Balla në Asamblenë e Gramshit: Opozita Meta-Basha kërkon alibi për humbjen e radhës. PS, aleancë vetëm me qytetarët

Sekretari i Përgjithshëm i Partisë Socialiste Taulant Balla mori pjesë në mbledhjen e Asamblesë Socialiste të Gramshit.

Në fjalën e tij Balla deklaroi se në zgjedhjet e 25 Prillit 2021 PS do të ketë aleancë vetëm me qytetarët, ndërsa përballë ka një koalicion politikanësh dështakë që politikën e duan si mjet për interesat e tyre, jo për interesat e Shqipërisë.

“Ne jemi të vendosur ta kemi vëmendjen vetëm tek njerëzit dhe tek përmirësimi i shërbimeve publike ndaj tyre. Duhet përkushtim për tu marrë me hallet dhe problemet e njerëzve dhe vëmëndja jonë janë vetëm ata.

E siç ka rifilluar po njëlloj kjo vjeshtë politike me opozitën Meta-Basha që kërkon alibi për humbjen e radhës, shan e shpif nga mëngjezi në darkë, përgjigja jonë do të jetë puna dhe përqëndrimi tek nevojat e njerëzve”, tha Balla.

Sipas Ballës, kasandrat e opozitës kanë nisur një betejë të re, atë të përdorimit të halleve për politikë, si dhe për përhapjen e panikut ekonomik dhe social.

“Tani mesa duket, vetë kasandrat e opozitës kanë nisur një betejë të re, atë të përdorimit të halleve për politikë, si dhe për përhapjen e panikut ekonomik dhe social duke përdorur si lëndë të parë atë që njohin më mirë baltën dhe mashtrimin.

Njerëzit nuk kanë asnjë interes të dëgjojnë më këtë lloj politike, njerëzit presin vetëm nga ne zgjidhjen e halleve të tyre”, deklaroi Balla.

Akuzat e Bild, si e shohin analistët e Real Story heqjen e lajmit

Publikimi i lajmit nga Bild për lobimin e kreut të PD, Lulzim Basha me paratë ruse ka shkaktuar pikëpyetje të mëdha, jo vetëm për publikimin por dhe për heqjen e lajmit pas disa orëve. Kjo “gafë” e Bild është diskutuar dhe ndërmjet analistëve dhe gazetarëve në Real Story të Sokol Ballës në Neës 24, ku më shumë duket se përbën lajm heqja e këtij artikulli pas asnjë shpjegim.

Arion Sulo, kryeredaktor i gazetës Liberale tha në Real Story se është befasuar nga të dyja veprimet e Bild. “Heqja e artikullit në mediat më të mira online nuk bëhet më. Më e keqja që na ka ndodhur të gjithëve është që bëhet një shtesë lajmi nga elementët e rinj që kanë dalë, por jo të hiqet lajmi, kjo është befasuese. Puna e parë që kanë bërë gazetarët e ‘Bild’ nuk ka lidhje me aktualitetin shqiptar, nuk kishte asnjë gjë të re, ishte pa kohë, pa pse aq më tepër që mungonte vendimi i Gjykatës së Tiranës. Por nëse shkruhet për një kryetar opozite atëherë ka diçka, mungojnë replikat e palëve”, tha Sulo.

Ndërsa për analistin Alfred Lela ishin tre gjëra që i kanë bërë përshtypje. “Tre gjëra më bënë përshtypje. Së pari, shkrimi i qenë jashtë kontekstit, pa lidhje me mikro dhe makro botën, për më tepër kur çështja ishte e mbyllur. E dyta ishte gjuha që përdorej në shkrim, e cila ngjante shumë me ngjyrën e mediave proqeveritare në Shqipëri. Kjo të bën të dyshosh për vendin, kohën etj. E treta nuk kishte përputhje mes të dhënave që ishin publikuar. Kjo e kthen të gjithën të pabesueshme. Nëse duam të shtojmë një element të katërt, është heqja, e cila e çon fajin te dera e Bild. Aty u mbyll historia”, u shpreh Lela.

Ndërsa Robert Rakipllari tha se Bild nuk është gazetë serioze europiane, por është gazetë e madhe europiane. “E para nuk ishte shkrimi i parë që bëhej. Një ditë më parë, një version i përafërt ishte botuar te The Times. Mua mu duk e çuditshme se për mua ishte më tepër surprizë se kur e kërkoje si lajm, dilte ‘not found;. Teksti nuk ishte i standardizuar me kohën. Por PD nuk pati një reagim pas hedhjes së lajmit nga Bild”, tha Rakipllari.

Ndërsa politikani Edvin Kulluri replikoi me Rakipllarin. “Për të qenë korrekt shkrimi i The Times nuk ishte i njëjti me atë të Bildt. The Times shkruante vendimin e gjykatës dhe unë mendoj se shkrimi që kishte bërë Times merrej më shumë me sistemin anglez dhe merrej si një shembull rasti i Bashës. Bildt kishte një shkrim të nxituar, pra mu duk një shkrim i shkruar keq. Ajo që ka rëndësi ka të bëjë me dy çështje lobimi”, u shpreh Kulluri.

“BE mundësoi dialogun”, Basha: Rama u detyrua nga ndërkombëtarët për tryezën

Kreu i Partisë Demokratike, Lulzim Basha tha se tryeza politike u mundësua nga BE dhe se ndërkombëtarët detyruan Ramën të ulej në bisedime, pasi opozita ka qenë gjithmonë gati. Basha tha se reforma zgjedhore është një nga nëntë kushtet e Bundestagut për daljen e vendit nga kriza dhe shpreson që ky vullnet që ka opozita të reflektohet dhe nga pala tjetër.

“Ndërkombëtarët detyruan shumicën të pranoi ta nxjerrë procesin nga parlamenti ilegjitim i Damianëve. E dyta se përse Rama vendos ta ndjekë këtë proces me dikë që duhet të ishte në burg, është pyetje për Edi Ramën dhe jo për mua” tha Basha. I pyetur nëse opozita është gati që të shkojë në zgjedhje me Edi Ramën kryeministër, kryedemokrati deklaroi prerë se “Me Edi Ramën nuk ka zgjedhje të lira dhe të ndershme”.

Këto komente Basha i bëri për media pas takimit që zhvilloi me Komisionerin e ri për Politikën e Fqinjësisë Europiane dhe Negociatat e Zgjerimit, Oliver Varhelyi, të cilit i paraqiti dy objektivat e opozitës, që janë zgjedhjet e parakohshme me reformën e re zgjedhore dhe mbështetja e procesit të integrimit të Shqipërisë në BE.

“Nga ana jonë prezantuam dhe gjetëm dakordësi se zgjidhja e krizës së rëndë përmes zgjedhjeve të lira të paraprira nga reforma zgjedhore dhe hapja e negociatave janë dy objektiva madhore. Në këtë kuadër mirëprita ndihmën e BE-së që mundësoi dialogun për reformën zgjedhore, si hap i parë për të çuar në rivendosjen e demokracisë, ku qytetarët zgjedhin dhe jo krimi. Pa kthyer legjitimitetin asgjë nuk do të bëjë përpara, as punësim dhe as ndalje të emigracionit. Ne jemi të vendosur t’i japim fund krizës me çfarë do kosto për të mos vonuar zgjedhjet e lira. Nuk ka rrugë tjetër përveç zbatimit të nëntë kushteve, që ka filluar një proces për të parë nëse do të ketë vullnet nga pala tjetër. Pjesa tjetër është përgjegjësi e qeverisë” u shpreh Basha.

Lulzim Basha ka shpëtuar si i “pandehur”, por jo si politikan

Nga Mero Baze

Shikoj një lloj gëzimi në Partinë Demokratike për atë që ndodhi sot në Gjykatën e Tiranës ndaj Lulzim Bashës. Një trupë gjykues në Tiranë, pushoi një çështje penale në ngarkim të Lulzim Bashës dhe dy zyrtarëve të tjerë të lartë të Partisë Demokratike, lidhur me pagesën e pajustifikuar ligjërisht për 650 mijë dollarë në emër të Partisë Demokratike, për lobistin amerikan Nick Muzin. Ky i fundit i ka deklaruar ato zyrtarisht, si para të ardhura për llogari të Partisë Demokratike në Shqipëri nga një kompani me pronarë rus.

Gjyqtari Lazër Sallaku, i cili është transferuar në Tiranë nga Lezha në kohën që ministër Drejtësie ishte Eduard Halimi, sot i pranishëm në sallë si avokat, injoroi kërkesën e prokurores Ymeraj për parregullsi, duke deklaruar se “fakti nuk ekziston”, pak a shumë siç u tha në vendimin e Gjykatës së Lartë për kasetën e Ilir Metës. Deklaratat triumfaliste të disa ish- zyrtarëve të lartë të PD, por dhe të këtyre që vazhdojnë të jenë aty, përpiqen të krijojnë idenë se edhe Lulzim Basha mund të fitojë ndonjë betejë. Ja përshembull këtë gjyqin e fitoi.

Nuk arritën ta dënonin vërtet. Pak a shumë ky është konteksti i gëzimit të tyre për vendimin e gjyqit. Nga pikëpmaja politike është një vendim në kohën e gabuar për t’u quajtur triumf për Lulzim Bashën. Edhe pse ai është një vendim i marrë politikisht nga klientela e PD në gjyqësorin shqiptar, ajo nuk i bën asnjë nder Lulzim Bashës dhe nuk i jep asnjë pikë në opinionin publik. Gjysma e atyre që janë zemërthyer me Lulzim Bashën, mendojnë se e ka falur Edi Rama, dhe gjysma tjetër mendojnë se e ka blerë vendimin me influencën që ka në gjyqësor, duke rritur mosbesimin tek drejtësia shqiptare dhe pandëshkueshmëria e politikës.

Politikisht Lulzim Basha do të kishte fituar sikur të përballej në gjykatë me akuzat, të përballej me dëshmitë ende të pambërritura të lobistit Nick Muzin, që ka deklaruar se i ka marrë këto para nga PD, dhe pastaj të përballonte çdo lloj vendimi. Mbështetësit e Luzlim Bashës do ta donin më shumë nëse ai përballej me drejtësinë dhe dënohej, se sa kështu, duke e mbyllur me procedurë lapsusesh të qëllimshme, nga Prokuroria deri në Gjykatë. Kështu ka shpëtuar i pandehuri Lulzim Basha, por ka humbur kryetari i PD, Lulzim Basha.

Ai është shpëtuar, por nuk është gjykuar. Nga pikëpamja ligjore, Luzlim Basha ka problem me dëshmitarin kryesor të kësaj akuze, që është Nick Muzin. Ai ka deklaruar në sistemin e taksave të SHBA se ka marrë 650 mijë dollarë për llogari të një pune që ka bërë për Partinë Demokratike, në një kontratë rmosur nga Lulzim Basha. Çështja u bë e ndjeshme pasi doli që paratë i kishin paguar formalisht dy biznesmenë rusë, por kjo mund të jetë dhe trill i Nick Muzin për të fshehur paratë cash që mund t’i ketë çuar Lulzim Basha.

Nëse Basha do ishte i ndershëm dhe pa njollë në këtë histori, do ngrinte padi ndaj Nick Muzinit, që ka deklaruar se ka marrë 650 mijë dollarë nga PD. Kjo akuzë ishte shenjë se Basha ishte i lirë të përballej me mashtrimin e bërë në emër të tij. Basha as emrin nuk ja zë dot Nick Muzin. Kjo e tregon atë një udhëheqës peng tek një lobist amerikan, i cili dhe nëse ka shpikur rusë në këtë hsitori, nuk ka shpikur 650 mijë dollarët, se ato i ka në llogari. Nick Muzin është nën hetim për këtë çështje dhe një ditë dëshmitë e tij do të mbërrijnë në Tiranë. Kjo mund të bëjë që çështja të rihapet, dhe Basha të ripërballet me drejtësinë, në kushte të tjera.

Por kjo përballje, do ta nxjerrë para demokratëve jo si një lider të pastër, por si një lider peng në duar të njerëzve të penduar të drejtësisë. Por ajo që shikoj si problem për PD në këtë histori, nuk është as ana politike dhe as ana juridike e skandalit të parave të paguara nga rusët në emër të PD. Skandali këtu është tek skaneri që i bën ky proces gjyqësor, mënyrës se si funskionon Partia Demokratike. Një demokrat i zakonshëm, nga kjo histori kupton se në partinë e tij, paguhen qindra mijëra dollarë në rrugë ilegale nga kryetari i saj, pa vendim Kryesie të PD, pas një praktike korrekte transparente të autorizimit të pagesës nga kontabiliteti i PD, dhe pa asnjë dijeni as të zyrtarëve të tjerë të lartë të PD.

Në një farë mënyre ky urdhër pagese, zbulon një parti të paligjshme, një institucion që është burim korrupsioni, pastrim parash dhe që turpëron një kauzë të tërë politike. Në vitin 2005, kur PD pagoi për herë të parë një kompani lobimi ndërkombëtare, BG&R, pagesa formale ishte 500 mijë dollarë, kurse pagesa informale ju dha “cash” nga një lob lojërash fati. Por pagesa formale, u justifikua si një honorar për një periudhë 2- vjeçare, që u justikua me letra si kontribute të 25 degëve të rretheve të Partisë Demokratike me nga 20 mijë dollarë secila. Pra një kujdes për të bërë letrat në rregull, ka ekzistuar.

Degradimi i akteve financiare në një parti të madhe, si akte personale të kryetarit, janë keqpërdorimi më i pashpirt që mund t’i bësh një partie të madhe, që pretendon të vijë në pushtet për të luftuar korrupsionin, duke vepruar si Al Capone. Mjafton ky veprim financiar i Lulzim Bashës, për të mos të të bindur kurrë, që t’i besosh atij pushtet dhe para. Ndaj kur i shikoj që gëzojnë se Lulzim Basha shpëtoi nga gjykimi, nuk e kuptoj ata nga çfarë kanë shpëtuar. Ata kanë nevojë për dikë që i fiton betejat, dhe jo për dikë që shpëton prej betejave.

“Mungesë përgjegjësie. Do shporreni”, Rama mesazh Bashës dhe abuzuesve të fondeve

Kryeministri Edi Rama mbajti një videomesazh pasditen e të shtunës ku foli për tërmetin. Rama u shpreh se konferenca e donatorëve do të mbahet në Shqipëri në fund të janarit të vitit të ardhshëm. “Me arkitekt të huaj dhe vendas për planet e rindërtimit si dhe për ndërhyrjen tërësore në Thumanë, ku do të përqëndrohet për një model shembull rilindjeje. Konferenca e Donatorëve, me vendim të KE do ta mbajmë në Tiranë, mes fundit të janarit dhe shkurtit, në varësi të raportit përfundimtar të të dëmeve. Brenda 2020 askush të mos mbetet në preskektivën e qartë dhe konkrete”.

Duke folur për rindërtimin, Rama tha se banorët e fshatrave të prekur nga tërmeti dhe që mbetën pa shtëpi, do ta gëzojnë shtëpinë e re brenda vitit 2020. Ndërsa për banorët që jetojnë në qytete, Rama tha se ata do të kenë gati apartamentet deri në qershor të vitit 2021. “Brenda 2020 banorët e fshatit do ta gëzojnë vitin e ri në një shtëpi të re, brenda qershorit 2021 ato të qyteteve të jenë në apartamente të reja”, tha Kryeministri. Ndërkohë, Rama tha se hetimet vazhdojnë intensivisht për të dërguara përpara drejtësisë personat që kanë abuzuar me ndërtimit. “Vazhdojnë intensivisht hetimet për të dokumentuar përgjegjësit e çdo kahu e niveli për dëmet e shkaktuara si pasojë e abuzimeve në ndërtim. Sot janë kryer arrestimet e para, mos dëgjoni ato që gam-gamosin përnatë pse nuk kanë arrestime”, tha Rama.

Gjatë videomesazhit, një moment të gjatë i kushtoi edhe liderit të opozitës Lulzim Basha. Fillimisht, Rama e përshëndeti për vetëpërmbajtjen kreun e PD, por nuk ngurroi ta kritikonte për refuzimin e ftesës për t`u ulur së bashku në një tryezë të përbashkët. Rama tha se refuzimi që Basha i bën ftesës së tij është mungesë përgjegjësie. “Opozita është inekzistente në detyrën e saj, përveç daljeve sporadike. Dua ta falënderoj Lulzim Bashën për një vetëpërmbajtje në momente të vështira, u përpoq të mos bëhej i tepër me fjalorin e rëndë. E kritikoj për refuzimin e përsëritur dhe absurd që të mos ulen në tryezën e bashkëpunimit, nuk e di pse refuzon, por di që refuzimi është mungesë e plotë e përgjegjësisë”, tha kryeministri.

Gjithashtu, Rama paralajmëroi qytetarët se nuk do të merret as me akuzat që opozita mund të drejtojë ndaj qeverisë në ditëtët në vijim në lidhje me menaxhimin e situatës pas tërmetit. Rama tha se ai do të merret me sfidën e jashtëzakonshme të rindërtimit, ndërsa u shpreh se Shqipëria do të ringrihet më e fuqishme pas kësaj situate. “Opozita ka nisur të jap shenjat e para të një lufte të egër prej balte, ku dita ditës do t`u mërzisin me akuza, shpifje, gjysmë të vërteta. Kjo është puna e tyre me Bashën. Nuk merrem dhe nuk do merrem me ta. Unë dhe ne duhet të merremi me sfidën e jashtëzakonshme që na ka vënë përpara Zoti duke na goditur si s’ka më rëndë, por edhe duke na dhënë mundësinë që të ngrigemi përtej politikës, përtej vetëvetes”.

Në fund, Rama dha dhe një mesazh për qytetarët, ku i garantoi se ai vetë do të bëjë të çmos që çdo donacion i dhuruar për rindërtimin të mos shpërdorohet. Rama tha se nëse do të ketë dhe vërtetohen akuza për shpërdorime, jo vetëm që zyrtarët do të largohen nga radhët e qeverisjes, por do të dërgohen përpara drejtësisë. “Do të bëj çmos që çdo qindarkë të shpenzohen me ndershmëri dhe zgjuarsi dhe që transparenca të jetë makimale, nëpërmjet Komitetit të Rindërtimit, pa dallim feje. Do kërkoj verifikimin dhe argumentimin e saj të çdokujt që bën një akuzë, dhe po pati bazë çdo abuzues do të shporret nga rradhët tona dhe të shkojë para drejtësisë”, tha Rama.

Lobimi me para ruse në SHBA, dosja e Bashës dërgohet në Gjykatë

Dosja e lobimit në SHBA me para ruse nga Lulzim Basha është dërguar në gjykatë për gjykim. Sipas Balkanweb, në ekstremin e afateve ligjore, pas përfundimit të hetimeve nga Prokuroria, dosja është dërguar në Gjykatën e Tiranës të enjten e 12 dhjetorit. Së bashku me Lulzim Bashën janë nën hetim edhe dy zyrtarë të tjerë të Partisë Demokratike, ish-sekretari i përgjithshëm Arben Ristani dhe financieri Ilir Dervishi. Megjithatë, Basha nuk do të hetohet për paratë ruse të përdorura për lobim në SHBA, pasi prokurorët pushuan akuzat “për pastrim parash” duke kërkuar gjykim vetëm për akuzën “falsifikimin e vulave, stampave ose formularëve”.

Më herët, prokuroria kishte ngritur për ta edhe akuzën për veprën penale “Pastrim i Produkteve të Veprës Penale ose Veprimtarisë Kriminale”, por që kjo akuzë nuk është ngritur, pasi në argumentin e vet, prokuroria thotë se është thelbësore dëshmia e lobistit Muzin për të faktuar një akuzë të tillë. 3 prokurorët e çështjes ishin të ndarë në vendimmarrje, pasi dy prej tyre, Ervin Karanxha dhe Gjergji Tako, kërkuan dërgimin e dosjes në gjykatë. Ndërkohë, prokurori Kol Hysenaj kërkoi që hetimet të vijonin. Megjithatë, tani pritet që të caktohet trupa gjykese e kësaj dosje në gjykatë.

Çështja e pagesave për lobim të kryera nga ana e PD-së u hap në nëntorin e vitit 2017, kur firma lobuese amerikane ‘Muzin Capitol Partners’ plotësoi me informacione shtesë deklarimet e saj të detyruara me ligj për Departamentin e Drejtësisë. Sipas deklarimeve të kompanisë ‘Muzin’ ajo ka marrë tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017: pagesa e parë mban datën 24 mars 2017 dhe është bërë nga firma ‘Biniatta Trade LP”, me një vlerë prej 150 mijë dollarësh, dy pagesat e tjera janë bërë nga Partia Demokratike, njëra më 27 mars, për 25 mijë dollarë, dhe tjetra më 9 qershor për 500 mijë dollarë. Nga këto deklarime të firmës Muzin, vetëm ajo prej 25 mijë dollarësh, është pranuar nga kryetari i PD-së, Lulzim Basha që është paguar nga PD-ja. Dy të tjerat mbetën të paqarta.

Partia Demokratike nuk ka pranuar asnjë lidhje me firmën ‘Biniatta Trade LP”, e cila rezulton e regjistruar në Edinburg të Skocisë dhe është në pronësi të një zinxhiri kompanish të regjistruara në Belizë – një shtet i Amerikës Qendrore, i njohur si parajsë fiskale. Sipas një investigimi të revistës “Mother Jones”, “Biniatta Trade LP” është një partneritet i krijuar nga dy kompani: Asverro Corp dhe Liminez Commerce, për të cilat “nuk ka të dhëna publike për ndonjë aktivitet tregtar”. Pas këtyre dy kompanive, sipas “Mother Jones”, qëndrojnë dy shoqëri të tjera të regjistruara në Mbretërinë e Bashkuar, “Babyonica” dhe “KF Global Management”, aksionet e të cilave zotërohen në masën 75 për qind nga dy shtetas rus, Evgeny Sheremetyev dhe Kostantin Ferulev. /Realstory.al/

Ftesa e Ramës për Bashën, PD: Propozimet tona i ka në tavolinë

Partia Demokratike reagoi pasditen e të dielës, pasi Kryeministri Edi Rama e quajti “gabim të madh” refuzimin e Lulzim Bashës për t`u ulur në një tryezë së bashku dhe diskutuar rreth përballimit të situatës së krijuar pas tërmetit. Me anë të ish-deputeti Edi Paloka, PD shprehet se “në ditën e 13-të pas tërmetit, ajo që ju duhet shqiptarëve nuk është pasurimi i albumit fotografik propagandistik i Edi Ramës me Lulzim Bashën në një tryezë”.

Partia Demokratike thotë se shqiptarëve u duhet një qeveri e përgjegjshme dhe dërgimin përpara drejtësisë fajtorët. “Ajo që kanë nevojë shqiptarët është një qeveri e përgjegjshme, një kryeministër që nuk e mbush ditën me shfaqje te shëmtuara me fatkeqët. Shqiptarëve nuk i duhet një kryeministër që shfrytëzon fatkeqësinë për të nxjerrë nga sirtari projektet me PPP korruptive për të pasuruar klientët e tij mbi gërmadhat e vdekjes. Shqiptarët duan ndihmë për njerëzit në nevojë. Shqiptarët meritojnë transparencë dhe përgjegjësi para ligjit për fajtorët”.

Duke përsëritur retorikën e zakonshme për dështimin e qeverisë me menaxhimin e situatës, PD pretendon se Lulzim Basha është në lartësinë e kërkesave të shqiptarëve. “Shqiptarët tani ka nevojë për vepra dhe jo për llogje. Në vend të lotëve të krokodilit, shqiptarët kërkojnë siguri nga një qeveri që di dhe ka vullnet t’i zgjidhë problemet e tyre. Deri tani në lartësinë e kërkesave të shqiptarëve është vetëm Lulzim Basha. Në këto 10 ditë, ai ka ofruar 2 plane për kapërcimin e shpejtë të fatkeqësisë: Planin e Emergjencës për banesat e dëmtuara dhe Planin për Rimëkëmbjen e Biznesit të prekur nga tërmeti”, thotë Paloka.

Në fund, PD thotë se zgjidhjet e propozuara janë në tryezën e kryeministrit. “Zgjidhjet e propozuara Edi Rama i ka mbi tryezë. Por si përherë atij nuk i intereson zgjidhja por shfaqja, nuk i interesojnë njerëzit por pushteti dhe paraja”, shkruan ndër të tjera Paloka.

Basha emëron Piro Ahmetaj, Këshilltar për Sigurinë

Kryetari i Partisë Demokratike Lulzim Basha bëri një lëvizje të papritur mbrëmjen e të premtes, duke njoftuar nëpërmjet zyrës së shtypit emërimin e një Këshilltari për Sigurinë Kombëtare. Këtë detyrë, kryeopoziari Basha, ia beson gjeneral Piro Ahmetaj, një ushtark karriere që ka ushtruar funksione të ndryshme në ushtrinë shqiptare. “Këshilltari i ri për Sigurinë Kombëtare i kreut të opozitës ka kryer detyra të larta shtetërore brenda dhe jashtë vendit, ku spikat detyra 6 vjecare si përfaqësues ushtarak në NATO”, thuhet nga njoftimi i PD.

Po sipas këtij njoftimi, në CV e tij, Piro Ahmetaj mban prej 36 vitesh uniformën ushtarake. Nga këto, 25 vjet, ekspert, në funksione të larta dhe kontribute të spikatura në reformën e mbrojtjes, planifikimin strategjik dhe integrimit në NATO; 6 vjet Këshilltar Ushtarak i Presidentit të Republikës, ZvëvendësShef i SHPFA, si dhe 6 vjet Përfaqësues Ushtarak në NATO-s.

“Gjeneral Ahmetaj spikat si themelues dhe drejtues i Përfaqësisë Kombëtare në Komandën Supreme të Aleancës, ku ka demostruar përgjegjshmëri të lartë për të përmbushur detyrimet e anëtarësimit në NATO (prill 2009); përgjatë negocimit dhe nënshkrimit të disa marrëveshjeve mirëkuptimi dhe marëveshjeve teknike për anëtarësimin e plotë, nënshkruar në Tiranë (Shtator 2013), duke kontribuar në renditjen e Shqipërisë si ‘një ndër 5 vendet model për reformat e mbrojtjes dhe përmbushjen e angazhimeve në NATO”, thuhet në njoftimin e PD.

Gjeneral Piro Ahmetaj ka kryer studime “Master në fushën e sigurisë globale”, Kolegji i NATO-s në Romë, ndërsa aktualisht ndjek programin e doktoraturës. Në Tetor 2019 ka dalë në rezervë nga shërbimi aktiv në Forcat e Armatosura.

“Buxheti rrit borxhin”, Basha: Të kthejmë paratë te shqiptarët

Buxheti 2020 ishte një nga pikat shqetësuese për kreun e Partisë Demokratike Lulzim Basha gjatë takimit që zhvilloi me kreun e FMN-së, Jan Kees Martijn. Basha e cilësoi buxhetin 2020 vjedhje të hapur, ku qindra milionë dollarë do të shpërndahen në duart e 13 oligarkëve.

Gjatë deklaratës për mediat, ku Basha ishte i fokusuar vetëm tek ekonomia, tha se opozita e ka zgjidhjen për daljen e vendit nga kriza ekonomike dhe kjo do të vinte duke ndalur koncesionet. Ai tha se sapo të vijë në qeveri do t’ju marrë pasuritë oligarkëve dhe do t’ia japë ato shqiptarëve.

“Kemi ndarë me ta shqetësimin e krizës së thellë ku e ka zhytur kjo qeveri me dështimin e saj. Një ndër problemet kryesore është çështjes e qindra miliona dollarëve që në vend që të shkojnë për shtresat në nevojë, apo për rritje pagash, përfundojnë në duart e 13 oligarkëve. Në qoftë se buxheti që kanë planifikuar do të kalojë, përbën një vjedhje një makutëri të babëzitur, vjedhje të hapur të 146 milion dollarë, që planifikohen t’i jepen 13 njerëzve nesër për PPP e koncesione që quhen, se nuk janë në fakt. Kjo do të çojë në thellim të krizës dhe rritje të borxhit publik. Rruga për daljen nga kjo krizë është e qartë. Kjo do të çojë në një thellim të krizës, qytetarët nuk kanë mundësi t’i paguajnë, por do të rrisë borxhin publik. Lajmi i vetëm, i mirë që ndava me FMN është se opozita ka një plan për ta ndaluar dhe për ta nxjerrë vendin nga kjo situatë. Ne do të ndalim këto koncesione. Të rikthejmë paratë tek qytetarët, tek studentët, tek qytetarët, fermerët dhe tek biznesi i vogël. Do rikthejmë konkurrencën e vogël. Biznesi nesër do ta ketë në krah qeverinë për ta ndihmuar, jo siç e ka sot. Shqetësimi i tyre është se çfarë proçke do të na bëjë qeveria dhe sa gjoba do paguajmë sot për të mbijetuar. Me vizionin tonë, ne do t’i japim fund kësaj situate. Do vënë nën kontroll borxhin publik, i cili ka dalë totalisht jashtë kontrollit. Takimin e FMN e konsideroj të frytshëm”-tha Basha.

Basha “kërcënon” si Meta: Referendum, ose përplasje për Kushtetutën

Lulzim Basha mbajti të dielën në mbrëmje një konferencë me gazetarët, ku foli për takimet që zhvilloi me drejtues të Partive Popullore Europiane. Basha u shpreh se fokus i takimeve të tij ishte hapja e negociatave. “Mesazhet që sjell nga këto dy takime janë mesazhe shprese për Shqipërinë. Fokusi i të dy takimeve ka qenë tek mbështetja totale e Shqipërisë në Europë, çeljes së negociatave dhe anëtarësimit në BE. U shpreh mirënjohje për këtë qëndrim të palëkundur”, tha Basha.

Sipas tij, veç kushteve të vendosura më herët nga Bundestagu, PPE kërkon nga Shqipëria edhe përmbushjen e një kushti të ri, zbatimin e ligjit të dekriminalizimit dhe ngritjes së SPAK e BKH. “Partia Popullore Europiane kërkon zbatimin e ligjit të dekriminalizimit, dhe nxit ngritjen e SPAK dhe BKH”, tha Basha. Sipas tij, situata në vend është shumë e vështirë, ndërsa shtoi se “thembra e Akilit” për të dalë nga kriza është ekonomia. Sipas Bashës, shumë investitorë gjermanë duan të investojnë në Shqipëri.

Basha tha se vendi ynë duhet të arrijë Serbinë në nivel ekonomik. “Vendi zhytet çdo ditë në krizë jo vetëm politike por dhe ekonomike. Shqipëria të kap ritmet e Serbisë për ekonominë”, tha Basha. Më tej, kryedemokrati konfirmoi se Partia Demokrtike është në mbështetje të Presidentit për referendumin, madje sipas Bashës, referendumi është një nga pikat e planit të PD. “Patjetër që mbështesim referendumi, është një nga 5 pikat e PD-së. Unë jam angazhuar tash dy vjet e gjysmë, një mekanizëm i demokracisë direkte”, tha numri një i Selisë Blu.

Ndërkohë, ashtu si Meta, Basha u shpreh se Rama do të përballet me popullin. “Tentativat për të kapur Gjykatën Kushtetuese apo përmendja e nismave skandaloze për ndryshime kushtetuese për t’i dhënë një partie, që po rri paligjshmërisht në pushtet me ndihmën e bandave kriminale, kompetencën e insitucioneve të tjera kushtetuese, vërtetojnë faktin se për pushtet Edi Rama është gati të bëjë gjithçka, siç ka bërë gjithçka. Por harron se do të ketë përballë një popull të tërë, do të ketë përballë një bashkim të vendosur dhe më të madhin në historinë e shqiptarëve, më të madhin në numër se ansjëherë më parë kundër tij dhe kundër planit ogurzi për të zhbërë themelet e bashkejetesës kushtetuese demokratike”, tha Basha.

Madje, kryedemokrati paralajmëroi edhe rikthimin te protestat duke përmendur dhe fjalën “përplasje”, pasi u shpreh se javët në vijim janë të fundit për të zgjidhur krizën politike me instrumenta politike. “Këto javë janë mundësia e fundit për të zgjidhur krizën me instrumenta politik, përplasja është e paevitueshme”, tha Basha. Ndërkohë, Lulzim Basha u shpreh se në fillim të muajit dhjetor Partia Demokratike do të parqesë propozimet e saj për Reformën Zgjedhore. I pyetur nëse po komunikohet me Partinë Socialiste për reformën, Basha nuk e pohoi por as e mohoi, pasi ai shprehu falënderim për ndërkombëtarët. /Realstory.al/