Deklaratat e Sekretarit të NATO për dialog, Basha fton shqiptarët për protestë

Pas më pak se tre orësh, opozita do të mbajë protestën e shtatë kombëtare, e cila do të mbahet këtë të diel në orën 19:00 përpara Kryeministrisë.

Kryetari i Partisë Demokratike, Lulzim Basha ka publikuar një tjetër video në rrjetin e tij social Facebook, ku fton për herë të fundit qytetarët që të dalin në protestë.

Në hapje të video-mesazhit të publikuar nga Lulzim Basha, shkruhet se “pushteti i krimit ka rënë”, ndërsa më pas video vijon me të tjera mesazhe, ku sulmohet Kryeministri Edi Rama.

Në fund të videos, Lulzim Basha e mbyll me sloganin “Shqipëria si Europa”, duke ftuar qytetarët të marrin pjesë në protestë.

Ky mesazh i kreut të PD, vjen vetëm pak minuta pas takimit që Sekretari i Përgjithshëm i NATO-s, Jens Stoltenberg pati me Kryeministrin e vendit Edi Rama.

Gjatë këtij takimi, edhe numri një i NATO-s i bëri thirrje opozitës të dialogojë dhe të marrë pjesë në zgjedhje.

Asnjë hap pas për çlirimin e vendit nga e keqja! Sonte në ora 19:00 të gjithë në shesh! #2qershor #ShqipëriaSiEuropa
Gepostet von Lulzim Basha am Sonntag, 2. Juni 2019

Mona thirrje qytetarëve: Sot të gjithë bashkë më të vendosur se kurrë

Kryetarja e LSI-së, Monika Kryemadhi i ka bërë thirrje shqiptarëve të bashkohen në protestën e sotme. Pak orë para protestës kombëtare të opozitës së bashkuar, përmes një statusi në Facebook, Kryemadhi i kërkon qytetarëve të jenë bashkë në protestën e shpresës, pasi vetëm nëse i dalin zot fatit të tyre mund ta rrëzojnë të keqen.

“Sot më shumë se kurrë, Shqipëria ka nevojë për forcën e protestës qytetare, ka nevojë që të gjithë bashkë të dëshmojmë se e ardhmja e fëmijëve tanë nuk mund të jetë peng i papërgjegjshmërisë së Edi Ramës! Sot është dita e qytetarëve. Prandaj të gjithë bashkë, pa asnjë dallim në jemi të rinj apo të moshuar, burra apo gra, nga fshati apo nga qyteti, nga Jugu a nga Veriu, me apo pa parti, të majtë apo të djathtë, të jemi bashkë në protestën e shpresës, sepse e keqja po shembet dhe se e nesërmja bëhet më e mirë, vetëm kur qytetarët i dalin zot fatit të tyre! Shqipëria pa varfëri dhe me punë të ndershme, pa korrupsion e në luftë me krimin e organizuar, pa drogë e oligarkë, por me njerëz që e duan familjen dhe atdheun e konsiderojnë shtëpinë e tyre, është më e rëndësishme, më e madhe dhe më e fortë se Edi Rama dhe klani i tij kriminal! Sot më shumë, sot më të vendosur, sot më të fortë, sot më të bashkuar!’- shkruan Kryemadhi

Sot më shumë se kurrë, Shqipëria ka nevojë për forcën e protestës qytetare, ka nevojë që të gjithë bashkë të dëshmojmë…
Gepostet von Monika Kryemadhi am Sonntag, 2. Juni 2019

Opozita protestë marshim deri në mesnatë, policia i jep dy orë leje

Opozita zhvillon të dielën pasdite protestën e saj të shtatë kombëtare. Protesta do të nis në orën 19:00 ndërsa mediat televizive raportojnë se PD ka kërkuar leje në policë për zhvillimin e saj deri në mesnatë.

PD ka kërkuar të zhvillojë një protestë marshim, por duket se policia e ka refuzuar këtë kërkesë duke u dhënë leje 2 orë dhe vetëm para godinës së Kryeministrisë tek bulevardi “Dëshmoret e Kombit”.

Protestat marshim të mëparshme të opozitës kanë qetë paqësore dhe janë shoqëruar me ndalimin e protestuesve përpara disa institucioneve që opozita i cilëson si të kapura nga krimi. Megjithatë nuk dihet se si do të marrë protesta e sotme, e cila sipas policisë ka leje të zhvillohet nga ora 19:00 deri në orën 21:00.

Edhe në këtë protestë pritet që efektivët blu të jenë në gadishmëri të lartë me një numër që varion nga 1300-1700 policë.

Policia do të nis bllokimi i qarkullimit në Bulevardin kryesor në orën 17:30 dhe prej orës 18:30 do të nis bllokimi edhe me akset që lidhin Bulevardin me unazën.

Kangjellat metalike, autoblindat e shpërndarjes së turmave me presion uji, ambulanca dhe zjarrfikësja do të jenë të pranishme si në çdo protestë tjetër.

Stoltenberg në Tiranë, opozita vendoset në shesh në mbrëmje

Ashtu siç ishte paralajmëruar edhe më parë nga Realstory.al, Sekretari i Përgjithshëm i NATO-s, Jens Stoltenberg do të zhvillojë një takim disa orësh në Tiranë, përpara se të nis vizitën e tij dy ditore në Maqedoninë e Veriut. Vizita e sotme e Stoltenberg në Tiranës është bërë publike edhe nga faqja zyrtare e NATOS, ku publikohet axhenda e takimeve.

Të dielën më 2 qershor 2019, Sekretari i Përgjithshëm i NATO-s, Jens Stoltenberg do të udhëtojë në Tiranë ku do të ketë takime me Presidentin Ilir Meta, Kryeministrin Edi Rama dhe Ministrin e Mbrojtjes, Olta Xhaçka.

Në orën 15:20 Sekretari i Përgjithshëm i NAto, Stoltenberg do të mbajë edhe një konferencës së përbashkët për shtyp me Kryeministrin Rama.

Vizita e Stoltenberg, sigurisht që do të jetë edhe për t’i dhënë një mesazh të qartë opozitës, që pasditen e së dielës në orë 19:00 do të zhvillojë protestën e saj të shtatë kombëtare. Skenari që opozita do të ndjek nuk dihet ende, por protesta e saj e fundit më 25 maj, ishte e qetë, larg molotovëve dhe konfrontimeve me policinë.

Opozita që prej djegies së mandateve është duke protestuar për largimin e Edi Ramës dhe shtyrjen e zgjedhjeve, ndërsa vetë kryeministri hapin zyrtarisht, pasditen e 1 qershorit, fushatën elektorale për zgjedhjet lokale të 30 qershorit.

“Teneqexhi, u bleve nga Rama”, Deputeti rom: Më mbroni, jam kërcënuar me jetë

Gjatë seancës plenare në Kuvend, ka folur edhe deputeti i ri i opozitës, Ervis Meço, i cili përfaqëson komunitetin rom. Meço tha se është kërcënuar me jetë dhe se kërkon mbrojtje nga SHBA. Ai tha se nuk ka hyrë në Kuvend për të fyer Bashën apo kënaqur Ramën, por për të lobuar për të drejtat e shtresave në nevojë.

“Zoti Ruçi iu vendos në dijeni dhe i bëj thirrje ambasadës amerikane dhe të gjitha të tjerave se pas pranimit të deputetit që lobon për komunitetin egjiptian dhe rom, jeta ime është në rrezik. Përveç një vërshimi me doza raciale, jeta ime dhe familjes është kërcënuar me jetë. Patologjia raciale dhe zemërimi po më diskriminon dhe shantazhon deri në marrjen e jetës. Ju lutem merrni nën kontroll ruajtjen e mos cenimit të integritetit tim. Të dashur qytetar reflektoni, Ervis Meço nuk ka hyrë në këtë parlament për të fyer Lulzim Bashën dhe për të kënaqur Edi Ramën, nuk jam kriminel dhe oligark, por babai i një vaze që lobon për të drejtat e shtresave në nevojë. Ju lutem më mbroni jetën.” – tha Meço

Disa ditë më parë ish kryeministri Berisha shkroi në Facebook disa fjalë ofenduese ndaj tij duke e akuzuar se është blerë nga Rama me një apartament në Tiranë për të pranuar mandatin.

Edvini akuzohet se bleu me 50 mije euro dhe nje hyrje deputetin e Delvines!Lexoni mesazhin e qytetarit dixhital!…
Gepostet von Sali Berisha am Dienstag, 28. Mai 2019

DW: Përçarjet e qeverisë dhe opozitës në Shqipëri për raport-progresin

Opozita dhe qeveria në Shqipëri kanë qëndrime të kundërta për raport-progresin e KE. Qeveria e pret me entuziazëm, ndërsa opozita me skepticizëm.

Rekomandimi pozitiv, pa kushte, i Komisionit Europian, (KE) të mërkurën (29.05.2019), drejtuar Këshillit Europian të BE, për të hapur negociatat e anëtarësimit me Shqipërinë, është pritur me entuziazëm nga qeveria dhe skeptizicëm nga opozita, e cila parashikon madje refuzimin. Ky është i treti rekomandim që jep për Shqipërisë KE, duke filluar nga viti 2017.

Ambasadori i BE, Luigi Soreca, e konsideroi të mërkurën rekomandimin e këtij viti, në konferencën e përbashkët për shtyp me kryeministrin Rama, “një gur kilometrik shumë të rëndësishëm, të arritur nga Shqipëria”. Për Ramën, KE dha rekomandimin ngaqë “Shqipëria ka bërë me përpikmëri të gjitha detyrat e shtëpisë. Komisioni ka konfirmuar progres dhe bazuar në fakte, shifra dhe analiza ka rekomanduar përsëri hapjen zyrtare të negociatave,” tha kryeministri në konferencën për shtyp.

Por opozita jashtë sistemit politik, që hoqi dorë nga mandatet parlamentare në shkurtin e kaluar dhe që atëherë vazhdon protestat në rrugë dhe sheshe për të larguar kryeministrin Rama dhe rrëzuar qeverinë e tij, të akuzuar prej saj për korrupsion dhe lidhje me krimin, mendon ndryshe.

Berisha, ish-lideri i Partisë Demokratike, (PD) shkruan në median sociale se “Shqipëria nuk ka plotësuar asnjë nga kushtet e kërkuara. Këshilli Europian do të votojë për hapjen e negociatave kur ato të plotësohen, diku nga fundi i vitit 2020, për të mos thënë edhe më vonë”.

Ndërsa Basha, lideri aktual i PD, shprehu të mërkurën bindjen se “Këshilli Europian do të votojë në qershor për mos-hapjen e negociatave me Shqipërinë.”

” Ky është një lajm ndëshkimi për çdo shqiptar, ndëshkim i pamerituar që ka një fajtor, një emër, Edi Ramën dhe qeverinë e tij antieuropiane,” tha Basha.

Të njëjtin qëndrim mban edhe Lëvizja Socialiste për Integrim (LSI), që është bashkuar me të djathtën opozitare. Klajda Gjosha, ish-deputete e kësaj partie dhe ish-ministre e Integrimit Europian, vuri në dukje se “sot për sot janë katër shtete anëtare të pozicionuara qartë në votën kundër”.

Pollo – BE fiksim në stabilitetin rajonal, pa kritika konstruktive

Por opozita jashtë parlamentare nuk ka një qëndrim “en block” ndaj rekomandimit dhe parashikimit negativ për vendimin e Këshillit Europian. Genc Pollo, ish-deputet i PD, ish-kryetar i Komisionit Parlamentar të Sigurisë, tha për DW se shpreson që kësaj here negociatat të hapen.

“Shpresoj të jetë e treta, e vërteta dhe BE t’i përgjigjet rekomandimit me një vendim pozitiv”. Procesi i negociatave mund të jetë një ndihmë e vyer për të kapërcyer situatën tejet të rënduar me kapjen e shtetit, me mpleksjen e qeveritarëve me krimin e organizuar dhe korrupsionin e nivelit të lartë”, tha për DW, Genc Pollo.

Ai kritikoi BE që nuk ka ndihmuar me politikat e tij në 5 vitet e fundit që situata aktuale në Shqipëri të mos jetë aktualisht kaq e përkeqësuar. “Nëse BE, në pesë vitet e shkuara nuk do të kishte fiksim tek stabiliteti rajonal i garantuar nga ” të fortët” apo tek një reformë e vetme komplekse, por tek të pesta prioritetet dhe kriteret e Kopenhagen-it si dhe të bënte kritika konstruktive në nivelin e atyre të deri 2013-ës, kjo do të kishte qenë një ndihmë e vyer për Shqipërinë Europiane dhe situata nuk do të ishte përkeqësuar kaq shumë”, tha Genc Pollo për DW.

Apel partive politike – kaloni përtej ndasive partiake

Vendimi i Këshillit Europian në qershor, për hapjen ose jo të negociatave me Shqipërinë dhe Maqedoninë, bazohet në analizën e Progres Raportit 2019 dhe diskutimet e vendeve anëtare, një procedurë kjo për çdo vend kandidat për anëtarësim.

”Tre javët në vijim të diskutimeve do të jenë kyçe. Çdo shtet anëtar duhet të jetë plotësisht i bindur dhe ҫdo shtet anëtar ka procesin e vet të vendim-marrjes për këtë çështje. Shqipëria ka nevojë për një konsensus kombëtar për prioritetin madhor të integrimit europian duke tejkaluar kështu polarizimimin, treguar vullnet të fortë politik për të qenë të bashkuar në objektivin e integrimit europian dhe kaluar përtej polarizimit dhe ndasive partiake”, tha ambasadori i BE, në Tiranë, Soreca.

Në të njëjtën linjë me ambasadorin Soreca, edhe Kryeministri Rama i bëri thirrje Bashës dhe “opozitës që është në rrugë” të ndryshojnë qëndrim. “Deri në momentin e vendimmarrjes nga Këshilli Europian është mirë që të mendojnë për Shqipërinë, jo për partinë. Është mirë të mendojnë për gjeneratën tjetër, jo për zgjedhjet e radhës. Është mirë të mos furnizojnë ata që mund të jenë të lëkundur apo në kërkim të arsyeve për të thënë “jo” me pamje të gënjeshtërta protestash partiake nga Tirana, protestash që nuk janë popullore, që nuk pasqyrojnë realitetin,” tha të mërkurën kryeministri Rama.

Opozita ka paralajmëruar të zhvillojë protestën kombëtare antiqeveritare të radhës këtë javë, të shtunën më 31 maj.

Kodheli sulmon opozitën: Ka braktisur votuesit e saj

Ish-ministrja Mimi Kodheli ka deklaruar gjatë seancës plenare tha se opozita aktuale ka braktisur jo vetëm fushën e betejës, por edhe votuesit e saj. Deputetja u shpreh se në vend të ideve në parlament, kjo opozitë ka ndërmarrë garën e hedhjeve të shtizave, ku edhe mbrojnë interesa meskine.

“Kolegë, për të dytin vit radhazi vijojmë të marrim rekomandimin nga BE. Opozita është larguar nga fusha e betejës, madje ka braktisur votuesit e saj. Garën e ideve në parlament e kanë zënë vendin gara e hedhjeve të shtizave. Këtu garohet për të mbrojtur disa interesa meskine”, u shpreh Kodheli.

Bushati: Raporti pasqyron qartë arritjet. Opozita, e dëshpëruar

Ish-ministri i Jashtëm Ditmir Bushati deklaroi gjatë seancës së sotme plenare se progres-raporti pasqyron qartë të gjitha arritjet. Bushati deklaroi se dje ndjeu keqardhje nga reagimet e opozitës.

“Ka vende që edhe pse janë bërë para Shqipërisë ia lejojnë vetes të ulen në dy karrige. Nuk është rastësi që raporti identifikon mbështetjen e fuqishme të firmosjes së marrëveshjes së Prespës. Raporti ofron një pasqyrë të qartë të të gjitha arritjeve. Unë kam 10 vite në këtë sallë dhe më erdhi keq me reagimet e opozitës në lidhje me këtë sukses të Shqipërisë. Ishin pasqyrë e dëshpërimit. Kam qenë ministër i jashtëm dhe në 2016 kemi bërë një debat. Po ashtu vjet kemi bërë debat nëse rekomandimi do shtronte rrugën për hapjen e negociatave. Qeveria në këtë proces ka thjesht barrën kryesore dhe duhet të bëjë detyrat. Merita është vetëm e shqiptarëve. Mbi 90% e shqiptarëve nuk kanë asnjë dyshim për sa i përket kursit të Shqipërisë”, u shpreh Bushati.

Ambasadori italian: Zgjedhjet janë legjitime, kriza brenda opozitës

“Zgjedhja për të mos marrë pjesë është një zgjedhje personale, që duhet respektuar, por që nuk i bën të pavlefshme këto zgjedhje.” Ky ishte mesazhi i Ambasadorit italian në Tiranë, Alberto Cutillo që dha gjatë një interviste në emisionin “Përballë” në RTSH. Cutillo tha se zgjedhjet e 30 qershorit janë legjitime dhe se pjesëmarrja në to është një zgjedhje personale, por gjithashtu bëri thirrje për opozitën e mbetur jashtë parlamentit dhe se ajo duhet të gjejë një rrugë brenda saj për të zgjidhur krizën në vend.

“Manifestimet e fundit kanë treguar se mund të manifestohet në mënyrë paqësore. Parlamenti sot ka një opozitë të re, që është legjitime, por e dimë të gjithë që opozita, në kuptimin e udhëheqësve kryesor të forcave të opozitës, është jashtë parlamentit. Duhet mbajtur një dialog i hapur me të gjithë. Opozita duhet të gjej në brendësi të saj zgjidhjet, të cilat i japin mundësinë e zgjidhjes së krizës. Për mua këto zgjedhje janë legjitime. Zgjedhja për të mos marrë pjesë është një zgjedhje personale, që duhet respektuar, por që nuk i bën të pavlefshme këto zgjedhje. Nga kjo situatë demokracia nuk del e ekzaltuar, por as e poshtëruar.’ – tha ambasadori Cutillo.

Ambasadori italian tha se kriza duhet të zgjidhet brenda opozitës, pasi aty lindi dhe u zhvillua. Të njëjtën gjë do të bënin edhe partitë e tjera në botë.

“Kjo është një krizë e ndërlikuar që ka lindur dhe zhvilluar në brendësi të opozitës dhe kësisoj i takon opozitës që ta zgjidhë. Besoj se në vende të tjera një krizë e tillë do të ishte administruar në brendësi të partive mbi bazën e rregullave të demokracisë së brendshme të partive, të cilat në Shqipëri janë disi të ndryshme. Partitë janë më të ngurta dhe kërkojnë t’i eksportojnë jashtë krizat, të cilat normalisht duhet të administrohen brenda tyre. Por besoj se në fund, partitë do të dinë të zgjedhin në interes të vendit. Ka diçka që nuk ecën në mekanizmin zgjedhor. Kjo mund të reformohet. Nëse nuk bëhet brenda 30 qershorit, të mos e kthejmë në një dramë”. – tha Cutillo

Letra e Ramës, PD: Hipokrite, shpresojmë të jetë e fundit

PD ka reaguar pas letrës së gjashtë të Ramës, nëpërmjet sekretarit të përgjithshëm, Gazmend Bardhi, i cili në një postim në Facebook, i ka cilësuar letrat e kryeministrit si hipokrite dhe hilecake. Madje, duke shprehur dëshirën që shpreson që letra e gjashtë të jetë e fundit, Bardhi nënkupton se kursi i opozitës nuk do të ndryshojë.

“Këto ditë kam lexuar me qindra komente për letrat hipokrite dhe hilacake të Edi Ramës, por efektin e vërtetë të tyre e kuptova gjatë protestës se fundit. Në momentin kur përpiqesha të ndaloja qytetarë të zemëruar tek Parlamenti, njëri prej tyre, rreth 50 vjeç, i revoltuar nga ndërhyrja ime, më tha: “Pse ma heq të drejtën të marr hak? Edi Rama me ka lënë fëmijët pa bukë. Tani tallet me mua me ato letrat në facebook”. Episodi i babait që lufton për mbijetesë në regjimin e panjerëzishëm të Edi Ramës, mu kujtua tani, kur lexova letrën e gjashtë (shpresoj të fundit), në të cilën ai vazhdonte të tallej, të fyente dhe të provokonte me mijëra e mijëra protestues”, deklaron Bardhi.

Më tej, sekretari organizativ i PD akuzon se Rama, me letrat e tij i ka injoruar shkaqet reale te krizës dhe problemet reale të qytetarëve, duke i fyer ata sa herë që ka mundësi, duke mos pasur ndjeshmërinë më të vogël për mijëra prindër që nuk kanë me çfarë ushqejnë fëmijët, duke u hakmarrë politikisht dhe duke dërguar tatimet në bizneset e qytetarëve që dalin në protestë, duke mos hequr dorë nga kërcënimi për prishjen e shtëpive që pengojnë planet e tij korruptive. “Edi Rama nuk bën asgjë tjetër me letrat e tij, veçse nxit dhunë dhe provokon qytetarët që u ka shkuar thika e pushtetit të tij në palcë. Në vend që të shkruajë letra luftënxitëse, që me hipokrizi i quan ‘ftesa për dialog’, Edi Rama bën mirë të kuptojë se ai është i pafuqishëm të ndalë triumfin e shqiptarëve të bashkuar. Kauza jonë për zgjedhje të lira e të ndershme, për të ndërtuar Shqipërinë si gjithë Europa, është kauza më e drejtë për të cilën shqiptarët kanë luftuar këto 29 vite, që pas rrëzimit të diktaturës.

Vetëm një qeveri e dalë nga zgjedhjet e lira e të ndershme, është garanci për mirëqenie, punësim dhe zhvillim për qytetarët shqiptarë”, përfundon Bardhi.

Këto ditë kam lexuar me qindra komente për letrat hipokrite dhe hilacake të Edi Ramës, por efektin e vërtetë të tyre e…
Gepostet von Gazment Bardhi am Montag, 27. Mai 2019