë në rrugë institucionale.

Ai akuzon ministrin se përmes këtij informacioni dhënë truprojës së Bashës, nuk ka patur qëllim tjetër veçse të shantazhojë kreun e PD-së.

Bardhi i kërkon Lleshajt informacion zyrtar në lidhje me sigurinë e kreut të PD-së, ndryshe shkruan ai, informacionin e tij do ta konsiderojë shantazh të pastër politik.