Tag: olsian cela

Dosja “tërmeti”, Olsian Çela u kërkon prokurorëve hetim të shpejtë

Pak ditë pasi u zgjodh Prokuror i Përgjithshëm, Olsian Çela zhvilloi një takim me prokurorët e Prokurorisë së Tiranës, ku të pranishëm ishin dhe drejtues të këtij institucioni. Sipas një njoftimi të bërë nga  Prokuroria e Përgjithshme, Çela mësohet të ketë diskutuar për disa tema që lidhen me funksionimin e policisë gjyqësore, organizimin e punës pas rritjes së numrit të prokurorëve etj.

“Në takim u diskutuan probleme që lidhen me funksionimin e policisë gjyqësore, vleresimin e performancës së saj, organizimin e punës pas rritjes së numrit të prokurorëve në këtë prokurori, çështje që lidhen me zbatimin e ligjit për prokurorinë, pavarësinë dhe përgjegjshmërinë e prokurorëve, ndërtimin e një sistemi efikas të monitorimit të zbatimit të ligjit në këto aspekte, si dhe u trajtuan  çështje  që lidhen me zbatimin e ligjit, ‘Për parandalimin dhe goditjen e krimit të organizuar”, thuhet ndër të tjera në deklaratë.

Gjithashtu, sipas njoftimit të Prokurorisë së Përgjithshme, Olsian Çela i kushtoi vëmendje të veçantë punës për hetimin e dëmeve të shkaktuara nga tërmeti. Sipas njoftimit, mësohet se kreu i akuzës u dha mbështetjen prokurorëve për hetimin e shpejtë dhe të plotë të rasteve dhe nxjerrjen përpara përgjegjësisë penale abuzuesit me detyrën.

“Në fokus  të veçantë të takimit ishte mbështetja që Prokurori i Përgjithshëm Olsian Çela  i ofroi drejtuesve dhe prokurorëve të kësaj prokurorie  për procedimet që lidhen me dëmet e shkaktuara nga tërmeti i datës 26 nëntor, përmes sigurimit të asistencës teknike dhe ekspertizës që do të ndihmojnë  në  hetimin e shpejtë dhe të plotë të rasteve. Ai inkurajoi prokurorët të kryejnë hetime gjithëpërfshirëse, për të individualizuar autorët e veprave penale dhe për t’i vënë ata para përgjegjësisë penale”, thuhet në njoftimin zyrtar të Prokurorisë së Përgjithshme.

Takimi me drejtuesit e Prokurorisë së Tiranës, i Olsian Çelës, dhe kërkesa për hetimin e dëmeve të shkaktuara nga tërmeti, vjen fill pas takimit që kreu i akuzës zhvilloi me ambasadorin e BE dhe të ngarkuarën me punë të SHBA në Tiranë. Gjatë takimit, Luigi Soreca dhe Leyla Moses-Ones i shprehën mbështetjen Prokurorit të ri të Përgjithshëm edhe për hetimin e përgjegjësve për dëmet që shkaktoi tërmeti. /Realstory.al/

Dosja “tërmeti” dhe SPAK, SHBA-BE mbështesin Çelën

Pas takimit me ambasadorin e Gjermanisë në Tiranë, Prokurori i Përgjithshëm Olsian Çela priti në takim ambasadorin e BE, Luigi Soreca dhe të ngarkuarën me punë të SHBA në Tiranë, Leyla Moses-Ones. Ambasadori i Bashkimit Europian, Luigi Soreca, zbardhi edhe temat e diskutuara me Prokurorin e ri të Përgjithshëm Olsian Çela.

Sipas ambasadorit të BE, në takim u diskutua për përparsitë kryesore të Prokurorit të Përgjithshëm, duke përfshirë dhe hetimin financiar proaktiv të zyrave të prokurorisë për tërmetin. “Së bashku me Leyla Moses-Ones, sot takova Prokurorin e Përgjithshëm të sapozgjedhur, Olsian Çela. Ne diskutuam për përparësitë kryesore të zyrës së tij të re, përfshirë rolin kryesor të hetimeve financiare proaktive, veprimin e zyrave të prokurorisë pas tërmetit dhe për fazën kalimtare drejt krijimit të SPAK ”, thuhet ndër të tjera në deklaratën e ambasadorit Soreca.

Gjithasht, dy drejtuesit e ambasadave të SHBA dhe BE në Tiranë, kanë diskutuar me Prokurorin e Përgjithshëm edhe për fazën kalimtare të krijimit të SPAK, ndërsa shprehen se zgjedhja e Olsian Çelës në krye të Prokurorisë së Përgjithshme është një hap përpara zbatimit të reformës në drejtësi.

“Zgjedhja e Z. Çela paraqet një hap tjetër të rëndësishëm përpara në zbatimin e Reformës në Drejtësi, e cila është një përparësi kryesore për Shqipërinë në rrugën e saj drejt integrimit në Bashkimin Europian”, thotë Soreca.

Ndërkohë, me një reagim të Ambasadës së SHBA, lidhur me takimin e Leyla Moses-Ones me Prokurorin e Përgjithshëm, thuhet se “e Ngarkuara me Punë përsëriti sërish mbështetjen e Shteteve të Bashkuara për reformën në drejtësi dhe rolin e rëndësishëm që institucionet e prokurorisë luajnë në luftën kundër krimit ndërkombëtar dhe korrupsionit”./Realstory.al/

🇦🇱️ | E Ngarkuara me Punë, a.i. Leyla Moses-Ones dhe Ambasadori i Bashkimit Europian Luigi Soreca u takuan sot me…

Gepostet von U.S. Embassy-Tirana am Mittwoch, 11. Dezember 2019

Olsian Çela merr detyrën, e nis me tërmetin: Njerëzit kërkojnë drejtësi

Arta Marku i ka dorëzuar detyrën Kryeprokurorit të ri Olsian Çela, i cili u zgjodh të enjten nga Kuvendi me 101 vota pro. Çela, i cili do të drejtojë Prokurorinë e Përgjithshme  për 7 vitet e ardhshme do e nis punën e tij pikërisht me çështjen e tërmetit dhe hetimet në lidhje me abuzimet që janë bërë me ndërtesat. Çela tha se populli kërkon drejtësi dhe shpreson që prokuroria të krijojë të gjitha mekanizmat e duhur dhe të veprojë ndaj padrejtësive në të njëjtin nivel që pret populli. Ai bëri edhe një vlerësim të punës së Arta Markut, ndërsa theksoi se tashmë vendi po hyn në një fazë të re edhe me krijimin e institucioneve të reja të drejtësisë.

“Transparenca është mënyra më e mirë për të rritur besimin e institucioneve dhe te publiku. Falenderoj dhe vlerësoj Markun për këtë punë në këto dy vite, në një fazë tranzicioni, ku vendi është përballur me mjaft probleme të mëdha. Ajo ka bërë më të mirën e mundshme. Tani hyjmë në një fazë të re, ku po ndërtohen institucionet e reja të drejtësisë. Prokuroria ka pësuar ndryshime rrënjësore, kjo kërkon një angazhim të ri dhe konceptim të ri si duhet të funksionojë ky organ. Kemi kapacitetet për t’i dhënë vendit një të ardhme më të mirë, që Shqipëria të bëhet pjesë e familjes së BE, rezultatet e punës sonë kanë rëndësi të jashtëzakonshme. Në këto kushte, unë mendoj se ka tashmë ka mundësi që Kryeprokurori mund të japë kontribut për t’u dhënë jetë ideve të reja. Sot ne ndodhemi në një fazë të vështirë, vendi po përballet me një krizë për shkak të ngjarjeve të fundit të muajit nëntor. Përgjigja që prokuroria duhet të japë në rastin konkret duhet të jetë, spikasë në raport me atë që po bëjnë institucionet e tjera, pasi njerëzit kërkojnë drejtësi, dhe gjërat të bëhen konkrete. Është një rast që jemi në lartësinë e asaj që pret vendi dhe njerëzit presin. Do të gjejmë të gjithë mekanizmat për të arritur atë që populli pret në raport me prokurorinë. Çdo gjë nuk shkon vaj ndryshimet gjithmonë janë pozitive. Vendi është në rrugën e duhur dhe e ardhmja do të jetë më e mirë” tha kryeprokurori i ri Olsian Çela.

Ndërsa Arta Marku, e cila drejtoi si Kryeprokurore e Përkohshme organin e akuzës për 2 vite, tha se ndihet e vlerësuar që drejtoi këtë institucion dhe uroi Olsian Çelën për detyrën e re.

“Ndihem e vlerësuar që drejtova Prokurorinë. Ishin dy vite të vështira për çdo magjistrat. Një falënderim të veçantë për mediat. Roli juaj i pazëvendësueshëm dhe na bën më të përgjegjshëm për detyrën tonë. Urime prokurorit të ri. Shumë e lumtur që detyrën ia pasoj një shoku tim të klasës”, deklaroi Marku.

Kuvendi zgjodhi të enjten Kryeprokurorin e ri me anë të një votimi të fshehtë, ku votoi me 101 vota pro kandidaturën e Olsian Çelës. Për Arta Markun Kuvendi ka votuar me 11 pro 22 kundra dhe 78 abstenim, e ndërsa për Fatjona Memçaj 8 kanë qenë pro, 16 kundër dhe 87 abstenim.

Çela, nga dosjet e nxehta te përplasja me Markun

Pasditen e të enjtes, rreth orës 15:30, me 101 vota pro, Prokurori Olsian Çela u votua në Kuvend në postin e Prokurorit të Përgjithshëm të Shqipërisë. Çela mori shumicë të cilësuar votash nga maxhoranca dhe opozita në Kuvend, duke i dhënë atij një mandat të ri 7-vjeçar.

Po kush është Olsian Çela? Dosjet që ka hetuar dhe përplasjet me ish-Prokuroren e Përgjithshme të Përkohshme Arta Marku, të cilën e kishte përsëri përballë në garën për postin e kryeprokurorit.

Olsian Çela e nisi karrierën në vitin 2001 duke punuar si prokuror në Prokurorinë e Tiranës. Pas tre vitesh punë në këtë prokurori, Olsian Çela emërohet prokuror te Krimet e Rënda, ndërsa nga viti 2008 deri në 2012 ai drejtoi këtë prokurori. Gjatë kësaj kohe, Olsian Çela dhe grupi i prokurorëve që ai drejtoi hetoi shumë dosje të nxehta të kohës, duke përmendur dosjen: “Xibraka” që çoi pas hekurave nipin e ish-diktatorit Enver Hoxha, Ermal Hoxhën dhe 8 pjesëtarët e këtij grupi.

Ai hetoi dhe çoi para drejtësisë pjesëtarët e dosjes: “Kompas”, që la në burg 32 trafikantët që përdornin prostitutat si korrierë dhe çështjne e “vrasjes së Mirit të Xhikes”. Dosja “Shullazi” ishte ajo që përplasi Olsian Çelën me drejtuesen e Prokurorisë së Krimeve të Rënda Donika Prela.

Prokurori Çela nuk pranoi të merrte në dorë dosjen “Shullazi” kur Prokurori i kësaj dosje, Ened Nakuçi dha dorëheqjen për arsye shëndetësore. Hetimet ishin në fazën e fundit, ndërsa Prokuroria ishte gati për të dhënë pretencën, por Olsian Çela nuk e mori në dorë këtë dosje. Prela vendosi ta zëvendësonte me short Nakuçin, por prokurorët e quajtën të paligjshme praktikën.

Në këtë ngërç të krijuar ndërhyri Arta Marku, e cila e transferoi Olsian Çelën dhe disa prokurorë të tjerë, duke kërkuar dhe hetim disiplinor. Por në atë kohë, Olsian Çela përflitej se do të kandidonte në postin e Prokurorit të Përgjithshëm. Ai e ankimoi transferimin në Këshillin e Lartë të Prokurorisë, institucion që rrëzoi vendimin e Arta Markut duke e rikthyer përsëri Çelën prokuror te Krimet e Rënda.

Olsian Çela kaloi Vettingun pa probleme. Atij nuk iu gjet parregullësi në pasurinë e tij, integritetin moral dhe atë profesional. Përpara Këshillit të Lartë të Prokurorisë, ditën që dha intervistën, Olsian Çela bëri “mea culpa”, pasi tha që prokurorët, ai dhe kolegët e tij, kanë qenë të ashpër ndaj të dobtëve dhe jo ndaj të fortëve. Çela u shpreh se në këtë mënyrë janë rritur problemet sociale në Shqipëri.

Vetëbesimi i Prokurorit të ri të Përgjithshëm u duk edhe kur ai u pyet në KLP në lidhje me pavarësinë nga politika. Olsian Çela u shpreh se Reforma në Drejtësi i ka rritur dinjitetin prokurorëve duke i bërë të pavarur. Çela njeh mirë 4 gjuhë të huaja, ndërsa karriera e tij nuk mbetet vetëm në fushën e hetimit si prokuror, por dhe të mësimdhënies në Shkollën e Magjistraturës. /Realstory.al/

Kryeprokurori, lista e KLP drejt Kuvendit

Të martën e javës së ardhshme, Kuvendi pritet të marrë listën me tre kandidatët e përzgjedhur nga KLP për postin e Prokurorit të Përgjithshëm. Pasi u bë intervistimi dhe renditja e tre kandidatëve nga Këshilli i Lartë i Prokurorisë, ky institucion pritet të dërgojë emrat e Olsian Çelës, Arta Markut dhe Fatjona Memçaj, për votim në Kuvend.

Sipas Ora Tv, asnjë nga kandidatët nuk do të bëjë apelim të renditjes në listë në Gjykatën Administrative. Arsyet lidhen me faktin se kandidatët janë njohur vetëm me pikët dhe renditjen, por pa u njohur se në cilin kriter kandidatët kanë pasur vlerësime jo të mira. Megjithatë, ligji u lejon tre ditë afat kandidatëve për kryeprokuror për të bërë ankim për listën dhe pikëzimin e KLP.

Në rastin konkret, dy kandidatet Arta Marku dhe Fatjona Memçaj kanë deri të hënën afat për të bërë ankim në Gjykatë Administrative. Nëse kjo gjë nuk ndodh, KLP i dërgon në mënyrë të menjëhershme listën me renditjen e tre kandidatëve Kuvendit.

Më pas parlamenti do të duhet të votojë me shumicë prej 84 votash një nga tre emrat e listës së KLP për postin e Prokurorit të Përgjithshëm. Pavarësisht renditjes që bën KLP, Kuvendi ka të drejtën të zgjedh një nga tre emrat e listës, prokurorit Olsian Çela, Prokurores së Përgjithshme të Përkohshme Arta Marku dhe kandidates Fatjona Memçaj.

Prokurori i ri, Çela i pari, Marku e dyta

Këshilli i Lartë i Prokurorisë bëri renditjen e kandidatëve për postin e Prokurorit të Përgjithshëm, një ditë pasi dëgjoi tre aspirantët e këtij posti. Në përfundim të këtij procesi, prokurori Olsian Çela është renditur i pari me 459 pikë, ndërsa e dyta në listë është Prokuroria e Përgjithshme e Përkohshme Arta Marku me 406 pikë.

E treta në listë është kandidatja Fatjona Memçaj me 362 pikë. Kjo renditje është votuar unanimisht nga anëtarët e Këshillit të Lartë të Prokurorisë në mbledhjen e zhvilluar të enjten. Ndërsa kryetari i KLP-së, Gent Ibrahimi u shpreh se kandidatët janë vlerësuar për tre kritere.

“Ne i çojmë Kuvendit një listë me tre kandidtë, që i vlerësojmë nga profesionalizmi, integriteti dhe pozicioni i tyre karshi kolegëve. Ka qenë një process i gjatë për shumë arsye, duke përfshirë dhe Vettingun. Sot jemi në gjendje të ndajmë me ju rezutlatet e punës tonë përzgjedhësve. Jemi përpjekur të jemi transparent me publikun”.

“Ky proces solli në këtë finale, ne sot jemi në gjendje të bëjmë pikëzimin sipas rregullores së miratuar në mars: vlerësimi bëhet për aftësitë profesionale, integritetin dhe aftësitë drejtuese”, tha ndër të tjera Gent Ibrahimi gjatë mbledhjes së KLP. Të tre kandidatët për Prokuror të Përgjithshëm, dolën përpara KLP-së të mërkurën duke shpalosur platformat e tyre për drejtimin e Prokurorisë së Përgjithshëm.

Olsian Çela në garë me platformë: sulmon Arta Markun dhe flet si “fitues”

Kandidati për Prokuror të Përgjithshëm, Olsian Çela ishte i fundit nga kandidatët që doli përpara Këshillit të Lartë të Prokurorisë, për të shpalosur platformën e tij për drejtimin e organit të akuzës. Çela foli “ashpër” ndaj vetes dhe kolegëve të tij, duke bërë një “mea culpa”, pasi sipas tij prokurorët janë treguar të ashpër ndaj të dobtëve duke krijuar probleme sociale në shoqëri.

Ndërkohë, një tjetër temë që ai u ndal ishte presioni politik mbi punën e kryeprokurorit dhe prokurorëve. I pyetur nga anëtarët e KLP-së çfarë mendimi kishte për ndikimin e politikës te puna e prokurorisë, Olsian Çela tha se tashmë prokurorët kanë dinjitet dhe pavarësi, për shkak të reformës në drejtësi dhe vettingut.

“Të jesh Prokuror i Përgjithshmë, do të thotë të jesh fytyra e organit që ti drejton. Ndryshimet ligjore, Reforma në Drejtësi, i kanë garantuar dinjitet prokurorit në punën e tij. Sot prokurori nuk ka nevojë t`i nënshtrohet sot politikës. Vettingu po i jep dinjitet prokurorit për të qenë i pavarur”, tha ndër të tjera Olsian Çela.

Gjithashtu, pavarësia e punës së prokurorit nuk është vetëm ajo nga politika, por dhe nga drejtuesi i institucionit ku bën pjesë. Olsian Çela u shpreh se në të shkuarën ka pasur përplasje në prokurori, kryesisht që lidhen me interpretimin e ligjit. Por me ndryshimet ligjore që solli reforma në drejtësi, prokurorët janë të pavarur në punën e tyre, edhe nga titullari institucionit ku punojnë.

“Ligji i ri i dha mundësi prokurorëve që të jenë vetvetja, mos fshihen më pas drejtuesit. Unë e shikoj thelbësore granatimin dhe ruajtjen e kësaj pavarësie. Ajo çfarë unë konstatoj me shqetësim është që prokurorë të caktuar për shkak të lirisë që i jep ligji, duke pasur dhe sensin  e protagonizmit nuk arrijnë ta menaxhojnë sa duhet këtë pavarësi që ligji i jep. Kjo prodhon pasoja”, tha Çela.

Përgjegjshmëria është një tjetër element i rëndësishëm i pavarësisë së punës së prokurorit, sipas Olsian Çelës. “Për të menaxhuar këtë situata është e rëndësishme që prokuroria e përgjithshme të monitorojë punën e prokurorive të shkallës së parë dhe apelit. Prokurori të mbajë një sy hapur për çdo gjë që ndodh. Mekanizmat për këtë do të ndërtohen. Prokurorët duhet të jenë të përgjegjshëm. Pavarësia dhe përgjegjshmëria shkojnë bashkë. Pavarësia nuk është liri ndaj ligjit, por është liria për të vendosur sipas bindjes së brendshme në përputhje me ligjin”, deklaroi Cela./Realstory.al/

Olsian Çela drejt konfirmimit, kandidon për kryeprokuror

Prokurori i Krimeve të Rënda, Olsian Çela, njëherësh edhe kandidat për postin e prokurorit të Përgjithshëm, ka zhvilluar të premten seancën e parë të rivlerësimit në Komisionin e Pavarur të Kualifikimit.

Në këtë seancë KPK ka bërë të ditur se nuk ka gjetur asnjë shkelje nga ana e prokurorit Çela. Ai ka bërë deklarim të saktë të pasurisë, ka burime të ligjshme dhe nuk ka konflikt interesi.

Ai rezulton se ka qenë pronar i një apartamenti 77 m2 në zonën e “Don Bosko”-s, blerë për 78 mijë euro në vitin 2015, të cilin e ka shitur në vitin 2018 për 85800 euro.

Nuk është konstatuar asnjë problematikë në lidhje me këtë pasuri dhe as burimet e deklaruara nga mamaja e Çelës.

Pa probleme kanë rezultuar edhe dy hua të marra nga Çela, te tezja e tij dhe te një person tjetër.

Për sa i përket figurës, DSIK ka realizuar një raport pozitiv.

Nuk ka kontakte të papërshtatshme me elemente të krimit të organizuar dhe konfirmohet si i përshtatshëm për vijimin e detyrës.

Për vlerësimin profesional, ka pasur raport pozitiv nga ana e Këshillit të Lartë të Prokurorisë.

Olsian Çela është një nga kandidatët për postin e kryeprokurorit. Në datën 23 korrik KPK pritet të marrë vendim pozitiv për konfirmimin e tij në detyrë duke i hapur rrugën e vlerësimit nga KLP për postin e kryeprokurorit.

Ngërçi me zgjedhjen e Kryeprokurorit, KLP kërkon Vetting të përshpejtuar për Olsian Çelën

Këshilli i Lartë i Prokurorisë i është drejtuar me një letër zyrtare Komisionit të Pavarur të Kualifikimit, për përshpejtimin e procedurës për rivlerësimin e kandidatit për Prokuror të Përgjithshëm Olsian Çela.

Ky i fundit është një nga kandidatët që ka dorëzuar dosjen për tu bërë Prokuror i Përgjithshëm, por deri më tani, Çela ende nuk e ka kaluar Vettingun, pasi dosja e tij mbetet në pritje për rivlerësim nga Komisioni i Pavarur i Kualifikimit. Shkresa e KLP-së mban firmën e kryetarit të saj Gent Ibrahimi, i cili ndër të tjera shkruan:

“Në këto kushte, nisur nga rëndësia e procesit të përzgjedhjes së Prokurorit të Përgjithshëm, si dhe duke mbajtur parasysh afatin e parashikuar nga neni 31 i Ligjit nr 97/2016 “Për Organizimin dhe Funksionimin e Prokurorisë së Republikës së Shqipërisë”, për kryerjen e verifikimit të plotësimit të kushteve ligjore nga kandidatët, do të kërkonim nga ana juaj rivlerësimin me përparësi të subjektit Olsian Çela brenda 30 ditëve nga mbërritja e kësaj kërkese”, thuhet në shkresën e KLP-së.

Kush është kandidati i parë për postin e Prokurorit të Përgjithshëm

Olsian Çela është i pari që ka dorëzuar dokumentet e regjistrimit për të kandiduar për postin e Prokurorit të Përgjithshëm të Shqipërisë.

Lajmi është konfirmuar nga Këshilli i Lartë i Prokurorisë. Gjatë mandatit të ish-kryeprokurores Ina Rama, prokurori Olsian Çela ka qenë drejtues i Prokurorisë për Krime të Rënda. Tashmë është prokuror në prokurorinë e Krimeve të Rënda.

Këshilli i lartë i Prokurorisë ka hapur që në datën 1 prill garën për drejtuesin e Prokurorisë së Përgjithshme, duke lënë 30 ditë kohë afat për të gjithë prokurorët që të aplikojnë duke dorëzuar dokumentet.

Kandidatët duket të plotësojnë kriterin profesional, atë moral dhe të integritetit, atë organizativ, të jenë drejtues dhe të kenë elementë shtesë për vlerësim (përvojë në jetën akademike, tituj shkencorë).

Emri tjetër i sigurt deri tani që kandidon është edhe Arta Marku, kryeprokurorja e Përgjithshme, e Përkohshme.

Skip to toolbar