Takimi me Metën, Idrizi: Duhet pakt kombëtar, i takon Ramës të ulet

Kryetari i PDIU-së, Shpëtim Idrizi është takuar të enjten me presidentin Ilir Meta për të diskutuar për një datë të re të zgjedhjeve. Idrizi vlerësoi aktin e Metës për anulimin e zgjedhjeve, ndërsa tha se gjatë takimit “I bëmë të qartë se sot nuk është dita për të diktuar për një datë të re, por për të ikur nga spiralja ku jemi futur, që po e nxjerr vendin jashtë shinave institucionale. Kokat e nxehta t’i thërrasin arsyes dhe kauza e opozitës janë zgjedhjet e lira.”

Idrizi shtoi se i takon kryeministrit Rama të ulet dhe të jap zgjidhje, pasi duhet “një pakt kombëtar me të gjitha forcat, duhet një reflektim, i bëj thirrje arsyes së kryeministrit Rama.”

I pyetur për vendimin e KQZ për të injoruar dekretin e Metës, ai tha se “Kemi parë çudira nga më të mëdhatë, e bënë KQZ si gjykatë. Për të gjithë ata që duan të kuptojnë, akti i presidentit ka natyrë individuale, por për të gjithë data e dekretimit të zgjedhjeve është e drejtë e presidentit”.

Ku gënjeu këshilltari i Presidentit Meta

Të gjithë prisnim Presidentin Meta të dilte të enjten pasdite në një konferencë për shtyp. Por si duket i sëmurë siç tha se ishte dy ditë me herët dhe i “lodhur” nga biseda misterioze me ambasadoren amerikane, ai vendosi të bënte vetëm një reagim në distancë ku bëri thirrje për reflektim “nga të gjitha palët”. Në konferencë për shtyp ai nxori këshilltarin e tij juridik Bledar Dervishaj, duke i dhënë kështu komunikimit më median një karakter teknik dhe ulur nivelin e saj. Por befasia qëndron në faktin se megjithëse teknik, këshilltari juridik i presidentit mbrojti dekretin e shfuqizimit (detyrë e tij), por me argumenta të pavërteta.

Duke mbrojtur dekretin e presidentit ai tha se Kodi Zgjedhor thotë se “të zgjedhurit e këshillave bashkiakë qëndrojnë në detyrë, derisa në ditën kur vijnë të zgjedhurit e rinj”. Më pas ai shtoi: “Po kështu kjo vlen edhe për kryetarët e njësive vendore”.

Por si është e vërteta? Për këtë mjaft të konsultosh Kodin Zgjedhor neni 10, pika 2 për të zgjedhurit lokale. Ai thotë: “2. Për efekt të këtij Kodi, mandati i organeve të qeverisjes vendore mbaron në të njëjtën datë të të njëjtit muaj të vitit të katërt pas datës së shpalljes me vendim të KQZ-së në shkallë vendi të rezultateve të zgjedhjeve për organet e qeverisjes vendore”.

Realstory disponon kopjen e vendimit të KQZ, të 10 gushtit 2015, për zgjedhjet vendore të vitit 2015 (shih linkun). Sipas kodit, bazuar në këtë vendim të KQZ, mandati I të zgjedhurve lokale, mbaron në 10 gusht 2019. Pra nuk qëndrojnë deri në ditën kur hyjnë në zyrë të zgjedhurit e rinj.

Kjo është gënjeshtra e parë. Por këshilltari juridik i presidentit zoti Dervishaj tha në konferencë për shtyp një tjetër të pavërtetë, sa i përket afatit të shpalljes së dekretit për datën e re të zgjedhjeve, duke deklaruar se data do të jetë e afërt, po ashtu edhe koha e dekretit.

Por çfarë thotë neni 9 i Kodit Zgjedhor për caktimin e datës së zgjedhjeve?

“Data e zgjedhjeve për Kuvendin caktohet me dekret nga Presidenti i Republikës, sipas rregullave të parashikuara në nenin 65 të Kushtetutës. Zgjedhjet për Kuvendin zhvillohen në një nga dy të dielat e fundit, brenda periudhës zgjedhore të përcaktuar në nenin 8 të këtij Kodi dhe në çdo rast jo më vonë se 30 ditë para datës së mbarimit të mandatit të Kuvendit… Presidenti i Republikës nxjerr dekretin për caktimin e datës së zgjedhjeve për Kuvendin jo më vonë se 9 muaj para mbarimit të mandatit të Kuvendit.”

Neni 10 i Kodit Zgjedhor që flet për caktimi i datës së zgjedhjeve për organet e qeverisjes vendore thotë se edhe për datën e zgjedhjeve lokale aplikohet të njëjtat rregulla si në pikat 1 dhe 2 të nenit për zgjedhjet lokale: “1. Data e zgjedhjeve për organet e qeverisjes vendore caktohet me dekret nga Presidenti i Republikës. Për caktimin e datës së zgjedhjeve për organet e qeverisjes vendore, Presidenti zbaton rregullat e parashikuara në pikat 1 dhe 2 të nenit 9 të këtij Kodi”.

Pra në bazë të Kodit, data e zgjedhjeve vendore nxirret jo më vonë sesa 9 muaj nga data e mbarimit te mandatit të të zgjedhurve vendore. Presidenti Meta ka qenë korrekt kur shpalli dekretin për datën 30 qershor. Ai e shpalli atë ne 5 nëntor 2018, nëntë muaj pa 5 ditë para mbarimit të afatit të të zgjedhurve vendor, duke respektuar kodin zgjedhor dhe kushtetutën. Por çfarë tha këshilltari i tij juridik Bledar Dervishaj në konferencë për shtyp? Se Presidenti do te nxirrte se shpejti dekretin e ri, dhe në një datë të afërt me 30 qershorin? Edhe sikur të shpallë datë të re për shembull 7 korrikun (si data më e afërt me 30 qershorin) ai do të shkelte afatin kushtetues me 8 muaj.

Dhe kjo është gënjeshtra e dytë e këshilltarit të presidentit. I cili nuk është as këshilltar politik, dhe as mediatik. Ai është aty për t’i thënë shefit të tij të mos gabojë, ose së paku ti thotë se kur gabon. Por që një jurist që paguhet nga paratë e taksapaguesve në institucionin më të lartë të shtetit, është gabim i rëndë.

Gjithsesi këshilltari i Metës tha një të vërtetë. Ai tha se dekreti i ri do të dalë pas negociatave mes palëve dhe marrëveshjes eventuale mes tyre. Por prapë këtu bëri një “gabim”: nxori gënjeshtar shefin e tij, që një ditë më herët deklaroi me zë të fortë se nuk do priste dakortësinë e PS, për të nxjerrë një datë të re zgjedhjesh.

Ndoshta ndaj dhe Meta zgjodhi të mos dilte vetë. Burri që është burrë, nuk gënjen kurrë. Por nëse gënjen, nxjerr këshilltarin që të pranojë gabimin. /realstory.al

Rama: Meta ndoti Kushtetutën, nuk duhet të rrijë në atë karrige

Kryeministri Rama në fjalën e tij në Kuvend iu përgjigj të gjithë kritikëve që e akuzojnë se ishte ai që e zgjodhi Metën President. Rama tha se para dy vjetësh nuk e kishte menduar kurrë se Ilir Meta do bënte veprime të tillë që çorodisin Kushtetutën dhe që vënë në jetë një plan të orkestruar nga Berisha.

“Unë e kam votuar Metën si president, gjithkush në këtë sallë që njësoj si unë këtu, ka bërë të njëjtën gjë, shumëkush me ka kritikuar në rrjetin tim social, vazhdimisht më zhdëpin me kritika për zgjedhjen e tij, jo pak më kanë mallkuar dhe për çdo paudhësi të Metës më janë përveshur mua.

Po të ecim mbrapsht në kohë do bëja prapë të njëjtën gjë, për shumë arsye. Ilir Meta u bë president me votat e tij. Dhe votat tona mund ta pengonin por nuk mjaftonin për të zgjedhur një president. A e kam imagjinuar unë kur u zgjodh se iliri do e kthente humbjen karakteristike dhe ciklite të kontrollit si një mjet sistematik për të çoroditur sistemin kushtetues me një plan çoroditës të orkestruar nga Saliu? Jo ketë jo nuk e kisha imagjinuar. Ka kaluar për tej çdo imagjinate. Ilir Meta e ka humbur të drejtën të qëndrojnë zyrën e presidentit”, tha Rama të enjten në Kuvend.

Në fjalën e mbajtur të enjten në Kuvend Rama kujtoi se Bujar Nishani asnjëherë nuk e kishte përdorur firmën e presidentit për PD-në, ndërkohë që Ilir Meta me këtë vendim është vënë në dispozicion të opozitës.

“Bujar Nishani nuk e përdorte Kushtetutën për interesa të partisë, pavarësisht se i shkonte pas avazit. Ai asnjëherë nuk e vuri Kushtetutën pas partisë. U desh të bëhej president Ilir Meta që të kujtojmë për mirë sot Bujar Nishanin, presidentin më partiak dhe më mediokër. Madje u desh të bëhej Ilir Meta president që libri i historisë të pasurohej me nocionin e çdekretimit. Dhe në faqet e veta të përfshinte dhe aktin e çfirmosjes. U desh të bëhej president Ilir Meta që historia e filozofisë botërore të përballej me një koncept befasues për njerëzimin. Gjithë filozofët grek, janë rrotulluar në varret e tyre kur kanë ardh fjalë për këtë kategori të re të konsensusit”, tha Rama.

Ai u shpreh i bindur se në Shqipëria nuk do të kenë një ’97 tjetër, ndërsa theksoi se PS nuk heq dorë nga zgjedhjet e 30 qershorit.

“97 tjetër? Përse? Çfarë ka ndodhur që të kthehemi në të kaluarën. Cilat skema piramidale pa bien dhe gjaku i kujt po digjen që të digjet Shqipërinë sërish si në ’97. Në cilën depo amartimesh NATO do hapë dyert për të armatosur shqiptarët kundër njëri tjetrit. Cili është halli që nxjerr në sheshe bashkitë blu që nxjerr të rinj me maska që vijnë të ngarkuar dhe urinojnë në derën e kryeministrisë. Dua të bëj sa më të qartë se ne nuk ka asgjë që na tund nga 30 qershori. E pranojmë si të keqen me të vogël zgjedhjen e atyre që na lënë me 1 kandidat në këtë bashki

Duke shkuar në zgjedhje me këtë dhimbje koke nga arratisja e opozitës ne nuk garantojmë dot larminë e plotë të zgjedhjeve. Produkti i zgjedhjeve do jetë një hartë elektorale pothuasje 100% e purpurt nëse nuk do ketë ndonjë surprizë tek e tuk. Por kjo nuk ndodh se nuk na pëlqen neve të mos ketë garë në çdo bashki, dhe as se ka ndonjë plan totalitarist. Nuk është plani ynë ky, ky është plani i tyre. Ne duhet ta pranojmë realiteti si është për të mos rënë në kurthin dritëshkurtësisë nga meraku se qëndrimi në proces na bën bashkëfajtorë për shkak të zgjedhjes njëngjyrëshe! Jo aspak”, tha Rama.

Me dekretin e çdekritmit të datës së zgjedhjeve, Ilir Meta “lëshoi një re nga pantallonat“, u shpreh Edi Rama ndër të tjara gjatë fjalës së tij në parlament. Sipas Kryeministrit, kriza politike që ka kapur vendin, e shtuar tashmë edhe nga shfuqizimi i datës së zgjedhjeve, dëmton vendin, ekonominë, investimet dhe turizmin.

“Për të gjithë ata që duan një situatë sa të qartë aq dhe konfuze, sa të kuptueshme aq dhe absurde. Çfarë interesi vetjak kam unë, që të jem kaq i patundur, nga bindja që nuk është koha për kompromis, por është koha për fushatë për zgjedhje. Qeveria ka një mijë e një probleme për të adresuar, ekonomia goditet nga ky tension, turizmi dëmtohet. Qetësimi i situatës duke shfrytëzuar edhe skandalin e dekretimit të zgjedhjeve, duket dicka më e lehtë”.

“Një dhimbje jo e vogël koke, në kushte jo normale, drejt përpara në rrugën e 30 qershorit, kur s`ka asnjë lloj interesi të ngushtë pragmatist, kthehet në pengesë për qetësimin e kësaj situate dhe asnjë pengesë në rrugën e qeverisjes sikur edhe zgjedhjet të shtyheshin në pafundësi. Po të isha i shqetësuar për karrigen time dhe për qeverinë do isha më i lumtur, që presidenti lëshoi një re kaq të madhe nga pantallonat mbi datën e zgjedhjeve”.

“Ja lija fajin Ilirit për ndërprerjen brutale të fushatës, duke i thënë jazëk të qoftë zoti president. U zhduk data e zgjedhjeve nga horizonit dhe dilja si një burrë i urtë dhe i pafajshëm. Shpëtoja dhe unë bashkë me Partinë Socialiste nga zgjedhje të tjera më vonshme. Me ëktë budallallëk na jepet mundësia të thoshim nesër se nuk duam zgjedhje”, tha Rama.

Rama 50 minuta fjalim, Meta takim kokë më kokë me Kokëdhimën

E ndërsa kryeministri Edi Rama analizoi për 50 minuta vendimin e Metës për çdekretimin e datës së zgjedhjeve, Presidenti nga ana e tij bëri lëvizjen e radhës duke ftuar në një takim kokë më kokë Koço Kokëdhimën, dikur deputet i PS-së dhe njeri i afër të Ramës.

Aktualisht Kokëdhima është kryetar i partisë Zgjidhja dhe është regjistruar për të marrë pjesë në zgjedhjet e 30 qershorit.

Takimi me Metën po zhvillohet në kuadër të konsultimeve për datën e re të zgjedhjeve. Gjatë ditës së sotme Meta do të zhvillojë edhe takime me përfaqësues të partive të tjera.

Rama i kujton Metës skandalet e falura

Kryeministri Edi Rama në fjalën e së enjtes në Kuvend tha se Shqipëria i ka dhënë shumë Ilir Metës duke i dhënë postet më të rëndësishme të shtetit pa u bërë as 50 vjecc. Ai tha se Ilir Meta nuk do ndihej mirë edhe po të bëhej Mbret, ndërsa shtoi se ai i ka shumë borxhe Shqipërisë dhe shqiptarëve pasi i ka falur shumë skandale.

“E pyes veten se çfarë kërkon më shumë Ilir Meta nga Shqipëria. Kujt i ka bërë Shqipëria më shumë ndere sesa këtij njeriu të cilin pa mbushur ende 50 vjeç e ka bërë si askënd tjetër në histori, edhe kryeministër edhe kryetar kuvendi edhe presidenti të republikës. Kujt më shumë se Ilir Metës i janë falur përçarjet, skandalet dhe i është dhënë kaq e kaq herë mundësia të lindë i penduar, i kthjelluar. Kujt më parë se Ilir Metës i takon të pyes vetes se çfarë më shumë mund të bëjë që t’i lajë Shqipërisë sado pak detin me borxhe që u ka. Që t’u lajë sado pak socialistëve dhe zgjedhësve borxhet e të gjitha rasteve që e kanë toleruar.

Historia nuk e gjen një të dytë politikan me të cilin Shqipëria të ketë qenë kaq zemër gjerë. Ilir Meta është mësuar keq ta shkelmojë të mirën e tij, duke u bërë vend e pa vend protagonist i një skene kur Metës asnjeherë nuk i mjafton roli që ka, vendi ku ndodhet, maja ku ngjitet. Jo president, por edhe mbret të të gjithë shqiptarëve po ta shpallin shqiptarët por edhe të tëra trojeve dhe viseve shqiptareve, Ilir Meta nuk do të ndihej mirë”, tha Rama.

ERTV Live😊: REZOLUTË MBI SHFUQIZIMIN E DEKRETIT PËR ZGJEDHJET E 30 QERSHORIT NGA PRESIDENTI I REPUBLIKËS
Gepostet von Edi Rama am Donnerstag, 13. Juni 2019

Ralf Gjoni: Ditë e zezë për Shqipërinë, zgjedhja e Ilir Metës president

Deputeti i ardhur nga listat e LSI-së, Ralf Gjoni tha të enjten në Kuvend se zgjedhja e Ilir Metës president ishte një ditë e zezë për të, pasi ai e dinte se largimi i tij nga LSI do të sillte vdekjen e kësja partie.

Gjoni tha se PS mendoi se duke çuar Metën në Presidencë do ta hiqte qafe atë, por harroi se Ilir Meta është bishë politike.

“Ju e votuat Ilir Metën. Unë jam i vetmi që e kam jetuar si një ditë të zezë ditën e votimit të Ilir Metës. Edhe ju nuk keni dashur por e votuan. Unë e dija se largimi i Ilir Metës nga LSI ishte fillimi i fundit të partisë. Zgjedhja e Ilir Metës nga PS nuk ka qenë në shërbim të shqiptarëve. Edi Rama ju urdhëroi ta zgjidhnit Ilir Metën sepse donit ta hiqnit qafe nga politika dhe e çuat në presidencë që më shumë i ngjan një azili pleqsh. Ilir Meta është bishë politike. Ku jeton dot ai pa politikë. Ju menduat se ai do ishte mbi palët. Hajde mendje hajde. Presidenti nuk e çdekreton dot një dekret sepse ju e keni zhvlerësuar presidentin. Me mirë të ishim monarki. Për çfarë vlen presidenca në një republikë parlamentare?”, tha Gjoni.

Fino: Kemi presion nga militantët, bëmë gabim me Metën, por gabojmë po ta shkarkojmë (tani)

Deputeti socialist Bashkim Fino në fjalën e mbajtur në seancën e së enjtes, ndërsa vuri në dukje shkeljen e Kushtetutës nga Ilir Meta, tha se PS bëri gabim me zgjedhjen e tij si presidenti. Fino tha se pavarësisht kësaj, shkarkimi i tij nuk e zgjidh gabimin e bërë, por sugjeroi që Meta duhet lënë ta çojë deri në fund planin e tij.

“E kuptoj presionin e militantëve të partisë për shkarkimin e Metës. Janë po ata militantë që na panë me inat kur e zgjodhëm president.

Nuk mendoj se shkarkimi i Metës i jep zgjidhje gabimit që kemi bërë. Ta lëmë Metën ta çojë deri në fund skemën e tij”, tha Fino.

Meta nuk bind as LSI: as gjysma pro shtyrjes së zgjedhjeve

Pyetjes “Zgjedhësit që mendojnë se Ilir Meta ka të drejtë për anulimin e zgjedhjeve vendore të 30 qershorit?” në sondazhin e kryer nga Instituti Italian GPF Inspiring Research vetëm 47.4 % e votuesve që thonë se do të votonin për LSI, e kanë vlerësuar si të drejtë vendimin e presidentit Ilir Meta për të shtyrë zgjedhjet lokale të 30 qershorit.

Ndërkohë, në radhët e demokratëve vetëm 40.6% shprehen “pro” vendimit të Metës për shtyrjen e zgjedhjeve dhe nga socialistët vetëm 0.9%.

Dekreti i Metës. Çfarë është presidenti për ju?

Dekreti i Metës: 54.6 % e shqiptarëve mendojnë se duhet shkarkuar

GPF Inspiring Research, një institut italian që merret me sondazhe ka zhvilluar një të tillë lidhur me situatën politike në Shqipëri. Sondazhi i publikuar nga Report TV ka dhënë përgjigjet për disa nga pyetjet e ngritura një prej të cilave ishte: A jeni dakord me vendimin e Partisë Socialiste për të shkarkuar presidentin Meta?

Në votim 54.6 % e votuesve janë përgjigjur pro këtij vendimi, ndërsa 39.5 % janë shprehur kundër. Ditën e enjte në Kuvend është përcaktuar një seancë 5 orë ku do të diskutohet mocioni për debat se pse Meta ka gabuar me dekretin për shfuqizimin e zgjedhjeve të 30 qershorit.

Dekreti i Metës. Çfarë është presidenti për ju?

“Puthu me Milon”. Aleati i Ramës pro shtyrjes së zgjedhjeve.

Kreu i Partisë Demokracia Sociale, Paskal Milo , aleat i Partisë Socialiste në zgjedhje, është takuar me presidenti Meta të mërkurën mbi diskutimin e një datë të re për zgjedhjet lokale. PDS është në aleat i Partisë Socialiste në zgjedhjet e 30 qershorit, e cila kundërshton me forcë aktin e Metës për shfuqëzimin e tyre. Milo ka thënë se nuk është në kundërshtim me shtyrjen e zgjedhjeve, rëndësi kanë standardet mbi të cilat do të mbahen.

“S’ka rëndësi se kur bëhen zgjedhje, rëndësi ka që të bëhen sipas standardeve të plotësojnë kriteret demokratike, të jenë të lira dhe në mënyrë të veçantë të jenë gjithëpërfshirëse.” tha Milo për mediat, ndërsa shprehu gatishmërinë e tij për t’u takuar me çdo parti politike në mënyrë që të gjendet zgjidhja e krizës. ” Ne do vijojmë të takohemi jo vetëm me presidentin. Shprehim gatishmërinë tonë për t’u takuar me të gjitha subjektet politike për ta trajtuar me përgjegjshmëri krizën politike në të cilën ndodhet Shqipëria që të gjejmë zgjidhjen më të përshtatshme më të domosdoshme. Në këto momente të vështira duhet të dëshmojmë urtësi dhe klasës politike përgjegjshmëri që interesi kombëtar të mbizotërojë mbi interesat politike.”

Dekreti i Metës. Çfarë është presidenti për ju?

PDS është pjesë e “Aleancës për Shqipërinë Europiane”, por kjo thotë Milo nuk e pengon të jetë i lirë të shpreh pikëpamjet e tij. “Subjekti politik që përfaqësoj vendos interesin kombëtar. Duam stabilitet dhe që Shqipëria të shmangë përplasjet politike dhe sociale.” /realstory.al