Thaçi ‘ftohtë’ për Haradinajn: Keqardhje, do respektoj Kushtetutën

Presidenti i Kosovës, Hashim Thaçi ka reaguar disa orë pas publikimit të lajmit, se Ramush Haradinaj kishte dhënë dorëheqjen e parevokueshme si Kryeministër i Kosovës. Në një reagim në Facebook, Thaçi shkruan se ka mësuar me keqardhje lajmin se Gjykata Speciale në Hagë, kishte ftuar për të dëshmuar këshilltarin e tij, Bislim Zyrapi, që dikur ka qenë shef shtabi në UÇK, kryeministrin Ramush Haradinaj dhe disa ish-eprorë të tjerë të Ushtrisë Çlirimtare të Kosovës.

“Me keqardhje mësova që Gjykata Speciale ka ftuar për intervistim ish-shefin e Shtabit të UÇK-së, Bislim Zyrapi, njëherësh këshilltar i imi, ish-komandantin e Zonës Operative të Dukagjinit, kryeministrin Ramush Haradinaj, si dhe disa ish-eprorë të tjerë të UÇK-së. Nga mediat tani u informova edhe për vendimin e Kryeministrit të Republikës së Kosovës, Ramush Haradinaj, për dorëheqjen e parevokueshme nga pozita e tij”, shkruan Thaçi. Më tej, Presidenti i Kosovës shprehet se do të respektojë kompetencat e tij kushtetuese, lidhur me dekretimin e një date të re zgjedhjesh të parakohshme, e kërkuar nga kryeministri në largim Ramush Haradinaj.

“Unë e respektoj vendimin e tij dhe si President i Republikës së Kosovës ju siguroj se do të veprojë bazuar në kompetencat e mia kushtetuese dhe ligjore, për të cilat qytetarët e Kosovës do të njoftohen me kohë. Unë besoj në pastërtinë e luftës së Ushtrisë Çlirimtare të Kosovës dhe besoj në vlerat e larta morale të ushtarëve të lirisë. As vlerat e lirisë sonë dhe as luftën e UÇK-së nuk mund ta cenojë askush”, shkruan Thaçi. Hashim Thaçi dhe Ramush Haradinaj kanë qenë të ndarë në qëndrimet e tyre lidhur me taksën mbi mallrat serbe. Presidenti ka qenë më liberalë në këtë drejtim, duke kërkuar nga kryeministri që të zbusë qëndrimin e tij, me qëllim që të rifillojë dialogun me Serbinë.

Por Haradinaj nga ana e tij e ka kritikuar Thaçin në publik për qëndrimet që ka mbajtur, madje duke e akuzuar edhe si një prej ideatorëve për ndarjen e Kosovës, gjë të cilën Haradinaj e përmendi dhe në emisionin “Rubikon”, ku u shpreh se ishte ai njeriu që ndali ndarjen e Kosovës, duke refuzuar dialogun nëse do të shtrohej një diskutim i tillë.

Gjithashtu, Hardinaj, u shpreh se përçarjet mes politikanëve në Kosovë, e kanë dobësuar rolin e saj në procesin e dialogut me Serbinë, duke u rikërkuar krerëve të lartë shtetëror të Kosovës, që të mbajnë një qëndrim të përbashkët, në mënyrë që Serbia të pranojë njohjen. Një detaj i deklaratës së Hashim Thaçit për dorëheqjen e Ramush Haradinajt, është ftohtësia me të cilën shprehet në Presidenti i Kosovës për kryeministrin e vendit të tij.

Madje, deklaratën e tij, Thaçi e nis me këshilltarin personal, Bislim Zyrapi, dhe me një fjalë përmend dhe Haradinaj në rreshtin ku shprehet keqardhje për ftesën që Gjykata Speciale i dërgon disa ish-drejtuesve të UÇK-së për të dhënë sqarime për të njëjtën çështje, që të paktën Haradinaj ka fituar dy herë pafajësinë nga Gjykata e Hagës.

Dorëheqja e Haradinaj, reagon politika shqiptare: Burrë shteti, mbrojti Kosovën

Dorëheqja e papritur e Ramush Haradinaj, ka sjell reagimin e politikës shqiptare duke e cilësuar të gjithë njëzëri si “burrë shteti” që mbrojti Kosovën dhe vendosi interesat e saj të para deri në vetëmohim.

Presidenti Ilir Meta në ragimin e tij ka shprehur krenarin për vendimin e marrë nga Ramush Haradinaj, të cilën përveçse burrë shteti e ka konsideruar edhe Heroin e Kombit.

“Krenar për Ramush Haradinajn dhe i bindur në pafajësinë e tij! Nuk ka pabesi dhe presion që e thyen Burrin e Shtetit dhe Heroin e Kombit! Nga sot të gjithë duhet të flemë më pak, të shqetësohemi më shumë dhe të bashkohemi më fort që Kosova dhe rajoni ynë të jenë të pacenuar në paqen dhe sigurinë tonë, si dhe në të ardhmen europiane.” – shkruan Meta

Krenar për Ramush Haradinajn dhe i bindur në pafajësinë e tij!Nuk ka pabesi dhe presion që e thyen Burrin e Shtetit dhe…
Gepostet von Ilir Meta am Freitag, 19. Juli 2019

Ish-ministri i Jashtëm, Ditmir Bushati e konsideroi dorëheqjen e Haradinjat shembull të një shtetari për të cilin Kosova vjen gjithnjë e para. Bushati tha se vendimi i tij do lartësojë luftën e shenjtë për liri të Kosovës .

“Akti i dorëheqjes së Ramush Haradinajt si Kryeministër i Kosovës për tu ballafaquar sërish me drejtësinë është forca e shembullit të një shtetari për të cilin Kosova vjen gjithnjë e para. Jam i bindur që ky veprim do të lartësojë luftën e shenjtë për liri të Kosovës dhe kontributin e pamohueshëm të Ramush Haradinajt. Ramushi ka fituar luftën e përmes forcës së shembullit po dëshmon së është artizan i paqes. Sot, Kosova ka nevojë për unitet e largpamësi për të tejkaluar sfidat e brendshme e për të fuqizuar më tej subjektivitetin juridiko ndërkombëtar që duan t’ia vënë në pikëpyetje.” – tha Bushati

Akti i dorëheqjes së Ramush Haradinajt si Kryeministër i Kosovës për tu ballafaquar sërish me drejtësinë është forca e…
Gepostet von Ditmir Bushati am Freitag, 19. Juli 2019

Ministri për Diasporën, Pandeli Majko e ka cilësuar Haradinaj si një burrë shteti që vendosi interesat e Kosovës të parat, duke dhënë një shembull të mirë në ruajtjen e paqes dhe mbrojtjes së vendit duke dhënë dorëheqjen.

“Ramush Haradinaj ka dhënë dorëheqjen nga posti i kryeministrit si një burrë shteti. Ai kreu një akt që i bën nder Kosovës shtet që drejtohet nga shtetarë të cilët bëjnë dallimin e fatit personal me atë të sigurisë kombëtare. Sot jam me Ramushin! Të falenderoj komandant për shembullin e luftës, dhe sot në atë të paqes.”- shkruan Majko në një postim në Facebook.

Ramush Haradinaj ka dhënë dorëheqjen nga posti i kryeministrit si një burrë shteti. Ai kreu një akt që i bën nder…
Gepostet von Pandeli Majko am Freitag, 19. Juli 2019

Largimi i Haradinajt, a duhet ta pranojë presionin e ndërkombëtarëve?

Edhe kryetari i Partisë Demokratike, Lulzim Basha e ka cilësuar dorëheqjen e Ramush Haradinaj si aktin e një njeriu që deri në vetëmohim i ka shërbyer Kosovës. Basha e ka cilësuar Ramushin simbol të Kosovës së lirë dhe evropiane.

“Dorëheqja e kryeministrit Ramush Haradinaj është akti i një njeriu që ve Atdheun mbi gjithçka. Ramushi i ka shërbyer gjithmonë me vetëmohim Kosovës, në ditë të mira dhe në ditë të këqija. Ramush Haradinaj është Kosova – Kosova e lirë, Kosova e pavarur, Kosova europiane. Askush dhe asgjë nuk e përdhos dot luftën çlirimtare të Kosovës dhe sakrificën sublime të familjes Haradinaj në altarin e lirisë!”-shkruan Basha

Dorëheqja e kryeministrit Ramush Haradinaj është akti i një njeriu që ve Atdheun mbi gjithçka. Ramushi i ka shërbyer gjithmonë me vetëmohim Kosovës, në ditë të mira dhe në ditë të këqija. Ramush Haradinaj është Kosova – Kosova e lirë, Kosova e pavarur, Kosova europiane.
— Lulzim Basha (@lulzimbasha_al) July 19, 2019

Të premten, Ramush Haradinaj dha dorëheqjen nga posti i kryeministrit pas ftesës së marrë nga Gjykata Speciale për të dëshmuar për krimet e luftës në Kosovë.

Haradinaj në arsyetimin e dorëheqjes së tij tha se nuk dëshironte që të paraqitej në Gjykatën Speciale si kryeministër i Kosovës, por si një qytetar i thjeshtë.

Letra pas dorëheqjes, Haradinaj: Ndërkombëtarët po gabojnë me Kosovën

Ramush Haradinaj ka dhënë këtë të premte dorëheqjen e parevokueshme si Kryeministër i Kosovës. Ish Komandanti i UÇK, që mbante postin e Kryeministrit të Kosovës, Ramush Haradinaj, është thirrur për herë të tretë nga Gjykata Speciale në Hagë, për të dëshmuar si i dyshuar për krimet e luftës në Kosovës. Me një letër publike, Haradinaj tregon se dorëheqja vjen pas ftesës nga Haga, duke u shprehur se në të nuk mund të shkojë si Kryeministër i Kosovës, por si Ramush Haradinaj. “Nderi i Kryeministrit dhe Shtetit duhet të ruhet dhe unë nuk e poshtroj asnjëherë. Në Hagë si Ramush Haradinaj do t’i dal përball shpifësve, ashtu si e kërkon nderi i luftëtarit shqiptar. Pastërtia ime dhe e luftës së UÇK-së, e konfirmuar nga dy aktgjykime nuk mund të njolloset nga askush dhe asnjëherë. Shteti im është Kosova, e paprekshme në multietnicitet, shumëgjuhësi, në territor e kufijë”, shrkuan Haradinaj.

Largimi i Haradinajt, a duhet ta pranojë presionin e ndërkombëtarëve?

Më tej, në letrën e tij, Haradinaj shkruan se Kosovës po i bëhet presion i padrejtë nga ndërkombëtarët për të hequr taksën ndaj mallrave serbe. Sipas Haradinajt, kjo taksë dhe tregtia e lirë me Serbinë, duhet të shërbejnë si çmim i njohjes së pavarësisë së Kosovës nga Serbia. “Kosovës i bëhet presion i padrejtë për çmimin e njohjes nga Serbia. Ndarja apo Dodik Republika janë të papërballueshme për Kosovën dhe stabilitetin e rajonit. Si Kryeministër i Qeverisë së Kosovës besoj fuqishëm se çmimi për njohje është tregu dhe për këtë taksa duhet të jetë çmimi i njohjes. Bashkësia ndërkombëtare po bën gabim që po insiston në çmim të papërballueshëm për Kosovën për njohje. Lidershipi Kosovar po bën gabim se nuk po e fuqizon legjitimitetin e vendimit për taksën ndaj Serbisë. Herët a vonë do ta kuptojmë se sa dëm i madh po i bëhet vendit me këtë mosunitet. Kosova euro-atlantike është e interesuar për njohje reciproke në kufijtë ekzistues. Dialogu për njohje është edhe rruga për tregti të lirë me Serbinë. Kurrë nuk është vonë të jemi bashkë – tregu për njohje, e jo ndarja apo Republika e Dodikut. Më lejoni të ju siguroj se: Taksa mbetet, Ushtria e Kosovës shkon para, Trepça është e gatshme për investime”, shprehet Haradinaj.

Në fund të letrës publike, Haradinaj i bën thirrje Hashim Thaçit si president i Kosovës, të konsultohet me partitë politike, dhe më pas të shpallë datën e zgjedhjeve të parakohshme. “Pas kësaj dorëheqjeje MANDATIN IA KTHEJ POPULLIT. Sovrani të vendosë për udhëheqjen e ardhshme me zgjedhje të lira dhe demokratike. I drejtohem Presidentit që në afatin kushtetues të kryejë konsultimet me partitë politike dhe t’i shpallë zgjedhjet e parakohshme. Qeveria e vendit vazhdon të kryejë funksionet e veta pa lejuar vakuum qeveritar deri në Qeverinë e re të dalur nga zgjedhjet e lira dhe demokratike. Menjëherë do t’i drejtohem me shkresa zyrtare për dorëheqjen e parevokueshme institucioneve të vendit dhe udhëheqësve të koalicionit qeverisës. Do t’i shërbej me besnikëri, gjithë jetën, POPULLIT, ATDHEUT DHE SHTETIT TIM KOSOVËS! Faleminderit”, shkruan Haradinaj.

‘Taksa serbe’, përçan Haradinajn me Veselin

Kryeministri i Kosovës, Ramush Haradinaj, tha të mërkurën se qëndrimet jo unike të udhëheqësve të Kosovës rreth tarifave ndaj mallrave serbe dhe bisedimeve me Beogradin, e kanë bërë Serbinë më të fortë dhe i kanë dhënë mundësi të kushtëzojë kthimin në tryezën e bisedimeve.

Ai i bëri këto komente duke reaguar ndaj intervistës së kryetarit të parlamentit të Kosovës, Kadri Veseli, dhënë Zërit të Amerikës, në të cilën ai tha se ka dallime konceptuale me kryeministrin Haradinaj rreth tarifave dhe bisedimeve.

“Dhe ka një pragmatizëm ku unë e mbroj interesin tim, duke mos lejuar asnjëherë që komunikimi me Serbinë, forma në të cilën komunikoj me Serbinë të bartet njëtrajtshëm edhe me Shtetet e Bashkuara dhe Bashkimin Evropian. Ky është dallimi mes meje dhe kryeministrit Haradinaj, i cili duhet ta bëjë këtë dallim. Kur flas për Serbinë, edhe 1000 për qind ia vë taksën, por kur flasim me Shtetet e Bashkuara dhe Bashkimin Evropian ne duhet të jemi pragmatikë, duhet të jemi pak më të mençur. Kjo është çështja që dallon”, tha zoti Veseli.

“E pash intervistën, është kualifikim i paqëndrueshëm, pra, nuk kam qasje me Amerikën si me Serbinë. Me Serbinë njëherë jam nda në luftë, kam qenë krah për krah me Amerikën. Kemi dallime në tema me Serbinë të shumta, ma pak me Amerikën. Kemi dallim në një temë; suspendimin e taksës. Sikur kryetari Veseli e të tjerët të kishin qenë unik Amerika ndoshta do të na kishte përkrahur më shumë, po kjo dëshirë me fol ndryshe po na bën dëm si Kosovë e na ka lënë ku jemi sot”, tha të mërkurën kryeministri Haradinaj.

Ai hodhi poshtë çdo mundësi që këmbëngulja për tarifat të jetë populizëm.

“Fatkeqësisht besnikëria ndaj atdheut ndaj temave të interesit nacional nuk duhet me u kalkulu kështu. Populizëm ose miqësi me Amerikën për Veselin e të tjerët ka qenë kur ishin momente të tjera, u pa se nuk e kemi fort shqetësim qasjen ndaj Amerikës se kemi fol me një gjuhë tjetër, ju e dini për cilën temë e kam fjalën. Ndërsa, kur janë temat e interesit nacional, me i kërku Kosovës me e suspendu taksën pra me ja dhanë tregun shtetit që e mohon ekzistencën tonë është e padrejtë. Ehe nuk shpjegohet kjo kurrqysh ski qysh me e shpjegu, nuk është në logjikën e Amerikës, e as të askujt tjetër, por, është fatkeqësia e udhëheqësve tonë që shkojnë atje dhe i thonë duhet me e gjet një zgjidhje, në vend se me i thanë ka të drejtë kryeministri jonë, kemi të drejtë që e kemi vendosë taksën…Po shihet këta unë e kam pas shumë të vështirë me e mbajt këtë drejtim politik, pikërisht për shkak të këtyre thyerjeve, se jam ankuar disa herë që nuk kemi qenë unik fatkeqësihst. Dhe kjo pastaj e bën Serbinë më të guximshme edhe nuk lëshon pe përderisa gjysma jonë i thotë kemi me e hekë taksën pse me e ardhë Serbia në dialog?”, tha kryeministri Haradinaj.

Qeveria e Kosovës u vuri tarifa prej 100 për qind mallrave nga Serbia në nëntor të vitit të kaluar në shenjë kundërvënieje ndaj qasjes së Beogradit ndaj shtetësisë së Kosovës. Beogradi kushtëzon rifillimin e bisedimeve të pezulluara me heqjen e këtyre tarifave, ndërsa Prishtina kërkon që bisedimet të mos kushtëzohen./VOA/

Haradinaj: Nëse nuk ka njohje reciproke me Serbinë, do armatoset dhe Kosova

“Kosova nuk ulet në asnjë tryezë dialogu nëse nuk ka një marrëveshje për njohje reciproke të kufijve ekzistues me Serbinë”, ky është qëndrimi i pandryshuar i Kryeministrit të Kosovës, Ramush Haradinaj, i cili tha se i vetmi kompromis që Kosova mund të bëjë për njohjen e reciproke nga Serbia është heqja e taksës. “Heqja e taksës është kompromis. Ne kemi kërkuar një kornizë marrëveshje për njohje reciproke në kufijtë ekzistues. Vetëm për këtë negociojmë”.- tha Haradinaj duke iu përgjigjur kështu thirrjes së presidentit francez, Macron për arritjen e një marrëveshje mes Kosovës dhe Serbisë, gjatë vizitës së tij në Serbi.

Haradinaj e ashpërsoi gjuhën e tij duke deklaruar se nëse nuk ka njohje reciproke atëherë edhe Kosova ashtu si Serbia do të kërkojë të drejtën për t’u armatosur.

“Serbia po shkon dhe po blen armë në Rusi. Edhe Franca e bëri një kontratë me Serbinë, për sisteme raketore. Ndërkaq, neve na thonë “nuk mund t’i vëmë emrin marrëveshjes” se është njohje reciproke në kufijtë ekzistues. Çfarë të bëjmë ne pra, nëse emrin nuk mundeni t’ia vini? Ne jemi shtet i pavarur dhe ne nuk kërkojmë asgjë tjetër në dialog përveç njohjes reciproke. Nëse nuk jeni gati për këtë, atëherë është porosi për ne që edhe ne të armatosemi”.

Haradinaj takon Theresa May: I kërkova mbështetje për dialogun me Serbinë

Kryeministri i Kosovës, Ramush Haradinaj ka takuar gjatë Samitit të Poznanit në Ploni, kryeministren e Britanisë së Madhe, Theresa May. Nëpërmjet një njoftimi në faqen e tij zyrtare në Facebook, Haradinaj shprehet se i ka kërkuar mbështetjen e Britanisë Znj.May, për finalizimin e dialogut me Serbinë.

“Takim bilateral me kryeministren e Britanisë së Madhe, Theresa May, në kuadër të Samitit të vendeve të Ballkanit Perëndimor, në Poznan të Polonisë. Kryeministren May e njoftova për zhvillimet politike në Kosovë, duke shprehur vendosmërinë tonë për fuqizimin e partneritetit bilateral mes dyja vendeve dhe duke kërkuar mbështetje në proceset rajonale, veçmas në finalizimin e dialogut me Serbinë, konkretisht në arritjen e një marrëveshjeje, finale, me njohje reciproke në kufijtë ekzistues”, shkruan Haradinaj.

Gjithashtu, Kryeministri kosovar shprehet se i ka shprehur mirënjohjen Britanisë së Madhe, si vend që ka dalë kundër idesë së ndryshimit të kufijve apo shkëmbimit të territoreve midis Serbisë dhe Kosoës.

“Falënderova Kryeministren May për qëndrimin konsistent të Britanisë së Madhe kundër idesë për ndryshim kufijsh dhe këmbim territoresh, si dhe për ndihmen e vazhdueshme që Mbretëria e Bashkuar ka dhënë për fuqizimin e sundimit të ligjit, avancimin e administratës publike dhe zhvillim ekonomik në Kosovë”, përfundon Haradinaj njoftimin e tij në Facebook.

Haradinaj pranon raportin por jo heqjen e taksës: Vetëm kur Serbia të njoh Kosovën

Kryeministri i Kosovës, Ramush Haradinaj duket i vendosur për të mos hequr taksën 100 % ndaj produkteve serbe edhe pas thirrjeve të vazhdueshme të ndërkombëtarëve. Pas takimit me përfaqësuesen e BE-së në Prishtinë, Nataliya Apostolova, e cila i dorëzoi edhe progres raportin, Haradinaj tha se heqja e taksës do të ndodh vetëm kur të ketë një njohje reciproke mes shteteve.

“Heqja e taksës ndaj Serbisë do të bëhet vetëm nëse do të ketë njohje reciproke Kosovë-Serbi.”

Haradinaj foli edhe për raportin e KE, duke e cilësuar si të përzierë, ku në disa raste ishte pozitiv dhe në disa të tjera kishte kritika si në rastin e taksës.

“Në disa raste është pozitiv, ndërsa në raste të tjera ka kritika, shembull si rasti i taksës, por përgjithësisht është raport që përmban suksese dhe kritika ndaj Kosovës” – tha Haradinaj

Haradinaj darkon në shtëpinë e Zaev: Bashkëpunim për të ardhmen euro-atlantike!

Kryeministri i Kosovës Ramush Haradinaj së bashku me bashkëshorten e tij, Anita, ka bujtur mbrëmjen e sotme në shtëpinë e homologut të tij të Maqedonisë së Veriut, Zoran Zaev.

Haradinaj ka publikuar një foto në rrjetin social Facebook, ku shfaqet së bashku me homologun Zaev dhe bashkëshortet reskeptive, duke shkruar edhe një koment për darkën miqësore në shtëpinë e Kryeministrit të Maqedonisë Veriore.

“Bashkë me Anitën, të pritur në shtëpinë e Kryeministrit të Maqedonisë Veriore, Zoran Zaev dhe zonjës Zorica. Bashkëbisedim miqësor, për fqinjësi të mirë, bashkëpunim korrekt dhe të ardhmen e përbashkët euro-atlantike të të dyja vendeve!”, ka shkruar Haradinaj.

Meta takon Haradinajn: Kënaqësi që ndaj pikëpamje të përbashkëta për…

Presidenti i Republikës Ilir Meta ka zhvilluar një takim mbrëmjen e sotme me Kryeministrin e Kosovës, Ramush Haradinaj. Kreu i shtetit ka publikuar në faqen e tij zyrtaren në Facebook një foto ku shfaqet me Kryeministrin e Kosovës në një ambient publik.

“Kënaqësi e veçantë të ndaja sërish me Kryeministrin, Ramush Haradinaj në Durrës pikëpamje mbi sfida të përbashkëta që forcojnë marrëdhëniet midis dy vendeve dhe perspektivën e përbashkët europiane”, shkruan Presidenti Meta në përshlrimin e fotos.

Publikimi i fotos vjen fill pas mbledhjes së sotme të grupit kordinues të punës mes dy qeverive, Shqipërisë dhe Kosovës, që kujdeset për zbatimin e marrëveshjeve të nënshkruara në mbledhjet e përbashkëta midis dy qeverive.

Në mbledhjen e sotme u ngritën shumë spekulime, pasi ajo u drejtua nga Zëvendës Kryeministri shqiptar Erion Braçe dhe ai i Kosovës Fatmir Limaj, në mungesë të kryeministrave Rama dhe Haradinaj.

Por, po mbrëmjen e sotme, në “Real Story”, Fatmir Limaj u dha fund spekulimeve për mungesën e Ramës dhe Haradinajt në mbledhjen e sotme.

Limaj saktësoi se kjo nuk ishte mbledhje midis dy qeverive, por e grupit të punës që kujdeset për zbatimin e marrëveshjeve të nënshkruara më herët.

Pas publikimit të fotos nga kreu i shtetit shqiptar, të njëjtën gjë ka bërë dhe Kryeministri Haradinaj, i cili e shoqëron dhe me komentin: “Qëndrime unike me Presidentin Ilir Meta për temat me rëndësi për Kosovën e Shqipërinë”, shkruan Haradinaj në postimin e tij.

Rama-Haradinaj munguan në mbledhjen e dy qeverive, Limaj tregon të vërtetën!

Zëvendës Kryeministri i Kosovës, Fatmir Limaj, ka qenë i ftuari i mbrëmjes në emisionin “RealStory” të gazetarit Sokol Balla, ku ka folur për disa tema, duke nisur nga marrëdhëniet e Kosovës me Shqipërinë e deri te çështja e negociatave me Serbinë.

Fillimisht ai ka sqaruar pse mbledhja mes dy qeverive (që në fakt ishte grupi koordinues midis dy vendeve) u zhvillua pa praninë e dy Kryeministrave, Edi Rama për Shqipërinë dhe Ramush Haradinaj për Kosovën.

“Kjo nuk ishte mbledhje e dy qeverive. Në Pejë ne krijuam një grup monitorues për marrëveshjet e firmosura nga dy qeveritë tona. Ky takim në këtë lloj formati është i treti që mbahet”.

“Është një nga takimet e radhës, për afatin e zbatimit të marrëveshjeve që kemi firmosur. Pra këtu nuk ka asgjë të bëj me prezencën apo mos prezencën e dy kryeministrave”, ka thënë Limaj.