Zbardhet vendimi, asnjë provë që lidh Tahirin me Habilajt

Gjykata e Krime të Rënda ka zbardhur të plotë vendimin e dënimit të dhënë për ish-ministrin e Brendshëm, Saimir Tahiri, me të gjitha argumentet e rrëzimit të akuzave të prokurorisë për të, duke argumentuar se ato përbëjnë dyshimin e arsyeshëm për të hetuar, por asnjë prej tyre nuk është provë për dënimin e ish ministrit për trafik droge dhe grup të strukturuar kriminal.

Sipas Gjykatës së Shkallës së Parë për Krimet e Rënda, janë vlerësuar si të pamjaftueshme provat e paraqitura nga Prokuroria për të lidhur Saimir Tahirin me akuzën e trafikut ndërkombëtar të lëndëve narkotike dhe e vetmja lidhje e provuar e ish-ministrit të Brendshëm me Habilajt është ajo farefisnore.

Organi i akuzës i mbështet provat te makina tip Audi A8, që Saimir Tahiri ia ka shitur Artan Habilajt, udhëtimet me skafin e Orest Sotës dhe udhëtimin e përbashkët për në Itali të dy prindërve të Saimir Tahirit me Moisi Habilajn. Për të tria këto episode, gjykata thotë se ato të krijojnë “dyshimin e arsyeshëm” të lidhjes së fortë të Saimir Tahirit me grupin e Habilajve, por në asnjërin prej këtyre rasteve, sipas vendimit të zbardhur të gjykatës, nuk kalohet caku i “dyshimit të arsyeshëm”. Pra, për gjykatën dyshimet e prokurorisë mbeten thjesht dyshime që nuk janë provuar në dosje dhe për këtë arsye gjykata i ka rrëzuar si prova që të lidhin Saimir Tahirin me trafikun e drogës.

Në rastin e shitjes së Audit, gjykata i referohet procesit gjyqësor të zhvilluar në vitin 2015 në Gjykatën e Fierit ndaj ish-oficerit të antidrogës, Dritan Zagani. Zagani ishte i pari që denoncoi se Habilajt lëviznin të lirë me makinën e Saimir Tahirit, që në atë kohë ishte ministër i Brendshëm.

Për llogari të këtij procesi është marrë në pyetje vetë Saimir Tahiri. Sipas procesverbalit të pasqyruar edhe në dosjen e prokurorisë për Krimet e Rënda, ish-ministri i Brendshëm ka pranuar se ka lidhje farefisnore të largët me Artan, Florian dhe Moisi Habilajn. Në këtë dëshmi, Tahiri pranon se ia ka shitur Audin Artan Habilajt dhe vetë ky i fundit e përsërit këtë. Ndërmjetësues në këtë transaksion ka qenë xhaxhai i Saimir Tahirit, Kujtimi. Prokuroria ngriti dyshimet se automjeti ishte lënë vetë në emër të Saimir Tahirit për t’u mundësuar Habilajve qarkullimin pa pengesa dhe shmangien e kontrolleve. Por, gjykata e hodhi poshtë këtë dyshim duke deklaruar se nuk provohej ky pretendim i prokurorisë.

Edhe sa u takon udhëtimeve të Saimir Tahiri me këtë mjet edhe pas shitjes së tij, Gjykata rrëzon pretendimet e prokurorisë se ato provojnë akuzën e pjesëmarrjes në grup të strukturuar kriminal në trafikun ndërkombëtar të drogës.

Gjykata ka rrëzuar edhe dëshminë e një shtetasi italian të arrestuar në Katania si bashkëpunëtor i Habilajve. Antonio Riela ka deklaruar në dëshminë e tij se Moisi Habilaj i kishte thënë disa herë që të mos shqetësohej, pasi në Tiranë kishte një person të pushtetshëm që e mbronte.

Gjatë përgjimeve ambientale dhe atyre telefonike mes Shqipërisë dhe Italisë, prokuroria përfshiu në dosje edhe përmendjen e emrit Saimir nga trafikantët. Në vendimin e arsyetuar, gjykata vëren se ky emër është përmendur dy herë. Por, në të dyja rastet gjykata thotë se nuk kalohet caku i dyshimit të arsyeshëm për të akuzuar Saimir Tahirin si pjesë e grupit të strukturuar kriminal.

Gjykata ka rrëzuar edhe një tjetër provë të fortë të prokurorisë, një përgjim mes xhaxhait të Saimir Tahirit, Kujtim Tahiri dhe Artan Habilajt. Bëhet fjalë për një përgjim të shtatorit të 2017, kur xhaxhai i Saimir Tahiri, Kujtim Tahiri telefonon Artan Habilajn. Megjithatë, në vlerësimin e gjykatës as ky përgjim nuk provon se Saimir Tahiri kishte një rol në grupin e strukturuar kriminal të trafikut të lëndëve narkotike.

Gjykata rrëzon gjithashtu edhe përgjimet e tjera ambientale të palës italiane, ku prokuroria pretendon se Moisi Habilaj dhe të tjerët flasin për dhurata që i kanë blerë për Saimir Tahirin dhe prindërit e tij. Gjykata thotë se për sa kohë nuk është gjendur asnjë prej materialeve të përmendura në këto përgjime, dyshimet mbesin dyshime.

Ish-ministri i Brendshëm, Saimir Tahiri u shpall fajtor vetëm për shpërdorim detyre më 19 shtator, në seancën maratonë që zgjati 13 orë në Gjykatën për Krimet e Rënda. Ai u dënua me 5 vite burg dhe pas përfitimit nga gjykimi i shkurtuar dënimi iu ul me 3 vite e 4 muaj burg. Zbutje vazhdoi më tej duke u kaluar në shërbim prove për të njëjtën periudhë kohore.

Tahiri u shfaq i pakënaqur me këtë vendim dhe apeloi çështjen, duke kërkuar pafajësinë. PO ashtu ky vendim u apelua edhe nga Prokuroria për Krimet e Rënda e tashmë dosja ndodhet në Gjykatën e Apelit për Krimet e Rënda.

Dënimi, Tahiri: Vendimi u mor nën kërcënime

Ish-ministri i Brendshëm Saimir Tahiri ka reaguar një ditë pas dhënies së dënimit ndaj tij duke e cilësuar atë të sforcuar dhe i ardhur nën shantazhe dhe kërcënime. Edhe pse lajmëroi se do të mbante të shtunën një deklaratë për mediat, ish ministri Tahiri ka folur për TVSH, duke thënë se gjykatësit u kërcënuar për të marrë një vendim të tillë.

“Vendimi ndaj meje ka qenë i sforcuar. Ky vendim u mor nën shantazh e kërcënime. Unë nuk merrem as me shantazhe dhe as me kërcënime. Nuk jam njeri i prapaskenave, sepse po të isha i tillë nuk do isha këtu ku jam e nuk do kisha arritur aty ku kam arritur”, deklaroi Tahiri.

I pyetur se a ndihej përgjegjës për kanabizimin e vendit, Tahiri theksoi se me këtë logjikë duhet të ishte në burg Koço Kokëdhima apo ministri aktual, për shkak se ka ende kanabis.

“Me këtë logjikë i bie që Koço Kokëdhima të ishte në burg që para tre vjetëve, i bie që Sali Berisha të ishte në burg që linte Lazaratin, i bie që ministri aktual i Brendshëm të jetë në burg se në Shqipëri ka kanabis. Unë rezervohem të flas për vendimin e Gjykatës pasi nuk e kam lexuar.” – tha Tahiri

Gjykata e Krimeve të Rënda, pas orëve të gjatë diskutimi, nxori verdiktin e saj përfundimtar duke dënuar ish ministrin Saimir Tahiri për shpërdorim detyre me 3.4 vite burg e konvertuar në shërbim prove. Gjykata hodhi poshtë akuzat për trafik droge apo pjesëmarrje në grup kriminal, për mungesë provash.

Tahiri, kur gjykata hyn dhunshëm në sherrin politik

Nga Skënder Minxhozi

Trupi gjykues që ndante fatin personal të Saimir Tahirit ka harxhuar shumë kohë në dhomën e këshillimit të enjten pasdite. Raportimet e gazetarëve të terrenit thonin se tre gjyqtarët kishin nisur madje të debatonin ashpër në lidhje me tre akuzat e rënda me të cilat prokuroria kërkonte të mbyllte pas hekurave ish-ministrin për 12 vjet.

Në fund të rreth tetë orë debatesh, vendimi i trupit gjykues duket se la gojëhapur të akuzuar dhe akuzues bashkë: shpërdorim detyre e jo grup i strukturuar kriminal apo trafik droge. Zyrtar që ka zbatuar keq detyrën, e jo kriminel që ndante paratë me trafikantët. Ky është thelbi i një akuze, e cila paradoksalisht, për sa kohë që s’kemi parë provat konkrete, e futi panelin e gjyqtarëve në zonën e rrezikshme të akuzave politike ndaj të gjithë maxhorancës, e jo vetëm ndaj personit të Saimiri Tahirit. Dhe ja pse.

Së pari, vendimi ndaj Tahirit nxorri si të pavlerë hetimin disavjeçar të organit të akuzës. Kush kujton insistimin e prokurorisë për ta arrestuar Saimir Tahirin, ka tani mundësinë ta vendosë në kontekst të drejtë atë kërkesë që asokohe acaroi gjakrat dhe gjuhën e të gjithë politikës shqiptare. Me devijimin e minutës së fundit nga akuzat e prokurorëve, gjyqtarët kanë ndërtuar një teoremë krejt të re të pozitës dhe përgjegjësive të vetë ish-ministrit të brendshëm, por kanë përfshirë potencialisht, në akuzën e rëndë që kanë formuluar, shumë më tepër persona me pushtet dhe institucione e instanca, sesa vetë Saimir Tahiri.

Së dyti, ky spostim i beftë i akuzave ndaj Tahirit, ka hedhur në opinionin publik shqiptar të parën akuzë zyrtare të formuluar nga sistemi i drejtësisë, për atë që njihet si “kanabizimi i vendit”. Një akuzë e cila nuk flet më për skafe të prishur e makina të dhëna e marra borxh mes Tahirit dhe trafikantëve, por për një fenomen kombëtar të disa viteve më parë. Eshtë dënimi i parë i një politikani për fenomenin, për të cilin s’i ka hyrë deri më sot gjemb në këmbë as atij që dilte në televizion e deklaronte me qetësi të plotë “Lazaratin e lejova unë, ishte vendimi im politik”! Ky pozicionim i ri e fut me të dyja këmbët drejtësinë shqiptare, në debatin e hershëm politik për fenomenin kanabis, që siç e dimë ka qenë në fokusin e posaçëm të politikës shqiptare në 30 vitet e fundit.

Së treti, vendimi për të ndërtuar një vendim gjyqësor mbi bazën e akuzës për shpërdorimin e detyrës në lidhje me përhapjen e kanabisit në të gjithë Shqipërinë, sjell në mënyrë të pashmangshme përfshirjen në listën e të akuzuarve, të një mase potencialisht të frikshme zyrtarësh, përfaqesuesish politikë e shtetërorë.

Sepse Saimiri Tahiri nuk mund ta ketë kanabizuar i vetëm një shtet, sado të vogël si Shqipëria. Akuza që i dha atij gjykata, përfshin drejtpërdrejt ose indirekt, një masë të madhe të institucioneve e agjensive të qeverisë qëndrore, asaj lokale, policisë, shërbimeve inteligjente etj. Në këtë aspekt, dënimi ndaj Tahirit, ndonëse pa etiketën e sikletshme të grupit të strukturuar kriminal apo të trafikut të drogës, është shumë i rëndë, pasi është më i shtrirë në hapësirë dhe në kohë. Nga lidhjet e vogla me ca kushërinj trafikantë, Tahiri akuzohet tani se ka prodhuar me anë të keqpërdorimit të detyrës, kanabizimin e gjithë shtetit.

E nga përmasa e akuzës rrjedh edhe bara e provës që ka sot gjykata. Sepse të prodhosh brenda disa orëve diskutimi në dhomën e këshillimit një akuzë kaq globale dhe të rëndë, ndërkohë që hetimi i prokurorisë nuk e përfshinte këtë aspekt në materialin disavjeçar të paraqitur në proce, do të thotë të marrësh mbi vete barrën e të provuarit të kësaj akuze. Gjykata ka luajtur një lojë të rëndë, atë të hedhjes poshtë të episodit dhe të ngritjes lart të fenomenit. Eshtë një ndryshim cilësor i gjykimit, për të cilin gjyqtarët duhet të kenë prova, madje të hekurta. Ndryshe bëjnë rolin e atij që ndodhet në hall e flet sa për të folur.

Çfarë provash ka trupi gjykues për nxitjen, bashkëpunimin, koordinimin dhe zbatimin e strategjisë së kanabizimit në shkallë kombëtare nga ana e ministrit? A ka objektivisht ai mundësi ta ketë bërë këtë i vetëm këtë gjë, ndërkohë që flitet për një fenomen që shtrihet nga malet e thella të Jugut e deri në pjesët më të harruara të Malësisë së Madhe?

Nëse këto pyetje dhe të tjera si këto nuk do të zbërthehen nga trupi gjykues në vendimin e plotë që do të bëjnë publik, atëhere vendimi për dënimin e Tahirit me akuzën e shpërdorimit të detyrës në lidhje me kanabizimin e Shqipërisë, është një flluskë sapuni që do të bjerë në apel. Dhe të provosh konkretisht dhe me fakte se një ish-ministër paska koordinuar një “plan kombëtar” kanabizimi, nuk është një punë e lehtë. Kur e ngre stekën lart, duhet të kesh provat, ose bën thjesht shou për t’i ikur sikletit të një dosjeje të dobët prokurorie që të kanë vënë përpara.

‘I tronditur nga lumturia’, sjellja e Tahirit, gjatë leximit të vendimit të Gjykatës

Gjatë kohës që gjyqtari Ardit Mustafai, po lexonte vendimin për ish ministrin, Tahiri u shfaq me një miks emocionesh sa edhe vetë nuk dinte si të reagonte. Pavarësisht se ndenji me kokën lartë gjatë leximit të verdiktit, ai fërkonte duart, lëvizte në vend dhe ndonjëherë dhe buzëqeshte duke treguar emocion për rënien e 3 akuzave, vendimi për të cilat do të kishte qenë shumë herë më i rëndë.

‘I tronditur nga lumturia’ e cilësoi sjelljen e tij analisti Alfred Lela gjatë emisionit Real Story të gazetarit Sokol Balla në News 24. Ndërsa pas vendimit për mediat, vetë Tahiri u shfaq i buzëqeshur dhe ironik në lidhje me akuzën e tij të re dhe dënimin e marrë. Duket se ky vendim edhe pse e shpalli fajtor, solli një lehtësim në sjelljen e Tahirit, i cili herët e kaluar, edhe pse mundohej të shfaqej i qetë para mediave, dukej gjithmonë i frikësuar dhe në ankth.

Gjyqtarët e çështjes, pas 6 orësh diskutime për të marrë një verdikt, arritën në përfundimin se mbi Tahirin nuk kishte prova që mund ta fajësonin për 3 akuzat atë të korrupsionit, trafikimit të drogës dhe pjesëmarrjes në grup kriminal të strukturuar. Ajo vendosi ta dënonte për “shpërdorim’ detyre me 5 vite burg, por duke qenë se është pranuar gjykimi i shkurtuar përkthehet në 3.4 vite burg. Por Tahiri nuk do të bëjë asnjë ditë burg, pasi edhe ky dënim do të përkthehet në shërbim prove për 3 vite.

Analiza në Real Story: Prokuroria, pa fakte për Tahirin

Çështja Saimir Tahiri, ishte tema e mbrëmjes e emisionit “Real Story” të gazetarit Sokol Balla në News 24. Pesë të ftuarit në panel, analistët: Skënder Minxhozi, Alfred Lela, Fatos Lubonja, Alfred Peza dhe Robert Rakipllari, kanë dhënë mendime të ndryshme në lidhje me dënimin ose jo të Saimir Tahirit. Megjithatë, mendimi i përbashkët, ka qenë fakti që sipas tyre, “prokuroria nuk ka pasur prova të mjaftueshme për dënimin e Saimir Tahirit”.

“Për mendimin tim, nuk ka prova të mjaftueshme për Saimir Tahirin. Ai duhet të hetohej në lidhje me veprimet dhe mosveprimet e Saimir Tahirit si ministër. Nga të gjitha ato që kam dëgjuar unë, gjëja më skandaloze, për mua ka qenë, trajtimi i Zaganit. Ai ishte njeriu që po hetonte mbi këta njerëz. Unë nuk di që Prokuroria ta ketë marrë në pyetje. Kjo është çështje…”, tha Lubonja.

Ndërkohë, analisti Skënder Minxhozi u shpreh, si para ashtu dhe pas dhënies së vendimit për dënimin e Saimir Tahirit, se për shkak se nuk e kishin kaluar Vettingun, “gjykatësit nuk kanë qenë të lumtur në marrjen e vendimit”. Ndërkohë, pas dhënies së vendimit, analisti Alfred Lela, u shpreh se vendimi i Gjykatës së Krimeve të rënda ishte i ngjashëm me qëndrimin e “OSBE/ODIHR dhe SHBA”. Pra, sipas analistit Lela, SHBA është e qartë dhe e prerë kur jep një vendim, ndërsa OSBE jep një vendim të paqartë. “Shpresoja që të ishte një vendim Amerikan, por në fakt ishte vendim i OSBE/ODIHR, që në fund nuk thotë asgjë”, tha Lela.

Ndërkohë, analisti Robert Rakipllari u shpreh se “vendimi ndaj Tahirit është një kompromis i gjetur nga gjyqtarët për ta dënuar”. Ndërkohë, Alfred Peza u shpreh se ky vendim për Saimir Tahirin, nuk e ngarkon atë me përgjegjësi penale në “dëshminë e penalitetit”, pasi të ketë përfunduar shërbimin e provës. Megjithatë, ai u shpreh se “vendimi Gjykatës së Krimeve të Rënda, është i pabesueshëm”.

“Të gjitha akuzat e rënda në drejtim të Saimir Tahirit ranë. Leximi ësht që të gjitha akuzat kryesore ranë. Pra, akuzat e prokurorisë nuk ekzistojnë. Shpërdorimi i detyrës është për kanabizim. Tani gjykata ku i gjeti këto prova që gjeti këtë akuzë? Kjo nuk ishte fare në dosje. Tahirit i është ngritur një akuzë, që nuk ishte fare në dosje. Për mua, ky vendim nuk është i besueshëm. Dënimi nuk bazohet në prova, por në perceptim. Nuk ka prova. Me këtë vendim Saimir Tahiri merr shërbim prove nuk i shënohet në dëshminë e penalitetit dhe tre vjet kjo e pengon. Gjykata rrëzoi të gjitha akuzat që ishin ngritur dhe gjykata ngriti një akuzë të re mbi asnjë provë. Penalisht Tahiri është i pastër, sepse ky lloj dënimi nuk i quhet se ka bërë ndonjë shkelje penale”, tha Peza. /Realstory.al/

TAHIRI I “LIRË” ME KUSHT

VENDIMI PËR TAHIRIN, BASHA: DREJTËSIA PENG I RAMËS

LUBONJA: PROKURORIA S`KA PROVA PËR TAHIRIN

LALA: NËSE TAHIRI DËNOHET, NUK SHKON NË BURG

LELA PËR REAL STORY: PRISJA VENDIM ‘AMERIKAN’, DOLI I ‘OSBE/ODIHR-IT’

Vendimi për Tahirin, Basha: Drejtësia, peng i Ramës

Vetëm pak minuta pasi ka dalë vendimi për Saimir Tahirin, që u dënua me tre vite shrëbim prove për akuzën e “Shpërdorimit të detyrës”, ka ardhur regimi i Partisë Demokratike. Lulzim Basha, me anë të një statusi në rrjetet sociale, është shprehur se mosdënimi i Tahirit, tregon që drejtësia në Shqipëri është peng i Edi Ramës. “Vendimi i turpshëm për të mos bërë drejtësi për krahun e djathtë të Edi Ramës, që e mbushi Shqipërinë me drogë dhe e shndërroi atë në njollën e zezë të krimit në Europë, provon se drejtësia në Shqipëri është peng i Edi Ramës, dhe Edi Rama është peng i krimit”, thotë Basha.

Ndërkohë, më tej, Basha shkruan se Saimir Tahiri mbane peng Ramën me dosjet e korrupsionit. “Vendimi i sotëm konfirmon se Edi Rama bëri gjithçka për ta mbrojtur Saimir Tahirin, sepse Saimir Tahiri e mban peng Ramën me dosjet e korrupsionit dhe të lidhjeve të tij me krimin, duke nisur me dosjen e kokainës së Xibrakës, ku është i përfshirë vëllai i Edi Ramës. Përsa kohë Edi Rama është në krye të qeverisë, në Shqipëri nuk ka për të patur drejtësi, krimi dhe të pushtetshmit do të jenë të paprekshëm, Shqipëria do të mbetet peng i krimit dhe shqiptarët më të varfër e më të papunë. Vetëm çlirimi i qeverisjes nga krimi do ti hapë rrugë drejtësisë së vërtetë dhe mirëqenies për të gjithë shqiptarët”, shkruan Basha.

Tahiri i “lirë” me kusht

Saimir Tahiri nuk do të bëj asnjë ditë burg. Gjykata e Krimeve të Rënda, pas më shumë se pesë orësh në dhomë këshillimi, ka marrë vendimin për dënimi e Saimir Tahirit me 5 vite burg. Por ky vendim konvertohet në 3.4 vite burg për shkak të gjykimit të shkurtuar. Megjithatë, Saimir Tahiri nuk do të bëj asnjë ditë burg, pasi dënimi i tij do të konvertohet në shërbim prove me tre vite. Në këto kushte, Saimir Tahiri, do të vuajë dënimin me kusht, me qëllim që ai gjatë kësaj periudhe të mos bëj asnjë shkelje tjetër të ligjit. Ndërkohë, Gjykata e Krimeve të Rënda ka rrëzuar tre akuzat e tjera për të cilat po hetohej Saimir Tahiri. Sipas Gjykatës së Krimeve të Rënda, Prokuroria nuk ka prova të mjaftueshme për të akuzuar Saimir Tahirin për “Grup të strukturuar kriminal”, “Trafikim të lëndëve narkotike në bashkëpunim” dhe “Korrupsion i zyrtarit të lartë”.

Pasi dëgjoi vendimin, Saimir Tahiri doli përpara mediave, teksa nuk e kurseu buzëqeshjen dhe ironitë, Tahiri gjatë fjalës së tij tha se nuk qesh dhe as nuk qan dot për vendimin, ndërsa i ftoi mediat të flasin nesër gjatë dhe gjerë së bashku.

“Meqë ca kushërinj të mi kanë përdorur emrin tim, un ë i bie që kam shpërdoruar detyrën. Më lini ta përtyp, nuk qesh dhe nuk qaj dot. Nesër do ju ftoj që të ndajmë ca mendime. Mu duk një gjë që; je i pafajshëm, por skemi këllqe që ta themi. Nuk konsideroj asgjë fitore. Kjo është vetëm maja e ajsbergut të betejës time. Më la pa fjalë Gjykata. Nuk jam kriminel, por paskam shpërdoruar detyrën. Më lini pak kohë ta përtyp këtë. Mu duk një gjë e tipit ‘je i pafajshëm, por nuk kemi kohë ta themi” Për të gjithë kushërinjtë idiot që kemi në farefis, do dënohemi për shpërdorim detyre. Nuk di c’të them.”- u shpreh Tahiri për mediat. Tahiri, edhe pse është munduar të shfaqej i qetë, por në fytyrën e tij shfaqej nervozizmi.

Saimir Tahiri kërkoi gjykim të shkurtuar nga Gjykata e Krimeve të Rënda, e cila në datën 10 shtator zhvilloi seancën e fundit dëgjimore të palëve, Prokurorisë dhe të akuzuarit. Në pretencën e saj, Krimet e Rënda kërkuan 12 vite burgim për Saimir Tahirin, i cili akuzohet për 3 vepra penale: “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të struktura kriminal”, në kuadër të dosjes “Habilaj”. Këto akuza janë hedhur poshtë nga ish-ministri i Brendshëm Saimir Tahiri, i cili ka kërkuar pafajësi.

Në seancën e 10 shtatorit, Saimir Tahiri paraqiti prova të reja përpara trupës gjykuese, ku sipas tij vërtetonin pafajësinë. Ai paraqiti një dokument, ku pretendonte se i kishte kërkuar ish-ministres së Mbrojtjes, Mimi Kodheli, që të shihte problemin e fikjes së radarëve. Ndërkohë, pas përfundimit të seancës maratonë të datës 10 shtator, Saimir Tahiri u shpreh se “nuk e mendonte dënimin”.

Edhe në seancën e të enjtes, Saimir Tahiri ka qenë i shoqëruar nga avokati i tij Maks Haxhia. Gjatë ditës, Haxhia u shpreh se ishte e papranueshme që të “dënohej një ish-ministër dhe deputet”, pa pasur asnjë provë. Ndërkohë, ashtu si në të kaluarën, procesi ndaj Saimir Tahirit edhe në ditën e vendimit, është vëzhguar nga përfaqësues të Ambasadës së Shteteve të Bashkuara në Tiranë.

Megjithatë, kujtojmë se Tahiri nuk është përfshirë në gjykimin e dosjes “Habilaj”, për të cilën drejtësia italiane ka dhënë vendimin me burg për disa të arrestuar, përfshirë Moisi Habilajn, kushuririn e Saimit Tahirit. Drejtësia në vendin fqinj nuk gjeti prova që implikonin Saimir Tahirin në trafikun e drogës të organizuar nga vëllezërit Habilaj në Vlorë, ndaj në Itali u pushuan hetimet për ish-ministrin e brendshëm./Realstory.al/

TAHIRI SULMON XHAFAJN: NUK MBAJTI PËRGJEGJËSI PËR VËLLAIN

SI U MBROJT 7 ORË NË GJYKATË TAHIRI, MBËRTHEU PROKURORËT

SHBA NDJEK “TAHIRIN”. ISH MINISTRI ZBULON SHKRESËN “TOP SECRET”

PROKURORIA KËRKON 12 VITE BURG PËR SAIMIR TAHIRIN, PRITET VENDIMI

Lubonja: Prokuroria s`ka prova për Tahirin

Analisti Fatos Lubonja i ftuar në studion e emisionit “Real Story” të gazetarit Sokol Balla, u shpreh se kishte bindjen se Prokuroria e Krimeve të Rënda nuk ka prova të mjaftueshme për të dënuar Saimir Tahirin. “Për mendimin tim, nuk ka prova të mjaftueshme për Saimir Tahirin. Ai duhet të hetohej në lidhje me veprimet dhe mosveprimet e Saimir Tahirit si ministër. Nga të gjitha ato që kam dëgjuar unë, gjëja më skandaloze, për mua ka qenë, trajtimi i Zaganit. Ai ishte njeriu që po hetonte mbi këta njerëz. Unë nuk di që Prokuroria ta ketë marrë në pyetje. Kjo është çështje… unë mendoj, hall të dënohet apo hall të mos dënohet, është shumë komplekse”, tha Lubonja.

Sipas tij, Saimir Tahiri nuk mund të dënohet pa prova, por, sipas Fatos Lubonjës, më pas duhet t`i kërkohet llogari Prokurorisë për hetimin. Ndërsa shtoi se nuk beson se Saimir Tahiri ishte organizator i kabanizimit. “Nuk mund të dënosh pa prova, ose duhet t`i kërkojmë Prokurorisë pse nuk i ke shkuar deri në fund. Për mua këtu është çështja e madhe te Prokuroria. Gjithë show që bën këta për luftën ndaj kanabizimit, u demaskua, pasi Shqipëria pati një kanabizim për lidhjen me Policinë. Saimir Tahirin këto e vënë në përgjegjësi, për veprime dhe mos veprime. Nuk ma merr mendja se mund të jetë Tahiri organizator i kësaj”, tha Lubonja.

Ndërkohë, gjatë emisionit, avokati mbrojtës i Nazer Seitaj, i njohur ndryshe si “Financieri i Habilajve”, ka dërguar një mesazh ku shprehet se “nëse Tahiri do të dënohet, do të ishte dramë për sistemin e drejtësisë”. “Garantoj me përgjegjësi ligjore që nuk ka asnjë provë që të dënohet Saimir Tahiri. Do të jetë një dramë për sistemin e drejtësisë nëse do të dënohet Saimir Tahiri”, ka thënë avokati i Seitaj./Realstory.al/

Tahiri sulmon Xhafajn: Nuk mbajti përgjegjësi për vëllain

Ka përfunduar seanca e mbrojtjes së ish ministrit Saimir Tahiri, ndërkohë që vendimi do të jepet rreth orës 16.00 të së enjtes. Në seancën gjyqësore ish ministri Tahiri ka sulmuar pasardhësin e tij në Ministrinë e Brendshme, Fatmir Xhafajn, ndërsa ka thënë se “disa ministra nuk kanë mbajtur përgjegjësi për vëllezërit e tyre, dhe unë duhet të mbajë përgjegjësi se ia shita makinën vëllait të Habilajve”.

“Po më dënoni vetëm se i kam shitur makinën njërit prej vëllezërve Habilajt. Këtu ka ministra që nuk mbajnë përgjegjësi për vëllezërit unë të mbaj përgjegjësi për vëllezërit e atij që i shita makinën”, tha Tahiri për rastin që i ka shitur makinën Artan Habilajt, ndërkohë që vëllai i tij Mojsi Habilaj akuzohet dhe gjykohet si kryetar i një bande të trafikut të drogës nga Shqipëria drejt Italisë.

“Dhe sikur të isha Saimir Habilaj s’do më dënonit për vëllezërit”, tha Tahiri.

Gjatë dëshmisë në seancë Tahiri ka përmendur edhe Edi Ramën duke thënë se më 23 prill ka qenë në një drekë me të dhe jo me Habilajt.

“Kam 2 vjet që jam nën hetim, unë ministri i Brendshëm akuzohem se kam trafikuar drogë. S’ka asnjë provë. E vetmja provë është se i kam shitur makinën vëllait të Moisi dhe Florjan Habilaj, që nuk është i përfshirë në asnjë akuze kriminale. Edhe sikur të isha vëllai i Habilajve nuk kisha pse të jem fajtor se vellezerit merren me drogë. Unë kam qenë në drekë në Dajt me Edi Ramën dhe qeverinë në 23 prill dhe jo me Habilajt. Ja ku jane titujt e gazetave që e kanë publikuar dhe në foto unë me Ramën (nxjerr një foto marrë nga shqiptarja). Për mua është jeta ime në këtë proces, për ju është vetëm një proces. Me kanë vënë edhe bomba gjatë punës time. Iki ne burg vetë nëse më vërtetohen akuzat”, tha Tahiri.

Ndërsa avokati i tij Maks Haxhia kërkoi që çështja të pushohet, pasi sipas tij nuk ka vepër penale.

Megjithatë gjykata do ta japë vendimin rreth orës 16:00, ndërkohë që prokuroria ka kërkuar dënimin me 12 vite burg për ish ministrin, por në rast dënimi konvertohen në 8 vjet për shkak të gjykimit të shkurtuar (ulje me 1/3).

Tahiri akuzohet për tre vepra të rënda penale “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”, në kuadër të dosjes ‘Habilaj’.

Në përfundim të seancës së të enjtes Tahiri është pritur para gjykatës nga dhjetëra qytetarë simpatizantë të tij.

Ish ministri nuk ka pranuar të prononcohet për mediat, duke e pritur me heshtje vendimin e gjykatës.

Vëllai i ish ministrit Fatmir Xhafaj, Agron Xhafaj akuzohet nga PD si trafikant droge në Itali, akuza këto që janë hedhur poshtë nga Xhafaj. Por ish ministri Xhafaj nuk dha dorëheqjen nga posti edhe pas akuzave të PD-së. Ndërkohë që kur mbajti postin e ministrit të Brendshëm, fill pas largimit të Tahirit në disa raste deklaroi në media se gjatë kohës së Tahirit segmente të caktuara të policisë u bënë njësh me drogën. Duket se përgjigjen ia ka kthyer sot Tahiri./realstory.al

Si u mbrojt 7 orë në gjykatë Tahiri, mbërtheu prokurorët

Ish-ministri i Brendshëm Saimir Tahiri ka bërë vetë avokatin mbrojtës gjatë seancës gjyqësore të mbajtur ndaj tij më 10 shtator. Seanca, që zgjati rreth 7 orë, u shty për një përgjigje përfundimtare më 19 shtator për ish ministrin, për të cilin prokuroria kërkoi 12 vite burg. Më herët gjykata ka pranuar gjykimin e shkurtuar, që nëse miratohet pretenca e prokurorisë i bie që Tahiri të kryej 8 vite burg. Ish ministri akuzohet për veprën penale “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”, në kuadër të dosjes ‘Habilaj’.

Edhe pse Saimir Tahiri ishte i shoqëruar në seancë nga avokati i tij Maks Haxhia, ai zgjodhi ta mbronte vetë veten duke hedhur poshtë të gjitha akuzat e prokurorisë duke paraqitur fakte të reja. Ish ministri ka “lënë pa fjalë”, prokurorët e çështjes së tij, Vladimir Mara, Dritan Prençi dhe Arens Çela, ndaj të cilëve iu drejtuar se priste fakte konkrete kundër tij dhe jo aludime. “Doja të dëgjoja sot provat konkrete. Ajo çfarë unë duhet të dëgjoja sot janë veprimet dhe provat konkrete kundër meje dhe jo aludime për fakte që nuk i kam kryer. Prokuroria aludon se jam unë personi që kam favorizuar Habilajt. Prokuroria të më thotë se nga njëra anë veproja si pjesë e grupit kriminal dhe nga ana tjetër bashkëpunoja për ta goditur atë”, tha ish ministri.

Gjatë dëshmisë për mbrojtjen e tij, Tahiri ka folur për të gjitha akuzat e ngritura nga çështja e radarëve deri tek shpenzimet e kryera si ministër. Në lidhje me fikjen e radarëve të ushtrisë, ish ministri Tahiri ka publikuar një dosje të cilësuar “Top Secret”, të cilën ia kishte dërguar ish-ministres së Mbrojtjes, Mimi Kodheli, ku e ka informuar se policia ka konstatuar se radarët nuk punojnë.

“Unë në kohën që kam qenë ministër i Brendshëm, në vitin 2016, i kam dërguar një shkresë konfidenciale, “Top Secrete”, koleges sime, ish-ministres Mimi Kodheli. Në këtë shkresë, e kam vënë në dijeni se radarët e ushtrisë nuk punonin, pasi Policia kishte konstatuar mosfunksionimin e tyre, duke hapur një rrugë të re për trafikun e drogës.”-ka thënë Tahiri gjatë mbrojtjes së tij, por nuk ka lënë pa përmendur edhe si absurde akuzat e prokurorisë ku në kohën që luftonte Lazaratin, ai paska bërë trafik droge. “Ata më akuzonin për trafik droge në një kohë që luftonim me Lazaratin. Si mund t’i bëja të dyja. Mos harroni kurrë ministrinë që isha dhe luftën që kam bërë kundër drogës. Ndërkohë që luftoja Lazaratin t’i shkelja syrin disa trafikantëve. Është një gënjeshtër e madhe që mu desh kohë ta çmontoja.” është shprehur Tahiri.

Tahiri ka folur edhe në lidhje me akuzat që e lidhin me ish drejtorin e Policisë së Vlorës, Jaeld Çelën, për të cilin prokuroria ka kërkuar gjithashtu 12 vite burg. Tahiri tha se ka qenë Jaeld Çela ai që ka luftuar rrjetin e trafikut dhe parcelat e drogës së Moisi Habilajt. Sipas Tahirit kjo akuzë është e pabazë dhe jo logjike, pasi i bie që në këtë rast grupi të ketë luftuar njëri-tjetrin.

“Si është e mundur që ja kemi futur njëri-tjetrit? Si është e mundur që një ministër të ketë rolin e ndihmësit? E pse qenkam unë “ministri” dhe jo një ministër nga Vlora? Çfarë kam bërë unë, ngarkim-shkarkim? Apo i kam shpërndarë cigare grupit?” janë disa nga pyetjet që Tahiri iu ka drejtuar prokurorëve, ndërsa ka zbardhur edhe një email konfidencial që Gjergj Kohila, ish-Shefi i Sektorit për Hetimin e Narkotikëve dhe Trafiqeve në Vlorë, i cilësuar si i pandehur në këtë çështje, i ka dërguar prokurorit, Dritan Prençi. Kohila i ka dërguar këtij të fundit një e-mail konfidencial ku kallëzon vëllezërit Habilaj dhe kërkon nga prokurori që të nis një çështje penale ndaj tyre. Mirëpo, si për ironi, ky prokuror kërkoi përgjegjësi penale për Kohilën duke e akuzuar për trafik droge në bashkëpunim me Habiljat. Ky e-mail i nxjerrë nga Tahiri, ka gjetur të papërgatitur organin e akuzës e veçanërisht prokurorin Dritan Prençi i cili nuk ka thënë asnjë fjalë.

Në seancën e gjatë gjyqësore, Tahiri nuk la pa përmendur edhe akuzat për shpenzime apo për përfitimin e 30 mijë euro nga grupi Habilaj. Tahiri tha se prokuroria ka bërë hetime të plotë të pasurisë së tij dhe shpenzimeve të bëra si ministër, dhe u rezulton se çmimi më i shtrenjtë i paguar është vetëm 140 euro nata. “Prokuroria ka hetuar të gjithë lidhjet e mia shoqërore dhe ka pyetur me letër porosi, se c’ punë kishte këtë nuk e di. Ka çuar letër porosi dhe ka pyetur edhe për çmimet e hoteleve ku kam fjetur, në media u tha se unë flija në hotele me 1 mijë euro nata. Por ju garantoj se me letër porosi është garantuar se çmimi më i shtrenjtë i paguar si ministër, është vetëm 140 euro, jo si ajo tjetra që paguante 900 euro nata.” ka thënë Tahiri.

Ndërsa në lidhje me përfitimin e 30 mijë eurove nga anëtaret e bandës Habilaj, Tahiri tha se këtë gjë prokuroria e ka vërtetuar se Saimiri i 30 mije eurove ishte një shofer kamioni dhe jo unë, e megjithatë e la gjithë zallamahinë te vazhdonte pasi kështu i interesonte për të mbajtur gjallë çështjen.

Akuzat se Saimir Tahiri ishte ‘Shefin i madh” në përgjimet e Habiljat me të cilin, anëtarët e bandës do të drekoni, ish ministri iu përgjigj se atë ditë që bëhet biseda, ndodhej në Bruksel me Klajda Gjoshën, Nasip Naçon, dhe ka dalë në konferencë me komisionerin për Zgjerim. “Nuk ka si të isha edhe në konferencë, edhe në drekë. Prokuroria më akuzon se kam pritur në zyrë njërin nga vëllezërit Habilaj, por në atë ditë unë kam qenë në zyrë me Adriatik Llallën, Visho Ajazin dhe ministrin e Drejtësisë, Nasip Naço, pasi atë ditë ishin arratisur 7 persona nga Burgu i Drenovës” ka thënë Tahiri.

Vetë avokati i tij personal e cilësoi një mbrojtje brilante gjatë një deklarate për mediat, ndërsa Tahiri tha për gazetarët se provat e pafajësisë i ka vetë prokuroria, por ato nuk duan t’i lexojnë siç duhet dhe bëjnë aludime të kota. / RealStory