“U puthën me Mogherinin”, Basha sulmon KE dhe qeverinë

Pak minuta pasi përfundoi konferenca për mediat e Kryeministrit Edi Rama, doli kreu i Partisë Demokratike. Bisedën me gazetarët Lulzim Basha e nisi fillimisht duke shprehur keqardhjen e opozitës për refuzimin e BE-së. “Nuk është ajo që kemi dëshiruar, por do të ishte gënjeshtër nëse do të thonim se nuk e prisnim. PD-ja dhe unë personalisht kemi punuar fort për të bindur miqtë tanë gjermanë të Merkel për ta transformuar ‘JO’-në e tyre. Dëshironim të kishim një rezultat ndryshe, por nuk prisnim më mirë se ajo që Bundestagu vendosi, pra një PO të prerë, arsyet janë të qarta” tha ai.

Europa, i kujt është faji?

Më tej, duke e parë si përgjegjësi të kryeministrit dështimin për negociatat, Basha tha se Rama nëse do të kishte pasur një fije patriotizmi, duhet të kishte dhënë dorëheqjen. “Rruga për hapjen e negociatave shkruhet në 9 kushtet e Bundestagut. Përsëritja e zgjedhjeve të 30 Qershorit sipas një kodi të ri. Dua të konfirmoj edhe njëherë se jemi të vendosur për të bërë gjithçka për të mos e pranuar gjendjen e sotme, tërësisht dhe kryekëput përgjegjësi e një njeriu që sot po të kishte pasur një fije patriotizmi, duhet të kishte dhënë dorëheqjen dhe asgjë më pak, por as unë dhe as ju nuk e prisnim, ndoshta ndonjë socialist idealist” tha ai.

Lulzim Basha sulmoi raportin e Komisionit Europian, që rekomandon hapjen e negociatave të Shqipërisë me BE. Sipas Lulzim Bashës, raportet e KE-së për zgjerimin janë të zbukuruara dhe nuk paraqesin realitetin. Ai tregoi, se të premten ishte kthyer nga Gjermania me informacione të freskëta, që sipas Bashës, tregonin mbosbesimin e vendeve anëtare. “Në orën 13:00 erdha nga Berlini me informacionet më të freskëta. Është e vërtetë që mbizotëron mosbesim me vendet anëtare në raport me raportet e KE për zgjerimin, konsiderohen të zbukuruara, nuk paraqesin realitetin. Këtë tha edhe Holanda kur u shpreh se në rast e Maqedonisë ishin dakord, për Shqipërinë, krimi, korrupsioni dhe ndarja e pushtetit i ndalonin për hapjen e negociatave, në raport të qartë me raportin e zbukuruar të KE-së”, u shpreh Basha.

Më tej ai shtoi se qeveria në vend të përmbushte kushtet e Bundestagut, u “puth” me Mogherinin. “Në vend që të plotësonim kushtet shtesë të Bundestagut, vazhduam të putheshim dhe përfaqafoheshim me komisonerin për zgjerimin, me Federica Mogherinin. Këta thonin “që i kemi bëra detyrat, “Plastë armiku!”, “plaçin fashistët !”. Nuk hapen negociata me propagandë. Shumë gjëra ka arritur Edi Rama me propagandë në Shqipëri për shkak të standardit tonë të ulët europian si shoqëri, por në Europë nuk shkohet me propagandë. Në Europë shkohet më të vërteta, të kontrolluara dhe aty ku ka dyshim për kontrollin e parë, kontrollohet edhe një herë tjetër. Dhe kjo ndodhi.”, tha Basha.

Por pavarësisht sulmeve ndaj BE-së dhe qeverisë, Basha nuk kërkoi zgjedhje të parakohshme. Ndonëse u shpreh se opozita është gati për t`u futur në zgjedhje në çdo moment, ai u shpreh se së pari duhet bërë reforma zgjedhore, që sipas Lulzim Bashës, është urgjencë kombëtare. “Reforma zgjedhore është urgjencë kombëtare, por jo për t’u hedhur hi syve shqiptarëve. Dua të deklaroj mbështetjen tonë të plotë për objektivat e shpallura nga Bundestagu, krijimi i Kushtetueses, SPAK-ut dhe dhënien fund të kulturës së pandëshkueshmërisë. BE ka pasur dhe do të ketë probleme, por kjo nuk lidhet me negociatat shqiptare”, u shpreh Basha.

Më tej, Basha, pavarësisht akuzave ndaj mazhorancës, u shpreh se opozita duhet të marrë përgjegjësi për të dalë nga gjendja që është vendi. Sipas tij, hapat konkret janë propozimet si në rastin e reformës zgjedhore, për organizimin e zgjedhjeve të lira. “Ne si opozitë sot kemi një mision; të dalim nga kjo gjendje duke marrë përgjegjësi. Përgjegjësi është akoma në krye të qeverisë. Ndaj detyra jonë fillon me propozimin e hapave konkretë si rasti i reformës zgjedhore, por është detyra e çdo shqiptari, të bashkohemi për të marrë në dorë fatin tonë për të vendosur standardin e zgjedhjeve të lira”, tha Basha.

Basha shtoi se rruga e opozitës janë kushtet e Gjermanisë ndaj Shqipërisë për negociatat. “Isha i qartë kur u thashë që opozita dhe Europa flasin me një gjuhë; e sotmja nuk është ajo që dëshironim, por nuk ishte e papritur, minimumi ishin kushtet e Gjermanisë. Prandaj kushtet janë rruga, plani për çdo shqiptar që duhet të thotë cfarë duhet të ndryshojmë. Reformë zgjedhore, zgjedhje të lira, zbatimi i reformës në drejtësi, para drejtësisë çdo kush që ka abuzuar. 9 kushtet e Bundestagut janë rruga e PD-së” tha Basha./Realstory.al/

Amerikanët bashkojnë Bashën me qeverinë

Mbrëmjen e të hënës Fondi Shqiptaro-Amerikan i Zhvillimit, me president Michael Granoff, festoi 10-vjetorin e themelimit. Mes të ftuarëve që mbajtën fjalë përshëndetëse në këtë ceremoni, ishte kryetari i Partisë Demokratike Lulzim Basha dhe kryebashkiaku i Tiranës Erion Veliaj. Gjatë fjalës së tij, Basha vuri theksin te kriza politike në vend, duke u shprehur se Shqipëria është në udhëkryq.

“Por sot kombi ynë ndodhet në udhëkryq. Ndërkohë që duam të afrohemi më shumë drejt miqve dhe partnerëve tanë në Bashkimin Europian dhe Shtetet e Bashkuara, ne na pret një punë kolosale, me reforma dhe ndryshime të mëdha përpara. Shqipëria është në krizë, dhe potenciali ynë i madh fatkeqësisht nuk po realizohet. Ndaj dhe koha kur jemi mbledhur për të përkujtuar 10 vjetorin e AADF është domethënëse. Në këtë udhëkryq ku ndodhemi sot, ne na duhet të zgjedhim cilën rrugë do të marrim. Do të zgjedhim rrugën e lirisë, transparencës, llogaridhënies dhe zhvillimit? Apo do vazhdojmë të ngecim në rrugën e tanishme, me marshin në indietro”, tha Basha.

Ndërkohë, ndryshe nga Basha, Erion Veliaj shprehu falënderimin për Fondin Shqiptaro-Amerikan të Zhvillimit, për mbështetjen që i jep Shqipërisë. E ngarkuara me punë e SHBA-së në Tiranë, Leyla Moses-Ones, lexoi një letër të Presidentit Donald Trump që shprehte mbështetjen për këtë fondacion.

“Kjo qasje do të ndihmojë Shqipërinë drejt integrimit në BE. Ju i dëgjuat mesazhet e mbështetjes nga tre ish-Presidentë të Amerikës. Gjithashtu Presidenti Trump ishte goxha i prekur nga zhvillimet e ADF-së dhe ka dërguar një letër që e kam nderin ta lexoj. “Ju dërgoj përgëzimet e mia ADF-së për 10-vjetorin, iu uroj për këtë etapë dhe arritje. Pas rënies së komunizmit në Europën Lindore SHBA i mbështeti njerëzit përmes bujarisë së Amerikës”.

“Fondi i sipërmarrjeve ishte fondi më i vogël në vendin më të varfër në Europë i krijuar në 2009. Fondacioni vepron si dhuratë nga populli amerikan dhe ka investuar më shumë se 55 mln dollarë për sipërmarrjen dhe arsimin profesional. E përgëzoj ADF, borxhin dhe partnerët për arritjet. Ju uroj sukses të vazhdueshëm në vitet në vijim” ishte letra e Trump që lexoi e narkuara me punë Leyla Moses-Ones.

Basha sulmon drejtësinë dhe mediat: S`ka Kod Penal, që ndalon protestën

Lulzim Basha iu bashkua protestës së banorëve të “Astirit” të dielën pasdite. Ndonëse me ndryshimet e Kodit Penal, kushdo që bllokon rrugën arrestohet, kryedemokrati dhe disa protestues sfiduan këto ndryshime, duke bllokuar për disa minuta njërin krah të Unazës së Re. Më pas, Lulzim Basha sulmoi Prokurorinë, duke u shprehur se organet e drejtësisë janë me kamikazë politikë. “Prokuroria është e kapur dhe ka kamikazë politikë në gjykata dhe në Prokurori. Prandaj Rama nuk përgjigjet para ligjit, sepse ai e ka kapur Prokurorinë. Balla është sot njeriu i cili mbështet një trafikant droge për ndërtime pa leje. Damian Gjiknuri që iu përfshi emri në afera korruptive. Saimir Tahiri që dihet botërisht ka lidhje me bandat e trafikut të drogës”, tha Basha.

Më tej, sipas Lulzim Bashës, pa shkuar Edi Rama në Burg, nuk do të ketë Shqipëri europiane. “Shqipërisë nuk do i hapen rrugët në Europë me një mashtrues dhe pa çuar para drejtësisë të gjithë ata që kanë shkelur ligjin nga i pari tek i fundit. Opozita e bashkuar sot qëndron në krah të baballarëve, për një Shqipëri europiane dhe jo Shqipëri vend kriminelësh e hajdutësh. Ne luftojmë për Kushtetutë dhe ligj. Pa u çuar para drejtësisë Ramën dhe bashkëpunëtorët e tij nuk mund të ketë Shqipëri europiane”, tha Basha.

Ndërsa, më tej kreu i PD lëshoi akuza edhe për disa media në vend, që sipas tij kanë pronar të korruptuar. “Beteja jonë është për një Shqipëri ku politikanët të dënohen si qytetarët e thjeshtë. Unë kam respekt për çdo gazetar, por ka pronarë mediash të korruptuar. E drejta e protestës është më e shenjtë se sa e drejta e Edi Ramës për të vjedhur me Karlo Bolinon. Nuk ka Kod Penal që të ndalojë protestën. Vetëm në vendet diktatoriale ndalohet protesta”, tha Basha.

Sipas kryedemokratit, ndaj banorëve të Unazës së Re po ushtrohet terror, ndërsa akuzoi qeverinë se po devijon projektin e Lanës, për ndërtimin e kullave. “Prej një viti ndaj banorëve të Unazës së Re po ushtrohet terror. Qeveria po devijon projektin e Lanës, për t’i dhënë mundësinë një trafikanti, mik të Ramës e të Ballës, që do të pastrojë paratë e krimit në kulla. Policët, të cilët janë në hallin e tyre dhe marrin paga të ulëta, por janë rreshtuar në anën e gabuar. Gjykata ka vendosur të lërë në burg sot 3 baballarë”, tha Basha.

Presioni i aleatëve, Basha: Ndryshojmë sistemin (por pa Ramën)

Kryetari i Partisë Demokratike Lulzim Basha, foli në News 24 në emisionin “Kjo Javë”, duke komentuar disa nga çështjet thelbësore të krizës politike në vend. Basha u shpreh se nuk do të bëhet marrëveshje midis opozitës dhe Kryeministrit Edi Rama.

“Nuk ka dhe nuk do të ketë më marrëveshje PS-PD. Edi Rama duhet të mbajë përgjegjësi për dështimet e njëpasnjëshme në raport me integrimin europian, për kriminalizimin e vendit, për kapjen e shtetit, për shkatërrimin e zgjedhjeve, për mbrojtjen e bashkëpunëtorëve e tij në krime të shumta korrupsioni, vjedhje dhe të procesit zgjedhor”, u shpreh Basha. Më tej, Basha u shpreh se opozita do të rifillojë protestat si mjet për t`i bër presion qeverisë pas zgjidhjes së krizës, por pas 18 tetorit.

“Këtë po ju them, që protestat janë mjet për të arritur një qëllim dhe qëllimi që ne kemi është është t’u shërbejmë njërëzve, t’u shërbejmë qytetarëve për ta nxjerrë vendin nga kriza. Nxjerrja e vendit nga kriza do të vijë përmes zgjedhjeve të parakohshme parlamentare, të mbajtura në një ditë me zgjedhjet legjitime vendore, në kushte që garantojnë lirinë e votës dhe zgjedhje të lira e të ndershme”, tha Basha.

Kryedemokrati u shpreh se PD nuk tërhiqet nga kushet për Reformën Zgjedhore, duke i kërkuar qeverisë që të zbatojë planin e opozitës jashtëparlamentare. “Ka ardhur momenti të zbatojë këtë plan për nxjerrjen e vendit nga kriza, që është në fakt edhe plani i partnerëve tanë, i Bundestagut dhe i Bashkimit Europian. Propozimin sa i përket reformës zgjdhore e ka mbi tavolinë ose përndryshe të hapë krahun”, tha Basha.

Më tej, Lulzim Basha, duke folur po për Reformën Zgjedhore, pranoi një propozim të aleatëve për ndryshimin e sistemit zgjedhor në vend. Sipas tij, qytetarët duhet të zgjedhin drejtpërdrejt përfaqësuesit e tyre. “Unë besoj se qytetarët kanë te drejtë të zgjedhin drejtpërdrejt përfaqësuesit e tyre, personalisht kam parashtruar disa herë idenë e një sistemi maxhoritar, qoftë edhe një sistemi kombëtar proporcional”, tha Basha.

Gjithashtu, ai propozoi ngritjen e një Senati, dhe reduktim të numrit aktual të deputetëve në Kuvend. “Personalisht besoj se në këtë fazë të demokracisë shqiptare kemi nevojë për një dhomë të dytë, për nje senat, një reduktim te numrit te deputetëve në dhomën deputetëve dhe një një senat, i cili të luajë rolin e nje hapi tjetër kontrolli dhe balance pushteti. Për të kufizuar pushtetin e ekzekutivit, për të kufizuar cirkun e shëmtuar që shpesh shohim në Parlament, ku legjislacioni kalon brenda natës për të favorizuar faktorë ekonomikë, oligarkë apo edhe banda kriminale me aministi”, shtoi Basha.

Kritikët i kërkojnë Bashës lista të hapura: Zgjidhin krizën në PD

Në një kohë që Reforma Zgjedhore është në krye të axhendës të debatit politik në vend, kritikët e Lulzim Bashës vijnë me një propozim konkret. Edvin Kulluri, ish-anëtar i Këshillit Kombëtar në PD, kërkon nga Basha që të propozojë një sistem zgjedhor me “lista të hapura”. “Demokracia është përfaqësim! Një sistem zgjedhore me “lista të hapura” e zgjidh problemin themelor të krizës së sistemit politik aktual. Z.Oketa dhe znj.Duma kanë me këtë propozim, një mundësi konkrete për t`ja propozuar Bashës zgjidhjen për bashkimin e Partisë Demokratike”, shkruan Kulluri.

Ai argumenton të mirat që sjell ky sistem, dhe përfitimin konkret të PD-së. Sipas Kullurit, Basha, ka mundësi të nxjerrë të djathtën nga kriza me synim fitoren e zgjedhjeve të ardhshme. “Thirrjeve të hapura të disa bashkëpunëtorëve të vet për bashkimin e PD, zoti Basha ka mundësi tu përgjigjet pozitivisht për ta nxjerrë të djathtën nga kriza me synim fitoren e zgjedhjeve të ardhshme. Të kërkojë një reformë zgjedhore për miratimin e një sistemi proporcional kombëtar ose rajonal me “lista të hapura”.

Sipas Kulluri, me që Basha nuk pranon një proces demokratizues në PD, atëherë, sipas tij, kryedemokrati mund të bëjë demokratizimin e parlamentit. “Meqënëse nuk pranon të nisë një proces demokratizues të Partisë Demokratike, atëherë mund të bëjë demokratizim të parlamentit, qeverisjes dhe vetë partisë përmes sistemit zgjedhor. Ti propozojë Këshillit Kombëtar një listë me 140 kandidatë ku të përfshijë kritikët e tij për gjendjen në parti dhe secili të mbledhë vota për PD dhe veten”.

“Edhe PD mbledh maksimumin e votave, edhe përfaqësimi në parti dhe parlament rregullohet njëherë e mirë. Diskutimi që vendos kryetari për çdo gjë, merr fund. Vendosin demokratët dhe qytetarët kush i përfaqëson më mirë! Natyrisht dhe programi elektoral bëhet më i plotë për shkak se përfshihen më shumë ide për një qeverisje më të mirë”, shkruan Kulluri.

Rama, Bashës: Këmbësor te hija e fikut, kush je ti që më çon mua kushte?!

Kryeministri Edi Rama iu përgjigj ashpër Lulzim Bashës, pas deklaratës së kryedemokratit që i vinte “kushte” mazhorancës për dialogun për Reformën Zgjedhore. Rama foli me ironi por dhe me tone të larta, duke i drejtuar pyetje retorike kryedemokratit: “Kush je ti, kë përfaqëson?”. “T’i thotë një këmbësor që rri tek hija e fikut një makine hap krahun. Me çfarë dekreti hyjnor e ke marrë të drejtën të më çosh mua planin? Kush je ti kë përfaqëson? Ata që përfaqëson i ke lënë në rrugë bashkë me veten, ata janë të mirëpritur në çdo moment, unë ju kam të gjithëve njësoj, juve këtu dhe ata atje, madje për ata kam pak më shumë dhimbje dhe kujdes se janë në hall më të madh, ju nuk jeni në hall të madh, ju keni hallin e Evropës”, tha Rama.

Më tej, Kryeministri u kërkoi deputetëve të opozitës në Kuvend, që të bashkëpunojnë për të bërë sa më parë Reformën Zgjedhore, duke i qëndruar rekomandimeve të OSBE/ODIHR. “Miqtë e mi, reformën zgjedhore mbi bazën e rekomandimeve të OSBE-ta ta bëjmë urgjent. Ata që janë jashtë nuk e duan. Ju që jeni brenda nuk keni përse të mos e doni. Ju thoni sistemi, ata që janë jashtë nuk e duan se një nga gjërat që do bëjmë bashkë është heqja e komisionerëve politikë. Të bëjmë reformën zgjedhore, të presim të plotësohet gjykata Kushtetuese dhe e Lartë dhe t’i themi miqve tanë gjermanë, që janë avokatët e negociatave sot, ne i kemi plotësuar kushtet”, tha Rama.

Në fund të fjalës së tij, Kryeministri Edi Rama ka bërë batuta me deputetin e opzitës Kujtim Gjuzi, i cili tentoi të replikonte disa herë me kryeministrin gjatë kohës që Rama fliste. Shefi i qeverisë u shpreh me nota ironike, se nëse “deputetët e tjerë të opoziës kanë hallin e Evropës, Gjuzi ka hallin e monarkisë”. “Zotëria atje ka hallin e monarkisë. Hallet tuaja luksoze mbajini vet, se erdhi se nuk erdhi monarkia, ti je mbret pa mbretëri (i drejtohet Kujtim Gjuzit), po mbret je nuk të lëviz njeri nga froni. Gjuz ti nuk je i përgjegjshëm, ti je mbret, je më shumë. Naltmadhëni, ulu, se jemi akoma në republikë. O naltmadhni, dallimi mes meje dhe teje është se ti ke jetuar në luftën e parë botërore, mos më fut në terrenin e luftës se aty me mund. Ti vjen nga lufta e pare, flet me kompetencë”, tha Rama. /Realstory.al/

Rama i përgjigjet Bashës dhe e “quan” karrocier

Gjatë konferencës të mbajtur të mërkurën, Kryeministri ironizoi Partinë Demokratike. I pyetur nga gazetarët nëse do të ishte solidar me PD siç u tregua me të prekurit nga tërmeti, Rama tha: “Tërmeti në PD është i realizuar me metoda artificiale”, tha Rama.

Ndërkohë, kreu i qeverisë i është përgjigjur dhe “ultimatumit” të Lulzim Bashës për zbatimin e planit të opozitës. Rama u shpreh se më të rëndësishme janë “problemet e njerëzve”.

“Më e rëndësishme se sa të harxhojmë kohë me njëri-tjetrin me këtë procesin; ‘e tha, pse se thua’…Njerëzit duhet të merren me probleme reale. Tërmetet artificiale unë kam në dorë ti krijoj, por jo ti parandaloj. Tërmetet natyrale largqoftë askush nga ne si ndalon dot, ajo që kemi në dorë është të bëjme cfarë kemi në dorë. Keshtuqë është njësoj si një karrocë me kalë ti thotë një treni hap krahun. Mirupafshim”, tha Rama.

Kujtojmë se të mërkurën paradite, PD publikoi kushtet e vëna ndaj qeverisë për dialogun e Reformës Zgjedhore dhe jo vetëm. Ndërkohë, Basha, po gjatë të mërkurës, i vendosi “ultimatum” kryeministrit për plotësimin e këtyre kushteve, ose në të kundërt, siç u shpreh Basha, Rama të hap rrugën se opozita e realizon vetë planin.

PLANI I OPOZITËS, 5 “KUSHTET” E BASHËS PËR RAMËN

MEDIU KUNDËR BASHËS: GJIKNURI EKSPERT I “ZGJEDHORES”

Gjiknuri, Basha e do në burg, por e mbron Mediu

“Asnjë komision parlamentar, i drejtuar nga individë që duhet të ishin në burg për krime elektorale, nuk gëzon legjitimitetin për realizimin e Reformës Zgjedhore”, ishte një nga kushtete e Lulzim Bashës ndaj Edi Ramës, për hartimin e Reformës Zgjedhorem, publikuar të mërkurën. Pra, thënë ndryshe, Basha nuk do Damian Gjiknurin (të cilin e akuzon për vjedhje të votave në Dibër), që të jetë pjesë e Komisionit të Hartimit të Reformës Zgjedhore. Por a janë të gjithë aleatët dakord me Bashën? Përgjigjen e jep Fatmir Mediu. Në një intervistë për Report Tv, pasi përfundoi mbledhjen me Bashën dhe aleatët e tjerë të opozitës, Fatmir Mediu shprehet se, “largimi i Gjiknurit nuk është kusht”.

Sipas tij, Damian Gjiknuri është ekspert i Reformës Zgjedhore, ndërsa lidhur me akuzat për vjedhjen e votës, sipas Mediut, “kjo është çështje që i takon gjykatave ta gjykojnë”. “Nuk kam paragjykime për kundërshtarin tim, as nuk bëj rolin e gjyqtarit, nëse ka një çështje të ngritur janë ato që vendosin. Nuk është kusht, nga pikëpamja e moralit është e drejtë. Një dialog është një marrëdhënie besimi. Gjiknuri ka qenë ekspert i Reformës Zgjedhore dhe mbetet për t’u parë kontributi i gjithë secilit”, tha Mediu.

Më tej, Mediu është shprehur se opozita duhet të diskutojë me PS për përshpejtimin e Reformës Zgjedhore. “Patjetër që duhet të diskutojmë me PS për përshpejtimin e Reformën Zgjedhore, në Drejtësi dhe problematika të tjera që ka Shqipëria. Janë kushte ndaj qeverisë dhe opsione të opozitës për zgjidhje. Unë mendoj që ajo që i ka munguar Ramës është serioziteti për të vlerësuar nevojën për një dialog dhe të dëgjojë qëndrimet e ndërkombëtarëve. Ndërkombëtarët duan dialog të qenësishëm, pra që opozita të ketë të qartë zgjidhjen e problemeve. Nëse flasim për dialog politik, duhet të trajtojmë problemet tona dhe problemi ynë nuk është vetëm Reforma Zgjedhore. Ka disa elementë të tjerë”, tha Mediu.

PLANI I OPOZITËS, 5 “KUSHTET” E BASHËS PËR RAMËN

Basha “ultimatum” Ramës: Zbato planin tim, ose hap krahun

Lulzim Basha zhvilloi një takim me aleatët e tij mëngjesin e të mërkurës. Në mbledhjen, që zgjati 60-të minuta, Basha dhe aleatët diskutuan për krizën politike në vend dhe aksionin opozitar. Në takim ishin Monika Kryemadhi, Agron Duka, Fatmir Mediu, Vangjel Dule dhe Nard Ndoka. Pas mbledhjes me aleatët, Basha foli shkurt për mediat, duke u shprehur se opozita “ka një plan për ta nxjerrë vendin nga kriza”.

“Kjo nuk është një çështje për Bashën, nuk është një çështje për Ramën. Shqipëria është në krizë, vendi është në krizë. Ne kemi një plan për ta nxjerrë vendin nga kriza, për Reformën Zgjedhore. Ja kemi dorëzuar Ramës dhe përfaqësuesve të tij. Të marrë ta zbatojë dhe nëse nuk e zbaton dot të hapë krahun se e zbatojmë ne”, u shpreh Basha. Ndërkohë, Kryeministri Edi Rama deklaroi të martën se për Reformën Zgjedhore ishte gati të dialogonte me opozitën.

“Jam gati në çdo moment që të ulem në tryezë, do të doja që të flisnim për reformën zgjedhore, pasi koha vrapon, nëse ata nuk e ndiejnë presionin e kohës dhe janë në një kalendar tjetër është e drejta e tyre, nuk kam arsye t’u bëj presion, ‘hajdeni, hajdeni, hajdeni’. Jam këtu në çdo moment që ata dëshirojnë. Për të gjithë, çfarë ka në atë karvan, kush dëshiron që të më ketë edhe mua në tavolinë jam gati, kudo, edhe në selinë e PD-së nëse zhvillohet takimi unë shkoj, nuk e kam problem”, tha ndër të tjera Rama një ditë më parë.

RAMA: GATI TË SHKOJ EDHE NË “SHQUP” PËR “ZGJEDHOREN”

Firo e PD, Kulluri, Bashës: Lëri “armiqtë”, ndërto strategjinë politike

Analisti Eduard Zaloshnja publikoi në “RealStory” të dhënat e sondazhit të kryer gjatë mujit gusht dhe shtator për partitë poltike. Partia Demokratike rezultoi me një rënie të ndjeshme të votave, pasi vetëm në një muaj, PD pati firo në 70 mijë vota. Pas këtyre shifrave, reagoi ish-anëtari i Këshillit Kombëtar të PD-së, Edvin Kulluri.

Sipas tij, Partia Demokratike duhet të bëj një analizë për ndryshimin e votave, duke i dhënë përgjigje pyetjes “pse PD dhe aleatët kanë rënie drastike dhe PS, e mbi të gjitha LSI dhe PDIU kanë shënuar rritje të ndjeshme të votës me 40 mijë dhe 30 mijë vota respektivisht?”.

Sipas Kullurit, nëse rezultati i 2017 është vetëm pasojë e blerjes së votave (siç PD ka ngritur kauzën e aksionit opozitar kundër mazhorancës), i bie që “dy partitë e “opozitës së bashkuar” kanë blerë vota të djathta dhe koalicioni është i pamoralshëm”, shkruan Kulluri.

Në fund, ai thotë se “nëse këto vota kanë lëvizur prej sjelljes së gabuar poltike dhe taktike të PD, atëherë i pamoralshëm është lidershipi i PD! Rrugë të mesme nuk ka. Kështu, para se të gjeni armiq të brendshëm apo të jashtëm (ndërkombëtarë), bëni këtë analizë në Këshill Kombëtar ose në bazën e PD dhe ndërtoni strategjinë politike për zgjedhjet e ardhshme. Kaq është!”, shkruan Kulluri.