NATO, mbështetje për SHBA në Lindjen e Mesme

Të gjitha vendet anëtare të NATO-s shprehën mbështetje ndaj SHBA në Lindjen e Mesme, tha Sekretari i saj i Përgjithshëm Jens Stoltenberg të hënën, pas informimit që iu bë atyre mbi sulmin me dron të së premtes, i cili çoi në vrasjen e komandatit të forcave elitë iraniane, Kasem Sulejmani.

Duke folur pas një takimi të pazakontë të NATO-s për Iranin dhe Irakun, në të cilin Shtetet e Bashkuara informuan aleatët, zoti Stoltenberg bëri thirrje për ulje të tensioneve, duke u bërë jehonë deklaratave të disa udhëheqësve evropianë.

“Ne jemi të bashkuar në dënimin që i bëjmë mbështetjes së Iranit për një shumëllojshmëri grupesh terroriste,” tha zoti Stoltenberg.

“Në takimin e sotëm, aleatët bënë thirrje për përmbajtje dhe çtensionim. Një konflikt i ri nuk do të ishte në interes të askujt. Prandaj Irani duhet të përmbahet nga dhuna dhe provokimet e mëtejshme”, tha ai.

Megjithë zemërimin vitin e kaluar midis disa aleatëve evropianë të NATO-s ndaj strategjisë amerikane në Lindjen e Mesme nën Presidentin Donald Trump, dy diplomatë të pranishëm konfirmuan se takimi dy-orësh në selinë e NATO-s u zhvillua pa probleme, sipas agjencisë së lajmeve Reuter.

Ata thanë se asnjë ambasador nuk i sfidoi zyrtarët e Departamentit të Shtetit dhe të Mbrojtjes, të cilët informuan me videokonferencë mbi operacionin me dron.

Në takim nuk pati diskutime apo kritika rreth listës me objektiva të Presidentit Trump, që përfshijnë edhe objekte kulturore, nëse Irani hakmerret me sulme ndaj amerikanëve ose pronave të SHBA, thanë diplomatët.

Takimi u përqendrua kryesisht te vendimi i NATO-s për të pezulluar misionin e saj të trajnimit në Irak, pas një rezolute të parlamentit irakian, që bënte thirrje për largimin e trupave të huaja.

Ndërsa ekzistonte shqetësimi se vrasja e njeriut të dytë më të fuqishëm të Iranit mund të shkaktojë një konflikt të ri në Lindjen e Mesme, Franca, Gjermania dhe të vende të tjera thanë se dëshirojnë që misioni në Irak të vazhdojë.

“Do të dërgohej sinjali i gabuar nëse tërhiqemi,” tha një diplomat i NATO-s.

Misioni i NATO-s për Irakun, i përbërë nga disa qindra trajnues, këshilltarë dhe staf mbështetës si nga vende anëtare ashtu edhe jo-anëtare, partnere të aleancës, përfshin personel ushtarak dhe civil./VOA/

Udhëheqësit e NATO-s në samitin e Londrës dhe paratë

Udhëheqësit e NATO-s u mblodhën të mërkurën në një vendpushim golfi pranë Londrës për të paraqitur një front të bashkuar mes mosmarrëveshjeve të hidhura mbi terrorizmin, Turqinë dhe rritjen e ndarjes së barrës me Shtetet e Bashkuara.

29 udhëheqësit, përfshirë Presidentin Donald Trump, pozuan për një fotografi tradicionale “familjare” përpara se të largoheshin për takimin e planifikuar prej tre orësh. Udhëheqësit e NATO-s thanë se “veprimet agresive” të Rusisë ishin një kërcënim për sigurinë euro-atlantike dhe ndikimi në rritje i Kinës

paraqet mundësi dhe sfida për aleancën. Në një deklaratë të publikuar pas samitit të Londrës, 29 udhëheqësit riafirmuan “lidhjen e qëndrueshme Transatlantike” midis Evropës dhe Amerikës së Veriut, dhe parimin e mbrojtjes së ndërsjellë sipas të cilit një sulm kundër një vendi anëtar vlerësohet si një sulm kundër të gjithëve.

Në kuadër të takimeve të Natos, Presidenti Trump u takua me Presidentin turk Rexhep Tajip Erdogan. Shtëpia e Bardhë tha se “të dy Presidentët diskutuan mbi rëndësinë përmbushjes së angazhimeve të Turqisë ndaj aleancës, forcimin e mëtejshëm të tregtisë përmes një marrëveshjeje dypalëshe prej 100 miliardë dollarësh, sfidat rajonale të sigurisë dhe energjinë.”

Një ditë më parë, udhëheqësit ishin mbledhur për takime joformale për të shënuar 70 vjetorin e themelimit të aleancës, por festimet u zbehën kur tensionet mes Presidentit Trump dhe Presidentit Francez Emmanuel Macron u shfaqën publikisht përmes ekranit të televizionit.

Në një seancë gati 40-minutëshe me gazetarët, të dy udhëheqësit u përplasën për një numër çështjesh, përfshirë ndarjen e barrës brenda NATO-s, terrorizmin, inkursionin e Turqisë në veri të Sirisë dhe tërheqjen e Shteteve të Bashkuara nga një traktat armësh me Rusinë.

Të dy udhëheqësit u takuan disa orë pasi Presidenti Trump kritikoi Presidentin Macron për deklaratën e tij të fundit duke e cilësuar NATO-n se po përjetonte një “vdekje klinike”, për shkak të udhëheqjes së zvogëluar të Shteteve të Bashkuara. Presidenti Trump e quajti atë një “deklaratë të rrezikshme”.

Ndërsa të dy udhëheqësit u ulën për bisedime, Presidenti Trump paralajmëroi vendet anëtare të NATO-s që nuk plotësojnë kuotën 2% të PBB-së për mbrojtjen kolektive, se mund të përballen me “pasoja tregtare” duke iu referuar tarifave të produkteve, përfshirë ato për verën franceze.

Kjo bëri që Presidenti Macron, i cili aktualisht po kontribuon me 1.9% të PBB-së të Francës për NATO-n, të përgjigjej.

“Nuk është vetëm çështje parash,” tha presidenti Macron. “Po paqja në Evropë?” pyeti ai Presidentin Trump.

“Është e pamundur të thuash vetëm se duhen paratë, ushtarët, pa patur të qartë themelet e asaj që duhet të jetë Nato-ja, tha Presidenti Macron.

Macron tha se ai mbështet një komponent më të fortë evropian në NATO, por theksoi se pas përfundimit të Traktatit INF (Forcave Bërthamore me Rreze të Mesme), vendet evropiane përballen me një kërcënim të ri të raketave ruse.

Administrata Trump u tërhoq nga traktati i kontrollit të armëve në vitin 1987 midis Shteteve të Bashkuara dhe Bashkimit Sovjetik në gusht pas atyre që thotë se ishin shkelje të përsëritura të Moskës ndaj marrëveshjes.

Trump dhe Macron argumentuan rreth mënyrës së zgjidhjes së problemit me Shtetin Islamik pas tërheqjes në tetor të forcave amerikane nga Siria, një veprim që Presidenti Trump e bëri pa u këshilluar me aleancën. Tërheqja hapi rrugën që Turqia të niste një ofensivë kundër milicisë kurde, aleate e Shteteve të Bashkuara në veri të Sirisë dhe shkaktoi shqetësim mes aleatëve për një ringjallje të mundshme të ISIS-it.

Në përgjigje të një pyetje nëse Franca duhet të bëjë më shumë për të marrë luftëtarët e Shtetit Islamik të kapur në Lindjen e Mesme, Presidenti Trump e pyeti Macronin nëse ai do të donte “disa luftëtarë të spikatur të ISIS-it”.

Presidenti Macron u përgjigj duke thënë se problemi kryesor janë luftëtarët e ISIS-it në rajon. Duke iu referuar tërheqjes së papritur të Shteteve të Bashkuara nga veriu i Sirisë, Macron tha “ka gjithnjë e më shumë nga këta luftëtarë për shkak të situatës së sotme”.

Macron është “më shumë në krah të atyre që duan të përballen me krizën dhe të flasin për të,” tha Hans Kundnani nga organizata Chatham House. Ai është një “faktor shkatërrues” në krahasim me liderët e tjerë që mund të zgjedhin të shoshisin mosmarrëveshjet, tha zoti Kundnani.

Samiti vjen ndërsa Trump përballet me një hetim të Dhomës së Përfaqësuesve për shkarkimin e tij. Ai përsëriti kritikën e tij të martën për demokratët që kontrollojnë Dhomën e Përfaqësuesve, duke thënë se është e padrejtë të mbahen seanca dëgjimore ndërsa ai po merr pjesë në samit.

Trump nuk është presidenti i parë i amerikan që merr pjesë në një samit të NATO-s nën renë e fajësimit. Në vitin 1974 Richard Nixon shkoi në takimin e 25-vjetorit të NATO-s në Bruksel, ndërsa Dhoma e Përfaqësuesve po përmbyllte hetimin e saj për procesin e shkarkimit. Nixon dha dorëheqjen pak javë më vonë./VOA/

Tragjedia nga tërmeti, flamuri shqiptar në NATO në gjysmështizë

Shqipëria mori mesazhe të shumta solidariteti dhe mbështetje, pas tërmetit të fuqishëm që goditi vendin mëngjesin e të martës.

Aleanca e Atlantikut të Veriut, NATO, vendosi të ulte në gjysmështizë flamurin shqiptar në nderim të tragjedisë së tërmetit.

Me anë të një reagimi në Twitter, NATO u shpreh se: “Flamuri i aleatëve tanë, Shqipërisë dhe Francës, u ulën në gjysmështizë në selinë e NATO, pas tërmetit që goditi Shqipërinë dhe në solidaritet me ushtarët francez të rënë në Mali”.

The flags of our Allies 🇦🇱Albania and 🇫🇷France are at half-mast outside NATO Headquarters, following the earthquake in Albania and to honour the fallen French soldiers in Mali. pic.twitter.com/RiusEn5jxN
— NATO (@NATO) November 26, 2019

Pse del Macron në krye të atyre që shajnë NATO-n?

Akuza e Emmanuel Macronit se NATO ndodhet në vdekje klinike ka ngritur më shumë pyetje për gjendjen e kreut të shtetit francez, se për NATO-n. Teri Schultz shikon efektet e kësaj deklarate.

Mike Pompeo ishte modeli i vetë-përmbajtjes në Berlin. I ndodhur në Gjermani për festimet e rëniës së Murit të Berlinit, sekretari i Departamentit të Shtetit u pyet, nëse ai beson, se NATO është në gjendjen e vdekjes klinike, për shkak të mungesës së angazhimit amerikan, siç tha presidenti francez, Emmanuel Macron të enjten në një intervistë për The Economist. Pompeo i dha nota komike këtij momenti, priti pak dhe tha „kaq shumë përgjigje të mira”, duke qeshur me vete, pastaj „kaq shumë kamera”, shtoi ai duke qeshur më shumë e duke shkaktuar edhe duartrokitje tek audienca.

Kryediplomati i Donald Trump u soll si burrë shteti, më shumë se në ndonjë dalje të mëparshme publike në Europë, pa iu adresuar as Macronit në mënyrë specifike e as referimit për „vdekjen klinike”. „70 vite (NATO) ka nevojë të rritet dhe të ndryshojë. Ka nevojë të kontrontohet me realitetet e sotme dhe sfidat e sotme”, tha ai.

„Nuk besoj, se këto angazhime (politike) të vendeve tona do të humbasin ndonjëherë rëndësinë.” Megjithatë ai shtoi, se „nëse nuk i bën ato që duhet për t’u konfrontuar me sfidat e sotme në mënyrë efektive, nëse vendet besojnë, se mund të marrin të mirat e sigurisë pa siguruar burimet që nevojiten për këtë, nëse ato nuk i përkushtohen angazhimeve të tyre, atëherë ka një rrezik që NATO të mund të bëhet joefektive ose e vjetëruar.”

Vërejtet e Macronit

Jonathan Eyal, drejtor i institutit me qendër në Londër, RUSI, thotë, se Macron u ka bërë një dhuratë atyre që e mohojnë NATO-n me deklaratën se aleanca nuk ka shenja jete. Kremlini për shembull ishte mes vëzhguesve entuziastë të qëndrimit të Macron. Zëdhënësja e Ministrisë së Jashtme të Rusisë, Maria Zakharova e përcaktoi deklaratën e Macron si „fjalë të arta” që përcaktojnë në mënyrë të saktë gjendjen aktuale të NATO-s.”

Eyal habitet se edhe sa kohë do të kërkojë që Donald Trump ta përhapë komentin e Macron, si evidencë për të, se ai ka pasur të drejtë për një kohë të gjatë për mangësinë kolektive të europianëve në çështjen e mbrojtjes. Sipas Eyal, mund ta kritikosh aleancën, por ka mënyrë më produktive për ta bërë këtë. „Ajo që bëri presidenti francez, është vënie në dyshim e fundamenteve të rendit të pas-luftës pa ofruar aktualisht asnjë gjë substanciale kundër kësaj.”

Qasje ruse … vërtet?

Justyna Gotkovska, eksperte e mbrojtjes në Qendrën e Studimeve për Europën Lindore në Varshavë ka një qëndrim shumë më tepër kritik. Duke shënuar, se SHBA, megjithë ankesat e ka rritur angazhimin e saj ushtarak në Lindje, „Franca ka qenë vetëm pak e përfshirë në masat e strategjisë së frikësimit në krahun lindor”, tha ajo për DW.

Gotkovska është veçanërisht e shqetësuar për pohimin e Macronit,se Europa nevojitet „të rikonsiderojë pozicionin e saj me Rusinë”, të cilën ajo e shikon se tejet pajtues. „Nëse Franca është e shqetësuar për sigurinë europiane, po bën shumë që ta dobësojë atë, me vënien në pikëpyetje të vlerës së NATO-s, si dhe duke harruar performacën e dobët të ushtrive europiane e duke gjykuar gabimisht politikat dhe qëllimet ruse.” Retorika e Macron shkon në favor të Rusisë, sipas saj.

Niklas Novaky nga qendra studimore Martens shton, se Macron prek një nerv ne vendet lindore europiane. „Ato e ndjejnë me të drejtë që NATO është gurthemeli i sigurisë së tyre dhe se nuk mund të mbështeten vërtet mbi diçka autonome europiane që mund të propozojë Parisi.”, thotë Novaky. Kjo është shqetësuese edhe për jo anëtarë të NATO-s, si Finlanda, që e shohin aleancën si bazë të stabilitetit në rajonin baltik. Novaky thotë, se këto deklarata më shumë kanë efekt negativ për vetë Macron, „dhe ngrenë pyetjen shumë legjitime mes vendeve anëtare të NATO-s për angazhimin e Francës aty.”

Sipas Novakyt është e paqartë se cili ka qenë qëllimi i presidentit francez me këtë deklaratë, ndoshta deklarata e tij mund edhe të ketë qenë një gabim pa ndonjë qëllim, është i mendimit ai. „Ajo vetëm se e komplikon axhendën e tij politike të mbrojtjes në kontekstin e Bashkimit Europian dhe jashtë BE.” Por komplikon edhe axhenda të tjera, thotë eksperti Eayl, duke përfshirë edhe takimin e ardhshëm të krerëve të shteteve e qeverive të aleancës në Londër në dhjetor./DW/

Pompeo: NATO të ndryshojë, ndryshe rrezikon të vjetërohet

Sekretari amerikan i Shtetit Mike Pompeo tha të premten se NATO-ja duhet të rritet dhe të ndryshojë përndryshe rrezikon të vjetërohet. Komentet e tij vijnë një ditë pas deklaratës së presidentit francez Emmanuel Macron dhënë revistës The Economist se aleanca është në vdekje klinike, komente që u hodhën poshtë nga kancelarja gjermane Angela Merkel.

Zoti Pompeo tha se aleanca është ndoshta një nga më të rëndësishmet “në të gjithë historinë e derisotme”. Pas fjalimit në Berlin, sekretari Pompeo iu përgjigj pyetjes nëse NATO-ja është e vjetëruar ose klinikisht e vdekur. Ai u përgjigj se pas 70 vjetësh, aleanca duhet të rritet dhe të ndryshojë, duhet të përballet me realitetet dhe sfidat e sotme.

“Nëse vendet e ndryshme besojnë se mund të marrin përfitimet që sjell siguria pa i siguruar NATO-s burimet që i duhen, nëse ato nuk i respektojnë angazhimet e tyre, ekziston rreziku që NATO-ja të bëhet e paefektshme ose e vjetëruar,” tha ai.

Në fjalim, zoti Pompeo kritikoi trajtimin e Rusisë ndaj kundërshtarëve politikë dhe tha se taktikat e Kinës duhet të jenë mjaft të njohura për njerëzit e ish-Gjermanisë Lindore. Ai tha se vendet e lira janë në konkurrencë vlerash me vendet më pak të lira. Zoti Pompeo ndodhet në Gjermani në prag të 30 vjetorit të rënies së Murit të Berlinit.

Duke reflektuar mbi mësimet e nxjerra nga rënia e Muri në vitin 1989, zoti Pompeo tha se “Perëndimi dhe të gjithë ne humbëm rrugën në muzgun që ra pas atij momenti krenar”. “Ne menduam se mund t’i zhvendosnim burimet tona larg aleancave dhe ushtrive tona, por e kishim gabim,” tha ai.

“Sot, Rusia udhëhiqet nga një ish oficer i KGB-së, dikur i stacionuar në Dresden. Ajo pushton fqinjët dhe vret kundërshtarët politikë”. “Ne nuk duam që furnizimet me energji të Evropës të varen nga Vladimir Putini,” shtoi ai, duke iu referuar tubacionit të gazit Nord Stream 2 i cili do të transportojë gaz natyror nga Rusia në Gjermani.

Zoti Pompeo tha se Partia Komuniste Kineze po “formon një vizion të autoritarizmit” dhe paralajmëroi Gjermaninë që të mos përdorë pajisjet e firmës kineze Huawei Technologies për ndërtimin e rrjetit 5G të të dhënave. “Shefi juaj i inteligjencës ka thënë se Huawei nuk mund të besohet plotësisht”, tha ai.

Në Pekin, Ministria e Jashtme e Kinës e kritikoi zotin Pompeo për komentet e tij të mëparshme në adresë të Partisë Komuniste Kineze, duke thënë se komentet ishin “jashtëzakonisht të rrezikshme” dhe kishin nxjerrë në pah “qëllimet e tij të errëta” siç i cilësoi ajo./VOA/

Stoltenberg: Maqedonia e Veriut anëtare e NATO-s brenda dhjetorit

Sekretari i Përgjithshëm i NATO-s, Jens Stoltenberg, ka njoftuar këtë të martë se Maqedonia e Veriut do të bëhet anëtare e plotë e aleancës deri në fund të vitit 2019. Gjatë një konference për shtyp, Stoltenberg tha se ratifikimi i protokollit të pranimit për Maqedoninë e Veriut do të jetë mbyllur deri në dhjetor, ndërsa anëtarësimi pritet të miratohet në Samitin e Londrës.

“Nuk varet nga ne sa shpejt do të ratifikohen, por do të ishte shumë mirë nëse mund të përfundojnë deri në dhjetor kur liderët të takohen në Londër. Nëse jo atëherë, pres që kjo të ndodhë shumë shpejt më pas,” tha Stoltenberg.

Stoltenberg theksoi se Maqedonia Veriore përmbush të gjitha standardet për anëtarësimin në NATO. Sipas tij, anëtarësimi i Maqedonisë Veriore në NATO është sinjal se politika e “dyerve të hapura” po funksionon me sukses.

“Zgjerimi i NATO-s është një histori e madhe suksesi që ndihmon përhapjen e prosperitetit, stabilitetit dhe demokracisë në Evropë”, tha Stoltenberg. Gjatë takimit të NATO-s në Bruksel, të martën dhe të mërkurën, ministrat e alenancës pritet të diskutojnë rreth tensionit në rritje në Lindjen e Mesme dhe problemeve me armët bërthamore me Rusinë.

Haradinaj: Paqen e bëjnë të guximshmit, ne guxojmë të pajtohemi me Serbinë

Kryeministri i Kosovës, Ramush Haradinaj i ka bërë thirre Serbisë për pajtim dhe të vazhdojnë të qeverisin si dy vende të pavarura larg luftës për territore e kufij. “Paqen e bëjnë të guximshmit dhe ne guxojmë me u pajtu me Serbinë.” ka thënë Haradinaj gjatë fjalimit të tij në 20 vjetorin e ndërhyrjes së forcave të NATO-s në Kosovë.

Ai nuk harroi pa vlerësuar edhe ndihmën që SHBA dhe ndërkombëtarët i kanë dhënë dhe vijojnë t’i japin popullit të Kosovës.

“Shteti i Kosovës është vlerë e re në rajon, vlerë e shtuar në botë dhe sjell paqe në rajon. Paqen e bëjnë të guximshmit dhe ne guxojmë me u pajtu me Serbinë. I bëjmë thirrje popullit të Serbisë edhe presidentit Vuçiç ta njohë Kosovën si të pavarur në kufijtë e vet në mënyrë që ne që qeverisim të punojmë më shumë e të fokusohemi në vendet e punës për qytetarët tonë dhe në qeverisjen më të lirë dhe në luftimin e korrupsionit. Në mënyrë që brezave tu lëmë lirinë e respektin dhe jo luftën për territore e kufij. Kosova është gati për tu pajtuar dhe i bën thirrje Serbisë për pajtim. E bëjmë dhe në falenderim të ndihmës që na ka dhënë bashkësia ndërkombëtare.

Presidenti Klinton jeni në shtëpinë tuaj. Të gjithë sot jemi në shtëpinë tonë. Zoti bekoftë Kosovën dhe aleatët e Kosovës”. – tha Haradinaj/realstory.al

Medelenie Albrigt: Jam krenare që ndalëm luftën barabare së bashku!

Kosova ka kujtuar këtë 12 qershor ditën e përfundimit të luftës, pas ndërhyrjes së trupave të NATO-s ndaj forcave serbe. Ishe vendosmëria e SHBA-së 20 vite më parë, që bëri që në Kosovë të merrte fund lufta e përgjakshme dhe spastrimi etnik i popullësisë shqiptare nga forcat serbe. Ish-sekretarja e Shtetit Amerikan, Madelenie Albrigt, ishte e pranishme në ceremonin ë 20 vjetorit të ndërhyrjes së NATO-s, ku ka shprehur lumturinë për çlirimin e Kosovës.

“Jam e krenare me atë që kemi bërë së bashku. Lufta në Kosovë ka qenë një përballje e vrasjeve barbare ndaj popullësisë, më e rëndësishma është se ja dolëm. Fushata jonë ishte e vendosur në bazat e drejtësisë, sepse populli shiqptar po largohje dhe dëbohje edhe përgjigja jonë ishte JO”, tha Albright.

Ajo ka treguar kohën kur ishte në kamp ku ishin dëbuar mbi 20 mijë shqiptarë. “Më kujtohet një tok me shumë pluhur, ku ishin 20 mijë të dëbuar, dhe një fëmijë po e mbanete letrën që dëshironte të kthehej në Kosovë dhe i thash se kur të ktheheni NATO do të jëtë aty për të garantuar një jetë normale. Kosova ishte më në fund e lirë. Koha kishte ardhë të filloj një kohë e re për Kosovën dhe për rajonin”, tha Albrigt.

Çlirimi i Kosovës, Thaçi: Tani meritojmë BE-në dhe NATO-n, gati për marrëveshje me Serbinë

Kosova ka kujtuar 20 vjetorin e përfundimit të luftimeve në territorin e saj me forcat agresore serbe, pas ndërhyrjes së NATO-s. Në ceremoninë e zhvilluar në Prishtinë, Presidenti i Kosovës Hashim Thaçi u shpreh se “12 qershori është në themelet e identitetit tonë si popull i Kosovës”.

“12 qershori është në themelet e identitetit tonë si qytetarë, si popull, si Kosovë, si pjesë e pandashme e Evropës dhe e Perëndimit. Këtë kurrë nuk do ta harrojmë, do ta respektojmë përgjithmonë. Ashtu siç jemi sot së bashku, si kosovarë, amerikanë, britanikë, gjermanë, francezë, italianë, e nga shumë vende tjera në këtë ditë të bukur qershori në kryeqytetin e shtetit të Kosovës, në Prishtinë, ashtu ishim bashkë në periudhën më të rëndë, më të errët dhe më tragjike në historinë e re të Kosovës: – atëherë kur ishte rrezikuar vetë mbijetesa e një populli, – atëherë kur qytetarët e Kosovës ishin në gjendje të sakrifikojnë gjithçka për liri dhe për t’u bërë zot të fatit të vet”, u shpreh Thaçi.

Gjatë fjalës së tij Hashim Thaçi u shpreh se Kosova meriton të integrohet në Bashkimin e Europian dhe në NATO, pasi sips tij, Kosova ka bërë progres të rëndësishëm për të merituar këtë.

“Ne mburremi që jemi sot populli më proamerikan, më properëndimor dhe më proevropian në këto anë të botës. Por, ne jemi të bindur që së bashku duhet dhe mund ecim më shpejt drejt integrimit të Kosovës në Aleancën Veriatlantike dhe në Bashkimin Evropian. Ne e meritojmë këtë. Ashtu siç kemi merituar të jemi të lirë. Ashtu siç e kemi merituar të bëhemi shtet”, u shpreh Thaçi.

Më tej, kreu i shtetit kosovar, tha se Kosova tashmë po punon për të siguruar njohjen e pesë shteteve anëtare të BE, që ende nuk e kanë njohur atë, ndërsa nga ana tjetër theksoi se Kosova është e gatshme të bëjë një marrëveshje historike me Serbinëm për normalizimin e dy vendeve.

“Në anën tjetër, e dimë që rrëfimi për ne si Kosovë, si shtet, nuk mund të rrumbullakohet në tërësi pa e ngritur flamurin e Kosovës në East River, në selinë e OKB-së. Pa e siguruar edhe njohjen nga pesë shtetet e BE-së. Ashtu siç kemi qenë shumë vite më parë të gatshëm për ta bërë marrëveshjen historike me Serbinë, ashtu jemi edhe sot të vullnetshëm që të bisedojmë me Serbinë për ta bërë Marrëveshjen Gjithëpërfshirëse për normalizimin e marrëdhënieve në mes të dy shteteve”, u shpreh Thaçi.

SHBA: Kosova dhe Serbia të njohin njëra-tjetrën, ulni tonet ekstremiste

Amerika i kërkon Kosovës dhe Serbisë që të lënë mënjanë retorikën ekstremiste, dhe të ulen për të arritur një marrëveshje, që do të finalizohej me njohjen e ndërsjelltë mes tyre. Zëdhënësi i Shtëpisë së Bardhë, Judd Deere, në një deklaratë me rastin e 20 vjetorit të përfundimit të operacionit të NATO-s, që i dha fund spastrimit etnik të Kosovës nga Serbia, është shprehur:

“Prishtina dhe Beogradi duhet të dyfishojnë përpjekjet për të punuar drejt një marrëveshjeje gjithëpërfshirëse të përqendruar në njohjen reciproke dhe të heqin menjëherë pengesat ndaj përparimit.”

“E vetmja rrugë për një të ardhme më të mirë është një dialog midis fqinjësh që të synojë normalizimin e marrëdhënieve dhe t’i hapë rrugën Serbisë dhe Kosovës të kenë vendin e tyre të ligjshëm brenda komunitetit euroatlantik,” tha zëdhënësi.

“Shtetet e Bashkuara janë të gatshme të ndihmojnë gjatë gjithë këtij procesi, por i takon Kosovës dhe Serbisë që të ndërmarrin hapat e ardhshëm,” thuhet në deklaratën e Shtëpisë së Bardhë, e cila u bën thirrje Prishtinës dhe Beogradit të veprojnë tani e të mos ua lënë punën brezave të ardhshëm.