Komploti kundër Hajdarit, ikin dy “plëngprishës”. Rudina Hajdari çon në Prokurori Korab Litën

Telenovela e nisur të hënën me ndryshimet në drejtimin e Grupit Parlamentar të deputetëve të djathtë në Kuvend, pritet të përfundojë në Porkurori. Deputetja Rudina Hajdari, që drejton të djathtët në Kuvend, publikoi letrën e firmosur nga deputetja Fatjona Dhimitri, e cila njofton tërheqjen nga firma “pro” Korab Litës si kryetar i Grupit të deputetëve të djathtë në Kuvend. Hajdari shprehet se ndaj deputetëve është ushtruar presion nga Korab Lita dhe gangësterët e tij, ndaj pajmet filmike të disponuara nga Kuvendi, do t`i çohen Prokurorisë.

“Përveç një protagonizmi të shëmtuar mediatik, Korab Lita dhe gangsterët e tij, kanë ushtruar presion ndaj deputetëve, përfshirë edhe zj. Fatjona Dhimitri, e cila ka firmosur, për tërheqjen e këtij puçi. Pamjet filmike të disponuara nga zyrat e Kuvendit do t’i çohen Prokurorisë”, njofton deputetja Rudina Hajdari. E kontaktuar nga Realstory.al, kryetarja e grupit të deputetëve të djathtë, Rudina Hajdari konfirmoi se kësaj çështje do i shkohet deri në fund.

“Do e ndjekim deri në fund”, tha ajo shkurtimisht. Të hënën, deputeti i opozitës së djathtë në Kuvend, Korab Lita publikoi një shkresë të firmosur nga 7 deputetë të djathtë, ku njoftonte kryetarin e Kuvendit për ndryshime në drejtimin e grupit parlamentar. Më pas reagoi deputetja Rudina Hajdari, e cila u shpreh se ajo vijonte të ishte drejtuese e demokratëve në Kuvend.

Ndërkohë, nënkryetari i grupit, Halit Valteri, që kishte firmosur këtë letër, reagoi duke u shprehur se tërhiqej nga firma për emërimin e Korab Litës si kryetar i Grupit të Deputetëve të Djathtë në Kuvend, ndërsa u tregonte se Rudina Hajdari vijon të jetë drejtuese e demokratëve në Kuvend. /Realstory.al/

Hajdari nxjerr “blof” Litën: Të djathtët i drejtoj unë

Deputetja e djathtë, Rudina Hajdari reagoi mbrëmjen e të hënës, pas lajmit se deputeti Korab Lita kishte marrë drejtimin e grupit të deputetëve të djathtë, të cilin ajo e drejton. Hajdari shkroi në Twitter se ajo vijon të jetë kryetare e këtij grupi parlamentar, madje, sipas Rudina Hajdarit, grupi është duke u zgjeruar.

“Ju sigurojë se unë jam në krye të grupit Demokrat që ndërkohë po zgjerohet dhe forcohet edhe më shumë. Vendosmëria jonë për të çuar deri në fund reformimin e sistemit është detyrim ndaj çdo demokrati dhe opozitari që kërkon ndryshimin në Shqipëri. Shihemi te enjten”, shkruan Rudina Hajdari.

Më herët, gjatë pasdites të së hënës, deputeti demokrat Korab Lita, pretendoi se ishte zgjedhur Kryetar i Grupit Parlamentar të deputetëve të djathtë në Kuvend.

Burimet e Realstory.al konfirmuan se deputeti Korab Lita kishte pasur ambicie për të drejtuar grupin e deputetëve të djathtë në Kuvend. Megjithatë, zëra pranë Rudina Hajdarit i konfirmuan Realstory.al se lajmi ishte i rremë, ndërsa pjesëtari i këtij grupi Myslim Murrizi, pritet që të sqarojë gjithë situatën në një dalje publike. /Realstory.al/

Tentojnë të spostojnë Rudina Hajdarin?

Deputeti Korab Lita, që vjen nga radhët e opozitës së djathtë në Kuvend, pretendon se është zgjedhur Kryetari i Grupit Parlamentar, që drejtohet nga Rudina Hajdari. Megjithatë, zëra pranë Rudina Hajdarit konfirmojnë indirekt se Lita ka pasur pretendime, porse zëvendësimi i Hajdarit është lajm i rremë. “Grupi Parlamentar Demokrat në mbledhjen e tij të fundit, në funksion të organizimit të brendshëm bëri ndryshim në drejtimin e grupit. Personalisht, dua t`ju dërgoj një falënderim kolegëve të mi të Grupit Parlamentar për Vlerësimin dhe besimin që më dhanë për të drejtuar Grupin Demokrat”, shkruan Korab Lita në rrjetet sociale.

Më tej, Korab Lita shkruan se: “Detyra që më është besuar si Kryetar i Grupit Parlamentar Demokrat unë e shoh si një përgjegjësi e aspak privilegj sidomos në këtë situatë politike e institucionale ku ndodhet vendi ynë. Nëpërmjet jush dua të siguroj, dhe të gjithë qytetarët shqiptarë, që të gjithë bashkë do jemi në lartësinë e duhur për të justifikuar besimin e dhënë”, shkruan Korab Lita.

Ai publikoi një foto nga mbledhja e Grupit Parlamentar të Djathtë, ku shihen disa deputetë si Myslim Murrizi, Alban Zeneli apo Halit Valteri, por mungon Rudina Hajdari. A është kjo një krisje e deputetëve të djathtë në Kuvend, apo një lëvizje për riorganizimin e brendshëm të tyre? Ende nuk dihet.

Rudina Hajdari është një nga zërat më të fortë dhe më aktiv të opozitës në Kuvend kundër establishmentit politik në vend, majtas e djathtas. Megjithatë, për të sqaruar situatën e krijuar në Grupin Parlamentar të Deputetëve të Djathtë, pritet te ketë një deklaratë të nënkryetarit të Kuvendit dhe anëtar i këtij grupi parlamentar, Myslym Murrizi. /Realstory.al/

Hajdari përplaset me Gjiknurin: Jo reformë me dy faza

Dy bashkë-kryetarët e komisionit të Reformës Zgjedhore, Damian Gjiknuri dhe Rudina Hajdari patën përplasje për miratimin e kësaj reforme në dy faza. Për Gjiknurin është e rëndësishme që në muajin dhjetor të mbyllet drafti ku paraqiten rekomandimet e OSBE-së, ndërsa ndryshimi i sistemit të vijojë më pas duke qenë se kërkon një kohë më të gjatë diskutimi. Hajdari nuk është dakord në lidhje me këtë duke thënë se do diskutohen paralelisht edhe rekomandimet dhe sistemi përmes grupeve të punës të ngritura, dhe në fund kur të vijë momenti i miratimit do të jetë bashkërisht. Megjithatë palët kanë dakordësinë se reforma do të diskutohet brenda institucioneve të kuvendit, pavarësisht kërkesës së PD për ta bërë atë jashtë përmes një strukture të posaçme. Si Gjiknuri dhe Hajdari ftuan PD të jetë pjesë e tryezës me çdo mënyrë komunikimi për të adresuar çështje te reformës zgjedhore në një dialog sa më gjithëpërfshirës.

“Brenda një jave ekspertët do të paraqesin draftet e para për të adresuar rekomandimet e OSBE-së. Opozita ka të drejtën e propozimit për sistemin zgjedhor që do të adresohet paralelisht me rekomandimet e OSBE-së. Ne e bëmë të qartë që çështja e sistemit, vota e emigrantëve apo të tjerë të komplikuar do të duan më shumë kohë, ne duam që brenda dhjetorit të mbyllim çështjet që kanë të bëjnë me rekomandimet. PD nuk ka sjellë propozime, në çdo draft që do të diskutojmë natyrshëm edhe ata kanë të drejtë të bëjnë propozime si shoqëria civile, komente dhe vërejtje. Ne i kemi kërkuar PD-së të gjejë çdo forme komunikimi, çdo propozim edhe pa qenë pjesë e komisionit, ne jemi gati që ato propozime që janë në përputhje me rekomandimet ti marrim në konsideratë, por të jenë sipas rekomandimeve të OSBE-së.” tha Gjiknuri, i cili shtoi se opozita parlamentare nuk është dakord për ndarjen me dy faza, ndërsa shprehu se shumica ka vullnet për të parë edhe çështjet e sistemit.

“Jo nuk janë dakord, insistojnë për çështjen e sistemit zgjedhor. Por Shqipëria ka disa prioritete që lidhen me negociatat. Ne kemi vullnetin për ta parë çështjen e sistemit. Por komisioni filloi ta trajtojë çështjen dhe javë pas jave do të miratojmë paketa. Nëse PD-ja zgjedh rrugë komunikimi apo ka propozimet e saj jemi gati ti marrim parasysh. Tryeza me PD është përtej kodit, është e natyrës politike. Unë besoj që brenda dhjetorit kemi mundësi ti adresojmë çështjet që kanë të bëjnë me rekomandimet e OSBE-së.” tha Gjiknuri

Bashkë-kryetarja e Komisionit për Zgjedhoren, Rudina Hajdari theksoi se është kundër votimit të reformës me dy faza, por kërkon që si rekomandimet e OSBE-se ashtu edhe ndryshimi i sistemit zgjedhor të votohen së bashku. Hajdari bëri të ditur se do ngrihen grupe pune për të adresuar çështje të caktuara.

“Kemi rënë dakord të bëjmë disa grupe pune për disa nga çështjet, disa për ndryshimin e sistemit për një propozim konkret nga opozita parlamentare, atë që ne do të propozojmë. Nuk do të ketë reformë me dy faza, për këtë të jeni të qartë dhe për këtë kemi rënë dakord. Do të merremi edhe me rekomandimet e OSBE-së, por edhe për ndryshimin e sistemit, por kur të vijë momenti i miratimit do të jetë bashkërisht. Opozita parlamentare ka vetëm një qëllim; ndryshimi i sistemit, ta shembim këtë dhe qytetarët të votojnë përfaqësuesit e tyre dhe jo partitë politike.” tha Hajdari

Presidenca e “zgjedhorja”, Sekretari i OSBE pret delegacionin e Kuvendit

Deputetët anëtar të Komisionit të Integrimit Europian, Rudina Hajdari, Senida Mesi dhe Ralf Gjoni, zhvilluan një takim zyrtar me Sekretarin e Përgjithshëm të OSBE-së Roberto Montella. Takimi i mbajtur në Kopenhagen të Danimarkës, sipas një njoftimi të bërë nga delegacioni i OSBE-së në Tiranë, pati në fokus disa çështje, përfshirë vendimin e Këshillit të Europës për hapjen e negociatave të Shqipërisë me BE si dhe procesi i reformës zgjedhore dhe gjyqësore.

Gjithashtu, në takim është diskutuar edhe për marrjen e Kryesisë së radhës së OSBE-së nga Shqipëria në vitin 2020. Sipas njoftimit, mësohet se “Sekretari i Përgjithshëm Montella theksoi se Kryesia e ardhshme e Radhës është një përgjegjësi dhe mundësi për mbarë vendin, si dhe një proces në të cilin duhet të përfshihen dhe bashkëpunojnë të gjithë aktorët kombëtarë, përfshirë Kuvendin. Po ashtu, ai përsëriti mbështetjen e fortë të Asamblesë Parlamentare të OSBE-së për Shqipërinë dhe shprehu shpresën për të forcuar më tej bashkëpunimin e shkëlqyer, gjatë vizitës së pritshme të nivelit të lartë të Asamblesë Parlamentare, në Shqipëri, në nëntor”.

Ai citohet të jetë shprehur se “OSBE-ja ka nevojë për udhëheqje të fortë dhe unë kam besimin që Shqipëria do të jetë në gjendje ta çojë përpara axhendën e OSBE-së, në frymën e përgjegjësisë dhe pronësisë së përbashkët”. Në takim është diskutuar edhe për tryezën e Reformës Zgjedhore organizuar nga OSBE pak ditë më parë në Tiranë. Sekretari i kësaj organizate në bashkëbisedimin me deputetët e Kuvendit të Shqipërisë, shprehu besimin se “të gjitha palët do të vijojnë të jenë të përkushtuara në procesin e reformës zgjedhore, përfshirë përfaqësuesit e qeverisë, opozitës parlamentare dhe jashtëparlamentare, shoqërisë civile, si dhe ekspertë vendas e të huaj”.

Rudina Hajdari urdhër deputetëve: Çohuni nga kafja

Parlamenti diskuton të enjten projekt-Rezolutën për “Hapjen e negociatave të Shqipërisë me Bashkimin Europian”. Në nisje të seancës plenare, pasi përfundoi së lexuari rendin e ditës kryetari i Kuvendit, deputetja Rudina Hajdari, bashkëhartuese e dokumentit të Rezolutës, mori fjalën e para.

Ajo i kërkoi kreut të Kuvendit, Gramoz Ruçi, që të ftonte deputetët të ishin të pranishëm në seancë, për të diskutuara projekt-Rezolutën, që sipas Rudina Hajdarit është shumë e rëndësishme për hapjen e negociatave për anëtarësim të Shqipërisë dhe BE.

“Do duhej të kishte një pjesëmarrje më të madhe nga deputetët sot në Kuvend, pasi do diskutojmë për Rezolutën për negociatat. Nga të dyja anët, mazhoranca dhe opozita, të ngrihen nga kafet dhe të vijnë të diskutojmë rezolutën në Kuvend. Sepse është rezolutë shumë e rëndësishme”, tha Hajdari.

Miratimi i projekt-Rezolutës është në krye të axhendës së Kuvendit për seancën e të enjtes. Sipas rendit të ditës, rreth 30 deputetë pritet të flasin për këtë dokument, të hartuar nga deputet Rudina Hajdari dhe Senida Mesi. Projekt-Rezoluta është një dokument që nxit më tej punën e Kuvendit dhe të institucioneve të tjera, për hapjen e negociatave të Shqipërisë me BE në 18 tetor.

Pas Venecias, Hajdari: Pohoi shkeljet e Metës

Kryetarja e grupit parlamentar demokrat në Kuvend, Rudina Hajdari deklaroi se raporti i Komisionit të Venecias që vërtetoi shkeljet kushtetuese të Presidentit, faktoi qëndrimin e opozitës parlamentare se Meta shkeli Kushtetutën, që votoi pro rezolutës së mazhorancës në Kuvend për nisje të hetimit ndaj tij. Për Hajdarin shkarkimi i takon Gjykatës Kushtetuese, por u faktua se Meta ka kryer tejkalim kompetencash me vendimin e tij për anulimin e zgjedhjeve të 30 qershorit.

“Komisioni i Venecias faktoi qartazi qëndrimin që Opozita Parlamentare ka pasur ndaj shkarkimit të Presidentit të Republikës për shkelje të Kushtetutës, duke tejkaluar kompetencat e tij nëpërmjet çdekretimit të datës së zgjedhjeve të 30 qershorit. Cili ka qenë dhe është qëndrimi i Opozitës Parlamentare?

Pro rezolutës për shkelje dhe tejkalim kompetencash të Presidentit të Republikës, por kompetenca për të vendosur nëse ajo shkelje ishte një shkelje e rëndë ose jo i takon vetëm Gjykatës Kushtetuese.” shkruan Hajdari, e cila thekson se opozita parlamentare është e vendosur të vijojë me punën dhe përparimin e reformës në drejtësi dhe asaj zgjedhore në institucionet e vendit me ndihmën e ndërkombëtarëve, përkrahje të cilën Rudina e gëzon maksimalisht.

“Sot e në vijim, ne, Opozita Parlamentare, në bashkërendim dhe me përkrahjen e Aleatëve Ndërkombëtarë do të vijojmë rrugën që kemi nisur drejt një Shqipërie Europiane, me një reformim në drejtësi, sistemin zgjedhor, dhe plotësimin e kërkesave drejt hapjes së negociatave për Shqipërinë në BE.”- shkruan Rudina në statusin e saj.

Sokol Balla: Rudina, Pasqyra e trishtë e Partisë

Nga Sokol Balla

Të mërkurën pasi emisioni Real Story përfundoi, një miku im më shkruajti me shaka: “Emisionit i ra audienca, se Rudina s’bën më gafa”. Kjo rritje e shpejtë eksponenciale e kësaj vajze në dukje të brishtë, por me forcën që i imponon Tropoja dhe logjikën Uashingtoni, m’u kujtua kur të enjten, pak orë pas emisionit një djalë i ri sulmoi verbalisht por vetëm nga pak centimetra larg, një i ri militant i PD, Rudina Hajdarin. T’i thuash Rudinës a e njeh të atin, është t’i kujtosh asaj kur ishte vetëm dhjetë vjeç dhe e tërhiqnin të hutuar në shesh në 14 shtator, pas arkivolit të të atit, që partia e tij e përdori deri në fund atë ditë, për të shembur derën e Kryeministrisë dhe tentuar të merrte pushtetin me dhunë. I riu që e sulmoi me siguri nuk e njeh Azem Hajdarin dhe historinë e tij rebele në partinë që ai vetë themeloi e që ja vodhën pak ditë më vonë. Që prej 14 shkurtit 1991 kur Sali Berisha u zgjodh me një procedurë të diskutueshme përballë tij dhe Meksit, i ndjeri Hajdari nuk pushoi përpjekjen e tij për një parti tjetër nga ajo që krijoi, që e përjashtoi së paku dy herë dhe e përdori edhe të vdekur.

Sot, 21 vjet nga ikja e tij, sjellja e PD nuk ka ndryshuar, por ajo e familjes politike Hajdari, po. Raporti i Rudinës në pasqyrën politike të familjes, është i qetë dhe normal. Ajo është sot bashkëkryetare e dy komisioneve, një politik dhe një kuvendor dhe drejton një grup deputetësh, që kur zgjohen në mëngjes, vishen si është koha në Uashington dhe jo në Tiranë. Brenda dy vjetësh reputacioni i saj, është forcuar, ndryshe nuk do të “meritonte” sulme të personalizuara si ai në shkollën në Shkodër. Rëndësia e saj është e tillë, saqë zyrtarë ndërkombëtarë që vizitojnë Tiranën, takojnë atë dhe jo Presidentin e Republikës. Në kushte të ngjashme me Partinë, i ati i saj 25 vjet më parë, pinte birra i trishtuar vetëm me drejtorin lokal të fondacionit Kondrad Adenauer. Rudina është në rregull dhe më partinë që themeloi i ati. Ajo është pasqyra ku krerët përgjegjës për aksionin “revolucionar” të këtij viti, shohin gjërat që nuk duhet të kishin bërë. Ose më saktë sjelljen që duhet të kishin, por që nuk e kanë dot, para një ndryshimi thuajse “normal” pushteti pas tetë vitesh të PS. Dhe kjo sigurisht është frustruese.

Frustrimi i të riut demokrat, është pjesë e frustrimit kolektiv të PD dhe militantëve të saj, përballë dështimit të madh të një aksioni që do sillte revolucionin, por që siç e tha idhët dhe bukur Manjani, “nxori Opozitën nga Parlamenti, për ta futur (të mërkurën), në një hotel. PD, ashtu si 21 vjet më parë, mendon që faji nuk është i lidershipit të PD, që mori vendimin, por i Hajdarit që e theu atë dhe sot jo vetëm është në Kuvend, por është vendimtare, bashkë me të sajët, në pika delikate të Reformës në Drejtësi, që u lanë ashtu nga partia që pasi e përjashtoi, tani po e sulmon. Është vendimtare gjithashtu edhe në reformën zgjedhore, në të cilën Hajdari është kryetare bashkë me Gjiknurin e PS, aq të anatemuar nga selia blu për vjedhje votash, sa atij dhe jo Rudinës, të mërkurën Ivi Kaso i la në dorë propozimet e opozitës.

Frustrimi i të riut demokrat është thellë thellë aprovimi frojdian që ai i bën dikujt që ka qenë në partinë e tij, që bën diçka që prodhon rezultat, pavarësisht sa i kontestueshëm mund të jetë ai. Është një thuajse-duartrokitje përballë asgjësë që akoma vjen nga Selia Blu, lidershipi i së cilës mburret në mëngjes nga amerikanët për një akt të pandodhur, dhe që nuk ndodhi sërish: rikthimi në sistem. Frustrimi i të riut shkodran, është i justifikueshëm pasi demokratët konservatorë nuk dinë akoma nëse partia e tyre do kthehet në sistem, ku siç tha dje Grida Duma “është rruga e vetme për të mundur Edi Ramën”, apo me luftë siç tha Doktori nga llogorja e Çim Pekës.

Rudina Hajdari e brishtë, e ftohtë dhe e qetë, është pasqyra e Lulzim Bashës, aty ku si tek pasqyra e përrallës së Borëbardhës, i thotë atij se është ende larg së qeni më i miri me i bukuri, dhe gati për të qenë kryeministër.

Ndaj në pamundësi për ta mundur pasqyrën, po mundohen ta thyejnë atë. Ndoshta jo me urdhër, por me klimën negative të sulmeve fatva, me mallkime politike, që kthehen pastaj në urdhra në psikikën e lodhur të një të riu të frustruar nga dëshira për revolucionin e tij të munguar.

I riu duhet mirëkuptuar, ndërsa PD nuk e ka më luksin ta keqkuptojmë. Ajo na duhet dhe na duhet si Rudina. Por me nxitim (për të), qetësi dhe dashuri.

Në çdo rast Rudinën tashmë e kemi.

Sulmi, irritohet Patozi

Kryetari i Partisë Bindja Demokratike, Astrit Patozi reagoi në rrjetet sociale, pas sulmit që një i ri (pjesë e FRPD në Shkodër), i bëri deputetes Rudina Hajdari. Patozi reagon ashpër dhe shënjestron drejtuesit e PD, duke u shprehur se opozitën e quajnë “pronë” apo “leje ndërtimi”.

“Janë më shumë të marrë, se sa të poshtër, dhe për këtë nuk duhen marrë asnjëherë seriozisht.

Ata mendojnë se opozita është pronë, leje ndërtimi apo tender, që ka nevojë patjetër për firmën e tyre, sepse vetëm kështu e konceptojnë politikën dhe atë që vjen prej saj”, shprehet Patozi.

Patozi e quan skenë të neveritshme atë që ndodhi në Shkodër, ndërsa shprehet se opozitës e vetmja gjë që i ka mbetur është e ulëritura, pas revolucioneve që hëngrën bijtë e vet.

“Ndaj edhe mos u çudisni, kur të shikoni skena të neveritshme si ajo me atë trimin nga Shkodra, që i hakërrehej Rudina Hajdarit se përse ajo nuk e njihte tamam babain e vet, ashtu si ai vetë. Në fakt është e vetmja gjë që u ka ngelur për të bërë, pas një serie të pashembullt revolucionesh të premtuara, të cilat, ose nuk kanë shpërthyer kurrë, ose kanë ngrënë bijtë e vet”, shkruan Patozi.

Në fund, Patozi shprehet se reagimi i të riut demokrat në Shkodër, ishte i ngjashëm me ato të bishave të uritura, që u zvogëlohet territori. “Është një reagim i ngjashëm me ato bishat e uritura, të cilat në ruajtje të territorit, që u zvogëlohet përditë, shenjojnë duke përmjerrur hapësirën e tyre, ku nuk duhet të shkelin të tjerët. Në shqip mund të thuhet edhe “tokë e xanun”, përfundon kreu i BD./Realstory.al/

Hajdari: SPAK do të hetojë krimet elektorale në të kaluarën

Kryetarja e Grupit Parlamentar Demokrat, Rudina Hajdari shkruan se do të jetë SPAK dhe BHK që do të hetojnë krimet elektorale të së kaluarës dhe se këtë gjë s’mund ta bëjnë deputetët për njëri -tjetrin.

“Në të vërtetë, Komiteti Ad Hoc për Reformën Zgjedhore, theksoi se për të pasur një reformë gjithëpërfshirëse të zgjedhjeve ata që kanë manipuluar zgjedhjet në të kaluarën duhet të mbajnë përgjegjësi. Sidoqoftë, këto hapa do të ndërmarrin SPAK & BKH, pasi politikanët nuk mund të bëjnë gjyqe për njëri-tjetrin”, shkruan Rudina Hajdari.

Kjo deklaratë e saj vjen vetëm një ditë pas tryezës së organizuar nga OSBE për Reformën Zgjedhore dhe vjen si përgjigje ndaj kushteve të përfaqësuesve të PD-së, të cilët kërkojnë dorëheqjen e Damian Gjiknurit nga drejtimi i Komisionit Parlamentar të Reformës zgjedhore. Sipas PD-së ai nuk mund ta drejtojë këtë komision pasi duhej të ishte në burg për shkak të krimeve elektorale që sipas PD janë zbuluar nga përgjimet e publikuara nga BILD. Ndërkohë që çështja është ende nën hetim PD kërkon burg për Gjiknurin. Por përgjigjen e jep deputetja e PD-së Rudina Hajdari. Ajo thotë se nuk janë deputetët ata që duhet t’i bëjnë gjyqin njëri tjetrin, por kjo çështje i përket SPAK-ut.

Tryeza e së mërkurës e OSBE-së u përfshi nga debate të forta, ndërsa përfaqësuesi i PD-së, Ivi Kaso propozoi që reforma zgjedhore të bëhet nga ndërkombëtarët. Por si ambasadori i OSBE-së, dhe kryeministri Rama e kundërshtuan një propozim të tillë./realstory.al