Ikja e Memës, Tirana me trajner të ri

Julian Ahmataj do të jetë pasuesi i Ardi Memës në stolin e Tiranës. Ndonëse klubi ende nuk e ka zyrtarizuar, trajneri elbasanas pritet të prezantohet të premten pasdite me skuadrën. Ahmataj në fakt nuk është i panjohur në klubin e Tiranës, pasi ai në fillim të sezonit u emërua trajner i ekipeve të moshave, por u largua më vonë.

Ndërkohë, Ahmataj ka qenë dhe futbollist i ekipit bardheblu. Gjatë paradites të së premtes, Tirana zyrtarizoi shkarkimin e trajnerit Ardi Mema pas një viti bashkëpunim.

Largimi i trajnerit, që vinte nga familja Mema, dikur ish lojtar i skuadrës, erdhi për shkak të rezultateve jo të mira në ndeshjet e fundit. Tirana u mund në takimin e mesit të javës nga Bylis, disfatë që vulosi dhe fatin e trajnerit Mema.

Julian Ahmtaj është trajner me kepseriencë në kampionatin shqiptar, pasi në vitet e fundit ai ka drejtuar klube të ndryshme. Objektivi i Tiranës për këtë sezon është titulli kampion, që do të ishte qershia mbi tortë për festën e 100 vjetorit të themelimit të klubit, duke festuar njëkohësisht dhe titullin e 25-të kampion.

Humbja me Bylis, Tirana largon Ardi Memën

Ndeshja me Bylis ishte e fundit për trajnerin e Tiranës Ardian Mema. Sipas Panorama Sport, trajneri Mema dhe presidenti i klubit Refik Halili zhvilluan një takim të enjten. Palët kanë rënë dakord të ndërpresin bashkëpunimin me mirëkuptim.

Gjithashtu, trajneri nuk ishte i pranishëm të enjten në seancë stërvitore, çka konfirmoi edhe largimin e tij. Dy javë më parë, Tirana ishte gati të largonte trajnerin, por Halili riemëroi Ardi Memën në krye të bankinës duke i lënë kohë.

Megjithatë, duket se humbja me Bylis vulosi fatin e trajnerit. Mema e mori drejtimin e Tiranës një vit më parë, kur nga klubi u largua braziliani Zemaria. Në fakt, skenari i largimit të Ardi Memës duket i ngjashëm me atë të teknikut brazilian. Edhe një vit më parë, për shkak të rezultateve të dobëta, Zemaria u përfol për shkarkim.

Por ai u ribesua si trajner nga presidenti Halili. Por aventura e tij zgjati vetëm dy ndeshje, dhe palët ndërprenë bashkëpunimin mes tyre. Ndërkohë, ndarja mes palëve është bërë me konsensus dhe klubi nuk do t`i paguajë dëmshpërblim trajnerit Mema për pjesën e mbetur të kontratës.

Ndërkohë për zëvendësimin e trajnerit Mema, janë përfolur dy emra. Julian Ahmataj është kandidatura më e favorizuar, por nuk mbetet pas as trajneri i akademisë bardheblu, Bledar Devolli. Gjithësesi, në vijim pritet të ketë një njoftim zyrtar nga klubi për zhvillimet e fundit.

Tirana në “tapet”, Bylis merr kreun

Fitorja e pak ditëve më parë ndaj Laçit krijoi përshtypjen se Tirana la pas humbjet. Në fakt, nuk zgjati më shumë se tre ditë festa bardheblu, pasi Bylis e prishi atë. Të mërkurën në mesditë u luajtën ndeshjet e javës së nëntë të Superligës, të fundit e fazës së parë. Bylis priti në Shtëpi Tiranën duke fituar me rezultatin 3-1.

Gjithçka nisi mirë për mallakastriotët që shënuan gol që në minuan e pestë të takimit me Jurgen Goxhaj. Ish-mbrojtësi i Tiranës realizoi në të 5` me kokë, pas një goditje këndi. Goli i dytë për Bylis u realizua nga Guindo, i cili përfitoi nga një gabim i Idi Bathës duke gjetur rrjetën në të 25`. Me nisjen e të dytës Tirana është më kërkuese në fushën e lojës. Dyshja Ngoo-Dunga jep rezultat, kur në të 65` vjen dhe goli.

Një asist i bukur nga e djathta e Ngoo gjen Dungën, që pranë kuadratit dërgon topin në rrjetë duke mposhtur Isli Hidin. Por, Bylis nuk u ndal me kaq. Qershia mbi torë ishte supergoli i Celis. Në të 70`, sulmuesi mori arriti të kontrollojë një top jashtë zone, dhe me të djathtë shënon një eurogol në portën e Tiranës. Ky gol vulosi fitoren e Bylis, që me tre pikët ngjitet përsëri në vendin e parë të renditjes me 16 pikë, ndërsa Tirana zbret në vendin e katërt me 14 pikë.

Pjesa e parë/ Bylis befason Tiranën. Kukësi e Laçi e mbyllin në avantazh

Janë duke u luajtur ndeshjet e javës së fundit të fazës së Parë të Superligës. Katër nga pesë takimet e javës së nëntë, luhen të mërkurën, ndërsa të enjten luhet kryesfida e kësaj ajve ajo mes Partizanit dhe Skënderbeut. Tre takimet e mesditës, po dhurojnë spektakël, pasi pjesët e para janë mbyllur me fitoren e ekipeve vendase.

Konkretisht, Bylis është duke fituar ndaj Tiranës me rezultatin 2-0. Golin e parë për mallakastriotët e realizoi ish-mbrojtësi i Tiranës sezonin e kaluar, Jurgen Goxha. Mbrojtësi i Bylis gjeti rrjetën në minutën e pestë, ndërsa në të 25` Guido dyfishoi rezultatin. Nëse takimi mbyllet me fitoren e Bylis, skuadra mallakastriote do të jetë në krye të renditjes me 16 pikë, të paktën deri të enjten.

Kukësi është duke mundur Luftëtarin gjithashtu me rezultatin 2-0. Skuadra e trajnerit Duro shënoi që në fillim të ndeshjes me Valon Ethemin, i cili gjeti rrjetën në minutën e dytë. Ndërkohë, Vasil Shkurtaj dyfishoi për verilindorët në të 26`, duke i dhënë avantazhin e dy golave në pjesën e parë skuadrës së tij.

Laçi gjithashtu shënoi dy gola ndaj Teutës në pjesën e parë në takimin e javës së nëntë. Skuadra kurbinase gjeti rrjetën në të 18` me Teco dhe më pas sulmuesi dyfishoi në të 28`, duke i dhënë avantazhin në pjesën e parë Laçit. Takimi tjetër i ditës së mërkurë është ai mes Flamurtarit dhe Vllaznisë që luhet pasdite në orën 16:00.

Shkarkimi, Mema mesazh Halilit: Më duhet qetësi

Ardian Mema foli në konferencë për shtyp të premten në prag të ndeshjes me Laçin. Ai foli fillimisht për veten, duke u shprehur se ndeshjet e fundit është vënë nën presion. “Ndeshjet e fundit kanë sjellë disi presione në skuadër aq më tepër te unë, nuk flas në emër të skuadrës por në emrin tim. Kjo më vë mua disi në presion sepse pretendohet që ndeshjet e Tiranës të fitohen, duke qenë se këtë vit është ekip elitar. E rëndësishme është që të fitohen ndeshjet. Ekipi ka luajtur shumë mirë, nuk ka pasur probleme tekniko fizike dhe tekniko taktike”, tha Mema.

Sipas tij, në ndeshjet e fundit skuadra nuk është ndihmuar nga fati. Për këtë arsye, trajneri Mema i shkoi shumë pranë shkarkimit nga detyra, por u ribesua nga presidenti Refik Halili. Në konferencën për shtyp, Ardi Mema i dërgoi një mesazh presidentit, duke i kërkuar qetësi. “Fakti që është edhe 100-vjetori i klubit, na vë pak në presion. Unë nuk jam magjistari apo profeti i futbollit, që të them se nesër do fitojmë, dhe do largohem kur të dua unë. Drejtuesit duhet të kuptojnë, se klubit i duhet qetësia. Duhet të shikojmë nga e ardhmja. Nëse gjërat na dalin nga kontrolli, do kemi edhe probleme. Kemi qenë pushim këto kohë, tani do e shohim nesër në fushë”, tha Mema.

Ndonëse luan mirë, rezultatet e tre ndeshjeve të fundit nuk ishin në të njëjtin raport me lojën. Po çfarë nuk shkon te Tirana, që lojën e bën të mirë, por rezultatet mungojnë? Ardian Mema shprehet se shkaku janë gabimet. “Për këtë flas më shumë me lojtarët. Duke qenë se kemi pasur fatin e keq, duhet të kemi akoma më shumë përqendrim. Nuk kemi një kundërshtar që na ka mbajtur në fushën tonë. Fati është pjesë e lojës. Nuk duhet t’ia lëmë gjërat në dorë të fatit. Ca punë duhet t’i bëjmë akoma më mirë. Kjo nuk është për të justifikuar lojtarët, por për t’i vënë me këmbë në tokë që të jemi më të përqendruar”, tha Mema.

Në fund ai foli dhe për përballjen me Laçin. Objektivi janë tre pikët, por së pari kërkon që skuadra të jetë e përqëndruar dhe të mos pësojë gola. “Mendoj se ndeshjet me Laçin kanë qenë të forta. Është ekip me ekuilibër. Të godet në momente të caktuara, me lojtarë të mirë. Ky ekip, vjet e kemi pasur problem. Nuk është se na pritën miqësisht. U treguan të egër me ne. Ne nuk kemi armiq, por kemi kundërshtar. Çdo ndeshje e konsiderojmë kundërshtarin sipas radhës, por nuk i ndajmë, i mirë apo i fortë, në kuptimin e egërsisë. Laçi ka ekip të mirë dhe nuk duhet të kishte aq pikë sa ka. Nesër në ndeshje, do jetë e luajtur fort, shpresoj të kemi fat, e të mos pësojmë gola që nuk duhej t’i pësonim”, tha ndër të tjera Mema.

Hotel Plaza Tirana “ikën”, vijnë gjermanët

Hoteli me 5 Yje, “Plaza Tirana”, do të ndryshojë emrin. Hoteli i njohur në qendër të Tiranës, do të bashkohet me rrjetin e hoteleve gjermane “Maritim Hotels”. Ceremonia e përurimit të këtij bashkëpunimi do të bëhet në datën 17 tetor. Prej asaj dite, “Plaza Tirana”, do të quhet “Maritim Hotel Plaza Tirana”. Hoteli i njohur në kryeqytet, ushtron aktivitetin e tij në fushën e hotelerisë prej vitit 2016.

Hoteli është konceptuar për të ofruar shërbim cilësor, me dizajn modern dhe eksperiencën unike që u ofron klientëve. Megjithatë, sipas investitorëve të këtij hoteli, qëllimi kryesor është përmirësimi i vazhdueshëm i cilësisë. Për këtë arsye, është vendosur të bashkëpunohet me liderin gjerman në industrinë e hotelerisë, “Maritim Hotels”, themeluar në vitin 1969.

Ky grup hotelerie përmban portofolin e tij në më shumë se 40 hotele në shtete si Gjermani, Spanjë, Hollandë, Turqi, Kinë, Bullgari, Maltë, Mauritani, etj. Prej datës 17 tetor, ky grup hotelerie do të jetë edhe në tregun shqiptar, duke nisur bashkëpunimin me “Plaza Tirana”, që do të ketë emrin e përbashkët “Maritim Hotel Plaza Tirana”.

Disiplina rrëzon Tiranën. Gjobitet Flamurtari

Komisioni i Disiplinës Sportive në Federatën Shqiptare të Futbollit rrëzoi kërkesën e Tiranës për të fituar tre pikë në tavolinë të ndeshjes kundër Flamurtarit, luajtur në fundjavë.

Klubi bardheblu, kërkoi nga Disiplina dënimin e Flamurtarit, pasi në ndeshjen e javës së shtatë të kampionatit, skuadra vlonjate bëri një gabim në protokollin e ndeshjes, pasi u aktivizua një futbollist që nuk ishte shënuar në protokoll. Për këtë arsye, Tirana kërkoi tre pikë në tavolinë, për ndeshjen që përfundoi në barazim 2-2.

“Rrëzimi i kërkesës së KF “Tirana” si të pa bazuar në Rregulloren e Veprimtarisë Futbollistike, për sezonin 2019/2020”, shkruan disiplina në vendimin e publikuar të enjten. Ndërkohë, klubi i Flamurtarit për këtë gabim, duke shënuar me vonesë emrin e Muçollarit, është dënuar me 30.000 mijë lekë gjobë.

“Flamurtari FC, për mos riprodhim të formularit të ekipit sipas Nenit 114/2 të Rregullores se Veprimtarise futbollistike të Kategorisë Superiore, dënohet me gjobë në masën 30.000 (tridhjetëmijë) lek”, thotë Komisioni i Disiplinës në FSHF.

Këto janë dy vendimet e vetme për ekipet e Superligës nga Komisioni i Disiplinës për javën e 7-të të kampionatit. Për Kategorinë e Parë, klubi i Devollit është dënuar me gjobë prej 50.000 lekësh për shkak ë sjelljes së gabuar të tifozëve, ndërsa klubi do të paguajë vetëm gjysmën e vlerës së gjobës. Gjithashtu, Disiplina dënoi me 8 ndeshje pezullim zëvendës trajnerin e klubit të Kastriotit, Gëzim Rama, për sjellje jo sportive ndaj arbitrit.

Tirana shkarkon trajnerin Ardian Mema?

Një lajm i shpërndarë në rrjetet sociale nga faqja Superliga Shqiptare 81, tregon se Ardian Mema nuk është më trajner i Tiranës. “Ardian Mema nuk është më trajneri i Tiranës. Presidenti Refik Halili ka marr vendimin përfundimtarë për trajnerin Ardian Mema, 1 pikë në 3 ndeshje nuk i kanë pëlqyer numrit 1 të bardhebluve. Superliga Shqiptare 81 ka mësuar ekskluzivisht se Ardian Mema nuk do të jetë më teknikun i bardhebluve. Zyrtarizimi ka munguar deri ns këto momente për arsyjen e mbylljes me konsensus të kontratës që Mema ka me bardheblutë. Në listë për të zëvëndësuar teknikun Mema janë Bledar Devolli Julian Ahmataj por ende nuk ka asnje marrveshje për pasuesin e Memës”, shkruan faqja në rrjetet sociale.

Megjithatë, ndonëse ditët e fundit është folur shumë për një divorc të trajnerit Mema me klubin e tij të “zemrës”, nga klubi i Tiranës nuk është konfirmuar asgjë zyrtare. Një burim i rëndësishëm i tha Realstory.al, se “nuk ka asgjë zyrtare për shkarkimin e trajnerit. Ekipi ishte dy ditë pushim, ndoshta të nesër del në stërvitje”. Tirana pati një nisje të mirë të sezonit, por në tre ndeshjet e fundit të kampionatit, skuadra bardheblu pati një ndalim të rezultateve pozitive, që nisën me humbjen në ndeshjen ndaj Kukësit dhe në derbi ndaj Partizanit.

Skënderbeu merr kreun. Ndalet Tirana e Partizani

Tirana nuk shkoi më shumë se barazimi 2-2 ndaj Flamurtarit, në takimin e javës së 7-të të kampionatit, që vinte fill pas derbit. Bardheblutë e nisën mirë takimin, me Hasanin që gjeti rrjetën vetëm pas katër minutash lojë. por, goli i sulmuesit bardheblu, u pasua nga një autogol i Ngoo. Sulmuesi anglez realizoi në portën e Ilion Likës në të 13` duke vendosur barazpeshën në fushën e lojës. Megjithatë, Hasasni mendoi për rikthimin e avantazhit në të 38`.

Me avantazhin 1-2, Tirana mendoi se e fioi ndeshjen, por vlonjatët surprizuan në të 90+2`, kur Ardit Hoxhaj realizoi golin e barazimit për Flamurtarit. Kjo ishte pika e dytë për këtë sezon për skuadrën vlonjate, ndërsa Tirana shkon në kuotën e 11 pikëve. Në takimin tjetër të së shtunës, Partizani dhe Teuta ndanë gjithashtu ndanë nga një pikë mes tyre. Avdyli kaloi Teutën në avantazh në të 37`, ndërsa Trashi shënoi në minutën e tretë shtesë të pjesës së parë për Partizanin.

Skënderbeu është rikthyer te fitorja në kampionat, pasi mundi Luftëtarin 2-0. Të dy golat e fitores së korçarëve u shënuan në kohën shtesë, nga Dita dhe Muja në të (90+3` dhe 90+3`). Tre pikët e të shtunës, e ngjisin Skënderbeun në vendin e parë në renditje me 12 pikë, po aq sa Teuta që mban vendin e dytë. Ndërkohë, Partizani ndodhet në vendin e tretë me 11 pikë, po aq sa Tirana dhe Bylis, që ndajnë vendin e katërt dhe të pestë.

Superliga, Tirana dhe Teuta e mbyllin në avantazh pjesën e parë

Tirana e mbylli në avantazh pjesën e parë ndaj Flamurtarit në Vlorë, në takimin e javës së 7-të të Superligës. Ekipi bardheblu kaloi në avantazh në të 4` me Edon Hasanin, por në të 13` sulmuesi tjetrë i bardhebluve, Michael Ngoo bëri autogol, duke vendosur barazimin në fushë.

Megjithatë, Tirana gjeti rrjetën në të 38` përsëri me Edon Hasanin, duke i mbyllur 45` e para në avantazh. Skuadra bardheblu synon tre pikët në Vlorë për të lënë pas humbjen në derbi ndaj Partizanit një javë më parë.

Ndërkohë, të kuqtë janë duke u mundur në “Selman Stërmasi” nga Teuta, e cila shënoi në të 37` me Avdylin.

Skuadra durrsake vjen me ambicie të shtuara këtë sezon, duke synuar edhe fitoren e kampionatit. Në takimin tjetër, atë mes Skënderbeut dhe Luftëtarit, pjesa e parë është mbyllur në barazim 0-0.